بجد أنا بحبكم أوي، وباثق فيكم جدا، وعشان كده محتاجة مساعدتكم لي. أنا مخطوبة، والحمد لله أنا وخطيبي بنحب بعض جدا ومتفاهمين لحد كبير، وحياتنا الحمد لله مافيهاش مشكلات، وهو دلوقتي بيجهز في الشقة؛ لكن طبعا زمان كان فيه بيننا دايما مشكلات واختلافات في الرأي وزعل وكل حاجة، لحد ما قدرنا نفهم بعض كويس. من ضمن المشكلات اللي كانت بيننا إنه رافض إني أشتغل نهائيا، واتكلمنا في الموضوع ده أكتر من مرة، أنا عن نفسي مش من نوع إني أسعى وأدوّر على شغل؛ لأني بطبيعتي كسولة، بس كنت شايفة إنه لو جت لي فرصة كويسة ليه لأ؟! خاصة إن لي مواصفات في الشغل اللي أشتغله، لكن هو رافض جدا؛ والسبب في كده إنه مش حابب مراته تتبهدل وحدّ يضايقها بكلمة أو بنظرة، فمن الأفضل إنها تكون في بيتها معززة مكرّمة.. المهم إن الموضوع اتقفل من زمان؛ لأني مش ناوية أدوّر ولا أسأل على شغل؛ لكن كنت باتكلم معاه؛ لأن وجهة نظره ماكانتش عاجباني. دلوقتي بقى أنا جت لي فرصة شغل حلوة أوي، وفي شركة بترول كبيرة والدي بيشتغل فيها، وأنا والله لا سعيت ولا قلت لبابا حاجة هي جت كده، وأنا بصراحة مش عايزة أضيع الفرصة بس التعيين مش دلوقتي قريب أوي، وأنا مافتحتش الموضوع مع خطيببي، ومتأكدة إنه هيرفض، وأنا بصراحة بقى متمسكة جدا بالشغل ده، وهي فرصة مش هتتعوض وكلها مميزات ومستقبلها كويس جدا، ودي اللي كنت باتمناها، وحاسة إنها هتغير فيّ كتير، وأحس إني أخيرا باعمل حاجة؛ لأن طول عمري حاسة إني سلبية وماليش في أي حاجة. أنا خايفة أوي؛ لأن الموضوع ده بالنسبة له حياة أو موت، خايفة يقول لي: يا أنا يا الشغل!! ممكن ليه لأ؛ لأنه عصبي شوية والموضوع ده بالنسبة له مُنتهي تماما، أنا محتارة أوي وبادعي ديما وأنا باصلي إنه يوافق، بس ماعتقدش خاااالص أعمل إيه؟ nona