مساء الخير .. مشكلتي ابتدت بمشكل صحية انتهت باني عايزة آخد بالتار .. هحكيلكم من الأول .. كان عندي مشكلة صحية رحت بسببها دكتور أمراض نساء وتوليد وعادة انا قبل ما اروح لأي دكتور باهتم بفكرة ان الدكتور يكون شاطر او له سمعة كويسة بين الأطباء نفسهم , وعلى فكرة انا سني 27 سنة وفي بداية جوازي وما انجبتش لسة .. المهم الدكتور دة كبرلي المشكلة ودخلت في متاهات طبية وبعد 6 شهور من المرمطة بين التحاليل والأشعة والنتائج الملخبطة ونعيد ونزيد تاني , يعني مريت بكل اللي انتوا بتسمعوا عليه في الافلام .. الغريب أو الفظيع في الموضوع ان الدكتور قرر وشخص حالتي على انها تكيس كامل في الرحم والمبيض وان وصلت الحالة إلى درجة تستدعي إلى إستئصال الرحم والمبيضين بالكامل .. وانا في السن دة ولسة ايه !!! ما انجبتش .. من ثقتي في الدكتور صدقته وقلت الحمد لله على ما أصابني من مكروه وطبعا الموضوع ده لكم ان تتخيلوا مر علية نفسيا ازاي .. مكنش سهل بصراحة لكن فضلت ادعي ربنا يصبرني ويجعل اللي حصل في ميزان حسناتي .. المهم بعد ما عملت العملية ومر الوقت الكافي عشان اثرها يخف وابتديت امارس حياتي طبيعي .. قابلت واحدة صاحبتي كانت بتشتكي من نفس الحالة لكنها بحكم إقامتها خارج مصر كشفت واتعالجت هناك .. والصدفة لوحدها اللي خليتنا نفتح الموضوع مع بعض فحكيت لها اللي حصل معايا ولقيتها بتقوللي : إزاي الكلام ده هوة انت مش حالتك زيي بالظبط وبعدين حتى لو الحالة مختلفة كان ممكن علاج الموضوع بشكل يغنيكي عن شيل الرحم .. ايه ؟ هوة انت روحتي لدكتور مين ؟ بصراحة الكلام لعب في دماغي وقررت اروح لدكتور تاني ورحت فعلا وعرضت عليه كل الأوراق الخاصة بالتحاليل والأشعات وما قلتلوش اني عملت العملية عشان ما يغيرش من كلامه .. اتصدمت صدمة عمري لما الدكتور قال لي معندكيش مشكلة كبيرة دي حاجات بتحصل لمعظم الستات المصريات نتيجة طرق الأكل الغلط والضغط العصبي وعدم انتظام ممارسة العلاقة الخاصة , المهم .. نزل علية سهم الله وفضلت أعيط قدام الدكتور مش قادرة امسك نفسي ما كنتش متخيلة ان حياتي اتقضى عليها بسبب اهمال طبيب أو جهل منه أو حتى استسهال جاتلي حالة من الغيظ غير طبيعية .. فجأة رحت قمت وسبت الدكتور وحكيت لجوزي القصة كلها مبقاش مصدق فقال لي نروح لطبيب تاني وفعلا رحنا لتاني وتالت ورابع الكل أجمع على نفس النتيجة التانية ان معنديش حاجة خطيرة وان الأمور دي بتتعالج .. دلوقتي بقى وبعد نصائح بعض الأصدقاء ونصيحة أحد الأطباء قالولي أبلغ عن الدكتور ده النقابة واقدم بلاغ رسمي ضده وده حصل فعلا لكن المصيبة مش في كدة المصيبة في ان النقابة نفسها حاولت تداري الموقف وتكتم عليه كنوع من الإحتفاظ بالواجهة الأدبية للطبيب واحنا نولع مش مهم .. في الحالة دي المفروض اعمل ايه عشان اقدر اعرف كل الناس بخطأ الطبيب ويعلن رسمي عن اسمه .. وشكرا .. ارجو الرد سريعا جزاكم الله كل الخير . فاطمة فضفضة أولا : قدمي بلاغا للنيابة مقدمة كل الأوراق التي تثبت انه الطبيب المعالج مثل الروشته وسجل دخول المريض المستشفى التي تم إجراء الجراحة بها وكل التقارير الطبية لإثبات العلاقة بين المريض والطبيب .. ثم تطلبين من النيابة تشكيل ما يسمى بلجنة طبية محايدة من كبار الإستشاريين المحايدين وليس لديهم علاقة بالمستشفى ولا يكونوا أعضاءا بمجلس نقابة الأطباء ثم يتقدمون بتقرير للنيابة , ثم تتولى النيابة التحقيق وسيكون تقرير الخبراء هو الفيصل في تحديد العقاب وقبل كل هذا تطلبين شطب اسم هذا الطبيب من النقابة ورفع قضية تعويض مدني , لكن لا تخبري اي جهة إعلامية بذلك قبل ما يتم أخذ إجراء قانوني ضد الطبيب وإلا سيرفع ضدك قضية سب .. و بعد إتخاذ أي من الإجراءات السابقة ضد الطبيب سيصبح لك الحق بالإخبار عن الطبيب قانونا في أي وسيلة إعلام . وفقك الله وشفاك . نيفين حجازي
