كريم شعبان يكتب : " معلش ياريس على العامية "

ده ياريس كلام الناس فى الشوارع ومحطات المترو ، ومحال الفقراء إلى على باب الله ، وعلى القهاوي ، وبين الاصحاب والجيران ، وولاد البلد مش المنافقين ياريس .

وعلى طريقة احمد حلمي قالوا يوصلوا رسالة يمكن تشوفها ياريس :_


ياتري عندك دم ؟ ياتري بتعرف تنام ؟ عندك ضمير؟ بتعرف تقوم تتوضي عشان تقف بين ايد ربنا ؟ ضميرك مش بيقولك وذنب اللى بيموت ايه ؟ ده كلام القهاوي ياريس .

ليه ياريس مش بتحط نفسك مكان أهل القتيل ؟ محدش بيقولك ياريس انى الامهات المصريين بيدعو عليك اكتر ما كانوا بيدعو على مبارك ؟ هو ليه ياريس كنت بتاهجم نظام مبارك ؟ عشان كل اللى كان بيعملوه ! ده طلع ياريس تلميذ فى مدرستك ؟ اكيد بيجلك نوم ياريس لانى اللى مات مش اخوانى ، اما ده ياريس كلام الآهالى .


الغريب انك طلعت كداب ولسه مصر على الكدب قلت لينا هتعمل وهتعمل ، ومن محافظة لمحافظة ، ومن قرية لقرية ، وعملت البحر طحينة ، ضحكت علينا انت وجماعتك ولبست كل حاجة لنظام المخلوع ، وكأنك مخلص أخر الزمان ، والناس عشان بسيطة وعايزه تتعلق فى قشة للنجاة ، وقفت معاك بحسن نية ، وخرجت تدافع عنك ، واستمريت فى الكدب من قرية لقرية وكأن الكدب اصبح أحد سماتك الشخصية ، ومش كده بس ياريس قلت هتجيب حق الشهداء ، قلنا اخيراً هيعمل حسنة حلوة فى حياته ، بس للاسف طلع كله بياخد براءة يارتني ياريس كنت قتلت عدوي وهو بيتظاهر وده ياريس كلام الميكروباصات.

طيب ايه الفرق بينك وبين مبارك ، قتل متظاهرين وحصل ، سحل وتعريه ، وتعذيب ، وسجن وحصل ؟ ، مش ناقص غير مشهد التنحى ياريس ، اما ده ياريس كلام المثقفين .

حتى شيوخك ياريس كدبت عليهم وحسستهم ان الخلافة الاسلامية ستعود ، وانه حان الوقت لتطبيق الشريعة ، وخرجوا يدفعوا عنك بكل ما اعطهم الله من قوة ، يكفرون هذا ، ويحللون دم هذا ، ويشوهون هذا وكأن دين الله قد فسر لهم ، أما ده كلام الناس البسيطة.

يا تري ياريس محدش قلك انك عندك احمد عز فى جماعتك اسمه الشاطر ، وصفوت الشريف اسمه العريان ، وفتحى سرور اسمه الكتاتنى ، ومجاش متحدثك ياسرعلى مرة قلك ان الناس بتقول علينا ياريس حزب وطنى جديد ، ياتري ياريس بتسمع ، ولا زى مبارك .

عارف ياريس كان نفسي اقف افتخر انى انتخبتك ، واقول للدنيا كلها ده الرئيس الى انا اقنعت اصحابي انهم ينتخبوه ، بس للاسف ، ده بقى ياريس كلام الى انتخبوك وضحكت عليهم .