جارتي المزة الصايعة

مساء الخير أستاذة نيفين لعلك بخير
معلش انا مشاكلي كتير انا دايما ببعتلك بس المشكلة المرة دي مع واحدة من الجيران ابتديت ألاحظ أنها بتغازل جوزي عيني عينك كدة ولا هاممها وجودي طبعا كل كلامها تلميحات صايعة زيها لدرجة أنها تحرج الواحد يرد عليها اصلها مستأجرة جديدة ومن ساعت ما شرفتنا وهية أحوالها عموما حديث كل السكان وعايشة لواحدها بس كل فين وفين لما بشوف حد يجيلها .. مشكلتي بقى بدأت بشكل حقيقي لما لقيت جوزي بياخد ويدي معاها في الكلام ساعات قدامي وساعات لما بشوفه راجع من الشغل من البلكونة وهية تكون نازلة بالصدفة تفضل واقفة معاه رغي رغي تاكل دماغ الراجل وعشان انا عارفة طريقتها بتفرس بصراحة من الموقف ده وحاولت أقول له يخف شوية لان الست دي شكلها ما وقفتش في طابور الرباية خمس دقائق هههههههه وطبعا جوزي انا عارفاه يموت في المزز وهية مزة الصراحة لكن وبعدين انا شايفة ان وجودها خطر وبتهيالي مش علية لواحدي ده على ستات العمارة بحالها .. السؤال هنا اعمل ايييييه أتصرف أزاي هل أتجاهل الموقف ولا أبقى حازمة في التعامل مع جوزي ولا انزل للولية دي أسمعها كلمتين مع اني شكة أنها تاكلني أساسا لانها شلق شوية وقادرة !!
ف. ع
[email protected]