طريق النور

إنسان..

أنا إنسان.. عابر سبيل رحال.. والبحر علمني الرزق الحلال.. وان إسكندرية بلدي هي الآهه والموال.. وانك تقول القول في وش الغول.. وهو علي حصانه وبقوته واقف في أعلي الجبال.. وإن العلم حلم كان في الخيال وأصبح زي الميه في الغربال.. لكن يا صاحبي مش كل من مسك القلم وكتب كلمة صبح قوال.. ولا كل من ركب الحصان خيال.. ياما أحلام كتيرة غيرت أحوال.. وياما ناس كتيرة صنعت لأمتها المحال..
عشقت حورية من صغري اسمها الحرية.. كانت صبية عفية.. وكبرت قدام عنيه م الصبح للعصرية.. وفي المغربية ألقاها زي القمر بتنور خطوتي الجاية.. وتجري قدامي جريئة بريئة عارفة سكتها شقية.. لبستها توب أبيض من خيوط الشمس الدافية العفية.. وروتها بالعلم والحلم.. والقلم كان سلاحي وكفاحي ومجدافي في بحر الدنيا اللي منسية.. أقول الحق من صغري.. وادفع تمن كلمتي اللي شايلها علي ضهري.. لا باب سلطان غواني.. ولا ضحكة صفرا خليتني أغير طريقي وعنواني.. لحد ما فضلت في مكاني راضي بحياتي وان كانت راضية.. ولو تسأل الليل يقولك أنا راضي بالمقسوم.. لكن عقلي لسه في راسي وفاسي وكراسي وأرضي هي ورقي.. أكتب أشخبط.. ألون حياتي بقلمي وهمي جنب ألمي محفوظ في دولاب القلب يستني بكرة بضحكة صافية هنية..
عمري ما بعت دماغي لمخلوق.. ورضيت بحكمة الخالق.. وسحر الكلمة كان هو العشق والمعشوق.. والأدب علمني الحب فن وذوق.. وان الجمال من صنع الإله.. وان البشر صندوق كبير مقفول وعليك تفتحه بالذوق.. وان الحياة مدرسة وكتاب مفتوح فيها جروح الروح.. وسرها في حسنها.. ان باحت بيه تلاقي نفسك طير في السما.. بتقولك يا إبن أدم فوق.. ده مهما كان فكرك ومكرك.. ربك عارف أخرتك.. وساعة ميلادك وميعادك وللتراب ح تعود محمول علي الأعناق.. دي الدنيا ياما بتشيل بشر في العيون وياما بتسوق.. يا تفكر بعقل.. وتنظر لفوق.. ياتفضل عيونك تحت وتغرق في بحر الهموم ما تفوق..
وإن كانت الثورة صبحت في لسانا أغنية.. والكل صبح ناشط وناشطة.. وصاحب نظرية وخطة ومناظرة.. وكلمة مسموعة في الفراغ وقبله بشوية.. وراكب دماغه وناسي إن مركبنا ماشية بضهرها مش لاقية مرسا ولا معدية.. وان الربيع صبح خريف مخيف ع العرب والدم أرخص من شوية ميه.. لازم نعترف كلنا إننا كنا السبب في القضية.. وان الحرية مش كلمة بنقولها ونجري وراها وعيونا مستغميه.. الحرية حلم وأمل آه.. لكن بالعمل والجد نقدر نعدي ونسابق الزمن.. ونصبح زي الأمم الذكية.. إللي بالعلم ركبت صاروخ الألفية..
وان كان طريقك صعب.. فكر ودبر حالك.. وشاور عقلك وإعرف ان اللي فات لو مات.. عمرك ما تعرف خطوتك اللي جاية لحد الممات.. وإن السؤال لو كان جوابه محال لازم يكون قلبك وعقلك طويل البال.. وان العلم هو أول طريق الأمان.. والحلم لو كان مستحيل ح نحققه بالإيمان.. وان كان الفجر الوليد لسه بعيد.. إيدك في ايدي نبني نعمر ونسابق الخطوة بزمان.. لكن لازم نعرف الأول ان كلنا إنسان..