هيا.. نحتفل

قبل ما »تحتفل« بعيد ثورة يناير.. انت او غيرك.. حط وشك ادام المراية واسأل نفسك.. ح احتفل بايه بالضبط.. آه.. بسقوط النظام.. بس النظام ما سقطش.. يا راجل.. »سنة« بحالها ولسه ما سقطش.. أه والمصحف لسه.. مش غريبة.. ولا غريبة ولا حاجة.. ما احنا عندنا »عمارات« آيلة للسقوط من 05 سنة.. ولغاية دلوقتي.. واقفه علي حيلها، ولم تسقط.. مش فاهم.. حتلاقي.. مهندس الحي.. قبض له قرشين.. فساب النظام.. آيل للسقوط.. انت »حتهرج«.. لا انت اللي حمار.
خلاص ح احتفل بمحاكمة الفساد.. ايه ده.. ده امتي »اتحاكم«.. وحياة أمي ما أعرف إلا منك.. يا عم ده أنا لسه مقابله من يومين سارح في البلد وعايش حياته.. انت بتهزر.. لا انت اللي مغفل!!
طيب ح احتفل بنجاحنا في استرداد الفلوس اللي »اتهربت« بره.. والمصحف »ياله«.. أنا مستخسرك في جنينة الحيوانات.. تعرف هي الفلوس.. كانت ناويه »ترجع« بس ما تفهمش.. مين ابن حرام.. زن علي دماغها وقالها »حترجعي« تعملي ايه.. انتي هنا في »الدفا« ومصر ساقعه! يا شيخة »خليكي«.. فسمعت الكلام.. انت فاكرني هندي.. لا العفو وهما الهنود ييجوا فيك حاجة.
طيب ايه رأيك ح احتفل بتحقيق العدالة الاجتماعية.. »لا« دي بقي ليك حق تحتفل بيها.. بس وحياة الغالية عليَّ أمك..، وانت »زنقينك« في الاتوبيس.. ابقي اسأل اللي بقاله »ساعة« واقف وراك.. انت ايه اللي مركبك »اتوبيس« يا جدع انت.. هي مش »الثورة« عدلت الأجور.. واديتك أد كده.. هوه مش حيرد عليك »ببقه« بس حيدلك من اللي خده.. وساعتها اوعي »تزعق«!! وتلم الاتوبيس عليه!
انت كده.. »بوظت« علي »الاحتفال«.. ليه يا أمور.. ما »بظش« ولا حاجة.. روح يا حبيبي حيركبوك مراجيح.. ويلعبوك »شلح«.. وحيخلوا الساحر يطلع الخابور اللي اخدته علي سهوه.. وحيأكلوك »بونبوني«.. وحيعملوا »سحب« علي »قفاك«..
يا راجل ده كفاية المفاجأة اللي عاملينها في الاحتفال.. بيقولوا انهم اتفقوا مع الطرف الثالث يحتفل.. وسطكم!!.