بالورقة والقلم .. والالة الحاسبة انهمك المصريون منذ امس الاول في تحويل 410 ملايين فرنك سويسري الي الجنيه المصري.. وهي القيمة الاجمالية التي كشفت عنها الخارجية السويسرية وتمثل ارصدة وحسابات الرئيس السابق مبارك في سويسرا فقط.. 3 مليارات جنيه هكذا انتهت الة المصريين الحاسبة الي التوصل اليها وبدوا ينهالون باللعنات والتهكمات والتلميحات والتصريحات التي سرعان ما عرفت طريقها عبر الشبكة العنكبوتية ومواقع التواصل الاجتماعي مثل فيس بوك وتويتر وزاد الاقبال من قبل كارهي مبارك وانصار الثورة الي جروبات احنا اسفين يا ريس التي تعددت جروباتهم حتي وصلت الي 60 جروب علي الرغم من عدد زوارها القليلين الا ان معظم التعليقات بها شنت هجوما شديدا علي انصار الرئيس السابق الذين وقفوا بعضهم موقف المدافع الذي اكد انها شائعة لا اساس لها من الصحة هدفها تشويه صورة مبارك الذي لا يمتلك مثل هذا المبلغ علي الاطلاق بينما اعلن بعضهم الانسحاب من جروبات تأييد مبارك وانضموا للجبهة الثانية مؤكدين انه علي الرغم من انهم قد تعاطفوا مع مبارك الا ان حبهم لمصر أكبر خاصة وان الصورة بدأت تتضح بالنسبة لهم بعد تحقيقات النيابة الاخيرة وتحريات ادارة الكسب غير المشروع .. مؤكدين ان صدمتهم في مبارك لا مثيل لها وانهم لم يكونوا يتوقعوا علي الاطلاق ان تكون تلك الارصدة البنكية الهائلة بينما شعبه يعاني ويلات الجوع والفقر . وقد انهالت التعليقات كالمطر علي خبر الخارجية السويسرية علي المنتديات والجروبات الاليكترونية وتنوعت ما بين السخرية اللاذعة والانتقادات العنيفة وخفة الظل المصرية الشهيرة .. تقول امنية : أمنية واحد مصري: ياريت مبارك كان ضربنا إحنا الضربة الجوية، وراح حكم إسرائيل 30 سنة، كان زمانهم بيشحتوا دلوقتي! بينما كتب آخر "مبارك للقاضي: أتمني من سيادتك مراجعة الأوراق فستجد فيها دليل براءتي.. القاضي:و أنت فاكرني هافر كل الورق ده؟! مبارك للقاضي: ......يا راجل كبر مخك.. القاضي: إعدام وقال ثالث : قابل يا عم " ادي حوالي 500 مليون دولار اي ما يعادل 3مليارات جنيه في بنك واحد والملاحظ ان مبارك لية في سويسرا بس اضعاف كثيرة لبن علي واكتر من القذافي ب 50 مليون مبارك الاول سويسريا والشعب مش لاقي ياكل وبيدوروا علي استثمارات وكل واحد يجي بلدنا معاة كام مليون يدينا بالجزم ويقولك دا مستثمر وبنتسول من دول العالم لقمتنا وعجبي. اما أحمد سعيد فقد كتب في تعليقه " فعلا كان منحاز لمحدود الدخل" يعني حوالي 2 مليار جنيه مصري في رصيد واحد بس لسيادته يا حرام فعلا كان راجل متقشف فعلا إن الله ليمهل الظالم حتي إذا أخذه لم يفلته 30 سنة صدعنا إنه منحاز للفقراء الحمد لله ظهر الحق ودي رسالة لإخوانا بتوع أسفين يا ريس والله ما أنا عارف أسفين علي خيبت إيه طبعا دي رسالة لهم لو هما فعلا أسفين بجد لكن لو قابضين من الرعاة الرسميين لمبارك من الأمراء الخليجيين يبقي طظ فيهم. وقال الدكتور زمزم " كده يا مبارك " كان نفسي تطلع مش حرامي بس خذلتني. اما محمد انور فقد كتب في تعليقه "نصف مليار دولار في سويسرا وماخفيي كان اعظم". وقال ايه ياخويا بيقول في تسجيل العربية انة ملوش اي حسابات او ولديي علاء وجمال اي ارصدة خارج مصر بجد منك لله يالي سارقنا حسبي الله ونعم الوكيل ..والله انا لسة قابض مرتبي 748 جنيها ومش عارف ادفع الايجار كهرباء ولا ولا فتورة التلفون ولا اعمل اية في المواصلات والا الاكل اعمل فية ايه ولا الدواء الكفن مالوش جيوب اما تعليق عمر طنطاوي فقد كان تهكميا لاذعا حمل عنوان " الكفن ما لوش جيوب بس له حسابات بالعملة الصعبة!!!قائلا " فينك يا مبارك ما تتفضل ترفع قضية علي وزارة الخارجية السويسرية!!هي برضو بتكذب؟ وبتقول بكل وقاحة ما عنديش اموال برّه؟؟ ما طبعا "قالوا لل....احلف" .. ودول يا جماعة ولا حاجة شوية فكّة اللي لاقوهم في سويسرا ودول غير ثروة اولاده نزلاء طره في سويسرا !! وغير الاموال اللي اعترفت لندن وامريكا بوجودها هناك عندها واللي مش راضيين يفصحوا عنها عشان عايزين يلطشوها وما يرجعوهاش لاسباب كثيرة منها ان هذه الاموال تستخدم في عمليات التنمية في تلك الدول وزيادة الاحتياط المالي لهذه الدول وايضا عشان تفضل مصر محتاجة لمعوناتهم ويفضلوا يبتزوها ويضغطوا عليها للتنازل في ملفات كبيرة امنية وسياسية واقتصادية!! ودي غير الصناديق الاستثمارية السرية و الثروة العقارية في بلدان عديدة !! صحيح الكفن ما لوش جيوب يا مبارك ما كنتش بتكدب في ديه عشان كفنك طلع لوه صناديق اسثمارية وحسابات مصرفية بالعملة الصعبة وثورة عقارية مهولة وهيروحوا فين دول في الجيوب!!!!! اما عوض علي فقد تساءل " راحو فين اللي كانو عايزين يرجعوا الحرامي تاني" مضيفا ضحك علي الناس كتير وكذب عليهم كتير والعجيب ان لسه فيه شوية منتفعين وعمالين يوجعوا دماغنا ببطل الحرب والسلام وعدم محاكمته وعدم اهانته ايه رايكم دلوقتي انه طلع حرامي رسمي ولا سويسرا ح تعمل المبلغ منحه او كدبه اتقوا الله بقي وخلاص شوفوا لعبه تانيه بعد الاثبات الرسمي ودوروا علي واحد غيره وانتم قدوتكم كتير من نوعيته زي مرتضي وشفيق وعمر سليمان وانتم كمان ماهي الطيور علي اشكالها تقع وانتم منتفعين منه وبنظرة ناقمة وكنها قانعة راضية بنصيبها وقدرها يقول احد الزائرين " ما تمنيت ان يكون عندي مليون جنيه مضيفا " صدقوني عمري ما تمنيت ان يكون عندي مليون جنيه......... لان ما جاش يوم احتجت للمبلغ ده...... واتمني ان ربنا ما يجعلني احتاجه ...... لكن احمد الله ان عندي كل احتياجاتي التانيه اللي حسني مبارك يتمني انها تكون عنده وما يعرفشي يشتريها بالفلوس........... انا مش عارف الناس دي سرقت كل الفلوس دي عشان يعملوا بيها ايه والاّ ياتري هم فاكرين انهم هيعيشو في الدنيا كام سنه؟؟ والاّ هم مش فاكرين ان دي هي الدنيا ...... وبكره فيه الموت وبعدين حساب امام الله؟؟؟ فمن فعل مثقال ذرة فسوف يري خيرا او سوف يري شرا. وبأسلوب تهكمي كتب ابو شومة معلقا "بحبك يا مبارك يارئيسنا ياكبيرنا !!!! بحبك لغاية روحي ما تطلع !!!! فين بقيت إخواتي العزيزات علشان يزغرطوا معايا !! وحشتنا ووحشنا عهدك ياريس !!! والنبي بس ياريت تغمزني بخمسين ألف جنيه بس والله عندي 34 سنة ولسة مش عارف أتجوز !!! بش معلش كله فداك يا كبير يا حلو !!! يا حنين وربنا يخليلك الست !!!! اصوات مدافعة من جانبهم لا يزال عدد من اعضاء جروب احنا اسفين يا ريس يدافعون عن الرئيس السابق بشدة تجاه طوفان الانتقادات الحادة يقول سلمي حسني مبارك " سمعتم قبل كده ان مبارك عنده 70 مليار وطلع غلط والله لو معاه 60 مليار يبقي برضو انتو غلط لإنكم بتصدقوا اللي بمزاجكووادينا معاكو للاخر وسويسرا بتقول 2 مليار يبقي مبروك لما نشوف الدول اللي هتدور وتلاقي "وللعلم انا لسة أسفة ياريس ومعاك يامبارك للأبد اما شادي مطاوع فقد دافع ايضا قائلا انا عاوز اعرف ايه هو رقم الحساب ومن اي بنك ومن اي جهة وكمان من امتي من حق سويسرا انها تنتهك سرية حسابات العملاء بتوعها مهما كانو وحتي لو كدا وصح انتو فاكرين ان سويسرا هترجع الفلوس دا اذا ما كانش دا مجرد كلام اشعال للفتن اكثر حول مبارك بعد ما طلع وقال انو ما عندو قالو يخلو المصريين يكرهوه اكتر وعلي العموم لسه جهاز الكسب غير المشروع ما اكد لسه كله كلام وعادي ما ياما بيكدبوا حتي امريكا بتكدب الحق هيبان ومهما كان بردو احنا مع مبارك. وكتب ثالث في جروب "ستندموا لرحيل مبارك " الرئيس مبارك ليست تخصه الاموال التي اعلنت عنها قناه الجزيرة انما هي محاوله تشويه صوره ليست اكتر وطبعا لن يكدبوا الخبر. وقالت بنت مصرية من جروب احنا اسفين يا ريس هذا الكلام كذب وافتراء مثل حكاية ال70 مليار اذا كان الرئيس مبارك لديه اموال بالخارج كان هرب وكان هذا سهل جدا علي فكرة مصر في خلافات مع سويسرا فاذا كان للرئيس اموال فليس من الممكن ان يدعها في سويسرا نفسي الناس تشغل مخها لكن مع الاسف مفيش عقل اذا كان هذا الكلام حقيقي لماذا لم يظهر علينا اي مسئول ويؤكد هذا الخبر ريحوا نفسكم لا تحاولوا مازلت اقول احنا اسفين ياريس وكتب ناصر عن انجازات مبارك خلال 30 كابوسا معددا اياها في نقاط 1 - القضاء علي مبادئ ثورة يوليو السته و هي عدم اقامة عدالة اجتماعيه وعدم اقامة حياه ديمقراطية سليمه وعدم اقامة جيش وطني قوي وعودة الأقطاع بتمليك رجال الأعمال و المحاسيب مئات الآلاف من الأفدنه وعودة سيطرة رأس المال علي الحكم و عودة الأستعمار و اعوانه عن طريق الخصخصه و بيع القطاع العام للأجانب 2- ارتفاع نسبة البطاله والفقر والمرض وخاصة السرطان 3- ظهور ما يسمي بالمناطق العشوائيه وسكان المقابر في ظاهره ليس لها اي مثيل في اي بلد في العالم و حتي المتخلف او الثالث منه 4- حادث العبارة و الدويقه و حوادث قطارات السكك الحديدية 5- تزوير الأنتخابات بصوره فجه و مستفزة علي مدي فترة حكمه 6- نهب ثروات مصر المحروسة و خاصة قناة السويس دون رقيب او حسيب 7 - السماح لأولاده باستباحة المال العام و فرض الأتاوات و العمولات علي رجال الأعمال و هذا جزء من كثير من الأنجازات الخاصه بالمخلوع . وكتب " هيرو " تحت عنوان المية تكذب الغطاس " لو الكلام دا حقيقي خلاص الراجل قدم اقرار لجهاز الكسب غير المشروع يخول بيه وزارة الخارجية بالمطالبة باسترداد اي اموال او عقارات تكون له بالخارج يبقي الموضوع سهل جدا لو الكلام دا صحيح يبقي من حق الحكومة تطالب باستردادها علي الفور من سويسرا بس بقي لو الموضوع فشنك كا العادة مش هانسمع حاجة عن استرداد هذه الاموال يبقي الخبر كذب و تلفيق زي الي قابله يا ريت نتابع الحكومة و نشوف هاتسترد الاموال دي و لا لأ بدل التهليل و الشتيمة علي الفاضي و خلاص. شوية مليارات وتخيل " التهامي " آخر تصريح لمبارك قائلا " يعني تصدقوا مستر لارس نوتشل المتحدث الرسمي باسم وزارة الخارجية السوسرية وتكذبوني انا.. أنا معرفش حاجة عن الفلوس دية اكيد حد حطهم بأسمي دي مؤامرة لتشويه سمعتي وسمعة اسرتي وأولادي. فنحن لانملك شيئا من حطام هذة الدنيا سوي بضعة مليارات قليلة في بنوك وأماكن أخري مبعثرة حتي اننا لانتمكن ولا نستطيع حصرها وانني احتفظ بحقي وسأقاضي بنوك مصر والعالم التي تكشف عن اموال موجودة بهذة البنوك بقصد الاساءة لتاريخي الذي يعلمة القائم والنائم والحاضر والغائب وهخلي فضائحكم أنتم بجلاجل وانني اعرفكم وعندي فريق من المحامين البارعين الذين سيثبتون لكم صدقي وشفافيتي انا وأبنائي وحتي كل من عمل معي من قريب او من بعيد ولو مش مصدقيين اسألوا اقرب أقاربي في بلدتي كفر مصيلحة المنوفية ان كان استفاد احد منهم بمليم واحد وليس بمليار.. وكتب خالد ابراهيم " طيب هات ياعم " كل دي فلوس يا حج محمد يا حسني يا للي زورت بيت ربنا ، وعارف انك مسلم وهتتحاسب علي كل قرش دخل جيبك ، لا وايه دا انت هتتحاسب كمان علي كل فرد من شعبك ملقاش في يوم يأكل ولا يجيب علاج لأولاده ولا يدخل ولاده مدارس ذنبنا في رقبتك ليوم الدين "" حسبي الله ونعم الوكيل "" وكتبت سحر " لماذا الكذب " طالما عندك هذه الملايين وغيره من المليارات لماذا هذه الخطبه الاخيره علي قناة العربيه وقلت كفايه ما عانيته انا واسرتي من اهانات وقلت ايضا انك لاتملك اي مبالغ نقديه في الداخل والخارج تفتكر اننا شعب اهبل بنصدق هذا الكلام ..من الاخر كده هل انت سوف تعيش قد ما عيشت وقريبا ستواجه رب كريم ماذا ستقول له عن ما فعلته في رعيتك ..سرقت اموالهم وجوعتهم وسكنتهم القبور وبنيت لهم العشوائيات وتركت اطفال الشوارع نائمين في العراء متلحفين ببعض في عز البرد وأنا نائم انا واولادي علي ريش نعام في عرش الطاووس ..يا مبارك ارحم شعبك ورجع لهم ماسرقته منهم عسي ان يغفر الله لك وتلحق ان تتوب قبل ما تقابل وجه كريم مازالت الفرصه امامك وباب التوبه مفتوح ..لكن هل سيغفر لك الله ما سببته من اراقة لدماء الشهداء والذين اتعذبوا في سجونك اتمني من الله ان ترحم شعبك وترجع المليارات التي نهبتها انت ووزارتك ..مصر تعاني وانت تركت خزنتها خاويه فاأرحم شعبك لكي يرحمك الله.
