غضب وسخرية ضد خبر “مبارك يطلب العفو”.. ودعوات لثورة غضب في 27 مايو.. وناشط : خليه يتسلى

* ناشطون يردون بنشر قصيدة “لا تصالح” .. ونسمة تليمة: هي أشياء لا تشترى.. وآخرون: أنا ماحستش بالتغيير ونازل تاني التحرير
* عايدة سيف الدولة : عودة مبارك .. وصفحة على الفيس بوك : إحنا آسفين يا مخلوع لا أسف ينفع ولا فلوس تشفع
* تعليق: إحنا نقتل جمال ونحرق علاء ونسحل سوزان ونغرق أحفاده فى عبارة، ونعتذر له لو قبل اعتذارنا هانقبل اعتذاره
* محمد خير: مطلوب توكيل يوقع عليه ” شهداء الثورة .. وبثينة كامل : اعتذاره لا يعفيه من المسئولية و المحاسبة
* رامي البساطي : بقالنا كام يوم بيقولولنا مصر هتفلس مافيش استثمارات القمح لا يكفي .. يا ترى فيه علاقة بين التسريبات دي والخبر ده
* كريم يوسف: “مبارك يعتذر عن السرقه ماشي طيب والقتل؟”.. وهبة الشرقاوي : لا تصالح ولو اثلجو صدرك بالبيانات فكلها كاذبة
* عبير سعد : آسف سرقتكم وخصخصتكم وسرطنت اطفالكم ثم حجمتكم وقزمت دور بلدكم ثم ورثتكم وورثتكم ثم كممت أفواهكم
* شامبونجو: اسمي مبارك بعت أراضي البلد المتر ب 3جنيه شاملة المرافق بس عملت مراحيض عامة هاتساعدني.. وسمعني لطيفة ” أسامحك وماله”
كتب – نور خالد :
أثار خبر جريدة الشروق عن إعتزام الرئيس المخلوع حسني مبارك طلب العفو من الشعب واعتذاره عن ما بدر منه وزوجته سوزان ثابت من أخطاء خلال فترة حكمه, وإبداء رغبته وزوجته فى التنازل عن كل ممتلكاتهما لصالح الشعب المصري ردود أفعال متباينة بين النشطاء على موقعي التواصل الإجتماعي الفيس بوك وتويتر, تنوعت ما بين السخرية والغضب والدعوات للثورة مجددا احتجاجا على ما وصفوه بسرقة الثورة.
ودعا بعض النشطاء إلى التظاهر مجددا يوم الجمعة المقبلة 20 مايو للتأكيد على ضرورة محاكمة مبارك ورموز نظامه, والمشاركة في ثورة الغضب الثانية يوم 27 مايو.
وتناقل النشطاء مقطع فيديو لقصيدة “لا تصالح” لأمير شعراء الرفض أمل دنقل, كما قام ناشطون بتأسيس صفحة على الفيس بوك بعنوان ” إحنا آسفين يا مخلوع لا أسف ينفع ولا فلوس تشفع”.
قال مؤسسها : كان زمان ياللى كنت ريس ، ثورتنا ثورة كرامة مش جياع وفلوسنا هترجع هترجع ... دم الشهداء والمعتقلين والمعذبين مش هننساه ولا هنقبل ثمن إلا المحاكمة العادلة... ثلاثين سنة فساد ودمار مش هيخلونا لحظة نفكّر نسامحك على اللى عملته فى أجيال راحت وأجيال جاية ... والقانون لازم ياخد مجراه يامخلوع.
وكتب عمرو خيري يقول :تصدق ان الصفحة بتاعه مش قابل اعتذارك يا مخلوع دى محجوبه في السعوديه.....!!!!!!! اه والله العظيم تلاته ...... هي بقت كده عيني عينك”
كما كتب عشرات الناشطين تعليقات غاضبة على ما وصفوه ب”سيناريو العفو عن المخلوع”..
علي بدر : مصر الان معمل تجارب المجلس العسكرى بصراحة الان انا اكره بسبب تسريب بلونة الاختبار بتاعت مبارك حيعتذر للشعب مقصود منها ايه يقدر حد من المجلس يقولى الموضوع بقى فى منتهى التلاعب بعقول المصريين كفاية احنا مش معمل تحليل.
أما نسمة تليمة فقد كتبت : “هى أشياء لا تٌشترى” مع نشر فيديو عليه قصيدة أمل دنقل لا تصالح وخلفيتها مشاهد لشهداء الثورة
وكتب ناشط على صفحة أفوض وائل غنيم يقول: من الممكن ان نعفو عن اخطاء عبد الناصر والسادات على إعتبار انهم أخطأوا عن سؤ تقدير وليس عن سؤ قصد ولكن من أخطأ لمدة ثلاثين عاما بقصد وبنية مبيتة للافساد فلا يجوز العفو عنه.
وقالت عبير سعد: ” وبعث بابا حسنى ...لابنه الصغنون الأمور ...بأهداء واعتذار وبيقوله ....انا اسف يا شعب .. لماذا سيادته سيعتذر ؟؟؟
لأنه اخطأ بحق الشعب فعلا ؟؟؟؟ يبقى معنى كده انه قبل ما يقول اسف مفروض يقول ...نعم ..سرقتكم ...ثم نعم ...تاجرت فى السلاح اللى استعمل فى قتلكم ...ثم خصخصتكم بداية من الارض ...للمصنع ...للتاريخ ...لفهمكم وانسيانيتكم ....ثم سرطنت اطفالكم .....ثم حجمتكم ....وقزمت دور بلدكم .......ثم ورثتكم وورثتكم ...ثم كممت أفواهكم” .
ناشط آخر على صفحة أفوض وائل غنيم علق قائلاً: إحنا نقتل جمال ونحرق علاء ونسحل سوزان ونغرق أحفاده فى عبارة، ونعتذر له لو قبل اعتذارنا هنقبل اعتذاره.
أما كريم يوسف فقال: “مبارك يعتذر عن السرقه ماشي طيب والقتل؟”.. وقالت نيفين وجدي : “الشعب المنتهك واهالى الشهداء هم القاضى الوحيد وقد سبق اصدار الحكم”
و علقت عايدة سيف الدولة على طلب العفو قائلة:”عودة مبارك “..
وقال محمد خير: “الأوراق المطلوبة للعفو عن مبارك: صورة البطاقة، اعتذار مكتوب، وتوكيل يوقع عليه زياد بكير واحمد نسيم وكريم بنونة .. ” شهداء الثورة ”
فتحي عزام : “ايه الحكايه كلام عن اعتذار و عفو و بروباجندا خايبه كده هوه فيه ايه ؟ لا الاعتذار مقبول و لا العفو ممكن و لا ينفع و كلام عن ان معدل النمو لن يزيد اكتر من 2% و عن عجز ضخم فى الموازنه العامه وعن خسائر كبيره للسياحه و نفضها سيره و نعفو عن مبارك و عيلته وبالمره عن نزلاء طره كلهم و ننتبه للتنميه والعفو من شيم الكرام و ليذهبوا فهم الطلقاء”
لتكن الجمعه 20 مايو فى ميدان التحرير و كل ميادين مدن مصر جمعه الاصرار على الثوره و حمايتها و على محاكمات فوريه عاجله عادله بنصوص القانون و الاصرار على نقل مبارك فورا لطره و الهانم للقناطر و لن تكون هناك لا تنميه و لا استقرار ابدا طالما هناك من يملك ترف العفو و النيه لاهدار دماء الشهداء”
ياسر الزيات : لكي نفهم خبر الشروق ص1 عن اعتذار مبارك يجب أن نقرأ خبر الوفد ص1 عن سرقة مستندات تخص حسابات مبارك السرية من البنك المركزي في 2 مايو.
بثينة كامل : اعتذار مبارك للشعب المصري علي ما أصاب الشعب المصري في عهده من فقر و جهل وقهر و مرض واجب في كل الاحوال و لكن اعتذاره لا يعفيه من المسئولية و المحاسبة
دكتور خالد عبد الرحمن : اعتذاره وارجاع اموال الشعب لا يعفيه عن المحاكمه والحبس ولو سامحناه عن نهب الاموال فكيف نسامحه عن قتل المتظاهرين والخيانة
عمر الأنصاري : خليه يتسلى
هبة الشرقاوي : لا تصالح ولو اثلجو صدرك بالبيانات فكلها كاذبة
رامي البساطي : بقالنا كام يوم بيقولولنا مصر هتفلس مافيش استثمارات أجنبية القمح لا يكفي سوى ستة أشهر ، يا ترى في علاقة بين التسريبات دي والخبر ده ، يمكن علشان نقبل الاعتذار ونرضى بالأمر الواقع
رحاب أبراهيم : يحضرلنا خطاب اعتذار ...مبارك دا عنده افتكاس في الشخصية.
محمد قابيل تعليق على قضية فساد : ايه يعني يا وائل المخلوع هيعتذر وخلاص . خلاص علي العمر اللي راح وخد معاه حاجات مش ممكن تيجي تاني.
طارق دوير : انا محستش بالتغيير ونازل تاني التحرير .. كلنا نازلين 27
هادهوتا على تويتر: أترى لو فقأت عينيك وثبتّ مكانهما جوهرتين.. هل ترى؟.. هي أشياء لا تشترى.. يا روح أمك.
مريم دبي : أسف ؟ بعد فتح السجون والمعتقلات؟سيبت المجرمين وسلحتهم واطلقتهم علي ولادك العزل ؟ خليت مصر كلها تنام في الشارع تحرس بيوتها.
ناشطة على الفيس بوك : يا ترى المجلس الموقر عايز ايه ؟؟ المجلس العسكرى المحترم اذاى تسمح بتسريب خبر ذى دا وانت عارف انه هيولع الدنيا مجرد تسريب خبر ذى دا فى حد ذاته خيانه احب اقول للمجلس العسكرى انت فقدت مصداقيتك مبقاش حد يصدقك فى اى خبر تقوله وفى اى موقف بتتخذه انت مواقفك مش مفهومه وكان عليها علامات استفهام كتير لكن مع الوقت وكثرة اخطاءك وعثراتك اتفهمت وعرفنا انت مع مين بالظبط انت موالى لمبارك وماشى على نهج مبارك وانت بكدا جاوبت على السؤال.
ليتل بدر : لاتصالح ولو قيل رأس برأس. أكل الرؤوس سواء.
مريد: لؤم برضه: يقعدوا يخوفونا ويقولوا الاقتصاد بينهار وهتجوعوا، وبعدين يقولوا بس حسني هيرجع الفلوس وهتتنغنغوا لو عفيتم عنه
محمد السيد : بتعتذر عن إيه؟ عن دم الشهدا.. وحقوقنا اللي راحت، عن حريتنا.. ولا فلوسنا قوت عيالنا.. وأيامنا والسنين وعيون الطيبين ولا عن السر العظيم.
شامبونجو : و سمعني لطيفة ” أسامحك و ماله و دي فيها إيه حبيبي و بحبك ماسمحكش ليه ؟ على إيه ناخدها حكاية كرامة مادمنا حلائب كفاية ابتسامة.
شامبونجو برضه : أنا اسمي حسني مبارك بعت اراضي البلد كلها المتر بتلاته جنيه شاملة المرافق ، بس عملت مراحيض عامة تحت كوبري الازهر هاتساعدني ؟.
شامبونجو تالت مره : أنا اسمي حسني مبارك خربت البلد و نشرت كل الامراض ، بس عملت حفلة الميلينيوم تحت سفح الهرم هاتساعدني
فاروق عادل : لم يخترع القانون لقبول الاعتذارات وجلسات الصلح العرفية ....حد يقوللى فى ام قانون فى البلد ولا لأ ؟
تويته : افتكرت اغنية منير..طلب السماح حبيبى قلت سماااح حبيبى ورجعلى ناادم ع الى كاااان...بس ينسى ف روح امه وف رواية اخرى ف روح ابوه.
تويته برضه : أنا اسمي حسني مبارك ذليت شعب 30 سنة و ضيعت أجيال و قتلت و شردت و سجنت و اتريقت على موت أبرياء بس عملت مترو أنفاق هاتساعدني.
السنهوري : ربنا رحيم يا مخلوع.. روحله وهو يرحمك، حتى ربنا أنا واثق إنه مش هيسامحك في دم الشهدا.
محمد علي : سؤال بس: هوا ليه بيتم السماح للمخلوع بإلقاء خطابات مسجلة وهو متهم والمفروض مسجون على ذمة التحقيق؟
إنسانة : ويعني إنت عملتلنا ايه اصلا؟ قتلت حبة وإعتقلت حبة ومرضت حبة وخليت حبة يدمنوا والباقي خليتوا جاهل ... وسرقتهم جميعا
ومحمد حسن : لا حل سوى التحرير .. أنا ما حسيتش بالتغيير ونازل تاني التحرير