الأول أنا باشكركم بصراحة على الموقع ده.. حلو جداً ومجهودكم رائع وربنا يزيدكم. أنا من زمان جداً وأنا باتعامل معاه ودلوقتي بقى أحلى وأسهل كتير كمان.. أنا بقى ليّ مشكلة في باب "فضفض لنا". أنا سني دلوقتي 22 سنة.. خلّصت جامعة؛ بس مش اشتغلت لسه.. مادياً مرتاحين أوي.. كل حاجة عايزاها باعملها إلا حاجة واحدة ودي شبه ممنوعة وهي إني أحب أو أتحب زي بنات سني. ممنوع إني أرتبط إلا باللي هيخطبني؛ حتى في الجامعة كان ممنوع أرتبط بشباب من الكلية.. آخري معاهم هو سور الكلية مش أكتر من كده. دي كانت رغبة أهلي أو بمعنى أصح هي أختى الكبيرة وصديقتي، ومش بحب أعمل حاجة تزعّلها مني لأنها بتقف جنبي كتير.. أصحابي كانو بيفكّروا إن اهتمام أختي بيّ ده تحكّم، ورفضها إني أحب أو أتحب ده كمان تحكّم. أنا فاهمة هي ليه عايزاني أعمل كده؛ بس أنا نفسي إني أتحب أو أحب أو يكون ليّ علاقة ولو حتى تفشل.. نفسي أجرّب.. هي قافلة أي باب ممكن يخلّيني أجرّب.. هي خايفة أنجرح.. وكمان خايفة من كلام الناس. حتى لما حبيت أشتغل.. رفضت وقالت يا إما أشتغل في شغل حكومي عشان يكون فيه ناس كتير أو أقعد أحسن في البيت.. حتى المكاتب الهندسية ممنوع أشتغل فيها؛ مع العلم إني مهندسة مساحة.. حتى السفر كمان ممنوع -أقصد السفر جوه مصر- يعني مصيف مع أصحابي أو قرايبي لوحدي ممنوع؛ حتى أيام الجامعة كان ممنوع.. أنزل القاهرة أو أي مكان تاني لوحدي ممنوع -أنا من سكّان الدلتا- كل حاجة ممنوعة. بس فكرت أخيراً أدخّل نت وأتعرف على شباب وبنات هنا في الشات.. هي وافقت؛ بس كان برضه ممنوع أقابلهم أو أتعرف عليهم لايف. زهقت وكرهت كل حاجة، واتعلقت بالنت جداً، وبقيت مدمنة شات.. أنا كرهت الشات؛ بس هي الوسيلة الوحيدة اللي بتخلّيني أكلّم ناس في سني؛ لأن أنا مش ليّ غير صديقة واحدة بس، وبقيت حاسة إني زي الكمبيوتر اللي أنا قاعدة عليه ده؛ باخد أوامر وأنفّذها بس مش أكتر، من غير تفكير أو إبداء رأي.. ومش عارفة أعمل إيه.. يا ريت تفيدوني. shicola
