يجدد نشاطه أحسن ما يبص برة

صباح الخير
انا قلت أبعت مشكلتي لعل وعسى حد يرد رد افهمه من رجالة مصر الحلوين (انا بتريق طبعا) .. مع ان الرجل المصري بقى صعب جداً زي جوزي لكن ما يجراش حاجة ممكن يفيدوني بحل على اعتبار أنهم رجالة زي بعض ههههههه ..طيب ..
دلوقتي المشكلة باختصار اني زوجة لإنسان يدعي انه راجل من ثلاث سنوات وليه منه ولدين ولاحظت من فترة قريبة انه غاوي يتفرج على أفلام إباحية .. في الأول ما كنتش مركزة معاه وقلت بيني وبين نفسي يمكن الراجل بيجدد نشاطه اهو أحسن من البص برة .. ارحم يعني مش أحسن بالمعنى .. لكن في مرة من المرات في ساعة سودة عديت من قدامه بالصدفة وكنت مخلصة شغل البيت لمحت منظر غريب على الكمبيوتر انه بيتفرج على فيلم من دول لكنه رجالة مع بعض ( شواذ يعني ) في ساعتها دبيت الخناقة المعتبرة واستغربت جداً انه بيميل للفرجة على نفس جنسه وده قلقني اكتر ووترني وبعد الخناقة ما طلعناش بحاجة غير جملة واحدة قالها ملكيش دعوة انا حر في مزاجي فالخناقة زادت على اثر الكلمة دي ودلوقتي إحنا عايشين متخاصمين لا انا فاهمة عمل كدة ليه ولا قادرة اسكت اكتر من كدة .. حلوها بقى .
ع . ي

فضفضة
محررة الصفحة .. نيفين حجازي
يا أستاذة .. هوة حضرتك مستغربة من فرجة جوزك على نفس جنسه بس .. ومش مستغربة من الفرجة من أساسها ؟! .. بعدين فين المنطق في رضاكي على مشاهدة جوزك لمثل هذه الأفلام كبديل للنظر الى سيدة أخرى ؟! يا أستاذة المشكلة فيكي وفي جوزك .. وياريت تواجهي الموقف بانك تبلغي راجل في العيلة دي بالواقع وخليه يتكلم مع جوزك ويوصل لأسباب ميول جوزك الغريبة .. وانت نفسك لازم تعرفي ان الموضوع ده حرام من الأساس حتى لو رضيتي بيه كبديل علشان ما يعرفش ست غيرك .
Fadfada@ elfagr.org