حرب الزراير النووية !

- سا الخير يا أمينة، مالك متكلفتة ليه وإيه البطاطين دي كلها؟
- كيم أونغ أون كيم أونغ أون ياسي السيد !
- يرحمكم الله يا أمينة سلامتك حتاخدي برد ولا إيه؟
- هههههه الله يحظك ياسي السيد باقولك كيم أونغ أون ياخويا بيسلم عليك!
- اللهم طولك يا روح حتتكلمي عدل يا ولية ولا أسيبك وأروح أنام في الأوضة التانية لحسن تعديني أنا مش ناقص عيا وزكام !
- أيوه اتلكك اتلكك، يا راجل معقولة ما تعرفش كيم أونغ زعيم كوريا الشمالية أبو زر نووي إللي بيهدد صاحبك طرامب بتاع أمريكا؟
- هههههههه ضحكتيني يا أمينة وانا مليش نفس أضحك يعني عارفة كيم أونغ أون وبتنطقيها زي اللبلب ومش عارفه تقولي ترامب مش طرامب؟ ثم من امتي ترامب بقي صاحبي مش انتي إللي رقصتي لما نجح في الانتخابات قصاد هيلاري علشان بتغيري منها؟ لو كنتي نسيتي إللي جري يا أمينة هاتي الدفاتر تنقرا.
- طب يا خويا بلاش ردح زبيدة وجليلة العوالم بتوعك وقولي ناوي تعمل إيه؟
- أعمل إيه في إيه يا ولية يا خرفانة انتي؟
- ياسي السيد الدنيا بره مولعة وكيم أونغ أون زعيم كوريا الشمالية لسن علي طرامب بكلمتين وقاله إن عندي زر علي مكتبي وممكن لو دوست عليه في ثانية أجيب عاليها واطيها قام طرامب ماسكتلوش وقاله لا بقي يا حيلتها لو علي الزراير فأنا عندي زر أكبر من زرك وحاطه تحت المخدة إللي بانام عليها أنا مش لسه حاستني لما أروح المكتب، وعلي الأقل زري أنا شغال مش زي زرك البايظ ده يعني ممكن أنسفك انت وبلدك في فيمتو ثانية.
- الله يرحمك يا عم زويل وكمان عرفتي الفيمتو ثانية يا أمينة؟
- ما تغيرش الموضوع ياسي السيد واضح إن إللي عايز يبقي قوي في الزمن ده لازم يكون عنده زر زي الجماعة دول، فرحني يا راجل وطمني يكونش انت كمان ياسي السيد عندك زر مخبيه لوقت عوزة؟
- زر أما يلهفك، قصدك إيه يا أمينة شامم ريحة مش حلوة في كلامك؟
- ابدا يابو ياسين ماقصدش حاجة وحشة بس أنا متأخذنيش يعني في الكلمة شايفاك اليومين دول علي طول سرحان وسأمان ياخويا زي ما يكون فيه حاجة مضايقاك ومخبي عني فخوفت لحسن تكون حكاية الزراير دي شاغلاك!
- يا ولية دول ناس مهافيف عايزين يدمروا العالم، انتي عارفة الزر الواحد من دول لو حد داس عليه ممكن يعمل إيه في العالم كله؟ ثم أنا كام مرة أنبه عليكي تبطلي السياسة إللي مش بناخد منها غير وجع القلب ده؟
- ما هو بس أصل يعني.
- لا بس ولا أصل إسمعي بقي آخر مرة أنبه عليكي لو شفتك بتابعي سياسة تاني تلمي هدومك وعلي امك.
- خلاص سماح أحب علي يدك ياسي السيد، هدي خلقك ياخويا بلاها سياسة يا بو فهمي وتعالي ادخل جنبي تحت البطانية لحسن الدنيا برد أوي الليلة.
- كيم أونغ أون كيم أونغ أون يا أمينة!
- مش قلنا بلاش سياسة ياسي السيد؟
- لا يا أمينة أنا باعطس واضح إني أخدت برد ولازم أروح أنام في الأوضة التانية لحسن أعديكي!