السلام عليكم ورحمة الله.. أنا مشكلتي نفسية، أعتقد إنها مش كبيرة بالنسبة للمشاكل اللي أنا قرأتها هنا، لكن والله أزمة كبيرة لي؛ أنا كنت في هندسة بس سبتها بغبائي؛ لأني كنت ما بذاكرش، بس والله كنت مضايقة جداً، ومش عارفة إيه اللي حصل لي وخلاني ما ذاكرش، أنا لحد دلوقتي باسأل نفسي مليون سؤال يعني لما أتعب أوي، أنا ليّ أصحاب كتير بس لما بلاقيهم مكملين في هندسة بتضايق من نفسي أوي، وباقول مش زماني كنت وكنت، أنا كنت مخططة لحياة أحلى بكتير من اللي أنا فيه طبعاً كل شيء بأمر الله، بس ده اللي كنت هعمله، ووالله أنا مش باحسد ولا باحقد على أصحابي بالعكس أقسم بالله بادعي لهم، بس زعلانة على نفسي، أنا دلوقتي في تجارة وبرضه مش باذاكر ومهتمة أكتر إني آخد كورسات وأشتغل، حاسة إني ضعت خلاص، بس حاسة إني هنجح في شغلي إن شاء الله، ونفسي إني أنجح وأجيب تقدير علشان أثبت إني كويسة، بس مش عارفة شكلي مريضة نفسياً ولّا مش عارفة أنظّم وقتي.. ولّا كسولة ولّا إيه ولا عايزة حد يشجعني؟!! ولّا علشان بافكر في إني مش مرتبطة لحد دلوقتي وده موضوع شاغلني؛ لأنه مخليني مش بثق في نفسي، دايماً إني مش حلوة أو ما ينفعش إني أتحب، يمكن محتاجة أحب علشان أكون سعيدة في حياتي، وأعرف أعمل فيها حاجة مش عارفة ربنا يستر عليّ وربنا يهديني لأمي ولدراستي.. يا رب قوّيني واهديني وارحمني. a
