"آسفين يا أمن الدولة " و"عاوز ملفى".صفحات ساخرة على فيسبوك

كعادتهم فى السخرية منذ بدء الثورة دشن مجموعة من الشباب حملات ساخرة احتفالا بسقوط دولة "أمن الدولة"، بدأ الكثير منها بعبارة "إحنا آسفين" فى إشارة تهكمية لأنصار الوطنى ممن يدشنون صفحات و وقفات اعتذار لكل من يخرج من موقعه بداية من الرئيس السابق مبارك والشرطة ورئيس الوزراء السابق أحمد شفيق.
وتنوعت الصفحات الساخرة ما بين الأسف ورد الجميل والتكريم مثل :"إحنا آسفين يا أمن الدولة "، "آسفين يا أمن الدولة الورق المفروم ورق أجندات مندسة" ،" إحنا مش آسفين يا أمن الدولة"، "مسيرة رد الجميل لأمن الدولة"، حيث ذكر أحد مؤسسي صفحات الأسف على حائط الصفحة "المصيبة إن فيه ناس فاكرة إن الصفحة اعتذار بجد.. إحنا بس سبقنا بتوع بقايا الحزب الواطى وبتوع آسفين يا ريس وحقك علينا يا أبو نسمة" أما صفحة الورق المفروم فكتب مؤسسها "الورق المفروم مدسوس من المندسين وده ورق أجندات تعبيرا من عن اعتذارنا لأمن الدولة من القلة المندسة اللى بتطالب بإلغاء دوره الوطنى، أمن الدولة بيحمى مصر مفيهوش تعذيب ده بيوزع بونبونى على الناس " وتصدرت الصفحة صورة لكمية كبيرة من الورق المفروم التقطت من داخل مقر أمن الدولة بالإسكندرية .
كما تم تدشين صفحة رسمية لتكريم أمن الدولة وترشيحهم لشغل منصب رئيس الجمهورية تحت شعار " معًا لاستعادة الأمن و الأمان و الاستقرار للمواطن.. معاَ لاستعادة جهاز أمن الدولة".
جروب آخر تم تأسيسه تحت شعار" أمن الدولة لا دين له" مبرزين شعار الحملة الإعلانية الشهيرة " الإرهاب لا دين له " بعد استبدال كلمة الإرهاب بأمن الدولة، كما تم تدشين حملة "عاوز ملفى" التى طالبت كل مواطن بالمطالبة بملفه الموجود بمباحث أمن الدولة وكتب مؤسسها على حائط الصفحة " أنا فعلا عاوز ملفى، بجد والله نفسي أقرأ ملفى فى أمن الدولة، أمسكه كدة بإيدى و احضنه زى فيلم تيتو و أعرف ماما أمن الدولة شايفانى وحش فى إيه، ومتنسوش يا جماعة بكرة مليونية إن شاء الله عشان نقولهم ماشي احرقوا ملفات العادلى بس سيبي ملفاتنا يا ماما ..ماما أمن الدولة".
واشتركت كل تلك الصفحات فى عرض مقاطع فيديو لوقائع اقتحام مقار أمن الدولة المختلفة ولقطات للمقار من الداخل وبعض لقطات لعمليات التعذيب التى كانت تتم بداخلها وصور لأكوام الورق والمستندات التى تم فرمها، وكان القاسم المشترك بينها جميعا هو العبارات الساخرة من هذا الجهاز الأمنى الذى كان فزاعة لكل مواطن على مدى 30 عاما، ولقد انتقت البوابة عينة من أبرز التعليقات التى كتبها الأعضاء فكان منها :
- عاجل: قررت وكالة ناسا الاستعانة بخبرات أمن الدولة فى السفر وراء الشمس.
- "أثناء اقتحام متظاهرين جهاز أمن الدولة، جرى المتظاهرون خلف أحد الضباط، ويقال إنهم قتلوه.. ولكن نتيجة الطب الشرعى المشكل من المتظاهرين جاءت: مات من إسفكسيا الخنق عشان بلع ملفات مهمة، والناس حاولوا يطلعوها من بقه فمات " ..فى إشارة لحادث مقتل خالد سعيد.
- أمن الدولة .. بدل ما تتشطروا عليها، روحوا شوفوا ملفاتكم عند مرتضى منصور.
-اللي مش هيقول أنا أسف ... هطلع ملفاته.
- إنتم حريين .. دوروا على حد يعذبكم.
- أمن الدولة ... ظلمتوهم، كانوا لازم ياخدوا فرصتهم.
- آخر كلام : اللى مالوش ملف عندنا ..مالوش خير فى مصر .
- عاجل : اكتشاف آلاف البلوفرات المحروقه و المفرومه بمقر أمن الدولة بالسويس.
- أمن الدولة : نحن ننفرد ..ليه !!؟ لأن احنا أمن الدولة الوحيد فى العالم اللى سفاراته كلها موجودة فى دولة واحده ..اللى هي مصر ..اكتر من 40 قنصلية... ومش محتاج تأشيرة ... بس الدخول لازم بعد الساعة 12 وقبل 6 الصبح فقط .
- تعرف فلان ؟ اعرفه ...... شفت ملفه ؟؟؟؟ لا ..... يبقى متعرفوش.
- أمن الدولة علاقاته رهيبة... رجال دين..سياسة..وزراء ..محافظين..موظفين..قضاة..إعلاميين..ظباط جيش..مجموعات مسلحة..رقاصات ...و أخيرا بلطجية السجون ..... أكيد هنكسب الانتخابات الجايه .. أنا متفائل.
- عاجل : على غرار أغنية شهداء 25 يناير ماتوا فى أحداث يناير، أعلن المطرب الشهيرحمادة هلال أن أغنيته الجديدة القادمة ستكون أوراق أمن دولة، لقيناها في أمن دولة .
- مسابقة اليوم: اختر الإجابة الصحيحة:..عمليات فرم الورق فى أمن الدولة هل هى : 1- فرم ورق يودى فى داهية 2- فارم فريتس 3- فارم فيل . صاحب الإجابة الصحيحة سيفوز معنا برحلة إلى مقر مباحث أمن الدولة وجولة تفقدية فى معتقلات التعذيب مع تذاكر مجانية لاستخدام كافة أدوات التعذيب، والمفاجأة الكبرى تجربة جهاز الصاعق الكهربائى مجانا.
- إزاي الناس تجيلها قلب تعمل كدة في أمن الدولة ..أمن الدولة ده هو اللي حمانا..هو اللي مفجرش الكنايس..هو اللي موقعش بين المسلمين والمسيحين..هو اللي معذبش الناس 60 سنة..هما اللي مخربوش البلد..اخص عليكم
هان عليكم العيش والملح يا مصريين..أنا أمن الدولة .... أنا مجد ... أنا تاريخ..ستندمون حين لا ينفع الندم...من أنتم .... من أنتم..لا تراجع .. إلى الأمام .. ثورة .. ثورة..يلا على مصطفى محمود جمعة فرم الورق لمساعدة أمن الدولة.
- اقترح بعد حل أمن الدولة أنهم يشتغلوا في مصانع فرج الله وحلواني لفرم البسطرمة.
- البرنامج الانتخابى لأمن الدولة تحت شعار خازوق لكل مواطن.
ضم حديد التسليح للتموين للتيسير على المواطنين شراء خوابيرهم الشخصية ( لأن استخدام الخوابير العامة بينقل العدوى)
كل مواطن له الحق فى قضاء داي يوز في أمن الدولة التابع له
كل مواطن له الحق فى مراجعة ملفه فى أمن الدولة وطلب اى تصحيح للمعلومات فيه
مكافآت مجزية لكل من يخبص على أحد اصدقائه
كل أب يستطيع طلب الملف الخاص بعريس بنته ( ده نسب برضه ولازم تبقى مطمن)
- عاجل : لعطل مفاجئ أعلنت مباحث أمن الدولة عن توقف خدمة عذبنى شكرا.
- أمن الدولة بعد تولي منصب رئيس الجمهورية :يتم تحرير مخالفة وإعتقال أي مواطن لا يشتري ويحمل أدوات تعذيبه بنفسه، إحنا ماعنديناش ميزانية تكفي 80 مليون.
- أمن الدولة: حرقنا بعض الأوراق للتدفئة وفوجئنا بهجوم المتظاهرين على المقر بالدبابات.
- آه يا ظلمة ... مالها أمن الدولة ... كانت بتقتلكم آه ... بس بعد ما كانت بتقتلكم كانت بتحميكم.
- أمن الدولة: يحز فى نفسى ما ألاقية من أبناء سيدى جابر والأنفوشى..أنا ...هعمل صفحة كلنا أمن الدولة.
- كفايه بقى خربتوا البلد أمن الدوله دول مشغلين نص البلد علشان يتجسسوا ع النص التانى يعنى يقفلوها والناس تاكل عيش منين.. حرام عليكوا وبلاش تقطعوا رزق الناس.
- عاجل : نظرا لغياب جهاز أمن الدولة قرر الأهالى تكوين لجان شعبية لتعذيب أنفسهم.
- التليفزيون المصرى: لا وجود لمقرات أمن دولة في مصر.
- كفاية ظلم لينا بقى...حد فيكوا يعرف كنا بندفع أد ايه كهربا كل شهر!!.
- أمن الدولة هو المكان الوحيد الكهرباء متتقطعش فيه .. ياريت مصر كلها أمن دولة.
- يا جماعة هو الكلام إن فى تعذيب وقتل وإهانة فى أمن الدولة ده إنتو جبتوه من مين؟! هو كان فى حد أساسا بيطلع..... سؤال يطرح نفسه.
- أنباء عن تظاهر ضباط أمن الدولة....و سماعهم يهتفون "الشعب و أمن الدولة إيد واحدة.