أبرز أعضاء الثورة المضادة.. كل اللى بيتلككوا علشان يقولوا.. الشعب ده جاهل وهمجى وماينفعوش غير ديكتاتور يحكمه.. والله يرحمك يا استقرار. من سمات المواطن العاطفى: يشوف مواطن مضروب.. يقول الشرطة زبالة.. يشوف شغب فى ماتش.. يقول إحنا ماينفعناش غير الشرطة.. مايعرفش يروح شغله يومين، يقول الثورة وحشة.. يعرف إن الرواتب هتزيد، يقول الثورة حلوة.. من الآخر.. بيتعامل مع أى قضية.. بالقطعة.. ونسيت أقول حاجة مهمة ... بيصدق أى إشاعة.. خصوصا.. لو من تأليفه. الغش مش فهلوة والواسطة مش مجاملة والكدب مش تجميل والسرقة مش محاولة للتأقلم مع متطلبات الحياة، والنفاق مش أدب وحياء والاستغلال مش شطارة.. وإحنا لازم نتغير لأن معظم الناس لسه مش مستوعبة إن فيه ثورة حصلت وإن الأوضاع الغلط اللى اتعودوا عليها وظبطوا حياتهم عليها لازم تتغير وإن تحقيق الأحسن مش مستحيل، وليكن شعارنا.. مش عايزين نمشى الكون كله على مزاجنا.. كفاية قوى كوكب الأرض. كل واحد بيبقى مش شايف نفسه.. وشايف غيره بس ويقعد يقول أنا لو مكان فلان كنت عملت كذا.. فلان ده مش فاهم حاجة.. فلان فاشل.. طيب يا سيدى ما تشوف نفسك وتحل مشاكلك وإنت ماتعرفش ظروف كل واحد إيه.. لازم كل واحد يفتى ويحشر نفسه فى اللى مالوش فيه وخلاص.. قرفتونا. المريض الفقير تهان كرامته ولا يعالج.. أما المريض الغنى، لا تهان كرامته.. ولا يعالج برده. السياسة زى القانون زى الهندسة زى الطب زى الدين زى الميكانيكا.. ليها ناسها اللى بيفهموا فيها.. علماء الدين يقولوا إن الذهاب للاستفتاء واجب.. ماشى.. بس ماينفعش يفتوا إن نعم مع الدين ولا ضد الدين سواء إسلامى أو مسيحى.. يعنى الدين يعلم المهندس إنه يبقى عنده ضمير فى شغله، لكن مش هيروح ياخد فتوى وهو بيبنى عمارة مثلا يزود الأساسات ولا كده كفاية.. أنا لما اخترت لا كنت مقتنع إنها الأصلح مش علشان أنا كافر. إنت اللى تيييت وابن تيييت.. يا تيييت يا ابن ستين تييييت.. منقول من نقاش محترم بين اتنين بيدافعوا عن الإسلام نظرتك إنت هى اللى تفرق.. هل عيبك.. سبب للفشل.. ولا دافع للنجاح. طبعا حتى لو الرئيس اعترف بكل البلاوى اللى عملها وحلف إن هو اللى عملها.. بتوع جروب إحنا آسفين يا ريس هيعملوا جروب جديد ويسموه.. لأ ماتقولش على نفسك كده يا ريس.
