مواطنون بدمنهور: "السائقون بيدبحونا ومفيش عدادات شغالة للتاكسي" (فيديو)

- السواقين بيدبحونا ومفيش عدادات شغالة للتاكسي
- مستعدون ندفع مبلغ شهري للعمل بسيارات ملاكي كأجرة
بالتزامن مع أزمة ارتفاع أسعار الوقود والمواصلات بمحافظة البحيرة، التقت عدسة بوابة "الفجر" بعدد من المواطنين أصحاب السيارات الملاكي بمدينة دمنهور لرصد مطالبهم عن قرب
فالبداية يقول عطية رجب، سائق سيارة ملاكي بدمنهور "كان معايا تاكسي بعته عشان أجوز أبني، واشتريت عربية ملاكي اشتغل بيها وأجيب مصروف البيت، مشكلتنا أن المرور بيحاربنا وبياخد رخصنا ويدفعنا غرامة، أتمني وضع حل لعمل السيارات الملاكي كأجرة، حتى لو هندفع مبلغ شهري أو سنوي للمحافظة".
ويقول عادل عرابي، "كنت بشتغل نجار عربيات وأصيبت بالغضروف، بعت عفش بيتي واستلفت 3 آلاف جنية من رجال الأعمال، واشتريت عربية ملاكي عشان اشتغل عليها وأصرف علي بيتي، وكل شوية أدفع مخالفات بالآلاف، نفسنا يقننوا أوضاعنا حتى لو يخصصوا لنا أماكن محددة نشتغل فيها، التاكسي دلوأت تديله الخمسة جنية ما يرضاش يديلك الباقي والسواقين بيدبحوا ومفيش عدادات شغالة للتاكسي".
وأضافت سيدة بدمنهور قائلة "ابني عنده عربية ملاكي وهوا اللي بيصرف عليا، والمرور بيحاربه وبياخد رخصته، وأطالب بترخيصها أو يعملولها "بادج" يوضع علي زجاج السيارة بعملها كأجرة، مقابل مبلغ مالي يتم الاتفاق عليه مع المحافظة، المهم يبقي ماشي في أمان، أنا تعبت من الشغل في البيوت وهوا اللي بيصرف عليا".
كما يطالب أحد السائقين بدمنهور بترخصي السيارات الملاكي قائلا "إحنا مش لاقين شغل ولا وظيفة، مش معايا غير عربية ملاكي بسترزق منها وعايز أكل عيش، المرور بيوقفني كل شوية ويعملي مخالفة تحميل ركاب، لازم يوضع حل ويُقنن أوضاعنا خصوصا بعد جشع سائقي الأجرة والسيرفيس".
لمشاهدة الفيديو اضغط هنا