الدنيا ساقية لكن بتلف ع الفاضى.. لا نفعت الخلق ف حاضر ولا ف ماضى.. ونازلة حش فى رقابنا زى سيف ماضى.. ولسه ماسكين فى ديلها والمثل بيقول.. رضينا بالهم بس الهم مش راضى! عبدالحق عادل إبراهيم فلاح جامعة القاهرة ياللى عملتوا البحر طحينة.. من عمايلكم ياما آسينا.. شربنا المر بإيدينا.. وامتى راح يرتاح لنا بال.. وفسادكم واصل لركبنا.. وسكاكينكم بتحز رقابنا.. ولو كحينا أو تنهدنا.. تزيدوا علينا بالأحمال.. وأحلامنا بخطة خمسية.. وأيامنا مليانة أسية.. يا وطنا أصبحت تكية.. للحرمية والأندال.. كل حياتنا مش مفهومة.. من قوانينهم المسمومة.. يعنى نروح نجيب حكومة.. من جيبوتى أو السنغال محمد عبداللطيف ليه نوصف الحب بغرام.. يا ناس حرام.. الحب أكبر من كده.. كل أيامه سلام.. الحب بيعيش فى القلوب.. ماتهزهوش هفوة خصام.. يوماتى بيزيد فى العطاء.. خطواته دايمًا للأمام.. إحساس يحسه الأوفياء.. دا مش كلام.. أصحابه دايمًا سعداء.. عايشين فى جنة الأحلام.. يعيشوا طول العمر حب.. راحة وسلام.. هو دا الحب الحقيقى.. اسأل مجرب يا إمام.. حياتى كلها عشتها.. صديق مع الكل فى سلام.. قضينا أيامنا مرح.. لا فيه عداوة أو خصام.. نصيحة منى للشباب.. دى تجارب مش كلام. عبدالعظيم محمد جاسور الإسكندرية يا دفيان فى فروتى.. وأنا ميت من البرد.. يا شارب من ميتى.. وأنا عطشان فى الشرد.. يا شبعان من لقمتى.. وتكلمنى عن الزهد.. يا غرقان فى نعمتى.. وتقول لى بلاش حقد.. لك حق ف اللى تعمله.. ما هو لا ذمة ولا عهد.. كنا أسياد الناس.. ذلتونا للحر والعبد... وعدتونا بالجنة والنعيم.. عشنا فى النار والصهد.. جيبتونا يمين وشمال.. كلتم من عرقنا الشهد.. مش لاقيين لقمة ناكلها.. راحت الصحة وراح الجهد.. ماشيين نكلم نفسنا.. تاه منا الأب والجد.. صبح الكل يقول نفسى.. ما بقاش منا غير الجحد.. الحساب جاى جاى.. مش هزار لكن بجد. مهندس / أحمد صالح - ميت غمر بجوار بيتنا حقل صغير رأيت به مجموعة من العصافير يلعبون ويمرحون.. يحلقون فى السماء بكل سرور.. سألت نفسى لماذا لم أولد عصفور.. لا يقيده مكان، فهو فى كل مكان يصول ويجول.. ولكنى راجعت نفسى فالطيور لا تملك حرية العقول.. فهم من الخيال يخافون ويطيرون بعيدًا ولا يرجعون.. ماذا لو كانوا يعقلون.. لعلموا أن ما يهرعون منه مجرد خيال مآتة، لا يستطيع ضرهم، ومن ضعفهم يستمد قوته.. سألت نفسى مرة أخرى: هل حياتنا تشبه حياة العصافير؟ نخاف مثلهم من خيال المآتة وننتظر يومًا يرحل فيه، فتعود لنا حريتنا كاملة؟؟ ولكن كيف للإنسان أن يخاف من الخيال؟ فالخيال لا يخيف إلا عديمى العقول.. فهيا نحلم بمستقبل جديد، مستقبل كله حرية، وليذهب خيال المآتة إلى الجحيم!! إمام سليم إمام شربين - دقهلية الدنيا مش عايزة الكسل.. عايزة الأمل عايزة العمل.. نبنى ونزرع نجتهد علشان الحلم يكتمل.. وبلاش نعيش على ذكريات، فرعون ومات.. ده كلام عجيب لا يحتمل.. يا مصرى فوق، فتح عيونك ع الحياة.. فيه ناس كتير وصلوا القمر.. يا مصرى ليه ساكت حزين؟.. مستنى إيه ده أنت ف خطر.. ابدأ حياتك من جديد وبلاش تلوم على الظروف.. نور طريقك بالإيمان.. هيكون سند علشان تشوف. أحمد عبدالعزيز السيوف ترام - الإسكندرية