إحم إحم

السكر ناداني ياسي السيد !

(المشهد الأول).. سي السيد يعود متأخرا كعادته من سهرته مع العوالم وشلة الأنس وأمينة تستقبله كعادتها علي السلم وهي تدعو له وترقيه بالبخور.
- حمدلله علي سلامتك ياسي السيد، اطلع ياخويا علي مهلك، ومن شر حاسد إذا حسد ومن شر النفاثات في العقد.
- الله يسلمك يا أمينة، الميه السخنة جاهزة؟
- جاهزة ياخويا ومستنية تحط رجلك فيها علشان أدعكهالك بالملح، بتتعب أوي علشانا ياسي السيد!
- هو أنا ليا بركة غيرك انتي والعيال يا أمينة.
- تسلم من كل ردي ربنا يديك الصحة ويباركلنا في عمرك ويخليك ليا وللولاد.
- بمناسبة الولاد اومال فين البغل إللي اسمه ياسين؟
- لسه مارجعش من السايبر ياخويا.
- مفيش فايدة في الواد ده كل يوم يفضل علي النت للصبح يكلم حريم، شكله مش ناوي يجيبها البر.
- من شابه اباه فما ظلم ياسي السيد.
- قصدك إيه يا أمينة؟
- ماقصديش ولا حاجة ياخويا.
- وبسلامته فهمي فين هو الآخر؟
- راح برج العرب يشجع الزمالك ياسي السيد.
- يعني برضه مفيش فايدة؟ مش قلنا مليون مرة بلاها حكاية الألتراس والكلام الفاضي ده؟
- أحضرلك العشا ياسي السيد؟
- نفسي اتسدت خلاص يا أمينة أنا رايح أتخمد.
- اتخمد براحتك ياسي السيد.
- بتقولي إيه ياولية؟
- قصدي خمدة العوافي يوه نوم العوافي ياسي السيد.
(المشهد الثاني)
(أمينة تتحدث مع أولادها وتخبرهم أنها رايحة الجمعية علشان تقف في طابور السكر)
- بس يانينة سي السيد احمد عبد الجواد لو عرف ممكن تروحي في طوكر!
- ماهو أنا مش هاقوله ياولاد بس إياك حد فيكم يغلط قدامه!
- هي المشكلة فينا احنا برضه يانينة؟
- عموما أنا مش هتأخر كلها خمس ساعات وكده كده أبوكم مش بيرجع بدري.
(المشهد الثالث)
أمينة ترقد علي السرير تئن وتتوجع وقد تم وضع رجلها في الجبس والأولاد يحاولون تلقينها الرد الذي ترد به علي سي السيد وهو انها وقعت من علي السلم اتكسرت.
- خير يا امينة فيه إللي مرقدك كده؟
- أصل يعني بس
- أصل إيه وفصل إيه إنطقي ياولية لاجيب خبرك؟
- هاقولك الصراحة ياسي السيد آه الكدب خيبة الطابور ناداني ياسي السيد رحت وقفت فيه أجيب سكر حصلت خناقة عليه والناس فضلت تضرب في بعض قوم وقعت علي ضهري.
- والله عال يا أمينة يعني خرجتي بدون إذني ووصل بيكي الحال تقفي في طابور الجمعية تجيبي سكر؟ خلاص أنا بقيت كيس جوافة في بيتي يا أمينة؟
- كنت عايزة أعملك عصير الجوافة إللي بتحبه ياسي السيد أحب علي يدك تسامحني.
- أول ماتخفي تلمي هدومك وعلي امك يا أمينة.
(المشهد الرابع، بعد مرور 6 شهور)
- العيال فين يا أمينة؟
- البنات ناموا من بعد العشا وياسين لسه في السايبر وفهمي راح يتفرج علي كاس اوروبا علي القهوة.
- طب عال عال يعني أنا وانتي لوحدينا دلوقتي يا أمينة؟
- أيوه يا سي السيد لوحدنا ياخويا والله زمان.
- أنا مستني اللحظة دي من زمان يا أمينة
- للدرجة دي وحشتك ياسي السيد؟
- طبعا هو انا ليا غيرك يا مونمونتي، طب يلا بينا قبل ما العيال ترجع؟
- هيء هيء هيء يلا بينا علي فين ياسي السيد؟
- علي المطبخ نلحق تعملينا كوبايتين عصير جوافة بكيس السكر إللي مخبياه من العيال!