المشكلة في ( شكمجية )

مساء الخير .. طبعا اول ما هحكي مشكلتي الكل هيضحك بس والله انا اتفرست فعلا عشان كدة قلت ما بدهاش ابعتلكو ويمكن الاقي عندكم الحل الأمثل .. القصة كلها في جملتين ..
انا وجوزي زوجين الحمد لله هايلين مع بعض لدرجة نتحسد عليها ربنا يكفينا العين , لكن كل المأساه بسبب الهانم ضرتي اللي جبتهاله بإيدي في البيت .. وهية الهانم الكلبة الجديدة ( شكمجية ) ده إسم الكلبة على فكرة مش علبة الدهب ! .. المصيبة اني لما فكرت اجيب الهانم قلت اسلي نفسي في اوقات الفراغ وانا كمان بحب الحيوانات بس بعد مرور وقت من وجود شكمجية هانم لاحظت تعلق جوزي بيها لدرجة ملفته للنظر ابتدى يتعلق بوجودها نفسيا وعلى فكرة كل اللي بيربو حيوانات عافين وفاهمين الموضوع ده .. بس مش كدة .. يعني لما اول ما جوزي يدخل من الشغل يسأل على الهانم ويأكلها بإيده ويلعب معاها مهما كان تعبان ويسبني انا اتفلق لما اقول له يلا نخرج ويقول لي تعبان يبقى ليه حق اموت من الغيظ ..... وهكذا بقى لغاية ما وصلت لدرجة كوميدية جدا بس درامية في نفس الوقت .. مرة قلت له يا انا يا شكمجية .. قاللي ايه بقى .. الآتي : بس الصراحة كان بيضحك عشان هوة عارف اني بغير منها بجد .. قال .. ماتحطيش نفسك في مقارنة عشان هتطلعي الخسرانه اكيد هههههههه وإذا فيه حد هيخرج من البيت هتكوني انتي ... انا سمعت كدة ومش عايزة اقولكم اللي حصل .. بدل ما اضحك والموضوع يبقى هزار لقيت نفسي في حالة من العياط هيستيرية وعايزة اموت الكلبة وفضلت اجري وراها وهوة يجري ورانا يحوش .. بصراحة انا بكتبلكم وانا بضحك بس متغاظة برضه جدا ومش عارفة اعمل ايه ؟
الزوجة الأولى
فضفضة
الحقيقة يا صاحبة الرسالة أضحكتيني كثيرا وعند قرائتي لكل سطر أتخيل المنظر فأغرق في الضحك أكثر .. لا أجد إجابة سوى قولي الحمد لله أن الهانم كما اطلقتي عليها ( شكمجية ) هي المشكلة الوحيدة بينك وبين زوجك ليت كل المشاكل بسبب ( شكمجية ) ههههههههه .
نيفين حجازي