بفكر بصوت عالي

اسمي يسرا جلال – مصرية- (زي ما الحكومة بتقول) . هو يعني إيه مصرية ؟ يعني اتولدت في مصر مش كدة ؟ و بيقولوا يعني إن أي حد بيتولد في أي بلد المفروض إنه يحبها و لو مش كدة يبقى هو خاين . يعني المفروض إني أحب البلد اللي عايشة فيها ، طب هاحبها إزاي إذا كانت هي مش طايقة اللي عليها وبتسكت كل حد كويس أو حتى مش كويس بس حد حب أنه يقول رأيه .
المفروض في ذكرى 6 أكتوبر اللي المفرض نكون فيها فرحانين بإنتصارنا على الإسرائليين اللي هما الأعداء يعني، بس أمتى هيجي اليوم إللي ننتصر فيه على الأعداء اللي مننا؟؟؟؟؟؟؟؟؟!!!!!! إحنا البلد الوحيدة (بعد فلسطين) اللي الأغراب بيجو عندنا ويضربونا وإحنا نسكت ونقول دول شعب عربي شقيق ومصر مضيافة والكلام بتاع المدارس دة، ناس مش لاقية مكان تنام فيه وناس مش لاقية تاكل (ولا عارفة تجيب طماطم حتى) وناس تانية بتاخد رشوى 225 مليون جنية وواحد كان بيصرف على سوزان تميم 200 ألف دولار في الشهر.
وأنا ضد إني اكتفي إني أفضل أدعي عليهم بس إيه اللي ممكن يتعمل؟ أقدم شكوى ؟ .. هتقطع قبل متروح، أقف في وقفة إحتجاجية ولا مظاهرة، نفسي حد يقولي على مظاهرة الشعب هو اللي عملها وجت بفايدة، من أول ثورة عرابي محققتش حاجة، طب سعد زغلول ( ولا الهوا) آه ثورة 23 يوليو (لأ دي اللي عملها الظباط اللي هما الحكومة) طب خلاص دول كويسين أهو وطلعوا الملك، وقفة 6 ابريل ( جابت نتايج عكسية ) ، طب فيه إيه تاني، أعمل زي أحمد حلمي في فيلم آسف على الإزعاج و أروح للريس بتورتة ؟؟ ... هيقولولي ماهو الريس قعد مع الممثلين وأتكلم معاهم والدنيا زي الفل أهو أنتي بس اللي مفترية، يبقى أيه الحل ؟؟ طب الفلسطنيين بيستنجدوا بالعرب وغيرهم عشان يطلعوا الإسرائليين، لكن إحنا هنقول للأجانب طلعوا المصريين المحتلين للشعب المصري ؟
طلب أخير بس من وزارة النقل والمواصلات، كنت سامعة إن فيه كوكب تاني إحتمال يكون فيه ناس عايشة، يا ريت تاخدوني مع أول صاروخ طالع ...