جوزي ( نمس )

صباح الخير أستاذة نيفين
عندي مشكلة موتراني جداً .. أنا متزوجة من 8 سنوات والحمد لله عايشة كويسة جداً .. زوجي راجل محترم ومش مخليني أنا والأولاد محتاجين لأي حاجة وعلاقتي بيه بحمد ربنا عليها ، لكن في الفترة الأخيرة ولما بقعد مع الصديقات مش بسمع من حكاويهم غير عن خيانة الرجالة وندالتهم وألاعيبهم في خداع زوجاتهم .. حسيت من كلامهم أن الرجالة كلهم عايزين الضرب بالنار .. وابتديت اقلق على جوزي وحياتي المستقرة .. وصحباتي بيقولولي أن جوزي أكيد ( نمس ) من تحت لتحت أكيد هوة على علاقة بستين واحدة لكنه مصدرلي وش البريء .. ابتدأ الشك يدخل قلبي جامد وحياتي اتقلبت نار بسبب سمعة الرجالة الوحشة .. اللي بسمعه مش قليل يخلي أي واحدة دماغها تتبرجل .. وانا دلوقتي مش عارفة اعمل إيه واتاكد أزاي من وفاء جوزي لية ؟ أرجو سرعة الرد علشان بقيت عايشة في جحيم بجد
ا . ب

فضفضة
محررة الصفحة .. نيفين حجازي
يا أستاذة .. ردي عليكي في جملة .. أن كانت صفاتك تتشابه أو تتطابق مع صديقاتك إذن زوجك كربون من باقي الرجال .
لا اجد اي منطق لتخوفاتك خاصة وان زوجك اثبت حسن خلقه في ثمان سنوات ؟! .. كم تحتاجين من العمر ليثبت لك ولاءه وحرصه على بيته وزوجته ؟ ماذا تريدين من زوجك أكثر من الذي قدمه لكي بشهادتك له ؟
ارحمي نفسك وانقذي بيتك من وساوس لم تأتي لك إلا بالخراب .. وابتعدي عن نماذج أنا شخصيا اشك في سلامة نواياهم .. فمن تسعد اليوم بحياة سليمة أصبحت حالة نادرة .. وان يصعب عليكي الابتعاد عن بعض الصداقات .. على الأقل لا تسلمين اذنيكي لاحد ربما معظم ما تسمعينه بدافع الغيرة .. حفظك الله وحفظ بيتك من كل شر .
[email protected]