والله عال يا أمينة - طب بس قول جود مورننج الأول بدال مانت داخل عليا بزعابيبك ولا فشر دخلة احمد موسي علي المشاهدين. انتي لسه بتتفرجي علي موسي وعيسي والناس دي؟ يعني كلامي مابيتسمعش يا امينة؟ - قلتلك مليون مرة انا باتفرج عليهم علشان أعرف مين إللي حايتقبض عليه..وبعدين سيبك من موسي وفرعون دلوقتي، خليك كوول وتعالي أفرجك علي شوية صور جاتني النهاردة علي الواتس آب إنما إيه تموت من الضحك. - متاخدنيش في دوكة يا أمينة وتلعبي معايا لعبة لميس وخيري.. تسمحي تقوليلي إيه إللي إنتي لابساه ده؟ - يوه بقي؟ حيرتني معاك يا سي السيد مش طول عمرك عايزني أبقي زي نانسي وهيفاء وبنات الإعلانات.. أديني لبستلك نص بلوزة وبنطلون جينز، إيه مش عاجبك ولا يعني بنطلون البيت فيه كخة؟ يعني لو كان علي زبيدة ولا جليلة ولا علي أي عالمة من بتوعك كان زمانك بتتغزل فيه صح؟ - متحاوليش تسخنيني زي ما بيعمل وائل الإبراشي وبلاش تجيبي سيرة زبيدة وجليلة. - ليه خير إن شاء الله هو انت معدتش بتشوفهم اليومين دول ولا إيه؟ - اتلمي يا أمينة أحسنلك وبلاش تحاصريني كده زي ما الداخلية محاصرة نقابة الصحفيين. - أيوه صحيح تلاقيك زعلان ياعيني علي جليلة وزبيدة علشان زمانهم ساحوا من الشمس وهم واقفين مع المواطنين الشرفاء قدام النقابة. - بلاش تهزي وسطك وتعيشيلي في دور جابر القرموطي ده وقوليلي إزاي تلبسي بنطلون زي ده.. ولا يعني بسلامتك مش واخدة بالك إنه مقطوع؟ - ههههههه مقطوع آه فعلا مقطوع بس مش انا إللي قطعته. - اومال مين انطقي لاجيب كرشك. - أنا حاعترفلك بكل حاجة.. أصل يعني بصراحة البوي فريند ناداني يا سي السيد - البوي فريند ناداكي ورحتيله يا أمينة؟ - لهو انت فاكر اكمني باتفرج كتيرعلي محمد الغيطي يبقي أي حد يقولي تعالي أروح؟ - شاطرة يا أمينة برافو عليكي اومال شوفتي البوي فريند بتاعك فين إن شاء الله؟ - بصراحة كده هو اللي جاني لغاية البيت! - والله عال يا أمينة وكمان ليكي بوي فريند وبتعترفي كده بكل بجاحة إنه هو إللي قطعلك البنطلون؟ آدي آخرة فرجتك علي فتاوي برهامي.. كيس جوافة انا في البيت يا أمينة ولا إيه؟ - وهو حد طايل ده حتي الجوافة في السوق بقت بالشيء الفلاني - وليكي نفس تهزري، يا ولية قري قوام يطلع مين البوي فريند بتاعك ده؟ - ما هو مش ذنبي انك راجل جاهل بالموضة ومتعرفش إن البوي فريند ده ماركة البنطلون الجينز إللي أنا لابساه! - يا مثبت العقل والدين يا رب بنطلون اسمه بوي فريند؟ - أنا مالي هو أنا إللي سميته ؟ - شكلي أنا إللي حاسمك واروح فيكي اللومان طب وازاي تجيبيه مقطوع كده؟ - افهم بقي يا راجل هي دي موضته يبقي مقطوع. - مقطوع من قدام كده؟ - ومن ورا كمان يا سي السيد حتي شوف؟ - إيه ده عايزة تقنعيني إن القطع إللي من ورا كمان ده موضة؟ - اومال يعني فتحة عاملينها علشان الحقنة؟ - طب بصي بقي يا بنت الناس يا تخلعي البوي فريند يا تخليعني أنا من البيت ده! - انت لو خلعتك هاخسر ربع جنيه المهر إللي دفعتهولي لكن هو لو خلعته هاخسر 300 جنيه تمنه إللي دفعته فيه!
