الأم

قالوا يا شاعر قصدينك فى احتفالية.. تكريم الأمهات وتتويج المثالية
اكتب لنا قصيدة بأبيات شعرية..وزن ولحن.. وكلمات شجية
خدتنى الشجاعة..وافقت.. قصيدة شعر عادية..كاتب قبلها مية
****
أخذت ركن بعيد وأوراق ومقلمية.. وفنجان قهوة ساعة مغربية
بعترت الحروف الأبجدية..وجَمعت معاجم لغتنا العربية
استعنت بشيطان الشعر... يلهمنى البداية والافتتاحية
ضحك بخبث..وقال... إيه حكايتك معايا..نسيت..أنا للغواية
فاكرنى ملاك من الجنة... دا أنا حتى عفريت ابن جنية
الأم مش سكتي.. معاك فى كل أشعارك.. إلا القصيدة دية
*****
بديت أفكر فى الكلمات المعنية..عاطفية غزلية ثورية وطنية
احترت وتعجبت ولقيت فى الأم المصرية.. كل المعانى اللغوية
****
قلت أبتدى أرص الحروف.. واغزل قصيدة بحرفية
ومن أول كلمة صرخ القلم.. وقال دى قصيدة استثنائية
الأم مش كلمة وحروف..دى مشاعر وحالة وجدانية
ولو هاتكتب عن التضحية والحنية..كل أمهاتنا فى قلوبنا مثالية
أنسى شعرك كله اللى فات..وقصايدك العمودية والعامية
لملم أوراقك وأدواتك.. وادخل محراب العبودية
ألام واحدة..الأم واحدة..وتعددت الشموس والمجرات السماوية
ودى مش مصادفة كونية أو فكرة.. أوتجربة عبثية
دى حكمة رب الكون.. خلق الأم بقلب يسع البرية
*****
زحت القلم..وطافت بيه الذكريات..زمن طويل عدى وفات
لما كنت لسه طفل .. أغمض افتح..اضحك واصقف
وكان الكون دا كله.. الكون دا كله..هو أمي
حتى بعد لما شبت.. ومن السنين خمسين وستين.. عشت
وكبرت وخلفت.. وكل الناس تقولي..عَجزت..شخت
إلا أنتي.. أنتى يا أمى لساكى شايفانى فى عنيكي..طفل
*****
تعنفينى وتنصحيني.. أعمل كبير.. وتاخدنى عزة الأيام والسنين..
أتضايق..أكشر.. لكن صدقينى مش من جوا دا بس وش
أنا مهما كبرت.. دايما بحس انى معاكي.. لسة طفل
ارمى همومى فى حجرك.. وانزل حمل كتافي..
ومافى غيرك يطبطب.. حتى لوكنت جافي
أنا السفينة فى بحرك..شراعى ياما ومجدافي
وإن يوم الموج حدفني.. وغطت الميه كتافي
مالاقى غيرك منارة..وحضنك المينا.. وقلب دافى
*****
ما حسيتش إنى فعلا بقيت كبير.. لاء.. كهل والشعر شاب
.. وولى الشباب. واد إيه العمر فات.. إلا بعد ما يوم دقيت عليكى باب
مالقيتش أمى فى انتظارى.. تضحك تقولى جيت ياغالي
ولقيتها دار خراب.. الدفء فيها سراب.. والبرد زاد
وكسى السما السحاب.. والريح بقا لها صوت دياب
سال الدمع من العين.. حمم بركان..دا ذهاب مالوش إياب
انكمشت.. اتكورت فى ركن الدار.. والعقل غاب
وافتكرت أيام زمان.. وتمنيت ارجع لحضنك..
.. افتح.. اغمض.. اضحك واصقف.. من تاني..طفل
انتى كل الكون..انتى كل الكون.. وكل الكون انتى يا أمي
****
وعرفت ليه صرخ القلم.. الأم مش كلمة فى قصيدة عدم
هى الديوان هى الحياة والأمل.. الأم فيها كل الصفات تكتمل
الأم أمن ودفا.. شمس وقمر..الأم هى..هى الوطن