نخبوي في مواجهة "افتكاسة"

لا حول ولا قوة إلا بالله .. الحمد لله الذي أنعم علينا بنعمة العقل .. هو فيه كده .. أستغفر الله العظيم ..
عفواً عزيزي القاريء فما قرأته ليس جزءاً من مقالي بل نوبة من حرقة الدم اللي الواحد عايشها مع القناة اللي تحرق الدم قال ويسموها صوت الشعب ؟!
ده يسموها صوت الخانكة أو منتدى العباسية أو عنبر العقلاء.. الحكاية أصلها ايه بالصلاة على النبي ...
نائب الله يسامحه قعد في البيت وسأل نفسه هو انا هفضل كده قاعد في المجلس زي الكنبة ؟ لازم انطق واطلع في القناة هو انا مش نائب ولا ايه؟ لا ده انا نائب ونص كمان ..وكانت البداية شحنة من الحماسة الفارغة وحبيتين استغباء عيار 1000مللي جرام..وبالفعل استجمع النائب قواه واستنشق نفساً عميقاً واغمض عينيه وقال صارخاً : انا عايز قانون يمنع المشاهد الاباحية من الاعلام؟؟؟؟؟؟ ..نعم مشاهد اباحية على الإعلام ده انا مش عايش في البلد بقي وهرولت مسرعاً للمكان القابع فيه الريموت كنترول وأخذت اتجول عبر القنوات ان الاقي حاجة أبدا ..احبطت واصاب محاولات بحثي الفتور.
تركت الريموت واتهمت نفسي بالانفصال عن المجتمع ووصنفت نفسي من النخبة اياها اللي بتتشم في البرامج وانهم عايشين في برج عالي بعيد عن هموم الناس ومعاناتهم و أحيانا مزاجهم.
وعندما طال انقطاعي عن أصدقائي اكتئاباً زارني صديق ليخفف عني رحلة جلد الذات التي بدأتها عقاباً لنفسي علي غيبوبتها وجهلها إزاء هذه القضية.. اباحية على الاعلام وانا ما باتفرجش –عفواً أقصد ما أعرفش – حاجة تكسف والله يا خسارة الشهادات والدبلومات والندوات كل ده طلع ما يساويش بصلة ولا يخلق انسان واعي اخس على النخبة واللي بيجروا وراها.
ولم يخرجني من دوامة الضياع والتشتت إلا كلمة قالها صديقي نزلت علي كالبلسم على الشعر الجاف والعسل على لسعة تحمير البطاطس والطحينة على صباع الكفتة السخن و..و..الكلمات تعجز عن الوصف والشرح.
قال صديقي : يمكن النائب عنده "كامة" زيادة للقمر الاوربي ولا حاجة ..وقاطعته : اخرس يا نخبة يا فاشل ده نائب يعرف ربنا كويس اللي انا وانت بعدنا عنه وقضينا عمرنا في كلام تافه اسكت حرام عليك مش عايز اشوف حد اطلعوا بره حياتي ياولاد ...........
لأتكيء على كنبتي التى قضيت عمرا عليها اتابع قنوات on tv ، والتحرير ،وروسيا اليوم،وغيرها من قنوات اسم النبي حارسهم النخبة ربنا ياخدوهم ان كان الجهل مصير اللي يتابعهم.
لكن الله لم يطل علي عذابي لتلمع في رأسي فكرة تقول :آه اما انا غبي النائب الله يبارك له يقص مشاهد العرايا من أطفال الشوارع ، وسكان العشوائيات ،أو مشاهد زنقة الاتوبيس وطابور العيش ,والانابيب وحجز الوحدات السكنية بتاعت محدودي الدخل اللي يا حرام بيطلعوا في التلفزيون وطبعا عرايا مجاعات أفريقيا ..والله عنده حق كلها مشاهد مقرفة ومقززة وتخلي الواحد يرجع اما النائب ده حساس بشكل ..خلاص لازم اخرج من اللي انا فيه ده لانه سلبية وعبط.
وبالفعل هاتفت أصدقائي لنعيد ترتيب اولوياتنا في العمل المدني ونبدأ حملة كبيرة لجمع الزائد من الغيارات الداخلية لدي الناس لسد العجز في المناطق المحتاجة..وأثناء ارتدائي الحذاء لأغادر جاءني صوت نائب آخر ليس أقل وطنية من سابقه يقول:لابد من وقف تدريس الانجليزية لانه تدخل أجنبي وتمهيد للاحتلال الجديد..وعندها سقطت على الارض وقلت كل ده بيحصل في البلد وانا نايم ما اعمق جهلي انني فاشل ..فاشل ..أين وطنيتي المزيفة اين حماسي الموجه لغير موضعه ..وقررت قرارا نهائياً أريدكم أن تساعدوني فيه اقتباساً من الراحل عبد الناصر لقد قررت أن أتنحي عن نخبتي وأعود لصفوف الجماهير أؤدي واجبي كأي فرد يشاهد جلسات برلمان الثورة..وإلي ان نلتقي في افتكاسات جديدة راسلوني علىwww الكنبة..com