أبو إيفانكا ملك الخانكة !

- بقي كده برضه ياسي السيد الراجل المعتوه أبو فيونكا يعمل عملته كده وانتوا قاعدين؟
- اصطبحي يا أمينة ووضحي كلامك أنا مش فايقلك.
- معلوم ياخويا هو فيه راجل يتحمل كده
- اللهم طولك ياروح فيه إيه ياولية ماتنطقي
- بقي أبو فيونكة ملك الخانكة ده يعمل كده ؟
- ويطلع مين بقي أبو فيونكة ده؟
- طرامب ياسي السيد طرامب هو فيه حد ميعرفش طرامب رئيس أمريكا أبو البت فيونكة الجميلة؟
- هههههههه الله يحظك يا أمينة..اسمه ترامب ياولية قصدك أبو إيفانكا مش فيونكة.
- ياخويا ماتدقش كل دي شكليات خلينا في المفيد.
- قصدك إيه مش فاهم؟
- قصدي يعني ياسي السيد معقولة حنسيب الراجل المجنون ده يعمل تهوين للقدس واحنا بنتفرج؟
- اسمها تهويد القدس ياجاهلة مش تهوين!
- تاني كل إللي يهمك الشكل ياسي السيد تفرق إيه بذمتك تهوين ولا تهويد المهم إنها هانت علينا واليهود حايلهفوها.
- لا فشر ومين قالك إحنا ممكن نسكت علي كده؟
- طيب يعني العرب عملوا إيه من الصبح تقدر تقولي؟
- عملوا اتصالات وكمان مزدكولات للعالم كله وفهمناهم إنهم لازم يشوفولهم حل مع ترامب ويرجعوله عقله وإلا ذنبه علي جنبه، بس قوليلي الأول حتغدينا إيه النهاردة بقالنا زمان ماكلناش محشي ياام فهمي.
- وكمان ليك نفس تاكل وعايز كمان محشي يابو ياسين؟
- اومال يعني عايزاني أصوم ولا تكونيش عايزة تسدي نفسي؟
- يا خويا ماعاش إللي يسد نفسك بس قولي تفتكر ممكن أمتي العرب يحرروا القدس من اليهود؟ وتفتكر العرب ممكن يعملوا حاجة مع طرامب ياسي السيد؟
- الله يخرب بيتك علي بيت طرامب بتاعك ده هم العرب فاضيين أساساً؟
- وإيه إللي شاغلهم كفي الله الشر؟
- عندهم شوية مشاكل مع بعضيهم أوعدك أول ما يخلصوها حاروح أقولهم الست أمينة بتقولكم إلحقوا القدس وروحوا حرروها!.
- بتتمهزأ بيا ياسي السيد؟
- ماهو بصي بقي لو مغيرتيش السيرة إللي تعكر الدم دي حاقوم وأروحلي أي كافيه أتفرج علي صلاح أبومكة إللي مشرفنا في العالم كله.
- ويطلع مين أبو مكة ده يكونش قريب صلاح الدين ولا داهية ليكون قريب أبو فيونكة؟
- ابو مكة ياجاهلة هو نجمنا الكبير محمد صلاح بتاع الكورة وماسمحلكيش تقولي عنه أي كلمة ده كان يبقي فيها طلاقك.
- وهو سي صلاح أبو مكة ده بيلعب في الزمالك؟
- يسمع من بقك ربنا يا أمينة أما دي لو حصلت يابت دي تبقي باضتلنا في القفص علشان مفيش أهلاوي بعدها يقدر يفتح بقه ولا يتريق علي الزمالك تاني!
- ألا بصحيح عندي سؤال ياسي السيد
- أسئلتك كترت يا أمينة بس ده آخر سؤال علشان عايز ألحقلي مكان في الكافيه.
- آخر سؤال ياسي السيد أوعدك..هو الزمالك حياخد الدوري إمتي؟
- هو انتي قولتيلي عايزة العرب يحرروا القدس إمتي يا أمينة؟