دعاء عبد الوهاب : أنا إنسان

أنا اللي باصوم
وأصلى الفَرض ف معادُه
وعندي خلاف مع الإخوان
أنا المؤمن ب حرية ودور الفن
لكن مبشوفش فيلم خليع
ولا مشهد يكون عريان
أنا اللي باحارب الظالم
لكن ما شمَتش فيه لو مات
وبافضح خِسة الخاين
لكن مبقولش فيه إشاعات
أنا اللى باحب طعم المحشى من أمى
واحب آكل مع صحابى ف كنتاكى
وباتضايق
واجِز بغيظ على سنانى
لو الفاسد سمعتُه يقول.. بيهواكى
وأقول رأيي وأدافع عنه بشراسة
لكن ما خسَرش عِشرة عمرى ف سياسة
وعمري ما هابقى صورة تشوفها بالكربون
عشان أرضيك
لكن تعارضنى مش هازعل
ولا هاخوِّن ولا أغلط فيك
وف الآخر
ومهما بنختلف نفضل
أنا إنسان
Comment *