“صمتي لا يعني رضاي” بوست على صفحة “وزارة الداخلية ” على الفيسبوك .. والمواطنون يردون : يعني لابدين في الدرا

* مواطن : عودتي لا تعني وجودي دي انا مصدقكم فيها .. امضاء الرجل اللي ورا عمر سليمان
* تعليق : محدش يقدر يهددنا بعد كده يا جميلة .. وآخر : ياعم روح نام بقي وارتاح البلد ماشيه زي الفل في غيابكو
* مواطن : ابقي أضربونا بالرصاص الحي ولا اعتقلونا ولا طلعوا المجرمين من السجون يرعبونا بلا قرف
* تعليق يقول إن وائل الكومى اللى قتل اكتر من 6 شباب فى اسكندرية دلوقتى بيهدد اهل الشهداء علشان يسحبوا الشكاوى ضده
كتبت – نفيسة الصباغ :
أثار أحدث”بوست” على صفحة “وزارة الداخلية المصرية” على الفيسبوك، الكثير من ردود الفعل الغاضبة وهاجموا الداخلية بعد أن فهموا كلماته على أنها تهديد من الوزارة وانتظار لبعض الوقت حتى تعود “ريما لعادتها القديمة”، البوست نص على ما يلي: “صمتي .. لا يعني رضاي .. وصبري .. لا يعني عجزي ..! وابتسامتي .. لا تعني قبولي .. وطلبي .. لا يعني حاجتي .. وغيابي .. لا يعني غفلتي ..! وعودتي .. لا تعني وجودي ..! وحذري .. لا يعني خوفي ..! وسؤالي .. لا يعني جهلي ..! وخطئي .. لا يعني غبائي ..! معظمها جسور .. أعبرها لأصل إلى القمه”
تعليق وحيد هو الذي أعرب عن تمنيات للشرطة بالوصول للقمة مثل: “والله إن شاء الله ربنا هيكرمكم وهتوصلو للقمه وتحمو البلد وتبقو جهاز محترم وبجد ربنا يعينكم ويساعدكم”، بقية التعليقات جاءت ساخرة وذكرت الضباط بجرائم الشرطة في حق المواطنين وقال احد الذين كتبوا التعليقات إن وائل الكومى اللى قتل اكتر من 6 شباب فى إسكندرية دلوقتى بيهدد اهل الشهداء علشان يسحبوا الشكاوى ضده بقية التعليقات جاءت كالأتي :
- كويس انكم عارفين الحاجات دي والله
- ده تهديد ده؟ والنبي اتلهي
- محدش يقدر يهددنا بعد كده يا جميلة و اظن هما شافوا احنا نقدر نعمل ايه وكله بالقانون ومش بنتجاوز حدودنا .. وعودتي لا تعني وجودي.. دي انا اصدقكم فيها.. تأليف الراجل اللي ورا عمر سليمان
- نصيحة: استخدموا لغة رسمية (عربية فصحى) لإشعار المواطنين بأن الجهاز يعمل ويتعامل بطريقة منظمة
- واحنا كمان صبرنا بدأ ينفذ وأساليب التهديد دي متنفعش يا حبايبي
- ما هذه الميكيافيليه ؟ هل هذا هو العهد الجديد؟ يعنى بالبلدى و خلى البساط أحمدى: لابدين فى الدره , عادت ريما لعادتها القديمه لن يسمح هذا الشعب بهذا ابدا
- ياعم روح نام بقي وارتاح متخفش علي البلد البلد ماشيه زي الفل في غيابكو اساسا
- وائل الكومى الى قتل اكتر من 6 شباب فى اسكندرية دلوقتى بيهدد اهل الشهداء علشان يسحبوا الشكاوى ضده
- ابقي أضربونا بالرصاص الحي ولا أعتقلونا ولا طلعوا المجرمين من السجون يرعبونا بلا قرف
- يا وزارتنا اخبار القناصه اللى على الاسطح ايه؟ اسألوهم بيناموا ازاى .. وازاى تغمض عيونهم ؟ اسالوهم عن صور الشباب اللى ماتوا مش بتفارق خيالكم؟ وضميرهم عامل ايه؟ عايش ولا لسه ميت؟ قولوا لهم شعب مصر بيدعو عليكم ليل نهار انكم تشوفوا اللى عملتوه فى اعز ما تملكون
يذكر ان مؤسسي الجروب وضعوا صورة لمظاهرات الشرطة وهم يرفعون علم مصر وكتبوا اسفلها فتية أمنوا بربهم .. فيما قدم مواطن تعليق يطالبهم فيه أن يتعاملوا باحترام مع المواطنين وقال تخيل لو ظابط قال لمواطن لو سمحت الرخصة بتاعتك .. المواطن هيرد عليه والله ما هي راجعة يا باشا .