-لاء حضرتك أنا مش لابساه ليك أنت يعني. أنت فاهم غلط -أنا برده اللي فاهم غلط يا شمال -شمال!! لاء. أنا مسمحلكش تقول عليا كلمة زي دي -امال ايه يا حلوه؟ يمين؟ مبينالي السمانة وعايزاني أقول عليكي ايه! - حضرتك برده مُصر إني مبينهالك أنت، قصدي لابسالك أنت مخصوص الفستان، وكمان أنا مش عايزاك تقول لا يمين ولا شمال، صدقني أنا مش عايشه عشان استني رد فعلك أساسا، ثم ايه مشكلتك مع السمانة تحديدا! تكلفة الفستان في مصر تتراوح بين 1000 جنيه ل 3 مليون جنيه وأنت طالع حتى لو كان تمنه الفعلي 50 جنيه! آه والله زي ما بقولك كده، " مغامرة لبس فستان في مصر" مكلفة أكتر مما تتخيل، الموضوع مش موضوع أخلاق وقرار شخصي من البنت بس ولا حتى من أهلها، الموضوع أكبر من كده بسنين ضوئية. سامعاك ياللي بتقول: الموضوع تافه يعني ومش كل شوية تتكلموا عن اللبس، ما تلبسوا اللي أنتوا عايزينه وخلاص، حد حايشكوا، وبعدين في موضوعات كتير أهم من اللبس. بص أنا مش هرد عليك، أنا هعرفك وهجيبك والبسك طول الوقت لبس بتكره شكله وألوانه وجزمه ضيقه على مقاسك واطلب منك تتحرك وتخرج وتنتج وتبص للحياة بنظرة إيجابية وتاخد قرارات! تاخد قرارات في شغلك ودراستك وحياتك وأنت أساسا مش قادر تقرر تلبس ايه وأنت نازل. جربتها دي؟ ومن ناحية "هو حد حايشكوا؟" فتعالي نسيبنا من المقال ونفكر في التجربة على أرض "لا مؤاخذة" الواقع! معانا الآنسة "خ" عندها 20 سنة ونفسها هفتها تلبس فستان تروح بيه مناسبه، تعالوا نشوف معاها واحدة واحدة كده، ايه هي خطوات لبس الفستان. تشتري الفستان (بسيطة دي) تشتري جزمة للفستان كعب عالي لزوم الشياكة (بسيطة برده) تعمل دايت وتخس من 15 ل 20 كيلو عشان ميبقاش في حاجة في الفستان، ومفيش منحنيات تثير حماس الشباب وتفكرهم بالغالية والزلزال، وتكتفي بإن الفستان يبقي مبهوأ عليها وأهو أحسن من مفيش! تقنع أهلها إنها تلبس الفستان (تستغرق هذه المرحلة من سنة لخمس سنوات شاملة مواجهة الأم والجدة والخالات والعمات بصورهم الأرشيفية في السبعينيات وإجراء حوار حضاري عظيم عن "زماننا مش زي زمانكوا" ثم مواجهة سبع البرومبه الحمش داخل كل ذكر في العيلة، ثم نقاشات ونقاشات ونقاشات...لغاية ما ربنا يكرم بقي) تلبس الفستان (بسيطة دي) ت..ت ..ت ..تن..تنزل بالفستان ازااااي؟ آه ..ازاي دي بقي متوقفة على " الفلوس" مش على الأخلاق بقي ولا علي العادات والتقاليد والذي منه. الموال ده خلص في رقم 4. يعني تخيل معايا لو "خ" نزلت من باب بيتها أو فيلتها في التجمع الخامس بتهفهف بالفستان، عادي يعني هتعدي وتمر بسلام ومش هيحصل أي حاجة ومحدش هيضايقها. بسيطة يعني. لكن لو في بعض الأماكن التانية اللي الفقرا فيها قرروا يكونوا أول ناس تيجي على نفسها من منطلق " الحياة سوحتنا فيلا نسوح بعض بقي" (ملحوظه أنت عارف يا حبيبي القارئ إن نسوح دي مقصود بيها كلمة تانية بتبدأ بحرف ال ف) لو حصل كده مجرد ما تخرج من باب بيتها الجماهير الغفيرة في المنتشطقة هتتلم عليها، وهييييييه هيييييييه بص المزة بص يالا وموتسيكلات وتكاتك هتتجمع وتعم السعادة على الجميع بقي، ده غير مصمصة شفايف الجيران اللي هياكلوا وش أهلها في المنطقة واحتمال يروحوا يتفاهموا مع أبوها أو أمها، والبواب اللي هيضرب كف بكف ويتنأور عليها في الرايحة والجاية ويعملها لبانه في بؤه مع بوابين المنطقة والمناطق المجاورة، وعلى المتضررة " أن تعيش عيشة أهلها وتلبس عباية سودا وخلاص وتدفن شبابها "! ولو لجأت لحل إنها تلبس حاجة فوق الفستان عشان تدارية على ما توصل المكان أو المناسبة اللي رايحاها الوضع هيبقي أسوأ، لأن غالبا هياخدوا بالهم إن في فستان تحت مستخبى وبناء عليه فهي كده رايحة تعمل ايه ومخبيه، ولما توصل المكان " ألف من هيقرر يعتبرها ياي بيئة " لو حد لمحها لابسة حاجة فوق الفستان وقلعتها خصوصا يعني لو في الصيف. يعني المرحلة دي لوحدها بتتطلب من 2 مليون جنية ل 15 أو 20 مليون عشان تعيش البنية في شقة أو فيلا في منطقة ينفع تلبس فيها فستان. ما علينا. نفترض إن المرحلة دي عدت في كل الأحوال بمعجزة، ونزلت من بيتها بالفستان، ايه المرحلة اللي بعد كده. تتحرك بقي بالفستان عشان توصل مشوارها. ودي المعضلة الكبرى. لو هي فقيرة تضطر تركب مواصلات. واعتقد مش محتاجة أكمل ممكن يحصلها ايه بالفستان في المترو أو الميكروباص مثلا! لو متوسطة هتركب تاكسي، وغالبا السواق هيسألها: تعدي قدام؟ وغالبا أكتر هياخد منها ضعف الأجرة عشان هيبقي معتقد إنها رايحة تعمل الجلاشة وحلال فيها النصب وأهي بتكسب كتير وهو بيقاسم بس مش أكتر أو هياخد منها 3 أضعاف الأجرة لو حس بقي إنها مضطرة تركب في أول تاكسي بسرعة عشان تهرب من العيون والمعاكسات أو هيعد يعاكسها طول الطريق أو هيشغلها " فرتكه فرتكه" أو هيستغفر ويتفتف وينفخ طول الطريق أو هيخطفها !! أما بقي لو فوق المتوسطة، هتركب عربيتها الصغننه وهتسوق، وسواقين الميكروباص والعربيات الصديقة المجاورة والتريلات والنقل هيشاركوها من كل قلبهم في نقلة رجله من عالفرامل للبنزين لحظة بلحظة وغالبا هيبقي في تشجيع وتسقيف وجوووون وجوووون وجوووون ده غير السايس اللي هيبقي برده عايز ضعف الركنه عشان يركنها قدام المكان بالظبط وإلا هيسيبها تتسوح بالفستان، وده كله غير مصيبتها السودا لو العربية عطلت بيها وهي لابسة فستان عالدائري مثلا..كده كل سنة وانتوا طيبين راحت البنية "خ"! وفي أوبشن كمان ..ممكن تركب مع صديقها العزيز "مرعي الخدوم" اللي غالبا هيبقي عايز يتأخد من خامة وملمس الفستان بنفسه! أما بقي لو غنية فهتنزل من بيتها الهادي في المنطقة الهادية جدا وتركب عربيتها في هدوء برده اللي بابي عملها رخصة فامية وغالبا هيكون في سواق وهتاخد نفس عميق وتلعب في الموبايل شوية لغاية ما توصل مشوارها وترجع عادي في سلام وأمان. بس كده !! بس كده. الموضوع بسييييييييييييييط !
