«إرجع إلي» يا سي السيد !

- بتعملي إيه يا أمينة شاغلك عني كل ده وإيه الكتاب إللي في إيدك ده وحاطة السماعات بتسمعي إيه والأكل خلص ولا لسه؟
- باتعلم اللغة العربية يا سي السيد، فهمي ابني جابلي كتب وكراريس وبيعلمني اللغة العربية!
- هههههههه الله يحظك يا أمينة لغة عربية حتة واحدة ليه هو انتي بترطني هندي؟
- لا يا سي السيد بس انا قصدي العربية الفصحي يعني زي إللي بيتكلموها في التليفزيون أريد أن أتحدث بالعربية ياخويا.
- آدي آخرة فرجتك علي أفلام الكارتون ياما حذرتك يا أمينة ثم إيه السماعات إللي في ودانك دي بتسمعي إيه ديسباسيتو برضه؟.
- لا بقي دي موضة وراحت ياخويا، أنا قررت من هنا ورايح مش حاسمع غير قصايد نزار قباني إللي غنتها نجاة وعبد الحليم!
- الله الله الله والله عال يا أمينة إحنا كنا ف جرة وطلعنا برة!
- دعك من السخرية مني يا سي السيد وقل لي هل تعرف ماذا يعني تاريخ اليوم بالنسبة لك؟
- هههههههه شكلك مش عاطفي في الفصحي يا أمينة لكن تاريخ اليوم بصراحة مش فاكر.. ايوه ايوه خلاص افتكرت النهاردة عيد جوازنا ياغالية ياه يا أمينة 25 سنة مروا كأنهم 25 ساعة تصدقي كنت فاكر أعدي أجيبلك بوكيه ورد وأبعتلك رسالة علي الموبايل؟.
- باقولك إيه يا سي السيد كفاك يا خويا تلعب دور العاشقين معي وتنتقي كلمات لست تعنيها، كم اخترعت مكاتيبا سترسلها وأسعدتني ورودا سوف تهديها؟
- خلاص يا أمينة أوعدك دي آخر مرة أنسي الهدية تحبي أجيبلك دهب ولا فستان جديد؟
- وكم ذهبت لوعد لا وجود له وكم حلمت بأثواب سأشريها؟
- خلاص مايبقاش قلبك اسود وقومي شوفيلنا لقمة ناكلها لحسن عصافير بطني بترقص من الجوع.
-وكم تمنيت لو للرقص تطلبني وحيرتني ذراعي أين ألقيها
- اللهم طولك ياروح رقص إيه ومياصة إيه بس إتمسي ياولية أحسنلك؟
- يا سي السيد دعك من جليلة وزبيدة وارجع إليّ بقي فإن الأرض واقفة كأنما الأرض فرت من ثوانيها.
- يا وليه مانا رجعت أهو وباقولك عايز اتعشي وانتي مش سائلة فيا؟
- كل همك الأكل يا رجل. إذن لمن صبايا لمن؟ شالي الحرير لمن؟ ضفائري منذ أعوام أربيها !
- ما هو لو كنتي ربيتيلنا بطتين ولا وزتين في البيت مش كانوا نفعونا أحسن من ضفايرك دي؟
- أنا أحبك فوق الغيم أكتبها وللعصافير والأشجار أحكيها!
- حب إيه يا ولية باقولك جعان تقوليلي عصافير وأشجار؟
- اسمع بقي يا سي السيد، أنا أحبك حاول أن تساعدني فإن من بدأ المأساة ينهيها !
- خلاص حاضر عندك حق إللي بدأ المأساة هو إللي ينهيها، روحي وانتي طالق يا أمينة !