«ديسباسيتو» يا سي السيد !

- سا الخير يا أمينة
- ديسباسيتو يا سي السيد
- انتي مش سامعاني كويس ولا إيه؟
- لا سمعتك كويس طبعا ورديت عليك.
- يا ولية شيلي السماعات دي وردي عدل لحسن أشرملك ودانك ماخلكيش تعرفي تحطي فيهم سماعات تاني.
- ديسباسيتو كده بس واهدي يا سي السيد مالك يا خويا متعصب ليه محدش واخد منها حاجة!
- تاني حتقولي يسباسيتو طب لو سمحتي ممكن أعرف انتي بتسمعي إيه في ودانك سمعتي الرعد يا بعيدة؟
- مانا عمالة اقولك ديسباسيتو وانت مش مركز شكلك ناوي تطيرلي دماغ الديسباسيتو إللي أنا عاملاه!
- نهارك اسود ومنيل.. انتي شاربة سبيرتو يا أمينة؟
- سيبرتو إيه بعيد الشر عليا يا خويا باقولك ديسباسيتو!
- اللهم طولك يا روح وتطلع إيه ديسباسيتو دي إنشاء الله صنف جديد نزل السوق وأنا معرفش؟
- هو انت فاكرني زي جليلة وزبيدة العوالم بتوعك؟
- يا ولية اتلمي أحسنلك وخلي نهارك يعدي وقوليلي حكاية سباسيتو دي إللي مفيش غيرها علي لسانك!
- ههههههه الله يحظك يا سي السيد اسمها ديسباسيتو بقي فيه حد في العالم ما يعرفش اغنية ديسباسيتو إللي مكسرة الدنيا، ده بيقولوا اتنين مريار واحد شافها!
- مريار عفريت يركبوكي يا أمينة أولا الدنيا متكسرة خلقة ثانيا عايزة تفهميني إن دي أغنية مصرية ؟ طب يا تري مين إللي بيغنيها إذا كان مطربينا اسم النبي حارسهم مشغولين بالخناقات والردح لبعضيهم؟
- ديسباسيتو دي يا خويا أصلا من بورتريكو!
- بورتريكو دي غير بورتو مارينا وبورتو السخنة؟
- آه مانت أصلك لوكال ومحلي وده آخرك متعرفش غير الأماكن دي إللي بتتفسح فيها مع صحابك وسايبني؟
- ماتغيريش الموضوع يا أمينة وقري واعترفي قوام؟
- يا سي السيد ما هو انت لو كنت متسأف ومطلع زيي كنت حاتعرف إن فيه بلد في الأمريكتين اسمها بورتريكو طلع منها اتنين مطربين عملوا ديسباسيتو دي.
- والله عال يا أمينة وكمان بتسمعي أغاني أفرنجي ويا تري بقي يا فنانة مين اللي بيغني ديسباسيتو دي عبحليم البورتريكي ولا ام كلثوم كوكب الأمريكتين؟
- لا يا خويا إللي بيغني ديسباسيتو اتنين رجالة واحد اسمه لويس فونسي والتاني اسمه دادي يانكي.
- يانكي عليها يانكي عليها وعرفتي تحفظي الأسماء دي إزاي إذا كنتي لغاية دلوقتي بتنطقي اسمي أنا بالعافية؟
- ما هو انت لو متابع السوشيال ميديا يا خويا!
- وكمان سوشيال ميديا الله يرحم ابوكي يا أمينة.
- باقولك إيه ملكش دعوة بأبويا وامي وقولي حاتزودلي مصروف البيت امتي أديك شايف الغلا والكوا يا سي السيد؟
- ديسباسيتو يا أمينة!
- الله طب مانت شاطر أهو وبتعرف تقولها، ألا تفتكر معناها إيه ديسباسيتو دي يا سي السيد؟
- ديسباسيتو يعني إتمسي احسنلك يا أمينة وخلي ليلتك تعدي!