"مواطن بدرجة بلياتشو" بمركز كرمة ابن هانىء الثقافى

ينظم مركز كرمة ابن هانىء الثقافى - متحف أحمد شوقي - بالتعاون مع جماعة خرابيش الأدبية ندوة لمناقشة ديوان "مواطن بدرجة بلياتشو" للشاعر علاء جمال ، وذلك فى الخامسة من مساء بعد غد الأربعاء ، ويناقشه الناقد مدحت صفوت.
ومن أجواء الديوان ننشر قصيدة "مواطن بدرجة بلياتشو" والتى يقول فيها :
ولأنك رافض أسلوبي لعيشتي
فبيتهيألك إنك أفضل مني
ولأني بعيشها بوش وحيد
وانت اللي عايشها بألف قناع
فبيتهيألك إن العالم سيرك
وانت الأراجوز
واقف بتضحّك خلق الله
لكن جواك
أنا عارفك
قلبك دايماً ضارب بوز
وبتسخر منهم
وتملي تلومهم
على لحظة ضحك
أنا زيك يمكن كنت زمان
بتعلم نط الحبل
ومخطط قلبي كاروه
وبحاول أبقى عبيط
لكن دلوقت
الدنيا خدتني لفكر جديد
وكأني كبرت
وبقيت
بسأل روحي وبتسائل
لإمتى هتفضل جاهل ...؟
ولإمتى هتفضل
زعلان من روحك ؟
ومش متفائل ؟؟
ومصمم إن العالم ضدك
ولإمتى هتفضل مفعول به ؟
مش فاعل
ولإمتى هتعشق مشي الليل ؟
والقعده ف ضل الحيط
مليت ....... ؟
أنا زيك يمكن كنت زمان
بتعلم شيء ،،،، ورا شيء ،،،،، ورا شيء
وبتقن نط الحبل
وبحاول أبقى عبيط
لكن دلوقت
بطلت اتعلم حاجه
وخرجت خلاص م السيرك