خالد كمال : عشان نفرح

ما طول عمر الأمل مكتوب
على القلب اللي داق مَرة
وطول عمر الفرح نسمة
تعدّي في حر يوم هيمُر
وطول عمرك
محاوطك كل عشاقك
بيعتذروا على الفرقة
ويتمنّوا الرجوع للطُهر
وأنا قلبي
بيظهِر حُبه لعينيكي
وغيرته شوية تتدارى
عشان وقت الدفا ميضِعش
أنا معرفش
كام باقي من الأحزان عشان نفرح
ومش عارف
يا إما إن الإيمان باهت
يا إما الوحي فوق منزِلش
يا إما اللمسة فوق حضنك
هتمسح كل شيء سابق
وحضنك لذّته بتجهز
بلاش نضحك على الأيام
محدش قبلنا عملها ومتبهدلش
بلاش نحزن من الماضي
بلاش نقلق على بكرة مجاش لسه
بلاش الوقت يسرقنا بأفكارنا فمنكمّلش
ولو برد الشتا أحزان
هضمك للدفا أكتر
وضمّي عينيكي للآخر
عشان أدفى
ما طول عمرك
بتاخدي من الشتا حِجة
عشان تسقيني من حضنك دفا
واسقيكي طول ليلك وَنَس وأمان