احمد صالح يكتب: ثورتنا ثورة عقليات ثورة احترام الآراء

اللى يقولك أنا وطنى و اللى يقولك أنا إخوان و اللى يقولك أنا برادعى و اللى يقولك أنا رهبان و اللى يقولك أنا سلفى أخبطوا دماغكوا ف الحيطان و اللى يقولك قول نعم يا تبقى ضد اللإسلام و كل اللى قال لأ من فريق الشيطان الراجل قال رأيه و ساب البلد ف غليان و بعدين قالك بهزر دى مزحة و فرفشة فاكرنا ف موجه كوميدى ماشى يا عم الأستذ ة و اللى يقولك اسمى مينا شيلوا التانية م الدستور أصلها مش عجبانى قطعوها بالساطور.
نزلوها على جنب فاكرنا راكبين حنتور و اللى يقولك الإخوانى يتجوز إخوانية يا عم طب و أنا مالى دى حاجة بينكم داخلية و لا انت بتقولى عشان أجى بالجلابية و اللى يجيبلك ميكى ماوس و يتكلم عن الإسلام.
يا عم شات يور ماوس ل أقفلهولك باللجام و برضوا قال بهزر.. ما اقصدش يا هندسة كان فاكره 0900 خط الفرفشة و اللى يقولك مليون لحية و عايزين كام ألف نقاب فاكرين الدين باللحية أو يمكن بالثياب.
و فيه ناس ردت بحملة عايزين مليون بكينى ده ناقص نعمل حملة تعالى و اخترلى دينى يا عم منك ليه كفايانا حملات هنعمل حملة واحدة نغير فيها العقليات و اللى يقولك نحن نؤيد و اللى يقولك نحن نعارض.
الثورة الجاية فين خلوها ف أرض المعارض ما هو أصل بعد الثورة كله طلعله صوت كل واحد من مكانه يورى التانى الجبروت و المفروض نكون كلنا متجمعين نعرف مصلحة البلد و ف سبيلها مضحيين و بلاش نسير فتن دى بلدنا و فيها عايشين كلنا هنا واحد كلنا مصريين.