ليه كده؟ مش حرام عليك؟ تقتل شبابك بالرصاص؟؟ عاوز أعرف لييييه؟ علشان كرسي متمسك بيه؟ ولّا أنت خايف من إيه؟ قلنالك مش هنحاسبك؟ سيبها وسافر وماحدش هييجي جنبك؟ تقوم تقتل شعبك؟ ليييييييه؟!! والله حرام عليك.. عمل لك إيه الطفل الصغير بلال.. ده طفل عنده 10 سنين، يعني ده ممكن يهدد أمن البلد بإيه؟ ولا حتى ممكن يهدد أمنك الشخصي بإيه؟ ولا ممكن يهدد مكانتك بإيه؟ ولما هو مابيهددش أمن حد؟ طب ليه اتقتل بالرصاص؟ أرجوك فهّمني؟ بالله عليك ما تسكت؟ اطلع وجاوب السؤال اللي بنسأله ليك كل يوم.. ليه كده؟ لييييييييييه؟! طب شباب عندهم 23 و 25 سنة عملوا لك إيه؟ بهاء وأحمد وكريستين وسالي.... وغيرهم عملوا لك إيه؟ هتفوا ضدك؟ طب وإيه يعني؟ قالوا لك مش عاوزينك؟ طب وفيها إيه؟ قالوا لك ارحل؟ إيه المشكلة؟ هي دي جريمة تستحلّ بها دمهم؟ دي جريمة يُطلق الرصاص والمولوتوف عليهم علشانها؟ ليه كده؟ بالله عليك قول لي ليييييييييييه؟ ماتقوليش أنا مش مسئول.. ماتقوليش ده كله اتعمل من ورايا.. وإوعى تقول إنك ماكنتش تعرف عن الموضوع ده حاجة.. علشان دي تبقى عيبة كبيرة أوي في حقك؟ وبعدين كل اللي اتمسك في ميدان التحرير من اللي كانوا بيطلقوا الرصاص طلعوا كلهم رجال شرطة.. آسف مش رجال.. دول "......" شرطة؟ هو مش برده أنت القائد الأعلى لقوات الشرطة زي ما أنت القائد الأعلى للقوات المسلحة؟ يبقى إزاي ده اتعمل من وراك؟!! طب واللي اتمسكوا في ميدان التحرير بيحدفوا طوب ومولوتوف طلعوا تبع شركات البترول ومن بلطجية السيدة زينب.. يا ترى من اللي مسلّطهم يعملوا كده؟ ليه عملوا في الشباب كده وعلشان إيه؟ ليه كده؟
قول للأمهات اللي أنت حرمتهم من أولادهم وهما لسه مافرحوش بيهم يعملوا إيه؟ قول لنا بقى نعمل إيه دلوقتي؟ قول للأمهات اللي أنت حرمتهم من أولادهم، وهما لسه مافرحوش بيهم يعملوا إيه؟ واوعى تقول لي هاعوضهم.. هتعوضهم عن إيه ولّا إيه؟ عن ضحكة وابتسامة الطفل بلال اللي هي برقبة نظامك كله؟ عن نظرة في وجه ابن أو ابنة في ريعان شبابهم تنسّي هموم الليل والنهار اللي مشيّلها لنا نظامك؟ قول لنا نعمل إيه بقى؟ عاوز الشباب يمشوا من ميدان التحرير ويسيبوك لحد سبتمبر؟! طب إزاي؟ ده يبقى ماعندهومش دم لو عملوا كده؟ هو أنت فاكرنا إيه؟ شوية "....." فاكر لما حفيدك محمد تِعِب؟ هااا فاكر؟ فاكر عملت له إيه؟ جبت طيارة على حسابنا وسفرته فرنسا علشان يتعالج.. فاكر؟ طب فاكر لما مات حفيدك محمد، ورجع من فرنسا في تابوت.. ها فاكر؟ كان شعورك إيه ساعتها؟ حسيت بإيه ساعتها؟ يا ترى بكيت ونزلت دموعك؟ يا ترى قلبك اتقطّع على فراقه؟ يا ترى قعدت كذا يوم ماتاكلش ولا تشرب من حزنك عليه؟ يا ترى قعدت في الضلمة طافي النور علشان تفتكر يوم ما كان بيلعب حواليك ويهزر وتهزر معاه؟ ها فاكر؟ ده أنت من ساعتها وأنت بتلبس كرافتة سودا حزناً عليه، وكلنا ملاحظين ده.. ده إحنا كلنا بكينا لما شفنا جنازته وحزنا لما مات.. طب ليه عملت فينا كده؟ ليه موّتّ شبابنا؟ ليه كده؟ ليييييييييييييييه؟
أصلا خلصت دموعنا على شبابنا اللي استشهدوا (تصوير: أحمد هاشم) كل شوية تقول لنا إنك بطل الحرب وبطل أكتوبر.. طب ما فيه كتير أبطال أكتوبر منهم اللي مات ومنهم عايشين وسطنا؟ هو أنت لوحدك اللي حاربت في أكتوبر؟ ده حتى فيه أبطال أكتوبر عايشين وسطنا مش لاقيين ياكلوا من الفقر.. وأنت اللهم صلّ على النبي خدت حق بطولتك دي تالت ومتلّت؟ مناصب وصلاحيات وقصور وأراضي ومليارات جوه ومليارات بره والله أعلم فيه إيه تاني.. عاوز بقى إيه تاني؟ ده إحنا لو كنا جبنا جيش من بره يحارب في أكتوبر ماكنّاش دفعنا له نصّ ثروتك؟ ماكنّاش منحناه نصّ صلاحياتك؟ طب هو فيه بطل في أكتوبر يعمل في شبابنا اللي أنت عملته؟ ليه كده؟ ليييييييييييييه؟ خلاص بقى مش لاقي كلام تاني أكتبه.. بس عاوز أقول لك حاجة.. قلوبنا بعد ما شفنا جثث الشباب اللي زي الورد خلاص اتحجّرت.. تطلع بقى بخطاب عاطفي أو بخطاب تهديدي أو بأي خطاب مش هيؤثر فينا.. حتى لو طلعت وذرفت الدموع أمامنا كلنا والله ما هنتأثر.. مش هنتأثر حتى لو حصل لك أي حاجة.. خلاص.. خلااااااااااااص.. قتلت فينا كل حاجة حلوة.. قتلتنا كلنا.. مافيش حاجة خلاص نبكي عليها.. أصلاً خلصت دموعنا على شبابنا اللي استشهدوا.. خلاااااااااااص خلص الكلام..
