يوميات شابة جداً: موعد مع السعادة

إلى يوم سعيد في حياتي:
أعادتني إلى أيام طفولة بعيدة كنت فيها صديقة للفيل آخذ معه صورة كلما ذهبت إلى حديقة الحيوان، أردد أغاني نيللي وأستمتع بتوم وجيري، وأعشق مداعبة صغار القطط والنط على كراسي الأتوبيس النهري أمام شباكٍ زجاجه مكسور، فيعصف الهواء بشعري، وتتطاير شذرات المياه بهدوء على وجهي.
كتبت هذه الكلمات تعليقاً وتخليداً ليوم من أيام مشروع تخرجي كنت فيه واحدة ممن يجلسون على مقاعد السيرك الأمامية تصفق للبلياتشو، وتندهش ملامح وجهها بعد كل حركة للساحر، وغضبَتْ عندما لم تتمكن من رؤية مدرّب الأسود، رغم أني تعديت العشرين.

فكان يوماً من أيامي التي لا تُنسى رغم أن ذهابي كان بقوة الدفع من زملائي الذين حاولوا إثنائي عن مقابلة د.عبد الوهاب المسيري، وإجباري على أن أذهب للسيرك لأكتب تقريراً صحفياً يقارن بين البلياتشو ومدرب الأسود.. تصوّروا
أنا: إزاي يا جماعة أروح السيرك.. سيرك إيه وهو أنا طفلة.. طب بذمتكم أروح أقول له إيه؟!
الجبهة التانية: ده أحسن ليكي يا عبيطة، حوار البلياتشو أهدى وأريح من حوار د. عبد الوهاب المسيري، ده عايز دماغ عالية أوي، خلي أسماء وآية يروحوا، والله يرحمهم بقى، وإنتي روحي مع معتز السيرك.
أنا: يا خبر أسود، السيرك ومع معتز.. ده أنا كده اللي الله يرحمني برحمته الواسعة، وإن شاء الله هاعمل الحوار لوحدي، ومعتز لسه قاعد مع أصحابه بتوع الجوّالة بيرقصوا دبكة، وبلدي كمان.
الجبهة التانية: خلاص مافيش كلام تاني.. هتروحي يعني هتروحي.
وقتها لم يكن لديّ حيلة للهروب، وذهبت معي ورقة مكتوب عليها البلياتشو، السيرك القومي، معتز هيستناكي الساعة 8 قدام السيرك، بس ما تنسيش الكاميرا والمسجّل.. يا سمّ.
وكانت مفأجاة لقيت معتز مستنيني فعلا، ومعاه أسئلة كمان، وإيه بقى مستعجل نعمل الحوار.. يا ما أنت كريم يا رب.
معتز: اتأخرتي ليه؟ ده أنا واقف بقالي ساعة.
أنا: ساعة بحالها؟ يا شيخ قول كلام غير ده، ده تلاقيهم عشر دقايق.
معتز: إحنا اتأخرنا على البلياتشو، وهنضطر نستناه بعد ما يعمل الفقرة بتاعته.
أنا: نستناه، مافيش مشكلة.
معتز: لو سمحت من فضلك، هو فين البلياتشو؟
واحد كده: حضرتك هتلاقيه في أوضته دلوقتي علشان العرض خلاص، ومش هتلحق تقابله.
أنا: اللهم طوّلك يا روح، طب ماشي قل لنا هو فين.
نفس الواحد كده: عندكم في آخر أوضة هناك.
البلياتشو: إنتم اتأخرتم كده ليه؟ كده مش هينفع الحوار إلا بعد العرض، هو إنتي اسمك إيه؟
أنا "مع ابتسامة عريضة لرجل تخفي الألوان ملامح وجهه": سعاد.
البلياتشو: هههههه.. أنا شربت حشيش يا سعاد. "وواضح طبعاً إنه بيقلد عادل إمام في فيلم كراكون في الشارع"، وإنت يا أبو نضارة؟
معتز: معتز حضرتك.
البلياتشو: لأ إنت اسمك كويس.
أنا "في سري طبعا": حتى أنت أيها البلياتشو.. معلش حوار وهيعدى، ولما أرجع لك يا مروة إنت ودعاء.
البلياتشو: إنتم بقى تشوفوا العرض، وبعدين نعمل الحوار إن شاء الله.
أنا: عرض إيه؟ يعني هنعقد في السيرك؟
معتز: أيوه.
أنا: دي حاجة حلوة خالص.
ومن هنا تحولت وكأني طفلة يكافئها أبوها بزيارة السيرك بعدما نجحت في الابتدائية بمجموع محترم "على فكرة أنا كنت الأولى على المدرسة ومع ذلك أبويا ما ودّانيش السيرك واكتفى بتمشية على النيل.. مش مهم".
ودخلت قاعة السيرك الكبيرة بسقفها العالي، وموسيقاها الصاخبة التي تستطيع تمييزها بسهولة، ويحيط بي الأطفال وآباؤهم من كل مكان، وهنا اشتغل اللعب العيالي، أعطيت لمعتز الأوراق والكاميرا والكاسيت والشرائط، وجلست متأهّبة لعرض خيالي من البلياتشو والساحر ولاعب الترابيز، ناسية أني جئت في مهمة رسمية وليس للعب والاستمتاع بألعاب أطفال لم يتعدوا سن الخامسة، وتذكرت فقط أنه رغم مرور كل تلك السنين لم أرَ السيرك ولم أمرّ عليه حتى من بعيد، وكانت آخر حاجة أعرفها عنه فيلم "السيرك" لحسن يوسف، وكنت باشوفه بس علشان أسمع محمد رشدي وهو يغني:
"سالمة يا سلامة..
فين أيامك..
سالمة يا سلامة
وحشني كلامك..
وليالي يا عيني نسهر ما ننام
نحكي الحواديت زي الأحلام
وتقول لي كلمة وأقول كلمة
ونجيب في كلام زي النسمة
سالمة يا سلامة.."
حلوة مش كده.. نرجع بقى للسيرك.. دلوقتي بدأ العرض.. ده البلياتشو، والساحر، وإيه ده كمان.. مش عارفة اسمه بس حلو أوي.
أنت الآن تستطيع أن ترى وجهي.. مبتسم وسعيد جداً جداً، وكأني عدت طفلة من جديد تلعب في الشارع مع البنات والولاد.. استنفدت كل طاقتها في اللعب، وعايزة تنام استعدادا ليوم جديد من اللعب من الصباح وحتى بعد مغيب الشمس، حتى تنادي عليّ أمي: "يا داليا "وهكذا تناديني" اطلعي بقى الشمس غابت علشان تتغدّي"!.
وبعد حوار كان ممتعاً ودوداً بيننا وبين البلياتشو الذي رغم تجاوز مدة حوارنا معه الساعتين لم يقل لنا اسمه الحقيقي ولا أين يسكن، كان فخورا بعمله الذي يُسعد الكبار قبل الصغار.. انتهى وكنت لا أزال سعيدة، لا أتذكر التذمّر الذي سبق الحوار، ولا القلق من السير في الليل وقت رجوع الجميع ليسكن هادئا في بيته، لديّ إحساس عالٍ بالأمان والدفء، دفء طفولة سعيدة مرّت لم يكن يعلم فيها القلق ولا الحزن إليّ طريقاً.. وأهم شيء أني لم أعد غاضبة من مروة ودعاء اللتين أصرتا على عدم ذهابي إلى عبد الوهاب المسيري واختارتا لي السيرك، بل انتويت أن أُحضر لكل منهما وردة حمراء مكتوب عليها "أحبك جداً".
تعرفوا بعد ما خلصنا الحوار أعادنا البلياتشو إلى صالة السيرك مرة أخرى مجاملة لنا، وأجلسنا في مكان جميل قرب المقدمة لنرى العروض بوضوح، دون تذاكر.. وحينها قال لي معتز: "لازم نروّح دلوقتي.. هتتأخري".
أنا: إيه النكد ده؟ ما تخلينا قاعدين شوية.
معتز: ما ينفعش.
أنا: طب مش لسه عندنا حوار مع مدرب الأسود.
معتز: بعدين بقى.
أنا: طيب، "وعلى رأي نيللي في الفوازير": "هنروّح".
واجتزنا البوابة وكأني أسمع موسيقى حلوة في أذني.. رأيناه، هو مدرب الأسود محمد الحلو على البوابة.
أنا: معتز.. معتز.. بص مدرب الأسود أهو.. ما تيجي نكلمه
معتز: دلوقتي؟
أنا: آه دلوقتي وفيها إيه؟
وبمجرد أن اقتربنا.. رأيناه هو برضه مدرب الأسود بس بيتخانق مع سيدة تبدو قريبته أو زوجته، وتخيّل بقى لما مدرب الأسود يتخانق هيبقى عامل إزاي.. وهنا......
أنا: معتز.. ما تيجي نروّح!
معتز: لا يا شيخة، ما تيجي نكلمه..
أنا: يا أخي مش دلوقتي.. بعدين بعدين.