بالفيديو: الرائد أحمد شومان في رسالة للثوار قبل تسليم نفسه:” ما تسيبوش الميدان.. وفرقوا بين الجيش والمجلس العسكري”

* شومان: أقصد بالميدان ميدان التضحية لازم نضحي علشان البلد.. و” أنا متأكد من نجاح الثورة”
* الرائد لأهالي الشهداء والمصابين:” ده ثمن قليل جدا لمصر”.. ولزملائه بالجيش:” عملت ما يمليه علي ضميري”
* “مكنتش عاوز أبقى عبد الناصر ولا “آكلها والعة” ولا كنت عايز أعمل انقلاب عسكري.. كل أملي إن البلد تفوق وما ترجعش تاني للوراء
كتب – أشرف جهاد:
تداول نشطاء على موقع التواصل الاجتماعي الفيس بوك مقطع فيديو سجله الرائد أحمد شومان الذي انضم لمتظاهري التحرير للمرة الثانية خلال الأحداث الأخيرة قبل تسليم نفسه للشرطة العسكرية ليلة السبت 26 نوفمبر.
وقال الرائد أحمد شومان في رسالة لشباب التحرير :”أنا واحد منكم وأقل واحد فيكوا.. أنا جيت وراكوا أصلا”.
وأضاف:”البلد الآن راحه في داهيه, وياريت نقف مع بعض ونربي جيل يخاف على البلد بجد بدل ما هم زرعوا فينا من 30 سنة عدم الولاء والوطنية, لكن الحمد لله كل ده ظهر في الميدان وعكس أصل المصري بجد”.
وأضاف:” أنا متأكد من نجاح الثورة”, وقال موجها كلامه لأهالي الشهداء والمصابين:” ده ثمن قليل جدا لمصر”.. وأكد :”الشباب هم أمل البلد”.
وفي رسالة لضباط الجيش قال:” أنا عارف أنكوا كلكوا بتحبوا البلد, بس أنا عارف إن ظروف مجتمعنا العسكري صعبة شوية, أولا محدش يفكر أني عملت حاجة غلطت أنا عملت ما يمليه علي ضميري والحمد لله أني قدرت آخذ موقف مرة واتنين وهاخده عشرة كمان لو قدرت”.وأضاف:” وفي الآخر: قل لن يصيبنا إلا ما كتب الله لنا”.
وأكد متحدثا عن قوى الغرب:”أنهم يحاربونا علشان ما نقمش وما نفقش لأنهم يعلمون اننا لو فقنا سنحارب مخططاتهم.. وأضاف :”كبارنا عارفين المخططات دي وقاعدين على كراسيهم وبس”.
وأضاف موجها كلامه للشعب المصري:”أنا مكنتش عاوز أبقى جمال عبد الناصر ومكنتش عاوز آكلها والعة زي ما تقالت لي إمبارح بالميدان ولا كنت عايز أعمل انقلاب عسكري.. كل أملي إن البلد تفوق.. و ما نرجعش تاني لأن لو رجعنا هنرجع أسوأ ..لأن هم بيلعبوا على وتر انهم يزهقونا.. لا مش هنزهق . والجيل اللي بعدينا أكثر حزم وهم اللي هيقودوا البلد وهيكملوا ورانا”.
وردا على سؤال أحد الأشخاص هل تريد البلد مدنية أم عسكرية قال شومان:” لا طبعا لا أريدها عسكريا” .. وطالب بالتفريق بين الجيش والمجلس العسكري قائلا:”الجيش بتاع الميدان, الشباب اللي في الميدان أولى بالجيش من المشير طنطاوي.. آخر طلبي للشباب :”لازم كلنا نقف مع الجيش أوعوا تكرهوا الجيش.. هو أمل البلد هو اللي بيدفع تمن السياسة الخطأ وده وضح في 67 ووضح فيما بعد 81′′.
وقال شومان إنه حاول تسليم نفسه لرئاسة القوات الجوية لكنه لم يجد أحدا, وأضاف سأذهب لوحدتي أو الشرطة العسكرية لتسليم نفسي”.
وفي رسالة أخيرة قال للشباب وثوار التحرير:” أنا عاوز الشباب ما تسيبش الميدان, والقصد من الميدان ميدان التضحية لازم نضحي علشان البلد , والله البلد تستاهل”.
واختتم أحمد شومان قائلا:” لا إله إلا الله”.
شاهد الفيديو: