«الداخلية» تهدي الأم قصيدتين شعريتين

أهدى قطاع الإعلام والعلاقات بوزارة الداخلية، الأم قصيدتين شعريتين بمناسبة الاحتفال بعيد الأم الموافق 21 مارس من كل عام.
وفيما يلى نص القصيدة:-
«جاني تاني وجابلي وردة
كان فاكرنى هاخدها وأرضى
قاللى جايلك من هناك
أحكى عن كل اللى فات
قال يا أمي
اوعي يوم تفتكري إني
راح أسيبك
مين حبيبك
لو ما ضحى عشان عيونك
لو ما كان بالروح يصونك
لجل ترضي يكون حبيبك
الحكاية...
الوطن نادى يا أمي
كنت أسيبه؟..
لو يضيع الحق منُّه... مين يجيبه
غير ولاده....
صدقيني...
إن حضن الأرض لما
بين إيديه ياخد شهيد
راح يلاقي نفس حضنك
إنتي أمي
والبلاد الغالية أمي
اوعي مرّة ف يوم تخافي
حضن أرض بلادي برضه
حضن دافي
حضن دافي».
كما أهدى قطاع الإعلام والعلاقات بوزارة الداخلية أمهات الشهداء الأبرار قصيدة شعرية، بمناسبة الاحتفال بعيد الأم أيضاً وفيما يلى نصها:-
«يا أمّى ليه يوم تحزنى
والجنة لسه ف انتظار متزينة
إللى على إيديه النهار جه أرضنا
يا أم الشهيد
ابنك بطل.. بالتضحية
ولولاه ما كانت أغنية
للانتصار
الجنة لسة ف انتظار
طلع النهار
كان البطل ابنك هناك
سابق بروحه خطوته
أفديك بروحى يا وطن
أفديك ومن دمّى التمن
الجنة لسة ف انتظار متزينة
يا أمى
قولى للى جايلك من صحابى
واللى جايلك من زمايلى
إنى أجمل حاجه إنتى
يا مصر
روحى فيكى فين ما كنتى
إنتى جنة أرض ربى
يا أمى أوعى تحزنى
الشهادة هي جنة للشهيد
يوم شهادتى يبقى عيد
إسألينى راح تلاقى قلبى من جوه سعيد
يبقى ليه ي أمى حزنك
جنة فاتحة حضنها من بعد حضنك
يا أمى اوعى تحزنى
يا أمى اوعى تحزنى».