"الراجل بتاع سكينة الكهرباء" يوجه رسالة ل"مرسي"

رد أحمد محب أمين عام النقابة العامة للعاملين بالكهرباء والطاقة على تلميح رئيس الجمهورية الدكتور محمد مرسي خلال خطابه الأخير الأربعاء الماضى قائلاً : أيوة أنا الراجل بتاع السكينة".

وأضاف فى تصريحات صحفية أن خطاب الرئيس تحريضى ، و بدا هذا واضحاً فى المضايقات التى بدأ يتعرّض لها من بعد الخطاب مباشرة، الناس بدأت تلسّن عليا أنا وزمايلى ويقولولى قبضتم وفصلتم الكهرباء عننا، بس أنا عاذرهم، إذا كان الرئيس بيقول إننا مرتشين فى خطاب رسمى، يبقى عادى الناس تيجى تعمل اللى هى عايزاه".

واردف : يعنى المخاطر اللى إحنا بنشوفها مش كفاية، جه الرئيس وزود الطين بلة، فيه ناس غيظها من قطع الكهربا بيخليهم مستعدين يقتلوا، خصوصاً مع انعدام الأمن ، متابعاً نقلاً عن الوطن ستزيد أزمة الكهرباء بمعدلات كبيرة، وساعتها الناس مش هتلاقى غيرنا تفش فيه غلها، ربنا يسامحك يا مرسى، لو كنت أقدر مانفذش قرار قطع الكهربا كنت عملت ده، لكن واجبى وعملى بيحتم عليا أفصل، وإلا ممكن أضر الشبكة بحالها، والله لو بإيدى كنت فصلتها عن بيته فى التجمع الخامس وعن أهله وعشيرته، والوزراء بتوعه، عشان يدوقوا من نفس الكاس، ويعرفوا يعنى إيه الواحد مايبقاش شايف كف إيده.