محمد الطباخ : ارجع يا ريس عشان نخليك ترحل

أنا عارف إن عنوان المقال ده حيضايق ناس كتير مني...بس اقروا الأول وبعد كده نتناقش في الآخر.
بقالي فترة بتفرج على اللي بيحصل في البلد اليومين دول...تحديدا من بعد تنحي الرئيس السابق...ومن بعدها دخلت في كذا نقاش مع ناس كتير عن نجاح الثورة دي ولا لأ...وهل أصلا هي ثورة ولا لأ...كلام كتير كده...
أنا رأيي الخاص المتواضع اللي طالع من واحد بداية معرفته بالسياسة بدأت يوم 25 يناير 2011... من غير فلسفة...ثورة...جية من يثور...والثورة بتيجي من الغضب...وبصراحة...كفاية قوي يوم 28 يناير إني أقول إن الناس دي غضبانة ...مفيش ناس حتقعد 18 يوم مش بتمشي من مكانهاغير لما تحقق اللي هي عاوزاه ...عشان حد يقولي دي مش ثورة..فأنا شايف إن دي ثورة وثورة عظيمة كمان!!
وأنا شايف كمان إن الثورة دي نجحت جدا...أصل هدف الثورة كان واضح...الشعب يريد اسقاط النظام ...لا للفساد...ودليل نجاح الثورة دي هو سجن طرة ...وال ناس اللي موجودة فيه...اللي عمر محد مننا كان متخيل إنه يشوف اقل واحد فيهم بيتوجهله تهم أصلا.
شفنا عدالة وشفنا حرية اعلام وحرية انتخاب لأول مرة.وحاجات كتير حلوة ...فكل اللي فات ده بالنسبالي كفاية جدا إني أقول إن الثورة نجحت...أُمّال المشكلة فين ..ليه في ناس متضايقة...وناس بتهاجم الثورة؟!!
زي ماشفنا كل الكلام الحلو اللي فات ده...بدأنا نشوف حاجات تانية مش حلوة...فتن طائفية...سلفيين...أقباط....كنايس بتولع...مظاهرات طائفية...وحزبية وبتنجانية....بدأنا نشوف انفلات مروري غير طبيعي...والناس برطعت...وكل واحد بيعمل اللي هو عاوزه أي وقت فيأي مكان....وبدأت ناس تهاجم الثورة..وناس تانية تقولك ثورة مضادة....وفلول النظام ...اللي اعتقد الشعب المصري كله كان أول مرة يسمع فيها عن كلمة فلول...وناس قلتلك إسرائيل هي اللي ورا الكلام ده....وكلام كتيير!!
والله بغض النظر عن الثورة المضادة...وال فلول ...واسرائيل....كل ده وارد ..ماحدش قال إن الناس مجانين إنها تقول كده...عادي....بس أنا شايف إن كل الكلام ده ملوش دعوة بالثورة...ولا أهدافها ولا اخلاقها...وأنا بعنيها...اخلاقها....أخلاق الثورة....اللي تنحت مع تنحي الريس للأسف .
أنا مش ضد الشعب المصري....لاني واحد منه...وبحبه...وعارف إن كل شعب فالعالم ...في بلاوي...مش احنا بس...بس ال 18 يوم بتوع الثورة دووول...يا سلاااااااام...الواحد شاف أخلاق..حتى من نفسه...عمره ماشافها قبل كده...والله ماكناش بنمثل...أنا عن نفسي مكنتش بمثل...نفسي أفضل عايش ال 18 يوم دول..عمال افتكرهم بقالي كام يوم...وابتسم ....نفس الناس دي كانت هي اللي بتنظم المرور....وكانوا هم نفس المسلمين وال مسيحيين اللي بيضربوا بعض دلوقتي...وكانوا هما نفس الناس اللي بتساعد بعض ...ومش بتعاكس ومش بتسرق...يااااااااه...أيام بجد..نفس الناس اللي خلت العالم كله يحترمنا..وبجد ده مش كلام صحافة..أنا فعلا أعرف اجانب كتير صحابي...مش قادر أقول لكم فخورين بينا إزاي...ونفسهم يجوا مصر عشان يزوره إيه؟!!...مش شرم الشيخ والله....عاوزين يزوروا ميدان التحرير !!!...عشان كده بأقول..............ارجع يا ريس!! عشان نخليك ترحل تاني....وماترحلش بسهولة برده....تنح كده.....وطول عن 18 يوم ...ماتبقاش بخيل...نعيش شهر شهرين كده فيأخلاق .
أتمنى بجد إن الأخلاق دي ترجع من غير مانحتاج إن واحد ظالم يحكمنا تاني...طالما احنا ا اللي كنا موجودين وقتها...مش حد غيرنا اللي عمل الثورة دي ...يبقى نقدر....وماحدش يقولي فلول...وثورة مضادة....آه موجودين...بس احنا على فكرة...كنا محكومين بالناس دي قبل كده....وكانوا الناس دي اللي مسكانة أيام الثورة...ومكنش ليهم أي تأثير...أنا عندي أمل فيالشعب ده....يا رب!!