اتجاهات

الاربعاء 28/9/2011
رشا مجدي: مشاهدينا الكرام مساء الخير وأهلا بكم مع حلقة جديدة من إتجاهات خلوني أبتدي حلقة النهارده بقصة صغيرة كده هتبين لكم إحنا عايزين نوصل إيه " كنب أبتنقل ما بين محطات التليفزيون ووقفت قدام إعلان في محطة إسرائيليةالإعلان ده إستوقفني لإن فيه لقطات عن مصر اللقطات ديه تقريباً أغلبها كانت عن الثورة وميدان التحرير – بعد اللقطات ديه علي طول لقطات لأحداث شغب وفوضي وأحداث عنف وإغلاق طرق ومظاهرات – طبعا المشهد لم يخلوا من لقطات لحادث مروري لسائحين أجانب وفي آخر اللقطات اللي بينوها كلها عن مصر ديه مشاهد آخري لسائحين أجانب في إسرائيل وإسرائيل آمنه وجميله وخضراء – يعني هم عايزين يقارنوا ما بين الوضع في مصر والوضع في إسرائيل يعني حتي الظروف التي تمر بها مصر بيحاولوا إستغلالها أسوأ إستغلال لتخويف السائحين من مصر أنا مش حأقدر أقول إن السياحة تعافت بشكل كامل في ولكن بدأت صحيح أقل من المتوقع أو أقل مما نأمل لكن بدأت خاصةً إن الأمور إبتدت في يوم نلاقيها هاديه ويوم نلاقيها صاخبه جداً السياحة عشان ترجع لازم قبلها يعود الهدوء والإستقرار الأمني عشان نرجّع السُيَّاح لازم تعود الحياه الي الشركات اللي أغلقت أبوابها والملايين اللي تعطلت وأبواب الرزق أُغلقت أنا عايزة أقول لك حاجة صغيرة جداً إن السياحة أحد الموارد الأربعة للدخل القومي السياحة بتساهم بنسبة 11% بيعمل بها 13% من إجمالي قوة العمل السياحة بتوفر فرصة عمل من بين كل 8 بيرتبط بها نمور أو ركود 72 صناعة وخدمة بها علاقة بالسياحة – السياحة الخارجية طبعاً أنا مش حأتكلم علي السياحة الخارجية كتير لكن لما حنتكلم عن السياحة الخارجيةفي حلقتنا ليها همومها ليها تحدياتها الخطيرة اللي بقة تبؤرق كل مصري غيور علي سياحة بلده أنا أقصد بالتحديد هنا مشاكل العمرة والحج – شركات سياحه – قوانين سياحه – تراخيص سياحه – إستثمارات في السياحة – مخالفات في السياحة ويبقي الطلب الأهم للشعب المصري الذي يجب أن يستوعبه هو عودة السياحة معنا في حلقة الليلة من إتجاهات المسؤول الأول عن السياحة في مصر الوزير منير فخري عبد النور نلتقي معه لكن بعد الفاصل
فاصل " تقرير لآراء رجل الشارع "
رجل :السياحة في البلد واقعة واقعة واقعة وفيه ناس عايزة تخرَّب البلد
" علي الشاشه الشعب يريد عودة السياحة " ومشاهد من الأهرامات والهدوء
رجل آخر: إنت شايف المنظر كله ما فيش سياحة ما فيش دخل لينا
رجل آخر:السايح بدل ما كانت نسبة 80% - 70% من السياحة الل ممكن تنزل مصر فيما بعد نزلت 5% 7%
رجل :نرجع السايح لازم نغير أنفسنا
شاب :نعمل مهرجانات عندنا الأهرامات عندنا أبو سنبل عندنا شرم الشيخ عندنا أماكن كبيرة جداً وعظيمة تأهلنا إن إحنا نبقي أكبر دول في العالم في السياحة
رجل :السياحة قليله يعني مش الوضع هو الأولاني حضرتك اللي الكثافة بتاعة السياحة كانت موجودة فيه أما بالنسبه للأمان فيه أمان
شاب : محتاج الوزير ييجي ينزل يبص نظره كده واقعية علي الميه الجوفية اللي مبهدلة الدنيا هنا ديه كده والوضع الأمن ما فيش أنا واحد ماشي في الهرم – محتاجين شوية أمن وشوية نظام
شاب : المشاكل اللي موجودة هنا موجودة بقالها فتره حمامات مافيش صفايح زباره مفيش مفيش أي إهتمام في المنطقة مجرد مجرد الهرم موجود معتمدين علي إن صخر موجود ده مجرد دخل وده ما ينفعش
رجل :إن شاء الله حترجع السياحة ثاني من أول وجديد وأحسن من الأول
رجل :فين وزارة السياحة إحنا مش شايفين – فين بتوع الآثار أحنا مش شايفين حد بتاع آثار
رجل :السايح طبعاً هرب النهارده لإنه بيمشي مش آمن عليه ولا علي عياله والعربيات ومتسكلات في وسط البتاع بجري علي الشارع بيطلع علي الرصيف خايف النهارده المحلات بملايين وناس فنانين وناس علي أعلي مستوي بتيجي بتخاف تنزل الشارع إلا بعد الساع 12 باليل الساعه واحده بالليل
رجل :لما يكون فيه جروب جاي تبص تلاقي العربيات بتفرقهم فمينفعش فلازم العربيات ديه تتمنع زي الأول
بياع أمام محله : أنا أول واحد عايزيتفرض عليَّ النظام ما أحطش حاجة تحت الرصيف أنا أمضي علي كده ما أداريش الأثر الجميل ده " الإشاره علي الهرم وأبو الهول "
فاصل
رشا مجدي: مشاهدينا الكرام معنا الآن ومعكم علي الهواء مباشرةً معالي وزير السياحة السيد منير فخري عبد النور أهلا بك يافندم
منير فخري عبد النور: أهلا بك
رشا مجدي: حمدالله علي السلامة
منير فخري عبد النور: الله يسلمك
رشا مجدي: ليه فرنسا حضرتك لسه راجع من فرنسا عايزين نعرف ليه فرنسا وليه الألف إبتسامه إشمعنا ألف إبتسامه
منير فخري عبد النور: ليه فرنسا لأنه كان فيه أكبر معرض سياحي بيعقد في فرنسا في هذا التاريخ إسمه " توب ليزاه " لمدة 3 أيام حضرتهم وبهذه المناسبة أطلقنا حمله إعلانيه ودعائيه جديدة مخصصة للسوق الفرنسي وحأقول لك ليه السوق الفرنسي بالتحديد لما هذه الحمله تحت عنوان ألف إبتسامة – ألف إبتسامة بمعني إن المصريين بيرحبوا بالسواح عامةً والسواح الفرنسيين بالتحديد فرنسا تأتي في الترتيب الخامس من الدول المصدرة للسواح في مصر عدد السواح الفرنسيين الذين زاروا مصر السنة اللي فاتت 600 ألف
رشا مجدي: السنة اللي فاتت اللي هي 2010
منير فخري عبد النور: 2010 – 600 الف أقل كثير جداً الطلاينة اللي بلغ عددهم مليون و200 ألف اقل من الألمان اللي عددهم مليون و400 اقل من الإنجليز اللي عددهم مليون و 700 وأقل من الروس اللي عددهم 2 مليون و 800 ألف لما السائح الفرنسي سائح له قيمه بالنسبة لنا لإن الجزء الأكبر من السواح الفرنسيين بيروحوا لقصر وأسوان وسياحتهم سياحه ثقافيه بعكس الغالبيه العظمي من السواح اللي بييجوا مصر النهارده سواح بيبحثوا عن الشمس والبحر سواح شواطئ
رشا مجدي: سائح مثقف ممكن نقول بيبحث عن الحضارة
منير فخري عبد النور: هو كده هو سائح مثقف بيأتي مذاكر دارس في إيده الكتاب اللي مذاكره وخلافه فبنهتم بهذا السايح وهم بيحبوا مصر وهم بيحبوا الآثار المصرية
رشا مجدي: كان فيه تجاول للحمله بقى ؟
منير فخري عبد النور: بشكل كبير جداً – أولا الحمله بديعه لأنها طبيعية جداً بتركز علي رجل الشارع المصري سواق التاكسي العامل في السوق الموظف في فندق وخلافه اللي بيتكلم اللي بيدعوا السائح بلغه سهله وبسيطه وطالعه من القلب لزيارة مصر أولا الإقبال علي الجناح المصري كان منقطع النظير – الإهتمام بمصر والتطورات السياسية والأمنية إهتمام كبير جداً عقدت مؤتمر صحفي حضره عدد كبير جداً من الصحفيين سواء كانت الصحافه متخصصة السياحية او الصحافه العامه المهتمه بالشأن السياسي والمهتمة بالتطورات – تطورات هذه المرحله في مصر – وطبعا الصحفي يجب أن يعبرعن قلقه عن الحالة الأمنية في مصر عن مستقبل الحالة الأمنية في ظل الإنتخابات القادمة وخلافه والحقيقة كانت إجاباتي في منتهي الصراحه وفي منتهي البساطة
رشا مجدي: حنيجي عند الحاله الأمنية ديه معالي الوزير تحديداً طبعا كل أمنياتنا إن نشوف الموسم القادم موسف مزدهر نرجع نشوف الموسم ده ثاني لكن خليني أبتدي بحضرتك هل وزير في الحكومة أفضل أم كنت معارض أسهر
منير فخري عبد النور: لأ شوفي المعارضة أسهل بكثير جداً من المسؤول متخذ القرار أسهل بكثيرإن الواحد يعارض ما فيش شك إنما عايز أقول لك إن التحدي في ظل هذه الظروف في ظل هذه المسؤولية في الحقيقة بالنسبة لي علي الأقل ممتعة يعني الناس بتقول لي إنت صعبان علينا إنت في ظروف صعبة وخلافه دا كلام مظبوط إنما التحدي ومواجهة هذا التحدي بالنسبة لي ممتع لإني متأكد علي يقين إني حأنجح مش لإني بأشتغل كثير
رشا مجدي: أصل نجاحك مرتبط بحاجة مش بإيدك وهو أمن الشارع المصري يعني ما فيش سياحه من غير أمن فالنجاح للأسف إنت ممكن تكون بتعمل مجهود كبير جداً بس حتعمل إيه
منير فخري عبد النور: أنا حأقول لك أولاً علي فكره لما شُكلت الوزارة السيد مشير طنطاوي بيقول لي يجب أن تنجح قلت له نجاحي متوقف علي نجاح السيد وزير الداخلية اللي كان واقف جنبي وده كلام مظبوط إنما واقع الأمر أنا لازم أقنع السائح أن المظاهره ليست خطره بالنسبة له لازم أذكَّره إنه في أوج أيام الثورة وفي قلب ميدان التحريركانت اللافتات بترفع وتطالب السواح بعدم مغادرة البلاد وبتوعدهم بحمايتهم لازم أقنع السائح إن في بلادهم عندهم مظاهرات أكثر بكثير من مظاهراتنا قد تكون مظاهراتهم أعنف من مظاهراتنا لازم أقنع السائح إن لما عندهم إنتخابات السياحة ما بتنخفضش عندهم وإن الإنتخابات هي ممارسة ديمقراطية في بلد أثبتت أنها قادرة علي ممارسة الديمقراطية وأثبتت أنها بلد حضار ثورة في الحقيقة كانت – دعونا نعترف إنها كانت بديعة – بديعة بمعني إن الممارسة نفسها كانت فيها قدر كبير من الحضاره عاوز أذكر كمان إن الجزء الأكبر من المقاصد السياحية المصرية بعيده كل البعد عن البؤر الملتهبة
رشا مجدي: بس حادثة الجورنا اللي حصلت النهارده أكيد هيكون لها تأثير بشكل أو بآخر خصوصاً زي ما حضرتك كنت بتقول إن اللي عملوها ناس مستفيدين من السياحة ما هي ديه المشكلة
منير فخري عبد النور: مظبوط مظبوط حأقول لك حاجة إحنا من إسبوعين كان فيه مجموعه سياديه طليانيه رايحة من مرسي علم كانت رايحة الأقصر وفي الطريق في قرية جنب إدفو لسبب أو لآخر كان عنده مشكلة ميه مشكلة ري طلعوا علي الطريق قطعوا الطريق طبعا في وقتها كانت مأساه وتدخلنا وا وا وا الي إن فتح الطريق وبتاع عرفنا نستغل هذا الحدث بحيث إن السواح إنبسطوا جداً عملنا لهم حفلة إعتذرنا فيها لما حدث وطالبنا الجماعه اللي قطعوا الطريق إن ييجوا هم يحتفلوا وقد كان هو أهل القرية جم وهم اللي أغتذروا للسواح وشرحوا لهم الموقف اللي حصل إن الجماعه الطلاينه قال لك أولا هذه المظاهرات بتحصل عندنا وقد تكون أعنف وعندنا اللي بيتظاهر ما بيجيش يعتذر يعني إنقلبت لصالحنا وفعلاً مشيوا مبسوطين جداً ملخص القول الوضع صعب والتحدي كبيرإنما هناك ممكن نقلب المسائل لصالحنا ولإنه في النهايه الشعب المصري حتي لما بيثور بيثور بإبتسامة وحتي لما بيزعل بيكون زعله لطيف
رشا مجدي: زعله مش عنيف
منير فخري عبد النور: آه ما فهوش عنف
رشا مجدي: خليني آجي علي موضوع
منير فخري عبد النور: علي فكره خليني أقول لك بقى إن السياحة بتتحسن وبتتعافي
رشا مجدي: فعلاً
منير فخري عبد النور: الأرقام واضحه وضوح الشمس يعني بتتحدث عن نفسها خليني أذكَّر إن في شهر فبراير السياحة كانت إنخفضت بنسبة 80% بالمقارنة الي فبراير العام الماضي " فبراير 2010 " – هذا الإنخفاض ظل يتناقص شهر بعد شهر إحنا وصلنا لشهر أغسطس والإنخفاض 20% عن العام الماضي أنا أعتقد
رشا مجدي: دا في شرم الشيخ والغردقة وكده
منير فخري عبد النور: أساساً ساحل البحر الأحمر
رشا مجدي: هي في شرم الشيخ أعتقد بدأت تنتعش قليلاً لما حصلت المغادره يمكن إبتدي شوية مغادرة الرئيس السابق لشرم الشيخ إنتقاله من هناك ديه إبتدت تنتعش شوية شرم الشيخ
منير فخري عبد النور: شرم الشيخ منتعشة سواحل البحر الأحمر كلها الغردقة الجونة بتاع منتعشة ونسب الإشغال فيها مرتفعة
رشا مجدي: أتمني
منير فخري عبد النور: المشكلة القاهرة وفي الصعيد
رشا مجدي: ما أنا عارفه المشكلة في القاهرة وفي الصعيد خليني حنتكلم علي موسم جاي بس حأتكلم علي الموسم ده من ناحيتين هو موسم الحج كلنا فاكرين اللي حصل في عمرة العشره الأواخر من رمضان إزَّاي نضمن إنه لا يتكرر مثل ما حدث في عمرة العشرة الأواخر من رمضان
منير فخري عبد النور: أولا خليني أقول لك إن إدارة عودة المصريين من موسم الحج أسهل بكثير جداً من إدارة عودة المصريين من عمرة رمضان
رشا مجدي: ليه ؟
منير فخري عبد النور: لإن الأعداد مختلفة خالص
رشا مجدي: محدده
منير فخري عبد النور: مختلفة إنت بتتكلمي عن حجم مختلف خالص
رشا مجدي: يعني العمرة بتبقي أكثر من الحج يا فندم ؟
منير فخري عبد النور: آه بكثير عدد المحتملين السنة ديه بلغ 700 ألف عدد الذين كانوا في الأراضي المقدسة يوم 28 رمضان بلغ 243 ألف فكان مطلوب عودة 243 ألف معتمر
رشا مجدي: قبل الوقفه
منير فخري عبد النور: قبل العيد عملية مستحيلة يعني أياً كان المشاكل اللوجيستيه مستحيلة الحل طبعا بالإضافه الي المشاكل الإضافيه اللي حصلت موسم الحج إنت بتتكلمي عن أكثر تقدير بتتكلمي عن 90 ألف
رشا مجدي: عدد أقل بكثير
منير فخري عبد النور: عدد أقل بكثير نمرة إثنين في الحقيقة فيه بعض القرارات التي إتخذت لتفادي كل هذه المشكلات
رشا مجدي: فيه صاله إتفتحت جديد أعتقد للحج
منير فخري عبد النور: طبعاً ديه حتسهل ديه للمواسم مش للحج للمواسم كلها
رشا مجدي: المشكلة العوده من السعودية للقاهرة هي ديه المشكلة الأكبر
منير فخري عبد النور: تمام
رشا مجدي: كان فيه تحقيق حيجري حول اللي حصل في موسم العمرة يا تري عرفتوا إيه الأسباب اللي أدت لحدوث المشكلة
منير فخري عبد النور: آه الأسباب عديده ما فيش سبب واحد هو الي تسبب في المشكلة الأسباب عديده أسباب خاصة بإلغاء بعض رحلات الطيران السعودي ثلاث أيام وراء بعض
رشا مجدي: مين اللي لغاها
الوزير منير فخري عبد النور: لأسباب فنية
رشا مجدي: لأسباب فنية
منير فخري عبد النور: حصل تكدس أسباب خاصة ببطؤ الإجراءات في مطار جده أسباب خاصة بسلوكيات المعتمر المصري دعونا نعترف الشنط الثقيلة الشنط الكثيرة المحملة وخلافة نمرة ثلاثه بقى أو نمرة أربعة وده اللي ممكن الواحد يتحكم فيه إن عدم إحترام المعتمر المصري بمواعيد العودة يعني علي سبيل المثال فيه عدد كبير جداً من المعتمرين اللي قعدوا من رجب وشعبان قعدوا في السعودية المفروض كانوا يرجعوا – المفروض إن يحترموا لما بييجي سيافر عنده مواعيد محدده للسفر وللعودة والمفروض إنه يحترم تاريخ عودته
رشا مجدي: يعني خطأ من الناحيتين طيب حضرتك كان لك تصريح بتقول فيه إن التنظيم الحالي للحج لا يحقق العدالة وحضرتك حتضع نظام جديد يُعيد الحق في تأشيرات الحجاج ناوي تعمل إيه ؟
منير فخري عبد النور: تمام تمام ناوي أعمل إيه – أنا أفتكر – تعرفي إن النظام الحالي مصر نصيبها 80 ألف تأشيرة حج مقسم كده
رشا مجدي: جمعيات أهليه – شركات
منير فخري عبد النور: حأديلك الأرقام مظبوطه 30 ألف قرعه بتديرها وزارة الداخلية في حدود 14-15 ألف جمعيات 30 ألف للشركات السياحية و5 ألاف بتوزع لمؤسسات مختلفة " وزارات مجلس الشعب
رشا مجدي: ديه مش موجودة – مش حتبقي موجودة
منير فخري عبد النور: أنا يخصني ال30 ألف بتوع الشركات أولاً هذه التأشيرات المفروض المستفيد منها هو الحاج مش الشركه – الشركه هي المنظمه للرحله السياحية – منظمة لرحلة الحج – إنما المستفيد من التأشيرة هو الحاج اللي بيحصل النهارده إنه ال30 ألف تأشيره بتوزع علي الشركات طبقاً لمعايير مختلفة هذه المعايير هي أساسا أقدمية الشركه وسابق خبرتها في تنظيم رحلات الحج بينما الواقع المفروض إن هذه التأشيرات تروح مباشرةً للحجاج والحاج هو اللي يختار الشركه اللي حتنظم له الرحله بيترتب إيه الفرق بيترتب توزيع هذه التأشيرات علي الشركات إنه بتخلق سوق سنويه للتأشيرة إن التأشيرات بتتباع بسعر معين
رشا مجدي: الشركات الصغيرة بتبيعها للشركات الكبيرة
منير فخري عبد النور: تمام وبالتالي لها قيمه وهذه القيمه بتحمل علي تكلفة الحج وبيتحمل تكلفة الحج الحاج الصغير
رشا مجدي: بالظبط يا فندم أنا عايزة أقول لحضرتك إن هناك إحتكار لشركات معينه في موسم الحج لدرجة إن أسعار الحج في مصر تقريبا ما وصلتش في أي بلد للأسعار ديه يعني بنسمع أرقام كأنك بتشتري عربيه عشان يطلع يحج يعني
منير فخري عبد النور: ده كلام مظبوط والحقيقة ما ينفعش ما ينفعش وفي تصور معين في الحقيقة أنا كنت عايز نطبقى من السنة ديه للأسف غرفة شركات السياحة إعترضت وقالت إن الوقت ضيق وتخشي إن ضيق الوقت ما يسمحلناش بوضع نقط فوق الحروف وحل المشكلات التي قد تطرأ نتيجه للتنظيم الجديد إنما بندرس مع بعض هذا التنظيم الجديد بالنسبه للموسم اللي جاي بإذن الله
رشا مجدي: إن التأشيرة تبقي مع الحاج ويختار شركة السياحة
منير فخري عبد النور: بالظبط كده إنه نعمل قرعه للحجاج وفقا لمستويات مختلفة لرحلة الحاج علي حسب مقدرة الحاج والحاج يأخذ التأشيره ويروح للشركه السياحية اللي هي تناسبه اللي ممكن تنظم له رحلة الحج وفقاً للمستوي اللي هو يرغبه حتوفر فلوس كثيرة حتخفض من تكاليف رحلة الحج وحتوزع هذه التأشيرات بطريقة أكثر عدالة
رشا مجدي: وفيه شركات كثير كلها حتقفل مش حيبقي ليها لازمه يعني مش حتاخد التأشيرة وتبيعها لشركه ثانية
منير فخري عبد النور: والله بقى المنافسة هي اللي
رشا مجدي: برضه خلينا في موسم الحج شركات سياحيه كثير ما أعرفش لسه الموسم حيبقي عامل إزَّاي الشركات ديه كانت مخالفه لشروط كثيرة يعني بعد ما الحجاج بيروحوا مواصفات معينه ياما عرضنا حاجات ولقطات كل كام واحد في الخيم ما بيلاقوش اتوبيسات بتبقي دورات المياه وأماكن الإستحمام حالتها سيئه جداً ومستوي الأكل حشرات الي آخره
منير فخري عبد النور: طيب المخالفات لو حصل لو حصل أنا طبعاً أنا طبعا مش حسبَّق الماضيع لكن لك في الشركات حتعاقب بإيه أو حتبقي فيه جزاءات قانونية معينة
منير فخري عبد النور: شوفي أولا عشان ما نعممش إحنا مسؤولين عن الحج السياحي عشان ما نخلطش الأوراق ببعضها
رشا مجدي: ما هو ده حج سياحي يافندم
منير فخري عبد النور: وضعنا معايير واضحه جداً للمستويات المختلفة لرحلات الحج المختلفة والحقيقة الرقابه السنة ديه ستكون صارمه والحزاءات واضحه وضوح الشمس ومنصوص عليها وستنفذ ولن يستثني أحد من تنفيذ القانون
رشا مجدي: ما كنتش بتنفذ قبل كده الحاج ياعيني حقه مهضوم
منير فخري عبد النور: في الحقيقة أنا ما أعرفش كانت بتنفذ ولا لأ إنما أنا بأقول لك الآن
رشا مجدي: ما أنا بأقول لك حضرتك كنت معارض ساعتها بس أنا بأقول لك اللي كان بيحصل إن إحنا بنعرض المشكلة ما حدش كان بيعمل حاجة
منير فخري عبد النور: أنا بأقول لك النهارده مش حيكون فيه إستثناء لمخلوق مش حيكون في إستثناء لشركه واللي مش حيحترم حقوق الحجاج سيجازي الجزاء المناسب
رشا مجدي: عندي سؤال عايزة أسأله لك وياريت حضرتك تكون صريح معايا فيه بلاش إجابه دبلوماسيه
منير فخري عبد النور: حأحاول
رشا مجدي: ياريت ياريت يا فندم ههههههه
منير فخري عبد النور: هههههههههههه
رشا مجدي: من بعد الثورة تصاعد تيار ديني بقي صوته عالي وهذا التيار حرَّم يدعو الي تحريم السياحة بشكلها الحالي يعني سياحة الشواطئ البلاجات تتقفل الكازينوهات تتقفل والخمور التي تُباع كذا كذا كذا هل دا أثّر علي السياحة بشكل أو بآخر ؟
منير فخري عبد النور: طبعا طبعا فيه أحدهم خرج ليقول إنه يجب إنه نخبِّي التماثيل ولا حاجة زي كده
رشا مجدي: لأ دا كان بيهدد إنه يهد التماثيل
منير فخري عبد النور: فيه واحد هدد إنه يهدها وواحد قالك لازم نحط عليها شمح وبتاع في الحقيقة أنا عايز أقول إنه اللي ما هواش فخور ببلده وماهواش فخوربتاريخ بلده وبتراث أجداده في الحقيقة عليه إنه يعود لقراءة التاريخ كي يفخر وعايز أقول لهؤلاء إن مصر بلد عظيمه وتاريخها عظيم ويجب أن نفخر بهذا التاريخ ويجب أن نفخر بهذا التراث وأخيراً عايز أقول إن السياحة وإن كان دخلنا منها 12 مليار ونصف السنة اللي فاتت أعتقد إن أحسنا تخطيطها وأحسنا تسويقها ممكن أن نضعِّف هذا المبلغ وإن كان ربنا إدي بترول لبعض الدول هذا البترول سينضب إنما ربنا إدي لمصر تاريخ وتراث وحضاره وطبيعه وشواطئ وشمس وصحراء لن تنضب وستستمر في كسب السياحة التي يمكن أن تكون المصدر الرئيسي لمصر والمصريين ومش حأقول لحد اللي مش عاجبه يروح لأ المفروض البلد بلدنا جميعا وتضمنا جميعاً إنما حأقول لهم وأطالبهم بالعوده للكتب والتاريخ لكي يقرؤها ويفخروا إجابتي صريح
رشا مجدي: صريحه آه – صريحه بس أتمني إن الرساله توصل لهم ديه بنتمناها يعني لإن حضرتك وإنت بتذكر ده تذكرت ما حدث في طورا بوره لما هدوا معابد كثيرة فأنا خائفة في حالة خوف مش قادرة أخبيها
منير فخري عبد النور: هي ما كنتش كورا بورة هي كانت صحراء أفغانستان وكانت تماثيل عبوده الرائعه
رشا مجدي: أعتقد آه كانت حاجة كده واليونيسكو حتي عملت أياميها مشكله كبيرة
منير فخري عبد النور: طبعاً طبعاً
رشا مجدي: حضرتك ذكرت في وسط كلامك إن في 2010 كانت دخل السياحة 12 مليار ونصف خسرنا قد إيه السنة ديه المعدلات نزلت لكام ؟
منير فخري عبد النور: شوفي أنا حأقول لك حاجة عشان أقارن عدد السواح اللي دخلوا مصر سنة 2010 كان 14 مليون و500 ألف والدخل منهم كان 12 مليار ونصف أنا أتوقع لو ربنا ساعدنا بلاش ربنا إستغفر الله العظيم هو بيساعدنا في كل وقت إنما لو الشعب فاق والشارع هدي أنا أتصور إن الأشهر الأربعة الأخيرة من السنة اللي هو من سبتمبر الي ديسمبر السياحة حتعود الي معدلاتها السابقى
رشا مجدي: يعني نقدر نوصل الي 12ونصف مليار تاني !!
منير فخري عبد النور: لأ شهر بشهر حنوصل الي نفس أرقام السنة اللي فاتت بإذن الله وحأديكي أرقام كويسه تعرفي إن في شهر أغسطس علي سبيل المثال عدد السواح الروس اللي زاروا مصر كان أكثر من عدد السواح الروس اللي زاروا مصر في أغسطس السنة اللي فاتت ب24% عدد الأوكرانيين اللي جم مصر في أغسطس 2011 كان يزيدوا عن عدد الأوكرانيين اللي دخلوا مصر أغسطس 2010 بنسبة 34% أنا أتصور إن علي نهاية السنة عدد السواح اللي حيكونوا زاروا مصر خلال السنة ديه الميلادية 2011 حيبلغ تقريبا 11 مليون سائح وإن الدخل حيقترب من أو يزيد بعض الشيئ عن 10 مليار دولار بإنخفاض 25% عن السنة اللي فاتت
رشا مجدي: أنا بأراجع الورق لإن كنت عايزة أطلع الرقم ده لإن حضرتك كنت بتتكلم عن الروس الأوكرانيين السياحة العربيه في مهرجان اللي كان في رمضان مهرجان الفوانيس وإتكلف 22 مليون جنيه
منيرفخري عبد النور: لأ مش حقيقي منين جبتي هذا الرقم السنة اللي فاتت يمكن إتكلف 22 مليون
رشا مجدي: طيب إتكلف السنة ديه كام ؟
منير فخري عبد النور: ولا حاجة أبداً إستخدمنا نفس الإعلان بتاع السنة اللي فاتت وما كلفش
رشا مجدي: ما فيش حد جيه
منير فخري عبد النور: لأ مش حقيقي
رشا مجدي: لأ يعني حأقول لحضرتك حاجة مافيش حد يعني الإخوه العرب ما شوفناهمش السنة ديه
منير فخري عبد النور: حأقول لك حاجة يمكن ما رحتيش شرم الشيخ ويمكن ما رحتيش الغردقه هذا المهرجان بيهدف الي جزب الإخوه العرب في رمضان والعيد الصغير والعيد الكبير – أولا العيد الصغير أي واحد كان في الغردقه أو في شرم الشيخ شافهم علي فكره بنتكلم عن الإخوه العرب عامةً عدد الأردنيين اللي جم مصر السنة ديه أكثر من عدد الأردنيين اللي جم مصر السنة اللي فاتت بكثير عدد اللبنانيين أكثر منهم بكثير ومع ذلك السياحة البينيه العربيه سياحه مهمة ويجب أن نهتم بها وأي أعلان أو دعايه أو مجهود تسويقي بنبذله مش ضروري إنه يثمر في ساعتها إنما قد تأتي ثمار هذا المجهود في السنوات القادمه وعلي فكره لهذه السيره أنا مسافر الإسبوع اللي جاي العقبه حيث يجتمع وزراء السياحة العرب بهدف تنمية السياحة البينيه العربيه اللي هو للأسف كل الدول العربيه نتيجه للأحداث الجسام التي شهدتها الدول العر بيه كل الدول العربيه اللي مهتمه بالسياحة تأثرت السياحة فيها
رشا مجدي: بمناسبة الدول العربيه أعتقد أن عدد الإخوه الليبيين كان كثير السنة ديه أنا يمكن ما رحتش إسكندريه حتي السنة ديه بس كان هناك من يقول أن الإسكندريه إتحولت الي مصراته مثلاً دا من ضمن الحاجات يعني عدد الليبيين اللي دخلوا مصر كبير
منير فخري عبد النور: جداً ليه الإسكندريه والقاهرة أيضاً ستي إستارز علي سبيل المثال تعرفي فيه 3 فنادق في ستي إستار كان الجزء الأكبر من هذا الإشغال من الإخوه الليبيين اللي جم مصر
رشا مجدي: هرباً طبعاً
منير فخري عبد النور: أه بعد الأحداث
رشا مجدي: طيب في 9 الشهر ده فيه قرار طلع وبعد ما طلع القرار بعدها يمكن بيوم تم إلغاء القرار ده – القرار ده هو إيه قصر منح التأشيرات السياحية بالمطارات والموانئ المصرية علي الأفواج السياحية طبعا ديه كانت حتبقي
منير فخري عبد النور: كانت حتبقي كارسة
رشا مجدي: حتبقي كارسة الغريب إن قرار زي ده يطلع من مجلس الوزراء وحضرتك موجود ووزير الطيران موجود إيه اللي خلاكوا موقفتوش لا يا جماعه القرار ده ما ينفعش إيه اللي خلي القرار يطلع وبعدين يتلغي
منير فخري عبد النور: في الحقيقة ما كنش فيه قرار هذا الموضوع ذُكِر في سياق مناقشه حول الحاله الأمنيه داخل مصر إنما كان ذكر في سياق الحديث تلخيص الجلسه ذكر ما ورد من أفكار أثناء الحديث إنما لم يصدر قرار علي الإطلاق ولم يوقع قرار ولم يلغي قرار طبعاً نتيجه للإعلان ردود الأفعال كانت فظيعه ردود أفعال من شركات السياحة العالميه ردود أفعال من حكومات ردود أفعال شركات سياحه مصريه وكان وجب التوضيح وتم التوضيح في ساعتها
رشا مجدي: دور الأعلام بقى أنا حآخد مكالمة – عايزة حضرتك بشكل قوي جداً – بس قبل هل الإعلام له دور في حالة البلبله االسياسية اللي حصلت
منير فخري عبد النور: آه طبعا آه طبعا
رشا مجدي: يعني إيه اللي مطلوب من الإعلام
منير فخري عبد النور: أكثر موضوعيه أنا أناشد الإعلام بكل أطرافه سواء كان الإعلام المسموع أو المقروء أو المرئي أن يكون أكثر موضوعية وأن يضع الأمور في نصابها السليم مش مطلوب إنه يكذب مش مطلوب إنه نخبي مطلوب إنه
رشا مجدي: ما نهولش
منير فخري عبد النور: ما نهولش ولا نهول ولا نقول -فيه حوادث طبيعية جداً المفروض تنشر في صفحة الحوادث يا في الصفحه الأولي من الجرنال – إيه الهدف من – إن كان الهدف هو الاثارة يعني أنا أعتقد إن هذه الاثارة مضره جداً
رشا مجدي: كفانا اثارة
منير فخري عبد النور: كفانا اثارة
رشا مجدي: كفانا اثارة ههههه معانا مداخله تليفونيه من الأستاذ فؤاد سلطان وزير السياحة الأسبق
منير فخري عبد النور: آه أستاذنا
رشا مجدي: مساء الخير يا فندم
اللواء/ فؤاد سلطان : مساء النور أنا مش وزير السياحة أنا اللواء فؤاد سلطان
رشا مجدي: أهلا بك يا سيادة اللواء
اللواء/ فؤاد سلطان : مساء النور أنا مش وزير السياحة أنا اللواء فؤاد سلطان
رشا مجدي: أهلا بك يا فندم
اللواء/ فؤاد سلطان : صاحب شركة سياحه أكثر من 25 سنة
رشا مجدي: معلهش يمكن إسم حضرتك كان متشابه مع وزير السياحة
اللواء/فؤاد سلطان : انا فاهم يافندم
رشا مجدي: أهلا بك يا فندم إتفضل يا فندم حضرتك كنت عايز تقول مداخلة لوزير السياحة
اللواء/ فؤاد سلطان : آه لو سمحت سيادة الوزير أنا بقالي أكثر من 4 سنين شغَّال في عملية دراسة موضوع الحج ووصلت لبعض نتائج ممتازه فيها فأنا بس عامل دراسات كاملة علي موضوع الحج إن الموضوع اللي ماشي دلوقت غلط وموضوع بتاع القرعه برضه ما يتمشاش مع الوضع اللي المظبوط بتاعه لإن له ضوابط وأوضاع تختلف وتعمل مشاكل أنا مغطي كل الحاجات ديه بدراسات أنا عاملها أصلا ً علي أساس إن الحج في مصلحة الحاج نمرة واحد مش للشركه ولا للوزاره فالحاج نمرة واحد أولا ويجب عمل تنظيم كامل بحيث إن الراجل يطلع وهو مطمئن 100% إنه رايح فين والخطوه الجايه فين والحته اللي حينزل فيها فين الكلام ده أنا طلبت إن أقابل سعادتك وأرجوا سيادتك تسمح لي إن أنا أشوفك عشان أقدم لك المذكره ديه وأشرحها عشان نقدر نحل بها مشكله أنا كصاحب شركة المسألة إنتهت أوردي
رشا مجدي: سيادة اللواء أعتقد إن رسالتك وصلت وطلب من حضرتك تسيب رقم تليفونك في الكونترول عشان ممكن سيادة الوزير يستعين بالدراسات اللي حضرتك ذكرتها
منير فخري عبد النور: أتشرف بسعادة اللواء وأشكرك علي هذا المجهود وأستفيد جداً من آراءك وأفكارك
رشا مجدي: خليني أتكلم علي السياحة الداخلية مهمله شوية ومافيش تشجيع للمصريين برغم ظروفهم المادية إن يبقي فيه سياحة داخلية يعني حضرتك ذكرت الأوكرانيين والروس شوف الأوكراني والروسي بيأخذ الباكتج علي بعضه في أي أوتيل بكام والمصري بيدفع كام يعني لما نيجي نتكلم دلوقت إن داخلين علي عيد كبير إن شاء الله عايزين مثلا يطلعوا الغردقه شرم الشيخ راس سدر مرسي علمي شوف المصري حياخذ الأوضه بكام والروسي والأوكراني حياخد الأوضه بكام
منير فخري عبد النور: تمام طبعا ملاحظه في محلها إنما حأقول حاجتين أولا خلال الصيف وما زال العرض مستمر وساري هناك برنامج
رشا مجدي: مصر للسياحه والبنك الأهلي
منير فخري عبد النور: مصر للسياحة والبنك الأهلي وعدد كبير من الشركات السياحية والفنادق التي أتاحت للمصريين الذهاب بأسعار في متناول العائله المتوسطه
رشا مجدي: وبالتقسيط كمان
منير فخري عبد النور: وبالتقسيط الي كل المقاصد السياحية سواء كانت علي البحر الأبيض أو علي شواطئ البحر الأحمر
رشا مجدي: ولسه العرض ده ساري ؟
منير فخري عبد النور: مازال العرض ساري هذه الملاحظه الأولي الملاحظه الثانيه فيه فرق بين سعر جمله وسعر تجزئه الفنادق التي تتعاقد مع شركات السياحة – الشركات السياحية الروسيه أو الأوكرانيه أو الألمانيه أو غير ذلك بتتعاقد علي
رشا مجدي: 30 أوضه 40 أوضه
منير فخري عبد النور: لا لا لا 5 آلاف ليله سياحيه 10آلاف ليله سياحيه
رشا مجدي: عرض أكثر بكثير
منير فخري عبد النور: آه طبعاً فيه فرق بين سعر جملة وسعر تجزئة ويجب أن نقدر هذا الفرق وأهمية السياحة المستمره بالنسبة للفندق وبالنسبه لوسائل النقل وبالنسبة للخدمات السياحية عامةً في التفرقه ما بين الأعداد الكبيرة والأعداد الصغيرة
رشا مجدي: حضرتك جبت سيرة وسائل النقل وانا كنت مش عايزة أسأل السؤال ده بس حتخليني أسأله
منير فخري عبد النور: إسألي
رشا مجدي: حوادث النقل السياحي ديه مشكلة المشاكل كارثة لدرجة إن حضرتك حطيت قرار لوجود إثنين سائقين في الحافلة التي تقل السُيَّاح في الرحلات اللي بتزيد عن 400 كيلوا لكن الحوادث ما بطلتش
منير فخري عبد النور: تمام خليني أقول لك إن وزارة السياحة عملت حاجتين إنت حتفخري بهم الحاجة الأولانيه إنه وضعت نظام جي بي إس لمتابعة الحوافل السياحية في أي وقت
رشا مجدي: لوزارة السياحة آه
منير فخري عبد النور: أه في غرفه مركزيه نستطيع من خلالها متابعة أي حافله سياحية نعرف هي فين سرعتها قد إيه مين اللي سايقها نستطيع أن نتصل بها لمتابعتها اللي حيعرف يتابع الحافلة الغرفة المركزية في وزارة السياحة وصاحب هذه الحافلة يتأكد إنه السواق رايح في المكان المطلوب منه ذهابه يعرف إن السوياق بيحترم الحد الأقصي للسرعه وما الي ذلك
نمرة إثنين وهو أهم من كده إن إن شاء الله خلال الأسابيع القادمه سنفتتح أكبر مركز لتدريب السائقين قد يكون في العالم في حلوان علي مساحة 20 فدان في الصحراء مركز لتدريب السائقين أقيم بالتعاون مع شركه نمساويه حنبتدي ندرب سائقين الحوافل السياحية
رشا مجدي: دا أنا أول مره أسمع عن المشروع ده دا حاجة جديدة كده
منير فخري عبد النور: جديدة وإن شاء اللي يمكن في خلال شهر حنكون إنتهينا من كل شيئ وحيفتتح وحاجة حتفخري وكل مصري حيتفخر بها
رشا مجدي: ديه حاجة جميله جدا يعني دا خبر مفرح يعني بصراحه طيب برضه عايزين نتكلم علي الرحلات النيليه ما بين القاهرة وأصوان ليه ما بترجعش وليه الناس خايفه إنها ترجع ليه فيه خوف
منير فخري عبد النور: لأ حترجع تعرفي إن هذه الرحله أنا في تقديري أجمل رحله في العالم
رشا مجدي: دية بدعة – دية ممكن تبقي لوحدها يعني روج لها في العالم كله هل مازال الخوف مثلا من المرورعلي المنيا وذكريات الإرهاب القديمه والحاجات ديه
منير فخري عبد النور: وزارة الداخلية إدت موافقتها علي عودة هذه الرحلات نحن بندرس مع الوزارات المعنيه بما فيها وزارة الري ووزارة النقل عودة هذه الرحلات وإن شاء الله سنتمكن من بداية الرحله الطويله بين أصوان والقاهرة قبل نهايه هذه السنة وأرجوا إنها تكون خلال شهر نوفمبر بإذن الله
رشا مجدي: يعني أنا أدعو كل مصري وأنا أو ما حيتم الإعلان عن الرحله ديه أتمني إن عدد كبير من المصريين حيشوفوا جمال بلدهم يعني يمكن أنا أخذت الخط ده بس أخذته قطر أو أوتوبيس عمري ما أخذته كمركب بس أتمين أشوفه كمركب
منير فخري عبد النور: دا حاجة رائعه ولما أعلنت عن عودة هذه الرحله الطويله من أسوان للقاهره في باريس ما تقدريش تتصوري ردود الأفعال كانت إيه وإن شاء الله حتكون دفعه
رشا مجدي: من أسوان لأبو سنبل الناس بتبقي فما بال حضرتك من القاهرة لغاية أسوان أكيد حيبقي
منير فخري عبد النور: حتكون دفعة قوية جداً جدا للسياحه وخصوصاً السياحة في الصعيد وحيكون اثارةا بقى علي المحافظات محافظات الصعيد أثر إيجابي جدا
رشا مجدي: أسيوط وسوهاج وقنا ومناظر خلابه الصراحة
منير فخري عبد النور: لأ أكثر من مناظر فيه ثروات يعني إلمنيا
رشا مجدي: تعابد
منير فخري عبد النور: يعني كل تراث أخناتون اللي هو في إلمنيا في الحقيقة للأسف مش مهتمين به ومهمل يجب الإهتمام به ويجب أن نلقي عليه الأضواء ليه في أخميس معبد رمسيس الثاني – لأ فيه حاجات عظيمه يعني يجب أن نلقي عليها الأضواء ونحييها مرةً أخري
رشا مجدي: فيه مواطن من سوهاج عايز يكلم حضرتك إسمه أحمد السيد محمود السيد أحمد مساء الخير
أحمد السيد محمود : السلام عليكم
رشا مجدي: عليكم السلام يا فندم
أحمد السيد محمود : مساء الخير يا سيادة الوزير
منير فخري عبد النور: أهلا بك
أحمد السيد محمود : الله يبارك فيك سعادتك إحنا فخورين بسعادتك ونتمني سيادتك إن أسعار تذاكر الحج سيادتك تتخفض شوية لإن إحنا ناس غلابه نقدر نروح الحج ونزور بيت الله وبارك الله في سعادتك
رشا مجدي: شكرا هو حضرتك مسؤول عن أسعار تذاكر الحج
منير فخري عبد النور: ما نيش مسؤول – أسعار تذاكر الطيران
رشا مجدي: هو بيقول هاود شوية في أسعار تذاكر الحج
منير فخري عبد النور: حاضر
رشا مجدي: بس علي العموم إنت إديتنا معلومه إن سيادة الوزير من سوهاج ديه كانت معلومه جديدة بالنسبة لنا
منير فخري عبد النور: آه طبعاً دا بلدياتي هههههه
رشا مجدي: هههههه طيب يُقال أنا ما قبلتش بس يُقال إن فيه مرشدين سياحيين إسرائيليين بيعملوا في مصر
منير فخري عبد النور: آه ديه فديه ومش عايزأستخدم كلمه أقوي من كده هذا كلام غير حقيقي ليس هناك مرشدين أو مترجمين إسرائيليين في الواقع يجب أن يكون معلوم أن وزارة السياحة لا تمنح ترخيس الترجمه إلا وبأوأكد إنها ترخيص ترجمه ما هواش ترخيص إرشاد سياحي إلا في حالة طلب لغات نادرة جداً غير متاحه في مصرعلي سبيل المثال كانتونيز تشاينيز
رشا مجدي: دا مقاطعه الصيني
منير فخري عبد النور: الصيني آه مش موجود في مصر فلو جاءت لي مجموعه سياحيه عايزة مرشد كانتونيز تشاينيزي وماعنديش حأدي ترخيص ترجمة مش إرشاد سياحي لواحد صيني ييجي يشرح لهذا الوفد فالحقيقة العبري ما هواش بالقطع لغه نادره في مصر
رشا مجدي: عندنا كتير بيتكلموا عبري
منير فخري عبد النور: كتيرجداً وخريجين ألسن بوالتالي مش حقيقي
رشا مجدي: يا تري الوزارة تلقت أي عروض للإستثمار بعد الثورة
منير فخري عبد النور: كثير
رشا مجدي: طمني طيب والنبي يا سيادة الوزير طمني إدينا إي تطمينات كده
منير فخري عبد النور: لأ إتطمني لأ كتير جداً خاصةً الإستثمار في الغردقه وشرم الشيخ لا لأ كثير جداً ومرسي علم وتوسعات وزيادة طاقات فندقية
رشا مجدي: رغم إن فيه عدد كبير من الأراضي تم سحبه من المستثمرين دا ما أصرش علي أي إستثمار خارجي
منير فخري عبد النور: لأ أولا خليني برضه أحط النقط فوق الحروف
رشا مجدي: ياريت
منير فخري عبد النور: تم سحب أراضي المستثمرين الذين لم ينفذوا مشروعاتهم لأسباب ترجع الي قرارهم أما اللي ما نفذش المشروعات لأسباب خارجة عن إيرادتهم علي سبيل المثال ما نجحوش في الحصول علي موافقات بيئية أمنية الأراضي لم تسحب منهم وعندما إتخذ القرار الوزارة كانت واضحه جداً ستقف دائما وراء المستثمرين الجادين وستشجعهم وستعمل علي إزالة كل العقبات التي قد تواجههم في العملية الإستثماريه بتاعتهم
رشا مجدي: طيب مين المستثمرين اللي جم لنا يعني إدي لنا أمثله كده بمشاريع معينة أو مشروعات حيتم تنفيذها زي إيه ؟
منير فخري عبد النور: زي يا سيدتي علي سبيل المثال مجموعة عبد الرحمن الشربتلي بيعملوا مجموعه من الإستثمارات في الغردقه وشرم الشيخ وبنتكلم عن إستثمارات كبيرة جداً
رشا مجدي: دا قري سياحيه ولا مولات برضه
منير فخري عبد النور: لالا لأ قري سياحيه وفنادق وا وا حاجات عظيمة
رشا مجدي: دا إستثمار سعودي بقى
منير فخري عبد النور: آه فيه إستثمار حقول لك حاجة ما دام بنتكلم عن الإستثمارات ما أقدرش ما أكلمكيش عن التوسعات التي تتم حاليا ً في مرسي علم في الإستثمارات في بورت غالب بتاعة الخرافي حاجات ظيمه ورائعه الحقيقة هؤلاء مستثمرين ما فقدوش الثقه في السوق المصرية ولا في مناخ الإستثمار في مصر ويجب إن نقف جنبهم ويجب أن نشجعهم ويجب أن نشجع أمثالهم علي إنهم يسلكوا مسلكهم وهم كتار جداً
رشا مجدي: طيب دا حيخليني أسأل علي القوانين المنظمة للسياحه قوانين كثيرة ومتعددة ومحتاجين يبقي فيه قانون موحد للسياحة
منير فخري عبد النور: أنت بقي قطعا مخترقه الوزارة
رشا مجدي: الله أبداً هههه مش مخترقة حاجة لو قلت وزير السياحة دلوقت بيخطط لقانون موحد للسياحه أهم البنود اللي حتحطها كده 1-2-3-4
منير فخري عبد النور: إحنا حالياً بنلم كل القوانين واللوائح المنظمه للسياحه وحنجهز خلال أسابيع بمشروع قانون إسمه القانون الموحد المنظم للسياحه بكل حاجة بقي بشركاتها بكل تفاصيلها
رشا مجدي: طيب دا حيخليني أسأل عن إتحاد الغرف السياحية
منير فخري عبد النور: أتفضلي يافندم
رشا مجدي: لإن إتحاد الغرف السياحية كانت له مشاكل كثيرة قوي قوي وكان بيمارس ضغوط علي وزارة السياحة أنا بأتكلم قبل كده هل إنتهت هذه المشاكل هل بقي فيه توافق ما بين وزارة السياحة وإتحاد الغرف السياحية ؟
منير فخري عبد النور: إتحاد الغرف والغرف والوزارة علي إتصال مستمر حقيقي مستمر يعني أي مشكله بتبلغ فوراً وبنحاول نحلها فوراً سواء كان مع الوزارات المختلفة أو مع الجهات التنفيذيه المختلفة أو مع المحافظات والمحافظين المختلفين الخطوط مفتوحه والباب مفتوح وأي إتصال بيحل المشاكل فأنا شايف إنه برضه ما أعرفش كانت إيه الظروف في الماضي إنما أقدر أوأكد لك إن ما فيش مشاكل ما بين الوزارة وما بين الإتحاد ومابين الغرف سواء كانت غرف الشركات السياحية أو غرف الفنادق أو غير ذلك
رشا مجدي: حضرتك عارف إن إنت جيت وزاره كانت تركة الفساد فيها كبيرة ما هو من القوانين خليتني أتكلم علي إتحاد علي تركة الفساد تعاملت معاها إزَّاي التركه الثقيلة ديه؟
منير فخري عبد النور: شوفي أولا مانيش جهة تحقيق وبالتالي مش عايز أعرف كان فيه إيه في الماضي إنما هناك واقع يجب إحترام القانون يجب إحترام اللوائح يجب إحترام القاعدة القانونية العامة والمجردة وبالتالي منعت أي إستثناء منعت أي مخالفة للقانون نفذت كل الأحكام القضائية التي كانت قد صدرت ولم تنفذ لمدة سنوات إعتبرت يعني ما دورتش علي فساد إنما إعتبرت إن المخالفات كانت ناتجة عن عدم تنفيذ القانون في الحقيقة أنا أعتقد إن إتفتحت صفحه جديدة في وزارة السياحة وفي هيئات وزارة السياحة أساسها إحترام القانون واللوائح
رشا مجدي: طيب معانا الدكتورة إلهام السعيد دكتورة إلهام مساء الخير
د / إلهام السعيد : مساء النور يا فندم ممكن اكلم السيد معالي الوزير
رشا مجدي: معاكي يافندم علي الهواء معالي الوزير
د / إلهام السعيد : أنا علي فكره دكتوره في الدراسات السياحية وبأحاول أولا منور الشاشة يا سيادة الوزير وبأحاول أكلم حضرتك من زمان من ساعة ما توليت الوزارة لإن أنا عندي مقترحات زائد إن درجة الكتوراه بتاعتي في الدراسات السياحية وكيفية إختراق أسواق جديدة سياحيه لتنشيط حركة السياحة الوافده لمصر وبعد ما أخذتها للأسف أنا تم وأد وقتي أو أد رسالتي لتعميمها علي الجهات المعنية وكان نفسي أوصل نسخه للوزير اللي قبل حضرتك ودلوقت أتمين تكون في إيدك الدراسة ديه زائد إن أنا لي كمان انا ساكنه في المعادي عندي إقتراح لتطوير منطقة حلوان بيئياً وجعلها منطقه سياحية كما كانت في العهد الملكي أيام ما كان فيها ركن فاروق
رشا مجدي: أستاذه إلهام لو تسمحي لي نسيب رقم التليفون في الكونترول ومعالي الوزير حيأخذه
د / إلهام السعيد : هو رقم التليفون في الكونترول وعايزة أقابله بأي طريقة
منير فخري عبد النور: تحت أمرك وأتشرف وسيبيلي رقم تليفونك وحأتصل بسعادتك
د / إلهام السعيد : أنا سايبة فعلا في الكنترول رقم تليفوني ووصلت لحضرتك إن هم اللي إتصلوا بي
رشا مجدي: شكرا أستاذة إلهام إحنا بنشكرك بس أنا عايزة أخلص موضوعات كمان مهمة جداً مع سيادة الوزيروخايفة الوقت ما يلحقنيش أحنا كنا بنتكلم علي الفساد وحضرتك قلت القوانين هي اللي حتاخد مجراها وأنا ما لياش دعوه بالفساد
منير فخري عبد النور: لأ مش ماليش دعوه بالفساد ما نيش جهة تحقيق
رشا مجدي: ما نيش طيب ملف تراخيص شركات السياحة عملت فيها إيه
منير فخري عبد النور: بفي الحقيقة دا كان ملف شائك جداً لإن اللائحة التنفيذية السابقى التي كانت صدرت سنة 2008 كانت بتفرق ما بين الشركات القديمه والشركات والحقيقة هي تفرقه ليس لها أي أساس قانوني والشركات القديمه كان لها حق تنظيم رحلات الحج والعمرة الشركات الجديدة لم تمنح هذا الحق يعني ما ينفعش فطبعا لغيت هذه التفرقة وأعتقد إن النهارده ما فيش فرق ما بين الشركه القديمة والشركه الجديدة بالإضافه كانت هناك إحكام قضائيه كثيرة في هذا الصدد لشركات منعت من الحصول علي الترخيص وصدر لها أحكام كل هذه الأحكام تم تنفيذها وعايز أقول لك حاجة عدد الشركات النهارده بالقطع يفوق حاجة السوق إليها
رشا مجدي: طيب كويس العرض كثير يعني دا في مصلحة المواطن
منير فخري عبد النور: في مصلحة المواطن ما فيش شك
رشا مجدي: النهارده 25 سبتمبر مظبوط يوم 27 سبتمبر هو يوم السياحة العالمي
منير فخري عبد النور: السياحة العالمي
رشا مجدي: بالظبط منظمة السياحة العالمية بتقيم إحتفالها كل عام في أحد الأقاليم السياحية والسنة ديه كان الدور في منطقة الشرق الأوسط وإختاروا مصر
منير فخري عبد النور: لأ ما كنش الدور في منطقة الشرق الأوسط الذي يختار المكان هو منظمة السياحة العالمية اللي تبع الأمم المتحدة وكان المفروض الإتفاق يحتفل بهذا اليوم في اليمن
رشا مجدي: لأ
منير فخري عبد النور: ما ينفعش
رشا مجدي: خالص
منير فخري عبد النور: فسكرتير عام المنظمة وهو صديق إردني وزير سياحه سابق الدكتور طالب الرفاعي صديق مصر ومحب لمصر وقرر بعد التشاور وإختار مصر لكي تكون مكان الإحتفال باليوم العالمي للسياحه وقد قررنا هذا الإحتفال في أسوان – أسوان لعدة أسباب أولا لإلقاء الضوء علي الصعيد والإمكانيات السياحية في الصعيد وثانياً لأنها قرصة لإفتتاح الفندق الرائع اللي هو كتاركت بعد
رشا مجدي: لكتراكت بقي والا
منير فخري عبد النور: لكتراكت مش نيوب بالعكس كتراكت القديم تم إصلاحه والإرتقاء بمستواه وأصبح حاجة فخمه جداً ورائعه جداً وأنا مسافر بكره بإذن الله أسوان وبكره باليل فيه حفله كبيرة ليلة يوم 27 حيحضر أو حضر وزير سياحة اليونان ليشاركنا في هذا الإحتفال مندوب عن اليونيسكوا عدد كبير جداً من السفراء الأجانب في مصر عدد كبير جداٌ من المندوبين عن وزارات السياحة للدول المصدره للسواح الي مصر من روسيا من فرنسا من إنجلترا من ألمانيا وخلافه في الحقيقة حيكون إحتفال كبير وقرصة نلقي الأضواء علي أسوان وعلي السياحة في الصعيد
رشا مجدي: أسوان جميلة
منير فخري عبد النور: أسوان بديعة
رشا مجدي: أسوان والنوبة هذه المنطقة
منير فخري عبد النور: وبهذه المناسبة أيضاً
رشا مجدي: فكرتك بالنوبة
منير فخري عبد النور: فكرتيني بالنوبة آه فعلاً فكرتيني بها أحدي كبار علماء الآثار أو المصريات الفرنسيه تسمعي عن كريستان درشمبلوكول توفت في شهر يونيو وهي شخصيه خدمت مصر كثيراً وهي صاحبة فكرة رفع المعابد النوبيه التي كانت ستغرق بعد بناء السد العالي أبو سمبل وخلافه توفت في شهر يونيو وحنعمل إحتفاليه تأبينيه في متحف النوبة في أسوان
رشا مجدي: جميل متحف النوبة جميل معالي الوزيرإحنا وقتنا إنتهي لإن ميعاد نشرة تسعه قرََّب
منير فخري عبد النور: خسارة
رشا مجدي: خسارة فعلاً أنا عندي حاجات كتيره بس أسعدتنا طمنتنا وأتمني إن أشوفك يا بلادي مره ثانيه والسياحة مزهره فيكِ وبحسك وبحس العاملين في مجال السياحة إن شاء الله ترجع السياحة أحسن من الأول
منير فخري عبد النور: بإذن الله
رشا مجدي: أشكرك معالي وزير السياحة منير فخري عبد النور أهلا بك معانا في إتجاهات
منير فخري عبد النور: شكرا
رشا مجدي: مشاهدينا الكرام بكده خلصت حلقتنا الليله ديه وشكراً لكن والي اللقاء