مصطفى أبو مسلم : حلم اتقطف مني

كان شئ طبيعي وقتها اني ابوس الشمس ف جبينها ف تخجل
تختفي خلف اي سحابه عابره ف السما
والخجل شئ مشترك بينا
كان طبع فيا قبل ما العسكر يقطفوا خدود البنات الصبح ع الكوبري
نتمسك لو قولنا : حرية
ونمد ايدنا بالسلام
ف يمدوا البندقيه !
كان حلمي يشبه لورده . .
غازلت ايدين طالب ف ثانوي و راحلها
ضلت تروح وياه لحبيبته وتنتظر تلمس ايديها لوحدها
تحضنها في فصل الشتا ساعة ما يوحشها !
لكنها . .
وبرغم شوقها لحضنها ما طالتش
يا كل هذي الدموع اللي محاوطاني
فارقيني فارقيني
هو صحيح العسكري شايل طبنجه بيحمي مين ؟
والدم دا كان دم مين ؟
هل دم شخص انتحر ف شاليه لوحده من البذخ ؟
ام دم واحد وشه م الذل اتسخ ؟
مش هكشر زي جدي لما قشر ضحكته لظالم !
مش هسلم نفسي للي استرخصوها . .
مش هخلي الليل يفوت عليه سالم
مش هسيب الشوكه للي بيجرحوها
مش هسيب الميكروفون الا اما اغني
مش هسيب هذي الجموع الا اما اقول :
ان العساكر كسروا كل البيبان . .
وانا مش هسلم حلمي للي
كفرهم بالحق بان !
لذا . .
أقر انا المدعو فلان . .
ان هذي الثوره “حركه” او بروفه لمسرحيه
واني ياسيادة المشير هنتخب بإيديك مرشح . .
بكره يمسك بندقيه !
او يبوس ايد اللي ساعدوه ف الخفا !
وان هذي الدوله خاضعه للتبني
واني قررت اني اغني
ف إسمحلي من فضلك أقول :
يا حته مني اتفرقت على دا ودا . .
اقسم بأني مش هسيبك
تبكي اكتر من كدا !!
الدمعه دي غنوة . .
والضحكه دي غنوة . .
والبنت لما اتبسمت ف المترو كات غنوة . .
والثوره دي اوركسترا
عازف كمان سالف دراع صاحبه اليمين
كل اللي قاعدين يسمعوه اتخيلوه ساحر . .
جربت معرفتش بجد ابدأ منين ؟
ف عزفت هذي النوته م الاخر !
يارب . .
قول للعصافير اللي طايره ف السما
تبلغ شجرة التوت اللي ماتت من زمن تطرح . .
تبلغ قطر تسعه ونص يمشي بنص ركابه !
ويسند جسمه ع النخله
وينسى يئن لما الناس تدوس على بابه ف الدخله . .
عشان لما البلد تطرح عيال
تقطفنا م المحنه