البلياتشو

كان فيه بلياتشو عظيم عامل زى القرد.. لابس بدلة وماسك قديم بيضحّك طوب الأرض.. بص لنفسه جوه مرايا.. قال أنا بعمل كده برضايا.. بس أنا نفسى من جوايا.. أطلع برة العرض.. جرب يعمل شرطى مرور.. واقف بينظم فى طابور.. عربيات وموتوسيكلات والتاكسى جنب الحنطور.. وف مرة طفل بيعدى.. والسواق مش راضى يهدى!
خبط الطفل.. والبلياتشو غطى عيونه بالطرطور.. جرب يلعب دور جراح.. يشفى مريض ويداوى جراح.. دوره يكد ويشقى ويتعب ويخلى غيره يرتاح.. حاول مرة ينقذ روح بنت كان قلبها مجروح.. جرب يشفى جراحها بإيده.. ماتت البنت وقلبها راح.. جرب يلعب دور فنان يرسم صورة بالألوان.. يتخيل نفسه ف أى مكان.. ويروحله بفرشة ولون.. حاول يرسم عالم تانى حب وصدق وخير مجانى.. صاحبى حبيبى يضحى عشانى..
ضحكوا وقالوا عليه مجنون.. قرر يرجع تانى البيت.. قال ده السيرك اللى أنا حبيت.. جوه حيطانه أنا اتربيت.. واتعلمت ف عمرى كتير لكن حاجة جديدة شايفها.. حكمة كان لازم أعرفها.. لما أبص كتير حواليا.. ألقى الدنيا دى سيرك كبير.. البلياتشو هو صحيح بلياتشو لكن قلبه كبير.. فاكر إن السيرك ده عرشه قال يعنى هو أمير.. طب دا يوم ما بيقبض قرشه بيخلصه فى الخير.. ولما بييجى ينام على فرشه بيحمد ربه كتير.. وف مرة بيأزأز لب وقاعد جنب الساحر.. قاله يا ساحر نفسى أحب وآخد حبى وأسافر.. بص الساحر ليه وزعقله وقاله أكيد بتهرج.. يا بنى دورك وسط الناس إنك تبقى مهرج..
يعنى الناس مش جايه تحبك جايه علشان تتفرج.. قاله البلياتشو: حتى أنت يا صاحبى بتقول ع الحب جنان.. يعنى هتعمل زى البنت اللى عرفتها زمان.. كانت أختى وبنتى وأمى وطبعاً كنا أصحاب.. كانت شايلة كتير من همى ودايماً فاتحة الباب.. لكن فجأة بقى مقفول ليه من غير أسباب.. بص يا ساحر كده م الآخر.. أنا هفضل على حالى.. ما أنا طول عمرى كده بلياتشو طب إيه اللى جرالى؟ إيه يعنى بنت أمورة جت لحظة على بالى! كانت أختى وبنتى وأمى وكان.. مكانها عالى؟ ما أنا لو آخد بس بكلمة كان واحد قالهالى.. قال أنسى اللى نسينى.. وأبقى للى بقالى.
معتز على أحمد