"الداخلية" تهدي قصيدتين شعريتين لوالدة الشهيد بمناسبة "عيد الأم"

قام قطاع الإعلام والعلاقات بوزارة الداخلية، بإهداء قصيدتين شعريتين إلى أمهات الشهداء بمناسبة الاحتفال اليوم الثلاثاء 21 مارس بعيد الأم.
وقالت القصيدة الأولى:
جانى تانى وجابلى وردة
كان فاكرنى هاخدها وأرضى
قاللى جايلك من هناك
أحكى عن كل اللى فات
قال يا أمي
أوعي يوم تفتكري إني
راح أسيبك
مين حبيبك
لو ماضحى عشان عيونك
لو ما كان بالروح يصونك
لجل ترضي يكون حبيبك
الحكاية ...
الوطن نادى يا أمي
كنت أسيبه ؟ ..
لو يضيع الحق منُّه ... مين يجيبه
غير ولاده ....
صدقيني ...
إن حضن الأرض لما
بين إيديه ياخد شهيد
راح يلاقي نفس حضنك
انتي أمي
والبلاد الغالية أمي
أوعي مرّة ف يوم تخافي
حضن أرض بلادي برضه
حضن دافي
حضن دافي
والقصيدة الثانية:
يا أمّى ليه يوم تحزنى
والجنة لسه ف إنتظار متزينة
إللى على إيديه النهار جه أرضنا
يا أم الشهيد
إبنك بطل .. بالتضحية
ولولاه ما كانت أغنية
للانتصار
الجنة لسة ف إنتظار
طلع النهار
كان البطل إبنك هناك
سابق بروحه خطوته
أفديك بروحى يا وطن
أفديك ومن دمّى التمن
الجنة لسة ف إنتظار متزينة
ي أمى
قولى للى جايلك من صحابى
واللى جايلك من زمايلى
إنى أجمل حاجه أنتى
يامصر
روحى فيكى فين ماكنتى
إنتى جنة أرض ربى
يا أمى أوعى تحزنى
الشهادة هى جنة للشهيد
يوم شهادتى يبقى عيد
اسأليني راح تلاقى قلبى من جوه سعيد
يبقى ليه ي أمى حزنك
جنة فاتحة حضنها من بعد حضنك
يا أمى أوعى تحزنى
يا أمى أوعى تحزنى