انا مالي ومال الستات اللي بتبص .. حاجة تقرف !

السلام عليكم , مشكلتي من نوع غريب شوية , عشان عادة بنسمع ان الزوجة بتغير على جوزها انما لما تكون بتغير من جوزها ده الغريب واللي خلاني ابعتلكم يمكن يكون في كلام استاذة نيفين في جديد او القراء الكرام يكون حد فيهم مر بالظرف ده او سمع عنه ويفيدني , مراتي من بعد ما اتجوزنا بفترة مش كبيرة أوي ابتدت تدقق جدا في لبسي
وانا نازل شغلي او لو رايحين زيارة لحد من اهلنا وخصوصا لو موجود في الزيارة حد من بنات العيلة سواء عيلتي او عيلتها بيركبها شيطان اسمه غير هدومك .. خللي القميص من برة .. شكلك ملفت أوي .. انا بصراحة مش فاهم شكل راجل ممكن يبقى ملفت ازاي ؟! ما علينا .... آجي نازل مشوار .. لا غير قصة شعرك , أتاري بقى انها عمالة تقنعني بقصة شعر أثرية من أيام ابو الهول , ليه بقى ؟ لما دخلت معاها في نقاش وضغطت عليها لقيتها راحت معيطة وبتقول .. اصل انت شكلك احلى مني وصحباتي كانوا نصحوني ماتجوزش راجل وسيم بس انا حبيتك وقلت دي حاجات مش هتفرق بس لا لقيتها فارقة ولما بنكون ماشيين جنب بعض كل الستات بتبص عليك لدرجة بتغيظني جدا وانت بتقصد تلبس حلو وتهتم بنفسك عشان شايف نفسك , وراحت مزعقة جدا في نص الكلام .. انت شخص مستفز ومحدش مستفيد من شكلك غير الستات اللي بره او اللي معاك في الشغل , طبعا احنا كدة بشكل مستمر وخناق ابن كلب واكن كل المشاكل خلصت ومفيش غير أم شكلي اللي تاعبها لغاية ما كرهت منظر أمي ومش معقول ابدا ان اي حد هينزل من بيته مبهدل ولا مكرمش ومنعكش ده حاجة جنان رسمي , يمكن المشكلة في انها على قدر بسيط من الجمال وهية حاسة بده , والمشكلة برضه انها هية نفسها مش من الستات اللي بيهتموا بشكلهم اساسا وحاولت كتير اكلمها في النقطة دي بس هية ذوقها مش مساعدها عشان تطور ولا ماكياجها ولا حتى في المدعوق البيت طيب اشمعنى انا مش بتخانق معاها على ده بالرغم انه من حقى اكيد ؟! .. حاجة بجد تقرف يعني يا اما ابقى معفن عشان ارضيها يا اما خناق .. .. لا والموضوع مش على قد ما بحكيلكم وبس ده الدنيا اتطورت لغاية كلام والله ما يتقال ومش عايز اطول في رسالتي , يا اساتذة من القراء انتم رأيكم ايه مع العلم اني طاوعتها كتير لغاية ما زمايلي بقوا يتريقوا على منظري ويقولولي مش عوايدك البهدلة يا نجم واخواتي كمان اخدوا بالهم وانا مش طايق نفسي .. البهوات القراء ارجوا الإفادة يمكن نلاقي عندكم اللي انا مش واخد بالي منه . وشكرا وآسف على اني طولت عليكم .
فضفضة
أستاذي .. مشكلة زوجة حضرتك مش الأولى من نوعها , للأسف سمعت عنها كتير وقمت بدور السؤال على صحتها ومناقشتها مع أحد المتخصصين .. الرد كان الآتي : الزوجة اللي حاسة انها على قدر بسيط من الجمال بتبقى حاسة طوال الوقت بالموضوع ده ومنه بتبدأ فعلا المشاكل تزيد ودرجة تدخلها في ادق التفاصيل بيزيد طبعا , فكان رد الدكتور ان انسب معاملة بشكل مبدئي , انه مع النوع ده من الزوجات لازم المحايلة والدخول في مناقشة يوصل فيها الزوج معلومة قيمة الشكل المهندم ومدى تأثيره على حالتنا المعنوية لكن يتجنب الزوج المبالغة في مجاملة الزوجة لأنها هتبقى فاهمة انها مجاملة وده هيزود عندها الشعور بالغيظ أكتر وبالعكس هيزود انشغالها بتفاصيل الزوج اكتر , ده غير دورك في مشاركتها في اختيار ملابسها وذوقها العام في اختيار كل حاجة حتى لو ملهاش علاقة بالملابس او الشكل وده بيعمل نوع من المعادلة وبيقلل شعورها بالدونية أو انها الأقل وبيقلل إنشغالها بشكلك او حالك عموما وتبدأ هية تدريجيا تحس انها مبسوطة من فكرة الإهتمام بشكلها قدامك وإهتمامك في حد ذاته بينكم انتوا الإتنين , وان الكلام بشكل مستمر معاها على إعادة تنظيم البيت كمثال بيخليها تحس بنوع جديد عليها من المشاركة ودي طبعا طريقة غير مباشرة للتعامل مع الزوجة اللي بتنتمي للنوع ده من الستات , وأكد الطبيب على ان الحيلة بالطرق غير المباشرة حل جيد جدا وفهم الزوج لفكرة وجود المشاركة بيدي احساس للزوجة بأنه بيخصها هية بس بالإهتمام فتبدأ تهتم فعلا لكن بنفسها وبالتالي بيقل تدريجيا انشغالها المبالغ فيه بالزوج , وبعد كدة تبدأ مرحلة تانية وهية انك تبادر بشوية نصائح تخص مظهرها لكن بحرص شديد جدا وانت بتختار كلماتك معاها لأنها هتبقى حساسة جدا في إستقبال اي معلومة منك , اختيارك لكلامك إما هيقلب الموضوع للأسوأ في ثانية أو ينقذك .. ده كان رأي الطبيب إذا حبيت تاخد بيه أما عن رأي أصدقائنا القراء بالتأكيد هتقرأه معانا بالتاكيد هيكون بين كلامهم حاجات كتير مهمة .. ربنا يوفقك ويصبرك لغاية مانلاقيلك حل يرضيك .