حالة حوار

لميس الحديدى:مساء الخير ، الحقيقة الاسبوع اللى فات كان اسبوع حزين جدا علينا فى مصر مش بس عيلة الريس لكن عيلات كتيرة جدا اسر كتيرة جدا انا شخصيا لانى ام عدى علينا اسبوع صعب قوى وعدى على عيلة الريس اسبوع صعب قوى واكيد لسه فى وقت صعب طويل لكن الريس امبارح لما خرج للناس ولما ابتدى يشتغل تانى ولما رجع يعقد اجتماعاته يعنى رجعلنا شىء من الاحساس بالامل انه هو كويس وصحته كويسه وانه يستطيع ان يغالب احزانه واحنا طبعا واثقين من حزن الرئيس مبارك على فقدان حفيده مش حزنه لوحده حزنا كلنا انا كنت فى الجنازة بصفة شخصية جدا والناس كانت بتيجى تعزينى بصفة شخصية بيقولولى البقاء لله ناس عادية جدا من الشارع كانت بتبكى على هذا الطفل محمدعلاء مبارك بنعزى اسرته يعنى نيابة عن كل فرد من افراد هذا البرنامج وبالنيابة الشخصية عنى وعن اسرتى انا ام وبتمنى وبدعوالله فى كل صلاة ان يصبغ الصبرو الرضا الاول على امه وعلى ابوه وعلى اهله كلهم نخرج من الحكاية دى ونشوف حلقة النهاردة حلقة النهاردة حوالين القضية الاشهر والحكم اللى زلزل المجتمع المصرى الحكم بالاعدام فى قضية مقتل الفنانة سوزان تميم على محسن السكرى ورجل الاعمال المعروف هشام طلعت مصطفى بقالنا من يوم الخميس عندما صدر هذا الحكم ونحن فى ضجة اعلامية كبيرة جدا المجتمع انقسم ما بين صدمة وذهول وما بين فرحة واحساس ان العدل اخذ مجراه وان هناك ثقة فى القضاء المصرى وثقة فى مجريات القانون المصرى وتطبيق القانون واحساس انه لا مهما علا شانه ومهما كانت معه من سطوة ومال القضاء قضاء والقانون قانون الحلقة دى هنعمل حلقة نقاشية قانونية اجتماعية نفسية اقتصادية لماذا هذه القضية اخذت كل هذا الاهتمام ؟ ليه المجتمع المصرى غريب جدا ؟ فترة بيشكك ويقول لا طبعا هتطرمخ معقولة يعنى رجل بهذا الشان وهذا المقام وهذا القدرمعقولة هيتحكم عليه ؟ ولما اتحكم عليه بالاعدام صدمة وذهول وراى بيقول معقول ده الذى بنى كل هذه الاصرح العملاقة والصروح العملاقة يتقتل او يعدم علشان دى ؟ صراع وخناقة كبيرة جدا فى المجتمع وخناقة بين القانونيين انفسهم ما بين ان الحكم باطل ولا مش باطل يعنى هل سيقبل النقض ؟ هل سيرفض النقض ؟ هل ممكن ان يتحول هذا الحكم من اعدام الى براءة صراع قانونى وخلاف قانونى كبير سنحاول نتكلم على ما بعد على هذا الجدل المجتمعى الكبير على صورة رجال الاعمال اللى كل ما نحاول نصلحها وانا منحازة لهم ومنحازة للقطاع الخاص كل ما نحاول نصلح حاجة يجى حد يبوظهلنا يعنى هذا الجدل الكبير هيكون هو محور لقائنا النهاردة مع اساتذة كبار هعرفكم عليهم بعد قليل لكن الحقيقة قبل ما نبتدى حلقة النهاردة وكان الحزن ابى ان يغادرنا فقدت انا شخصيا صديق وفقدنا فى مجتمع الاعمال وفى المجتمع المصرى رجل كان لوا وزن وكان لوا امته رجل مختلف محمد نصير محمد نصير كان ضيفنا فى هذا البرنامج والتقيطه طبعا فى برامج اخرى على مدى علاقتى بالصحافة الاقتصاديه مده طويلة ما كنش رجل اعمال عادى ما كنش واحد بيخش شركة ويكسب ويخسر ويبيع لا كان من نسميه بالانتربرنر انتربرنر يعنى رجل خلاق له فكر كان يفكر ويعمل شركات ثم ينشا الشركة ويبيعها كل ما كنت بساله مستر نصير زى ما كنت بقوله انت ليه بتعمل كده؟ دول ولادك ازاى تنشا شركة وتبيعها؟ يقولى انا بلاقى من يديرها افضل منى حب التملك ماكنش رغبة عنده كان الرغبه الاكبر انه يكون هناك مشاريع وان يكون هناك خلق وتفكيرواعادة ابداع محمد نصير كان الاول فى حاجات كتيرة جدا كان اول من دخل 4 كمبيوترات فى مصر اول 4 كمبيوترات فى مصر وفى لبنان ادخلهم محمد نصير فى الستينات اول مشروع خصخصة مشروع المياه الغازية الشهير جدا كان محمد نصير اول شركة اتصالات محمولة رغم ان هو يعنى خد الرخصة التانيه بعدها كان محمد نصيرهذا الفكر الخلاق معارك كتيرة جدا اتمنع من انه يخرج بره البلد صراعات مع عبد الناصر صراعات داخليه اعداء كثيرين لكن اللى بيحبوا كانه اكتر فقدنا محمد نصير بعد رحلة قصيرة جدا من المرض هذا الوجه الضحوك اللى كان دايما كل ما ارفع سماعة التليفون او يكلمنى تسمع ضحكته الاول هذا كان النموذج لرجال الاعمال هنقدملكم فقرة قصيرة جدا عن بعض الحوارات التى اجريتها مع محمد نصير يذكرنى دائما ان هذا هو النموذج رجل يفكر ويخلق ويترك بعد كده الادارة مش مهم مين يديرالمهم ان الشركة تكمل محمد نصير
مشاهد من حلقات سابقة كان ضيفها محمد نصير
لميس الحديدى: محمد نصير هو اول واحد دخل انترنت فى مصر.
محمد نصير :واول واحد يدخل 4 كمبيوترات فى مصر
لميس الحديدى:اين كانت البذرة الاولى او بذرة الاستثمار؟
محمد نصير:كنت محظوظ وانا كنت بعتبر الحظ ده علامة من علامات رضا الله
لميس الحديدى: عمرك ما تعرضت لضائقة ماديه بعت حاجة مثلا ؟
محمد نصير : كنت ببيع عفش بيتى انا اشتغلت عند اخ فى محل تصليح تليفزيونات فى باب اللوق كنت بشتغل عنده
لميس الحديدى: مازالت متمسكا بمصريتك؟
محمد نصير:مازالت متمسكا بمصريتى وبخدمة بلدى كل من ضبط بيسرق مشيته مشيت 120 لكن عينت 1200
لميس الحديدى:العداء استمر للخصصة تفتكر ليه ؟
محمد نصير:فى فترة بقالى اعداء والناس شتمتنى وبتاع, انا صح ومغلطش
لميس الحديدى: ليه محمد نصير ما اهتمش بالسياسة ؟
محمد نصير:مش عايز اتكلم فى السياسة وانا عمرى ما اشتغلت فى السياسة على فكرة
لميس الحديدى: بس عندك مشاكل فى التعامل مع الاسرائيليين ؟
محمد نصير: اه مبحبش اتعامل معاهم
لميس الحديدى: رحم الله محمد نصير وبشكر زملائى احمد عادل ووليد عبد الرحمن على اعداد هذا التقرير المميز احب الاول اقدم ضيوفى وبعدين اخد تليفون مهم فى بداية الحلقة التى نناقش فيها الحكم الذى زلزل ضمير المجتمع او زلزل المجتمع المصرى يشرفنى ان يكون معى المستشار احمد مدحت المراغى رئيس محكمة النقض الاسبق و مجلس القضاء الاعلى وحجة قانونية كبيرة تشرفنا بوجود حضرتك يا فندم والدكتورشوقى العقباوى طبعا دايما ضيف عزيزعلينا استاذ الطب النفسى بجامعة الازهر والاستاذ الدكتور محمود سامى القرنى استاذ القانونى الجنائى ومستشار سابق اهلا وسهلا معانا تليفون طيب قبل ما نبتدى بس يا فندم معانا الاستاذ على الهاتف من بيروت استاذ عبد الستار تميم والد الفنانة سوزان تميم مساء الخير يافندم
عبد الستار:مساء الخير بمسيكى وبمسى ضيوفك
لميس الحديدى: اهلا بيك يعنى يمكن تعازى متاخرة لكن قولى كيف تلقيتكم انتم الاسرة الحكم الذى صدر يوم الخميس ؟
عبد الستار : قبل كل حاجة انا عايز اقولك حاجة صدقينى انا من اول يوم قلت عندى ثقة فى القضاء المصرى ونزاهة القضاء المصرى واليوم عايزاهنى مصر وشعب مصر والشعب العربى على نزاهة وشجاعة وجراة سيادة المستشار محمد قنصوه على حكمه العادل واشكر النيابة والمحكمة وصدقينى عايز اقولك حاجة انا من اول ما عرفت الجريمة البشعة اللى حصلت لبنتى سوزان اللى كنت حاسس فيه فى اللحظة الاولى والمحكمة الموقرة والنيابة العامة وسيادة المستشار حسوا بيا واللى كنت عارفه من اللحظة الاولى المحكمة والنيابة العامة وسيادة المستشار عرفوه وقالوه على العلن واصدروا حكمهم العادل
لميس الحديدى: استاذ عبد الستار يعنى انت بتقول ان انت كنت متوقع واعتقد ان شهادتك التى ....
عبد الستار: انا مش كنت متوقع انا كنت حاسس وعارف لكن مقدرش اتكلم لان لما كمان اشكر دولة دبى وشعب دبى وشرطة دبى وحاكم دبى لانهم كانوا هما اللى اكتشفوا الجريمة البشعة من اللحظة الاولى حتى اللحظة الاخيرة كانهم متابعين كل الجلسات حتى المجرم اخذ جزائه انا كنت حاسس وانا كنت عارف
لميس الحديدى: لكن شهادتك اللى ارسلت بيها للمحكمة اللى ارسلتها فى ظرف مغلق يمكن من بيروت انت قلت فيها انك تتهم محسن السكرى بالقتل و تتهم هشام طلعت مصطفى بالتحريض .
عبد الستار: انا مقلتش كده
لميس الحديدى: مقلتش كده امال قلت ايه ؟
عبد الستار : انا قلت اللى انا عارفه الحقيقة ما قلتلك لو سمعتينى انا قلت اللى انا حاسس به من اللحظة الاولى اللى المحكمة حست بيه والمحكمة عرفته وقالته على العلن واصدرت حكمها العادل انا كنت عارف وكنت حاسس من اللحظة الاولى لما عرفت الجريمة البشعة اللى حصلت لبنتى انا كنت عارف مين اللى عمل كده لكن كنت فى الاول بقول مقدرش ادعى على حد ولا اتهم حد الى ان دولة دبى ربنا يطول عمر حاكم دبى اللى كشفواالجريمة وكشفوا المجرم دلوقتى انا سعيد وقلت اللى عندى
لميس الحديدى: هل انتم لما تلقيتوا الخبر يعنى كنتم فين والاسرة كانت مجتمعه مثلا فين؟
عبد الستار: تلقينا خبرايه ؟
لميس الحديدى: مش خبر المقتل لا خبرالحكم هل كنتم منتظرينه مثلا في المنزل؟
عبد الستار:اه انا تليقت الخبرطبعا انا كنت فى المنزل مع عيلة سوزان كلها والمحامين وشقيقها وجدتها والقرايب يعنى طبعا كنا كلنا قاعدين على شاشة التليفزيون مستنيين الحكم ولما صدر الحكم والله انا حزنت قوى لانه حكم عادل لو احكام الدنيا كلها صدرت هيردوا بنتى ازاى ؟بنتى سوزان ازاى؟
لميس الحديدى: هل هتطالب بتعويض ايه الخطوات القادمة بالنسبة لك او بالنسبة لكم كاسرة يعنى ؟
عبد الستار: والله بالنسبة لى انا انا مش عايزاى حاجة صدقينى دلوقتى انا ما بفكرش لا فى ماديات ولا فتحت فى اى حاجة يعنى زى ما هما بيتكلموا انا ما بفكرش فى حاجة و احدة حتى بنتى ترتاح فى تربتها المجرم السفاح اللى عمل بيها كده لازم ياخد جزائه وانا املى فى الله سبحانه وتعالى واملى فى القضاء المصرى من اللحظة الاولى وثقتى بالقضاء المصرى ثقة عمياء المجرم ياخد جزائه هو دا اللى انا بفكر بيه حاجة تانية والله ما بفكرش فى اى حاجة لان اى حاجة فى الدنيا مش هتردلى ضفر سوزان مش هتردلى كلمة بابا يا بابا اى حاجة تانية بالنسبة ليا تافهة صدقينى
لميس الحديدى: لكن انت على قناعة زى قناعة المحكمة ان هؤلاء هم المجرمين فى رايك ؟
عبد الستار: اه اه على قناعة تامة انا قلتلك من اللحظة الاولى انا عرفت وانا طلعت على شاشات التليفزيون واتكلمت وقلت عندى حاجات كتير مش عايز اقولها مش عارف سمعتينى انا قلت عندى كتير اشياء بس مش هقولها دلوقتى انا عارف كتير اشياء انا قلت الكلام ده قلت انا عارف حاجات كتير
لميس الحديدى: استاذ عبد الستار هل صحيح ان وصية سوزان يعنى كانت اوصت بكل ما تملك فقط لاخيها ولوالدتها ولم تذكرك فى الوصية ؟
عبد الستار : عايزاقولك حاجة وصية سوزان اللى بيتكلموا عليها والله ابقى سعيد يعنى لو كان في وصية وان شاء الله يكون في وصية لان لو سوزان عامله وصيه لشقيقها يكون احسن لان احنا عندنا فى الشرع زى ما حضرتك عارفة اخوها خليل يبقى محجب من الميراث لانه اللى يورث الوالد والوالدة يعنى دا سبب من الاسباب لان خليل يبقى محجب لو عملت الوصية دى انا ابقى اسعد الناس لانه انا فى النهاية لمين ؟ لخليل والسبب التانى عايزاقولهولك مش على الهوى الزكى يفهم السبب التانى دا بينى وبينها وبين سوزان وبين ربنا لكن انا ابقى سعيد دلوقتى بيقولولى ان في وصية ان شاء الله يكون في وصية
لميس الحديدى: لكن انتوا مالقتوش الوصية دى يعنى قيل انها وجدت لما قتلت سوزان فى دبى قيل انها وجدت ضمن ممتلكاتها ؟
عبد الستار:ان شاء الله ان شاء الله بيقولولى ان في وصية ابقى سعيد لان فى الوصية شقيقها خليل ما هو انا الشرع ما بيحرمنيش عندنا الشرع اخوها يبقى محجب من الميراث دا سبب من الاسباب
لميس الحديدى: حضرتك بتقولى ان قناعتك نفس قناعة المحكمة ان هؤلاء هم المجرمين لكن معلوماتى ان انت علاقتك بهشام طلعت مصطفى كانت علاقة جيدة وان هو ربما ساعد فى اخراجك من قضايا
عبد الستار: لا لا لا انا بقول على الهوا انا اتحدى لانه انا اللى حصل معايا فى 2004 انا تعرفت على هشام حتى سوزان تعرفت على هشام 2006 صدقينى اللى حصل معايا انا قلت للمرة المليون بقول لو انا كنت اعرف الاستاذ هشام طلعت ماكنش حصل معايا كده و لا اتوقفت لحظة انتى عارفة لكن صدقينى ورحمة سوزان انا ما كنتش اعرف الاستاذ هشام طلعت اتعرفت عليه بعد سنتين من الحادثة اللى صارت معايا
لميس الحديدى: ما كنتش تعرفوا فبالتالى ما تدخلش فى اخراجك من هذه الحادثة ؟
عبد الستار: لا ماكنتش اعرفه انا حصل معايا فى2004 اتعرفت على هشام طلعت مصطفى فى 2006 صدقونى يا ناس
لميس الحديدى: طب ايه كان دليلك انه قد يقدم على ذلك يعنى ليه بتقول انك تحمل نفس القناعة كانت عندك مؤشر؟
عبد الستار: ما هو انا كنت عارف القصة كلها وفى حاجات انا مش عايز افوت النيابة العامة والقضاء قال كلمته والقضاء قال اللى انا كنت حاسس بيه واللى انا كنت عارفه الحمد الله اصدرحكم عادل ومقتنع بيه يعنى مش عايز افوت انتى بتقوليلى ليه ؟ انا هقولك حاجة واحدة من لو انت عايزة تعرفى
لميس الحديدى : حاجة واحدة على الاقل بس
عبد الستار: حاجة واحدة محسن السكرى انا عندى الملفات بيقولوا ايه
لميس الحديدى : القضية يعنى..
عبد الستار: التحقيقات عندى الملف كله مش عارف 600 -700 صفحة محسن السكرى صدقينى قال حاجات يعنى انا عارفها انه حصل كده ومين اللى عمل كده اتاكد انا كنت عارف فى حاجات قايلها محسن السكرى قايلى اياها هشام طب منين عرفها محسن السكرى فى حاجات صدقينى بالحرف الواحد قالها محسن السكرى بالاجابات بتاعته كان قايلها هشام وفى حاجات كتيرة انا قلتها للمحكمة وبقولك يعنى المحكمة اللى حاسس به واللى انا كنت عارفه الحمد الله وبفضل ربنا هما عرفوه وحسوا بيه واعلنوه فى تفاصيل كتير دى واحد من ال1000
لميس الحديدى: انت رايك ان الغيرة وحب التملك هى التى دفعت هشام فى رايك يعنى الى..؟
عبد الستار: والله اللى دفع هشام صدقينى صدقينى صدقينى انا حزنت قوى قوى ورحمة سوزان لما شفت هشام جوا فى القفص حزنت انه عمل بحاله كده ؟عملت باسرتك ايه ؟ عملت بالبنت كده ليه ؟ عملت باسرة سوزان كده ليه ؟ عملت بى انا النار اللى جوايا اللى انا كل يوم بموت مليون مرة صدقينى اصحى بالليل واقعد واكلم .
لميس الحديدى : بس انت كنت بقالك مده طويلة مشفتهاش يا استاذ عبد الستار يعنى علاقتكم ما كنتش علاقة حميمة قوى يعنى ؟
عبد الستار: مين هو اللى قالك ؟ كانت سوزان معلش تتكلم معايا كل يوم واتكلم معاها كل يوم الكلام ده اللى هما بيقولوه معلش انا باباها وانا اللى بتكلم علاقتى بسوزان مش حميمة ؟مين هو اللى قال ؟هى بنتى وانا باباها ولو مش علاقتى حميمة ماهو سوزان حطانى فى كل مشاكلها وفى كل قضاياها ازاى مين هو اللى قالك الكلام ده؟بالعكس دى كانت بنتى وحبيبتى وصديقتى مين اللى قال الكلام ده ؟
لميس الحديدى : طيب استاذ عبد الستار انا بشكرك شكرا جزيلا لكن عندى سؤال اخيرلى معلوماتك من كان اخر ازواج سوزان تميم ؟
عبد الستار: والله انا بقولك سوزان اتجوزت واحد اسمه على ..وبعد كده كل اللى يبنى على باطل يبقى باطل مفيش اى حد عنده صفه شرعية وسوزان اطلقت من الراجل ده ومفيش اى حد عنده صفة شرعية وانا قدمت للمحكمة الاوراق اللى تثبت مفيش اى حد عنده صفة شرعيه دلوقتى
لميس الحديدى: ولا العزازى ده ولا عادل معتوه ولا حد من دول ؟
عبد الستار : انا قدمت للمحكمة لو حضرتك عندك ملف المحكمة
لميس الحديدى: عندى عندى طبعا اه
عبد الستار: انت شفتى الورقة اللى انا جبتها من المحكمة الشرعيه هنا من لبنان ؟
لميس الحديدى: ايوه
عبد الستار:طعنت بيها ووقفوا كل حاجة لان في دعوة لان كل ما يبنى على باطل باطل صدقينى سوزان محدش دلوقتى له اى صفة شرعيه الا باباها وماماتها فقط لا غير
لميس الحديدى:هتقدموا بطلب تعويض ؟
عبد الستار: ما انا قلتلك انا اخرهمى الفلوس تعالوا خدوا فلوسى كلها انا انسان مستور والحمد الله تعالوا خدوا روحى خدوا دمى وردولى سوزان انا ما بفكرش فى اى حاجة اللى المجرم ياخد جزاءه غيركده صدقينى والله ما بفكرش فى اى حاجة الفلوس انا بالنسبة ليا انا دلوقتى قلبى مات انا عايش ربنا عالم وحده انا عايش ازاى
لميس الحديدى: اشكرك استاذ عبد الستار تميم من بيروت اشكرك انك يعنى اتصلت معانا خاصتنا بهذه المكالمة اشكرك شكرا جزيلا يا سادة اهلا بكم يعنى قضية شديدة التعقيد ازواج بقى وحكايات ومين راح ومين جه
احمد المراغى:انا بس عايز تسمحيلى بداية ان انا هتكلم بصفة عامة عن الضمانات القضائية والضمانات القانونية للمتهمين بصفة عامة دون ان اتحدث فى خصوص هذه القضية بالذات انا هتكلم فى ان القضاء المصرى قضاء عريق ويعنى احنا ادخلنا النظام القضائى الحديث فى مصر منذ سنة 1883 يعنى احنا نظامنا القضائى نظام عريق وله تقاليده الراسخة المستمرة التى نفتخر بها
لميس الحديدى: طب ليه يا سيادة المستشاررغم كل هذه الاراء كان في دايما احساس فى الشارع انها هتطبخ فيه طبعا صدمة دلوقتى احساس اخر احساس بالعدالة دلوقتى الى حد ما لكن فيه
احمد المراغى : يعنى انا احب اوكد ان القضاء والقضاه لا يحكموا الا بناء على الاوراق والمستندات المقدمة اليهم والتحقيق اللى باشروه فى المحكمة لا يتاثروا باى مؤثرات خارجية ويحضرنى فى هذا المقام ان اذكرواقعة قد تكون قد مضى عليها فترة يعنى اعتقد ان احد رؤساء الجمهورية وكان رئيس قوى لا ترد كلمته
لميس الحديدى : الرئيس السادات مثلا؟
احمد المراغى : لا الرئيس جمال عبد الناصر اعلن فى خطبة علنية واتهم احد رجال وزارة الخارجية وهو فى درجة وزيرمفوض بانه عميل لدولة اجنبية يعنى اتهمه بالخيانة العظمى عرضت هذه القضية على محكمة الجنايات برئاسة المرحوم المستشار فؤاد الرشيدى تولت التحقيق وقضت بالبراءة فاعتقد ان هذا مثال صارخ لاستقلال القاضى وعدم تاثره باى عمل
لميس الحديدى: قبل ما اروح بس للوضع الاجتماعى عايزاك كده يا دكتورعقباوى تفكر كده فى الناس وفى ماذا يقولون ؟ وكيف يفكرون ؟بس هسال سؤال قانونى للدكتورمحمود يعنى هل القضية دى مفيهاش وسط يعنى اما الاعدام او البراءة بعد ذلك فى النقض ولا فيه احكام وسط ؟
محمود القرنى : طبعا مادة 41 من قانون العقوبات ساوت بين الفاعل والشريك مساواة تامة
لميس الحديدى: يعنى فى الشرع مثلا ليس ..
محمود القرنى: انا ما بقلش فى الشرع انا بقول فى القانون دا موضوع تانى لكن مادة 41 من قانون العقوبات ساوت بين الفاعل والشريك مساواه مطلقة ولكن احنا بنقول دورالقضاء ايه ؟ لكل قضية ليها ظروفها جرى العمل على ان الفاعل الاصلى او الشريك ما يخدش عقوبه الفاعل الاصلى او المحرض
لميس الحديدى:هل انت استغربت ان المحرض ..؟
محمود القرنى: مقدرش اعلق على الحكم الحكم عنوان الحقيقة لكن انا بقول لو كان المسالة فيها موائمة المحرض ما يخدش نفس عقوبة الفاعل الاصلى لان تبقى المسالة يعنى من وجهة نظرى مش سليمة او انا لوهحكم الحكم ده مش هحكم الحكم ده ابدا يعنى .
لميس الحديدى: سيادة المستشارلما نطق المحمدى قنصوه وقال انه سيتم عرض القضية على المفتى او اخذ راى المفتى علشان اكون دقيقة اخذ راى المفتى هل اخذ راى المفتى هنا استشارى وليس وجوبى ؟
احمد المراغى: هو القانون اوجب على محكمة الجنايات قبل ان تقضى بعقوبة الاعدام ان تستطلع راى المفتى
لميس الحديدى: وراى المفتى دائما بيجى فى اغلب الاوقات موافقا لراى القاضى اورئيس المحكمة ؟
احمد المراغى : غالبا
لميس الحديدى : فى حالة هنا عايزاكم تفكروا فيها لحد ما اسال الدكتورعقباوى على الوضع الاجتماعى قيل ان سوزان تميم مهدر دمها فكروا بس كده معانا شوية هناك راى من الدفاع مثلا اومن بعض الاطراف ان مهدر دمها ليه ؟ لانها متزوجة من اكثر من رجل ؟
محمود القرنى: لايجوز ان انا اهدر دم حد
لميس الحديدى: لا لا انا بسال فابالتالى لا يجوز ان انا ساعتها اخد بديتها او اخد يعنى يقتل يعنى يعدم
احمد المراغى : احنا عندنا الجرائم ينظمها القانون الوضعى القانون الوضعى انه اذا تم القتل مع سبق الاصراروالترصد ومقترن بجناية اخرى العقوبة الاعدام فان القاضى هنا يطبق العقوبة والمسالة متروكة لاطمئنانه ولضميره فهنا يطبق عقوبة نص عليها القانون فالمسالة كيفية العقوبة وتقديرالعقوبة دى متروكة للقاضى
لميس الحديدى: دكتورعقباوى النيابة انا قريت مرافعة النيابة ومرافعات الدفاع وكل الكلام ده قالت ان هذه القضية سيادة المستشارمصطفى سليمان قالت ان هذه القضية التى هزت ضميرالمجتمع وتسارع فيها المال والسلطة والجاه وما الى ذلك قالت ان الراى العام لديه رغبة عارمة وشغف كبيرويريد الاطمئنان الى ان المال والسلطة لا يعصمان صاحبهما من العقاب هل اطمان الراى العام ان المال والسلطة لا يعصمان صاحبهما من العقاب؟
شوقى العقباوى: نسبيا
لميس الحديدى: اشكر صراحتك
شوقى العقباوى: خلونا نتكلم بصراحة هذه جريمة ارتكبت فى بلد والقتيلة الله يرحمها من بلد اخر والمتهمين بالقتل من بلد ثالث تمت المحاكمة هنا علينا ان نتحدث الان على رد فعل اوتفاعل الجماهيرمع القرارالذى اصدره السيد رئيس المحكمة اولا لسه لم يصدرالحكم
لميس الحديدى: الحكم يصدر يوم 25 ؟
شوقى العقباوى: هيصدر بعد ان يجىء رد المفتى اذا احنا بنتكلم عن حدث فى شكل تحويل الاوراق الى المفتى واثارت كل الضجة دى ولاننا نعيش مرحله فيها الاعلام بيلعب دور اساسى فى تهياة الجماهيروالاستجابة ليهم و و الى اخره فخلينا نتكلم من مستوى الجماهير فى حاجة اسمها العقل الجمعى وحاجة اسمها الضمير الجمعى لو خدنا الجماهيرالمصرية والجماهير العربية فى عقل جمعى العقل الجمعى ده فيه معتقدات وفيه تفكير قوالب معينة كل دول هتحدد استجابات الجماهير لى الواقعة دى
لميس الحديدى :كيف ترى استجابة الجماهير لها ؟
شوقى العقباوى: بالظبط انا شايف استجابة الجماهير بتعكس واقعنا المصرى هناك فى بطن المجتمع احساس قد يكون شاملا قد يكون نص نص بالضيق من تزواج السلطة مع المال ادى واحد نمرة اتنين ماننساش ان الضميرالمصرى العادى المحافظ بيرى ان القتيلة لم يكن سلوكها فوق مستوى الشبهات
لميس الحديدى: اه اقف هنا بقى عند الحتة دى لان انا مستفزة جدا من هذه القضية ان يقولك علشان ديه يعدم ده ؟ يعنى هى دى مش انسانه ؟ ايا كانت سمعتها ولا سلوكها ولا
شوقى العقباوى:احنا بنتكلم ليه الناس بيستجيبوا؟بيستجيبوا بناءا على معتقدات وانحيازات زائد بعد عبر سنوات طويلة من الكلام عن القومية العربيه والوحده العربيه كلنا نعرف ان هناك تناقضات ما بين الاقاليم العربيه المختلفة والدول العربيه المختلفة ففى هناك انحياز للمصريين تجاه من عداهم انحياز للخليجيين تجاه من عداهم انحياز للبنانيين تجاه من عداهم الواقع كالاتى بالنسبه لدبى دى بلد عايشه على السياحة عايشه على انها معبر للتجارة عايشه على سمعتها الامن بالنسبه ليها ضرورة قصوى فالبالتالى ما بنسمعش فى اى حته فى الدول العربيه كل مكان تخشه متصور 24 ساعة اذا المسألة هنا بقى دا طبيعى جدا القتيله الله يرحمها فى ضمير الشعب المصرى شايف انها ست مزواجة تعددت علاقتها شابة صغيرة السن اصبحت مليونيرة من خلال العلاقات مع الازواج الى اخره وبالتالى
لميس الحديدى: وبالتالى مفيش تعاطف معاها
شوقى العقباوى : بالظبط كده وبالتالى انا راى ان الشعب المصرى ويمكن الشعب العربى لا يرى انها يعنى اصحح لساعتك فيه حاجة فى علم الضحيه ان الضحية مسئولة عن دور الضحية
لميس الحديدى: انا هضطر هخرج فاصل اعلانى بس وهنرجع تانى لراى القانون فى هذا هخرج بس فاصل اعلامى ونرجع تانى نسمع راى القانون علشان ديه يعدم هذا ؟ هل ساوى القانون بين البشر جميعا رغم سلوكياتهم ؟ فاصل اعلانى ونرجع تانى اجله التقرير بعد الفاصل
فاصل
لميس الحديدى: القضية التى زلزلت الراى العام المصرى الحكم الذى سيصدريوم 25 غالبا باعدام محسن السكرى وهشام طلعت مصطفى القانون يا سيادة المستشار يساوى بين سىء السمعة وحسن السمعة؟
احمد المراغى: هى جريمة قتل المسألة تقديرية للدائرة يعنى كيفية تقديرالعقوبة دى ترجع الى ضمير القاضى من واقع ما قدم اليه من مستندات ومن التحقيق الذى باشره
محمود القرنى: بس هى صورة تقديرية مطلقة للغاية لكن انا هتكلم بس على راى المفتى القانون الحقيقة فيه عيب كبير قوى فى حتة راى المفتى دى جعل راى فضيلة المفتى استشارى يعنى انا ارجع لفضيلة المفتى كمحكمة واقوله اعدم دا ولا معدمهوش ؟ يجى يقولى لا اعدموا برضه ما كنش المفروض حتى يحط النص بالشكل المش كويس ده نص غيرملزم
احمد المراغى: النص ورد هذا لتطمئن المحكمة الى راى الشرع هو هيبقى راى المفتى امام المحكمة وتحت بصرها فهتقدر العقوبة عندما يرد راى المفتى ولابد ان يصدرالحكم بالاجماع
لميس الحديدى: اشرحلى بقى قصة الاجماع دى علشان في ناس هو لازم ان يكون منطوق الحكم بالاجماع ؟
احمد المراغى: ضرورى بالاجماع يا اما يبقى باطل فى المداوالة وفى المنطوق الاجماع عند النطق بالحكم بالاعدام هو دلوقتى بيحيله الى فضيلة المفتى لابداء الراى لاخذ رايه وانما الحكم عندنا يقول حكمت المحكمة يبقى لابد ان يكون بالاجماع ان احنا مش هنسبق الحوادث احنا مش عارفين فضيلة المفتى هيقول ايه وانما ايا كان ما سيذكره سيكون تحت بصرالمحكمة قبل ان تصدر حكمها فى هذه الحالة لابد من اجماع المحكمة بحيث ان اذا واحد ما اقرش الاعدام يبقى لا تستطيع المحكمة ان تقضى بالحكم
لميس الحديدى : دكتور عقباوى هل ترسخ هذه القضية هذه الصورة النمطية لرجل الاعمال القريب من السلطة الذى استغل السلطة بالرغم فيه بصراحة رجال اعمال محترمين كثيرين لكن هذا النموذج يرسخ هذه الفكرة بشكل اساسى داخل العقل الجمعى المصرى ؟
شوقى العقباوى: انا متصور ان هويرسخ لان سبق هذه الجريمة جريمة العبارة اللى لقينا ان القانون فيها اهدردماء الالاف لانه لما اتقدمت القضية من النيابة للقاضى اتقدمت بشكل انها مش جناية انها مخالفة او جنحة هذا استثار الجماهير و1200 بنى ادم راحو ضحايا ولقينا ان مرتكب الجريمة او المسئول عن الجريمة فى عرف الناس او فى نظر الناس هرب مش موجود يعنى الحوادث دى ورا بعضها بتؤكد فى الضمير الجمعى انه تحالف السلطة مع المال ليس فوق مستوى الشبهات وانه بيضرالجماهير وانه ممكن يعملوا اى حاجة هى دى القضية طبعا فيه الالاف من رجال الاعمال الشرفاء و و الى اخره وبيساهموا فى التنمية وناس اخلاقياتهم عاليه وكل حاجةاحنا بنتكلم ان الاستثناء دائما يلوث القاعدة
لميس الحديدى : وهل هذا الحكم الذى سيصدر او هذا القرارالذى صدر مبدئيا فيه قرار مبدئى صدر هذا القرار يعيد بعض الثقة فى التوازن فى الفصل بين السلطات فيه شىء من الثقة فى النظام
شوقى العقباوى :انا فى راى بيعيد بعد محاولة السلطة التنفيذية السيطرة على السلطة القضائية بيعيد قدركبير من الثقة فى استقلالية القضاء فى جريمة بهذا الحجم وبهذا التعقيد وان فى اطراف من دول اخرى غيرمصر اعاد الثقة ان القضاء المصرى مستقل وبخير وموضوعى وحيادى تماما
احمد المراغى : القضاء المصرى دائما مستقل ولا ينظر الى اى اعتبار اخر لا شخصية الجانى ولا شخصية المجنى عليه
لميس الحديدى : سيادة المستشاربقى خلينا نقول المرحلة القادمة النقض اذا ما حدث حادثا ما فى النقض انا قلقانة بقى الناس هتقولك اه شوفته بقى ماهما كانه عاملين القصة دى من الاول مشددة علشان بعد شوية يدخلوا ويخففوا عنهم الحكم انا بحكى دا حديث الناس وحديث العامة ولا يجب ان يكون حديثا دقيقا
احمد المراغى : احب اطمان الجميع اولا ان محكمة الجنايات سوف تحرر اسٍباب الحكم ايا كان الحكم الذى سوف تصدره انا بتكلم بصفة عامة هذا الحكم يستطيع الدفاع ان يبدى اسبابه ايه اسباب البطلان ؟ هل في بطلان فى الاجراءات ؟ هل في بطلان فى الحكم ؟ هل هذا الحكم مخالف للقانون ؟ هل هنالك خطا فى تفسيرالقانون ؟ اكثر من هذا هل المحكمة استخلصت استخلاص غيرصايغ من الادله ؟ هل خالفت الثابت فى الاوراق ؟ لانها اسباب قانونية
لميس الحديدى : معايا تليفون مهم بس انا عايزة اسال حضرتك يا دكتور فى رايك وانت تعمل بالمحاماة ايضا فيما اخطا الدفاع ؟ اذا كان اخطا الدفاع الدفاع قال انه خسر الجولة الاولى وهذه هى الجولة الاولى لان مصر لديها القانون يعنى فيه درجات من التقاضى ودا دليل ودا فيه رحمة فيما اخطا الدفاع بس هاخد تليفون على ما تفكر فى الاجابة المهندس حسين صبور رئيس جمعية رجال الاعمال مساء الخير يا باشمهندس
حسين صبور: مساء الخير يا فندم
لميس الحديدى: يعنى انا بعتذر لحضرتك مع الدكتور العقباوى ومع السادة الافاضل منذ قليل ان للاسف كل ما نحاول نحسن الصورة كل ما نقول يا جماعة هذا مجتمع شريف هذا مجتمع مكافح هذا مجتمع يبنى مصر هذا هو الاقتصاد المصرى وان مجتمع القطاع الخاص ده سليم والقلة هى المنحرفة وما الى ذلك تيجى حادثة زى دى وتقطم ضهرنا انتى رايك هتعملوا ايه ؟ انتوا كمجتمع رجال اعمال ممكن تصلحوا الصورة دى ازاى؟ يعنى بنحاول نصلحهالكم ما بينفعش
حسين صبور اولا رجال الاعمال هم جزء من المجتمع المصرى كلنا نشهد الفساد فى مناطق كثيرة فى المجتمع المصرى رجال الاعمال مش جايين من بلد غير مصر يعنى عندنا بنتكلم لسه على فساد فى قيادات بعض الوزارات مش هقول اسمائها واحد مقبوض عليه الشهر اللى فات وواحد قالوا فيه حاجة فى المسرطنات قبل كده وكيل وزارة الصناعة فى اسناد عملية مصنع قوص مش هتكلم على المحليات نحن جزء من المجتمع المصرى لكن من المؤكد ان نحن يجب ان نكون مثل جيد للمجتمع المصرى من المؤكد انهم كل اللى بيتكلموا عليهم اومعظم اللى بيتكلموا عليهم فى الفاسدين اذا كان حقيقة فاسدين هم من ربطوا بين السياسة والبزنس وانا فى اكترمن برنامج فى التليفزيون على الهوا اعترضت بشدةعلى الربط بين السياسة والبزنس كان فيه من كام سنة قضية نواب القروض نواب يعنى سياسيين وسرقوا البنوك قضايانا كلها وفسدنا كله فى البزنس هو من ربط السياسة بالبزنس الدستور الصرى يحرم ذلك سايبنهم ليه ساكتين عليهم ليه ؟
لميس الحديدى: اسال زمايلك فى الحزب الوطنى بقى هما دول بتوع السياسة والبزنس ؟
حسين صبور: انا لست عضو فى اى حزب
لميس الحديدى:لا انا عارفة انت راجل محترم وعلشان كده احنا بنستشير برايك حضرتك اتفضل
حسين صبور: انا يؤسفنى جدا ان يكون هناك قلة من رجال الاعمال فاسدين ونحن علينا فى جمعية رجال الاعمال ان نقطع دابر هذا الموضوع على فكرة لن يحصل فى تاريخ جمعية رجال الاعمال المكونة من اكتر من 30 سنة ان احد افرادها قدم فى قضية انا ما بتكلمش على الجمعية فقط انا بقول كرجال الاعمال يؤسفنى ان يكون فيهم فاسدين لكن انا بقول على الدولة ان تطبق الدستور بحذافيره ويمنع الربط بين السياسة والبزنس
لميس الحديدى: هل تشعران رجل الاعمال فى مصر مازال يحتاج لحماية السلطة؟ بمعنى هو بيقترب من السياسة علشان السياسة تحميه هو معاه فلوس فيغرى السياسة بالمال ويبتدى يقولك ايه احميلى ضهرى يا عمى احميلى ضهرى
حسين صبور: يعنى هما العرب القدامى قالوا اذا انشغل الحاكم بالتجارة فسد الحاكم وفسدت التجارة نحن لا نريد ان ينشغل الحاكم مش الحاكم يعنى رئيس الدولة هو بيقصد بالحاكم من يشتغل فى السياسة فى منصب قيادى لانريد ولا يجب ان نسمح له ان يشتغل بالتجارة اذا طبقنا ذلك وهذا مش هنالف قانون دستورنا بيقول كده لكن لماذا لا نطبقه ؟ نسال بقى من لا يطبقوه
لميس الحديدى : اشكرك جدا على هذا الراى يعنى السديد المهندس حسين صبور رئيس جمعية رجال الاعمال بعض رجال الاعمال الكثيرمن رجال الاعمال شرفاء والاغلبية منهم انا اعرفهم شخصيا بشتغل معاهم فى كثيرمن المجالات فى التغطية الصحفية الاقتصادية فيما اخطا الدفاع؟
محمود القرنى: ايا من كان الدفاع قام بعمله على وجه اكمل او اخطا فهو فيه مرحلة بعد صدور الحكم
لميس الحديدى: سؤال هل اصرارالدفاع على تلازم المسارين على ان هو يدافع عن السكرى ولا يفصل ما بين قضية التحريض وقضية القتل؟
محمود القرنى: لاشك ان فيه تعارض مابين المتهم محسن السكرى وهشام طلعت لا شك
لميس الحديدى: سيادة المستشار ترى ان تلازم المسارين ماكنتش يعنى خطة سليمة ؟
احمد المراغى: انا لا اعلق على هذا
لميس الحديدى: لا تعلق على هذا ؟
محمود القرنى: المحكمة لو شافت هذا التناقض كان يجب عليها ان تنبه الدفاع
لميس الحديدى: ها احيلك لى بعض اسباب نقض الحكم او بعض الخلل فى الاجراءات التى ذكرها استاذ فريد الديب محامى استاذ هشام طلعت مصطفى حين قال والله فى شبهة انحياز من المحكمة لان كان فيه محامى دخل مدعى بالحق المدنى كان يسكن فى بيت رئيس المحكمة ودا يبطل الاجراءات وما الى ذلك رغم ان رئيس المحكمة تقدم بمذكرة افصح فيها عن هذه العلاقة وقال انه لا حرج يبطل هذا الاجراء ؟
احمد المراغى: القانون صريح وواضح اوضح الحالات اللى لا يجوز فيها القاضى ان يقضى فى الدعوة حاجات معينة
لميس الحديدى: قرابة من الدرجة الرابعة ؟
احمد المراغى: مصاهرة قرابة وحالات محدد على سبيل الحصر وحالات اجاز فيها للدفاع ان يرد المحكمة دى برضه وارده على سبيل الحصرفالعبرة فى هذا المكان هل هذه من ضمن هذه الحالات ولا لا ؟ويجب ان يكون طرف الخصومة اللى مدعى فيها ان يكون خصم حقيقى فى الدعوة وبعدين من حق الدفاع ان يرفض رد المحكمة اذا المحكمة من سلطتها القاضى اذا وجد ان هو استشعر الحرج فى نظر القضية او الحكم فيها فله ان يتنحى عن نظر القضية
لميس الحديدى: هل النقض مقبول اتوماتيك يعنى فكرة نقض القضية اتوماتيك كده النقض مقبول؟
احمد المراغى: لا طبيعى انا هقول لحضرتك هوضحلك هذا القانون بالنسبة لعقوبة الاعدام كان حريص على اصباغ كثير من القيود والضمانات لان هذه العقوبة هى اشد العقوبات اول حاجة ان زى ما قلنا انه لابد من اخذ راى المفتى قبل ما تصدر المحكمة الحكم تانى حاجة الاجماع ايضا حتى بعد صدورالحكم بالاعدام وحتى لو المتهم لم يطعن بالنقد واجب النيابة العامة ان تقدم القضية لمحكمة النقض
لميس الحديدى: النيابة العامة العامة تقدم القضية لمحكمة النقض ؟
احمد المراغى ايوه تقدم مذكرة وتقول رايها
محمود القرنى: قانون 57 سنة 59 بشان اجراءات فى حالات الطعن امام محكمة النقض اوجب على نيابة النقض ان تتقدم بمذكرة وتعرض على محكمة النقض
احمد المراغى: المتهم ذات نفسه له ان يطعن بالنقد فى حاجة تانية كمان عاوز اوضحها النيابة العامة بتقدم مذكرة لى محكمة النقض برايها سواءا بالموافقة على الحكم او ان هو ترى نقض الحكم ايضا فى نيابة النقض قبل محكمة النقض ما تنظر القضيه نيابة النقض تكتب مذكرة وتبدى الراى فيها ايضا
محمود القرنى: يعنى النيابة الكليه المعروض امامها الدعوة بتقول رايها زى ما سعاد المستشار تقدم بتقول رايها بالنسبة للقضية اذا كان حكم الاعدام دا سليم ولا لا ونيابة النقض الجنائى ايضا بتقدم مذكرة
لميس الحديدى: وفى حالة النقض بقى بتعاد المحاكمة؟
محمود القرنى : دا موضوع تانى بقى اذا نقض الحكم تعاد المحاكمة
لميس الحديدى: يعنى النقض ده بياخد الحكم ده يشوفه سليم ولا مش سليم
محمود القرنى : تعاد المحاكمة مرة اخرى من دايره اخرى وله ايضا بعد ان تعاد المحاكمة مرة اخرى ان يفعل مرة ثانيه
لميس الحديدى: بس عايزة اعرف اذا اعيدت المحاكمة ؟
محمود القرنى: يطعن مره تانية فى الحالة دى محكمة النقض بعد كده بنفسها بتتعرض للقضية وهى اللى بتحكم فيها كمحكمة نقض والموضع فى ان واحد تتصدى وتحكم
لميس الحديدى: دى قصة طويلة طيب معانا المستشار يسرى السيد محامى الاستاذ عادل معتوق مساء الخير يا استاذ يسرى
يسرى السيد:اهلا استاذة لميس ازى حضرتك
لميس الحديدى: انتم ايه موقفكم بقى من الحكم ما هى خطواتكم القادمة هتقدموا مثلا طلب تعويض هتعملوا ايه ؟
يسرى السيد: اولا انا مش مستشا انا مجرد محامى بالنقض تمام دى نمرة واحد نمرة اتنين بخصوص ما ابداه استاذ فريد الديب المحامى بخصوص المحامى اللى جه ادعى بالحق المدنى ادعى عن نفسه دون صفة ودون مصلحة فى الدعوة وكانت هذه الدعوة من الدعاوى الغريبه جدا انى انا لاول مرة فى تاريخ حياتى المهنية 30 عام وتاريخ الحياة المهنية لوالدى المرحوم سامى السيد المحامى من سنة 49 ان انا اصادف هذا الكم الهائل من الاساتذة المحامين الافاضل اللى جم ادعوا بالحق المدنى عن نفسهم
لميس الحديدى: ايه قضايا شهرة يعنى ولا ايه؟
يسرى السيد: اه دون صفة ودون مصلحة فهؤلاء المحامين اقحموا انفسهم فى هذه الدعوة
لميس الحديدى: هيطلعوا على التليفزيون بقى هيبقوا مشهورين
يسرى السيد :وقد يكون هذا الاقتحام من جانب هؤلاء المحامين قد يكون بعضهم مدفوعا من بعض من لهم مصلحة فى انه يدعى ابطال اجراءات المحاكمة فكان هذا المحامى الذى جاء وترافع وبعدين ظهران عنوانه عنوان له صلة بالعقار الذى يسكن فيه
لميس الحديدى : انت بتلمح يعنى انه قد يكون مدفوعا من شخصا اخر لابطال الاجراءات؟
يسرى السيد : بالظبط ومع ذلك لم تفلح هذه المحاولة فى ان تحال هذه الدعوة من امام هذا القاضى العظيم الى اى دائرة اخرى وانما هذا القاضى قد كان متنبها الى هذه الالاعيب الرخيصة فجاء منه القرار بانه لا يستشعر الحرج وانه لا صلة اطلاقا بينه وبين هذا المحامى وان هذا المحامى لم يباشر امامه اى عمل قانونى او قضائى من اى نوعا كان فاتخذ قراره الحكيم بعدم استشعار الحرج
لميس الحديدى: استاذ يوسف بقى انتم هتعملوا ايه ؟ دلوقتى هل عادل معتوق اخر كلام يعنى هو اخر زوج لسوزان تميم ولا ايه النظام ؟
يسرى السيد:ايوه هو الوحيد اللى اسمه فى الاعلان الشرعى كزوج للمرحومة سوزان تميم
لميس الحديدى: والدها بقى بيقول معنديش فى واحد كان اولانى اسمه ..
يسر السيد: والله المحكمة ستفصل فى هذا الامروان المحكمة لها ان تحيل الدعوة المدنية الى المحكمة المدنية المختصة كى يدلوا كل طرف بدلوه لاثبات صفته ومصلحته بالادعاء المدنى
لميس الحديدى: هتطلبوا تعويض يا استاذ يسرى ؟
يسرى السيد: هنطلب التعويض لكن مجال التعويض لسه مش موجود دلوقتى الا ان يكون هذا الحكم نهائى بات ففرق كبير عن الحكم النهائى عن الحكم البات
لميس الحديدى: اشكرك شكرا جزيلا استاذ يسرى السيد محامى الاستاذ عادل معتوق الذى يقال انه الزوج الاخير لسوزان تميم الله اعلم كله عند الله يعنى معلوم فاصل نشوف فيه تقريرعن شركة مجموعة طلعت مصطفى السهم طلع ونزل وراح وجه طبعا بيتاثر لكن هذه شركة ثابتة راسخة لها من يديرها الاقتصاد المصرى يعنى بيقوم على مجموعه من المؤسسات مش لازم نتخيل ان الافراد او يجب ان تقوم هذه الشركات على فكرمؤسسى وليس على افراد
جهاد الصوانطة (نائب الرئيس التنفيذى بمجموعة طلعت مصطفى):بنقول ان المجموعة ملهاش اى علاقة لا هى كان ليها علاقة ان هو اللى اسسها لكن اللى بنقول انه من تاريخ ما استقال عن المجموعة واستقال وتنحى عن رئاسة مجلس ادارة المجموعة من ديسمبراللى فات لدلوقتى لم يعد له علاقة ادارية بالمجموعة استاذ هشام كان فى ظروف ومازال فى ظروف ربنا يساعده فيها وربنا يكون معاه فيها ظروفه كوجودة فى السجن بحد ذاته ومدى تاثيردا عليه اكيد مش هيساعده فى اخذ القرارات الصح فى ادارة مجموعة بالحجم ده ولا هيكون عنده الوقت لادارة مثل هذه المجموعه طبعا لو كان القرارمش ده او ياخد براءة طبعا من حقه انه يطالب بالرجوع الى رئاسة المجلس ودى بالاخضاع الى مجلس الادارة وموافقته ولكن ماكنش فيه مثل هذه انه بالنسبة لاستاذ هشام اما باكد انه مفيش اى التزام على المجموعه اتجاه اى التزامات على استاذ هشام ومفيش اصلا اى قروض شخصية باسم استاذ هشام دى حاجة الحاجة التانية موضوع الصرف على القضية موضوعى شخصى بحت استاذ هشام كان قد بنى صرح مؤسسى ضخم قائم على نظام يكفل وكفيل باتمام مسيرة نجاح المجموعة دون الاعتماد على اى فرد حتى لو كان الاستاذ هشام طلعت بشخصه
لميس الحديدى: الحلقة تقريبا خلصت كلمات سريعة دكتور عقباوى يعنى كيف تتوقع رد الفعل هيكمل ازاى شكل المجتمع ؟
شوقى العقباوى: صعب التنبؤ بشكل المجتمع بشكل عام انا شايف انه سيسود اكثرفاكثر انحياز المصريين للمتهمين وانه حرام والعقوبة قاسية
لميس الحديدى: لانها كانت يعنى لها قصص وحكايات .
شوقى العقباوى: لانهم مصريين والمسألة بيبان فيها ان العقوبة قاسية
لميس الحديدى: تفتكر حظر النشر دا كان شىء سليم؟
شوقى العقباوى : انا شايف انه دا احد القرارات الجميلة جدا والمهمة جدا
لميس الحديدى: وانا كمان كلمات سريعة نهائية بقى سيادة المستشارعن هذه القضية ؟
احمد المراغى: انا لا تعليق لى
لميس الحديدى: لا تعليق ؟
محمود القرنى:انا هتكلم على ضمانات حكم الاعدام اللى اتكلم عنها سيادة المستشار احنا قولنا عندنا اجماع اراء اخذ راى المفتى
لميس الحديدى: هذه القضية اما اعدام او براءة؟
محمود القرنى: لا ممكن فيه فى النص كتيربسرعة كده نتكلم على الاجراء من حقه يطعن بالنقض فى اسباب كتيرة قوى للنقض واهم سبب فيها بخصوص التثبيت حاجة تانيه مهمة جدا فى ضمانة تانية رئيس الجمهورية
لميس الحديدى:امتى هيلبسوا البدلة الحمرا ؟
محمود القرنى: دى مسالة شكلية بعد رئيس الجمهورية يصدق عليه او يبدله او يعفوا عنه
لميس الحديدى: طيب انا عندى نشرة اخبار فيجب ان اشكركم شكرا جزيلا هذه القضية شغلت المجتمع كله والراى العام كمان قال النائب العام لديه رغبة عارمة وشغف كبير ويريد الاطمئنان ان المال والسلطة لا يعصمان صاحبهما عن العقاب اشكركم شكرا جزيلا وهذه لميس الحديدى تحييكم وتصبحوا على خير