كلام مسئول

الجمعة 14/1/2011
محمد صلاح : يا مساء الخيرتخرج من البيت الصاج وممكن ترجع أخرالنهار بس دا طبعا بدعا الوالدين بالدعوة الجميلة اللى كلنا محتاجنها النهارده ربنا يكفيك شرالطريق ويجعلك فى كل خطوة سلامة ويرجعلك ليناغانم سالم يعنى كل واحد ونصيبه والأعمار زى ما احنا عارفين بيد الله الحوادث على الطرق بتاعتنا بقت شيىء مخيف للى سايق وللى راكب للواقف وللقاعد للى ماشى وللى يدوب كان معدى الشارع للى فى البحيرة وللى فى أخرالصعيد أرقام الضحايا كبيرة من قتلى ومن مصابين حسب أرقامنا المعروفة أكترمن شهدائنا فى كل الحروب مع إسرائيل أما خسايرهاغيرالأرواح والإصابات والعاهات فالمليارات نزيف الأسفلت أو على الأسفلت وعلى قضبان السكك الحديديةوعلى الكبارى وعلى الدائرى والمحوروالطرق الزراعية والصحراوية والحاجات اللطيفة دى كلها مش هنمنعها خالص يعنى لكن تخف شوية وعلشان تخف شوية فالكلام كتيرفى أسبابها والكلام فى الأسباب نبصله بإعتباره حاجةغريبة إنقرضت زى الديناصورات كده لأن المفروض الناس تسوق كويس لو كان العنصر البشرى هو السبب وكمان اللى بيعدوا الطريق المفروض يكون فى عبور أو أماكن لعبورالمشاه وإذا كانت الطرق بايظة فالطرق البايظة أو المفرد تتصلح والمفرد أما أنها تكون فى إتجاهين يعنى رايح جاى كده أو ليها قواعد سواقة لازم تتطبق فى إجراءات السير والتجاوزاللى قدامك يعنى إمتحانات سواقة ومتابعة مرورية للطرق وكاميرات وكمبوسطبلات وردارات وفحص للعربيات وتطبيق للقانون على الغفير والوزير لكن ودنك منين يا جحا ؟ المهم لانه الناس مش ساكتة الجرايد بتكتب والبرامج بتتكلم وإستجوابات بقى فى مجلس الشعب والشورى وأرقام من الجهاز المركزى للتعبئة العامة والإحصاء عن ضحايا حوادث الطرق تبين لانه اللى يروح مشوارعندنا فى مصرهنا ويرجع لازم نباركله لأنه الخارج عندنا مفقود والراجع مولود عن حوادث الطرق فى مصر هيكون لينا النهارده كلام مسئول .
تقرير
قدرت منظمة الصحة العالمية أعداد الوفيات بسبب حوادث الطرق ب 15 ألف سنويا وذلك بخلاف عشرات الجرحى إلى جانب التلفيات والخسائرالمادية تعد حوادث الطرق ثانى أسباب وفاة المصريين بعد أمراض القلب والأورام وتذهب الإحصائيات إلى أن نسبة الحوادث وصلت فى السنوات الأخيرة إلى 25 مرة لمعدلاتها العالمية وأكد مركز المعلومات ودعم إتخاذ القرار التابع لمجلس الوزراء أن الإقتصاد المصرى يتكبد بسبب الحوادث 4 مليارجنيه سنويا كما يتضررقطاع السياحة بصورة مباشرة سواء بوفاة سائحين أجانب أو نقل صور وشهادات سلبية عن الأمان المرورى وحالة الطرق تتعدد المسئوليات عن أسباب الحوادث ما بين تسيرمركبات غير صالحة خصوصا فى النقل الجماعى والتساهل فى إمتحانات منح تراخيص القيادة وعدم التشدد فى تطبيق القانون وغياب الرقابة الكافية على الطرق من بشرية وتكنولوجية ودوريات وتدنى حالة معظم الطرق التى تربط بين المحافظات المختلفة وذلك بسبب أن نصف هذه الطرق على الأقل غيرممهد والنصف الباقى يعانى من الإزدحام الشديد ترصد التقاريرأن عقودا طويلة مرت من دون إنشاء خطوط سككا حديدية جديدة لم يتم التفكير بشكل جدى فى تخصيص حارات أو طرق خاصة للنقل الثقيل المسئول عن 49 % من الحوادث ولا يتم الإلتزام بمواعيد ليلية بإستثناء الطرق الداخلية فى بعض المدن ووضعت عشرات الخطط لتلافى حوادث الطرق لكنها لم تتجدد منذ سنوات وبالتالى لم تطبق كما نبهت لجنة النقل والإتصالات وتكنولوجيا المعلومات بمجلس الشورى وانتقدت اللجنة إستمراروقوع حوادث الطرق بنسبة تزيد عن مثيلاتها فى دول العالم والغريب أن طرق الموت شيه معروفة للرأى العام والتى تقع عليها الحوادث أكثر من غيرها ولكن من دون تحركات حكومية منقذة .
محمد صلاح : علشان نكافح الحوادث لازم نعالج أسبابها وطبعا ما لايدرج كله لا يترك كله يعنى لو منظومة النقل كلها أتطورت ماشى جزء منها يبان أثره وتأثيره برضه ماشى لو طبقنا حتى القانون بقيضة حديدية قبل ما نقول يا هادى فى التطوير مفيش مانع لكن المانع لانه الوضع ده يستمر النائب شوقى يونس رئيس لجنة النقل والمواصلات فى مجلس الشورى هيكون لينا معاه النهارده كلام مسئول .
فاصل
محمد صلاح : أرحب بالنائب شوقى يونس رئيس لجنة النقل والمواصلات فى مجلس الشورى منورنا يا سيادة النائب
النائب/شوقى يونس: أهلا وسهلا بحضرتك
محمد صلاح : إن شاء الله نعمل حلقة من غيرحوادث
النائب/ شوقى يونس: لا إن شاء الله احنا فى الأستوديو
محمد صلاح : بتحصل ما هولم عملوا الدائرى قالوش مش هيبقى فيه حوادث
النائب /شوقى يونس: لا إن شاء الله مفيش
محمد صلاح : سيادة النائب هو احنا فعلا بقينا دولة من أكبرالدول رصدا فى حوادث السيارات ؟
النائب/شوقى يونس: تقدر تقول كده
محمد صلاح : بداية حلوة
النائب/شوقى يونس: هى المشكلة بس لما بنتكلم على حوادث الطرق نعرف لانه حوادث الطرق دى مشكلة عالمية يعنى مش قاصرة على مصر بس ليس هذا تقليلا من شدة هذه الحوادث فى مصرفى العالم كله 1,2 مليون سنويا قتيل فى المنطقة العربية 40 ألف قتيل تأثير هذه الحوادث على الإقتصاد العالمة بصفة عامة يعنى حضرتك تتخبل لانه فيه 500 مليار دولار سنويا خسارة على الإقتصاد العالمى المنطقة العربية لوحدها 24,1 مليار دى خسار نتيجة حوادث الطرق خلينا نتكلم بقى على مصر وهنا المشكلة من واقع الدراسات اللى احنا عملناه على مجلس الشورى ويمكن من حكم مسئوليتى برضه عن لجنة النقل المشكلة أنك توصل للأرقام الحقيقية ليس سهلا
محمد صلاح : صعب من كترالحوادث ولا علشان
النائب/شوقى يونس: لأ جهات الرصد لانه علشان تعمل إحصائية لازم توحد القاعدة القاعدة العالمية بتقول أيه ؟ لانه أنا علشان أشوف حوادث مميتة قتل وأحسب عدد القتلى بيبقى عندنا 3 حاجات فى ناس بتاخد الحادث وقت وقوعه وفى ناس بتاخد الحادث وقت وصول المصاب إلى المستشفى إذا كان قتل مات أو ما متش التالتة وى اللى قالتها منظمة الصحة العالمية فى خلال شهرمن تاريخ الوصول إلى المستشفى للعلاج ومتى سابها ؟ دى القاعدة العالمية لمنظمة الصحة العالمية لما أنا أجى هنا فى مصر بقى ألاقى عندى وزارة الداخلية بتدينى أرقام وزارة الداخية واخدة منين ؟ بيجليها إخطاربالحادث بتروح القتيل وقت وقوع الحادث أروح لوزارة الصحة ألاقى وزارة الصحة مديانى أرقام تانية أللى هو أيه ؟ القتيل اللى مات فى المستشفيات
محمد صلاح : أه اللى راح مصاب ومات فى المستشفى
النائب /شوقى يونس: ومات فى المستشفى أروح للصحة العالمية تقولى لأ لا دا ولا دا اللى مات فى خلال شهر من وقوع الحادث
محمد صلاح : يعنى ممكن الواحد يموت بعد ما يطلع من المستشفى
النائب /شوقى يونس: فيبقى عندنا فى الحتة دى تضارب
محمد صلاح : لكن بغض النظرعن الأرقام الحوادث عندنا عددها كبيروالضحايا عددهم كبير
النائب /شوقى يونس: سيادك لو بصيت تلاقى يعنى لسه كنا بنتكلم قبل ما نخش هنا بنقول لانه القتيل بيستريح لكن المصاب بيعمل أيه ؟ بص سيادك للأثر النفسى والإجتماعى والإقتصادى لهذه الحوادث هى دى النقطة اللى احنا يجب لانه احنا نبصلها يعنى العملية مش عملية الحادث مات 6000 ولا مات 10000 الأسر اللى وراء ال 6000 الأسر اللى وراء هذا العدد من المصابين ما هى حالتهم النفسية ؟ ما هو تأثير موت أبنهم أو عائلهم الوحيد؟ ما هو تأثير الإصابة التى أصابته بعجز مستديم؟ أثر على المستوى الإقتصادى والإجتماعى لهذه الأسرة دى النقطة اللى احنا يجب نبصلها يعنى نبصلها بالبعد ده مش نبص بس لعدد اللى ماتوا لو احنا بصينا للبعد ده هتجد أن هناك مأسى وراء هذه الأرقام اللى احنا بنقولها أرقام مجردة
محمد صلاح : ماهواحنا عاوزين بقى نوقف المأسى يعنى دا بيعكس لان الأسرة عندنا دلوقتى أم يعنى لما أمها بيكون رايح شرم ولا إسكندرية ولا حاجة فيه نسبة فى عقلها لانه الولد يمكن يحصلوا حاجة فلازم تطمن عليه أول ما يوصل مزودنها ولا الحكاية كده ؟
النائب/شوقى يونس: لا كلنا بنفضل نتابعهم لغاية ما يوصلوا ودى الحقيقة ليه ؟ عدم إحساسك بالأمان بإنتقالك على الطريق ودى فى منتهى الخطورة
محمد صلاح : سيادة النائب هو معدلات الأمان أيه على الطرق المصرية ؟ احنا قلنا هنتكلم بصراحة طبعا علشان نناقش القضية ونخرج بنتايج معدلات الأمان أيه بقى ؟
النائب/شوقى يونس: معدلات الأمان للأسف الشديد وأنا بقول تكاد تكون غير موجودة
محمد صلاح : مش موجودة أصلا ؟
النائب/شوقى يونس: أنا بقول تكاد
محمد صلاح : تكاد تكون مش موجودة أصلا برضه
النائب/شوقى يونس: يعنى مثلا نقاط الإسعاف وأنا بأحيى وزارة الصحة اللى هى نشرت حوالى 570 موقع لسيارات الإسعاف لكن سيارات الإسعاف بنطلبها أمتى ؟ لما الحادث بيوقع انا عايزأقلل مش ممكن أمنع الحوادث لكن أنا لازم أعمل على تقليل عدد الحوادث لأن الحوادث زى ما احنا قلنا ظاهرة عالمية وموجودة فى كل الدول لكن اللى بيخلينا بنعانى منها هى كثرتها وكثرة الحوادث المميتة مش كترة الحوادث وبس ما أنت ممكن تعمل حادثة عربية تخبط عربية
محمد صلاح : يحصل فيها خناقة
النائب/شوقى يونس: لكن فى الأخرأنا بتكلم على الحوادث التى تفقد الأسرة عائلها أو أبنها أوالحوادث التى تجعل من عائل الأسرة معاق
محمد صلاح : معدلات الأمان بقى يا سياد النائب أخبارها أيه
النائب/شوقى يونس: نرجع نشوف أيه أسباب الحوادث ؟ علشان نشوف هل احنا واخدين الإجراءات المناسبة لتحقيق معدلات الأمان ولا يعنى أنا لو بصيت هنا ودا كلام مش من عندى أنا بدقق جدا فى الأرقام
محمد صلاح :ما أنا عارف ما أنت فى الأرقام فظيع
النائب/شوقى يونس: نشوف 70 % العنصر البشرى
محمد صلاح : 70 % من أسباب الحوادث العنصر البشرى اللى هو الضحية العنصر البشرى برضه
النائب/شوقى يونس: سواء كان العنصر البشرى ده قائد مركبة أومواطن بيعدى أيا كان
محمد صلاح : مش داخل فيهم بقى اللى بيراقب الطريق
النائب/شوقى يونس: لأ أنا بقول العنصر البشرى وال30% يعنى يمكن ظاهرة معتقدش لانه الناس واخدة بالها منها 20% من نسبة الحوادث التى ينتج عنها قتلى وإصابات سببها إطارات الكاوتش
محمد صلاح : الكاوتش عندنا مضروب أه دا بشوب حاجات ماسح خالص وماشية
النائب/شوقى يونس: شوف سيادك أنا بتكل على أيه شوف نسبة أيه 20 % يعنى أنا لو جيت حطيت قواعد تقلل من خطرالعنصر البشرى وتقلل إلى حد ما من أخطاء المركبة أنا بنزل من عدد 60% ده إلى 30% منه يبقى أنا عنلت نجاح ودا بيخلينى أقول أيه ؟ أى مشكلة بنتعرض لها بجدية يعنى احنا شبعنا دراسات
محمد صلاح : أه عندنا الدراسات كتيرقوى
النائب/شوقى يونس: أنا عايزأقول لسيادك الجامعة بمراكزالبحوث تعرضوا لهذه المشكلة وقدمت حلول فى المجالس القومية المتخصصة مجلس الشعب مجلس الشورى كل مراكزالبحث وزارة الداخلية الندوات على كل المستويات الحلول موجودة يبقى
محمد صلاح : التنفيذ بقى هى الطرق بتاعتنا يصلح أنها تتعالج يعنى ؟ أصل فيه طرق شكلها مش طرق بجد والله
النائب/شوقى يونس: لأ بس أنا هقول حاجة احنا عندنا هنا الطرق المرصوفة فى مصر 75 ألف طريق منها 24 ألأف تبع وزارة النقل ومنها 51 ألف تبع التنمية المحلية أنا علشان أعمل صيانة مش أنشأ عايز 1,8 مليار جنيه
محمد صلاح : فى السنة ؟
النائب/شوقى يونس: فى السنة الدولة بتدينى كام ؟
محمد صلاح : الدولة بتدى كام عندك فكرة ؟
النائب/شوقى يونس: بتدى بس بالقدرالذى لا يسمح بالصيانة الدورية
محمد صلاح : واضح لانه الفرق كبير يعنى
النائب/شوقى يونس: دى ثروة يعنى أيه لانه 57 ألف كيلومن الطرق لا يصلانه ؟ ما هوبعد3 سنين خلاص أنتهى ل حضرتك بتدينى وبتشرف على التنفيذ الخاص بالصيانة طبقا للمعاييرالدولية والعالمية وطبقا للمعاييرالمصرية وتدينى هذا القدروتحافظ على الثروة وترفع كفاءة الطريق
محمد صلاح : وتقلل الحوادث
النائب /شوقى يونس: جزء منها بيقلل الحوادث يعنى مش كله لانه هرجع وأقول لانه العنصرالبشرى له تأثير ضخك جدا فى هذه العملية هل الطرق اللى عندنا كافية ؟
محمد صلاح : لأ بدليل الزحمة أكيد مش كافية أكيد لانه بين فى المحافظات لسه فى طرق اللى هى فردة واحدة اللى هى رايح جاى طريق قد كده
النائب/شوقى يونس: ما هو دا موجود لانه الفردة الواحدة دية تلاقيها 51 ألف كبلو أو أزيد من 51 ألف كيلو لانه الطرق اللى بتربط بين المحافظات اللى بيسموها الطرق العامة هى تبع وزارة النقل أما أما الطرق اللى بتربط ما بين المحافظة داخليا فدية كلها تبع التنمية المحلية وأغلبها فردية زى ما سيادك بتقول بالنسبة للطرق فيه هنا حاجة غريبة جدا هدى سيادك مثال على تأثير الحوادث تأثير الحوادث على الإقتصاد المصرى الحوادث بتؤثر بنسبة من 1 إلى 1 ونص % من الناتج القومى الناتج القومى عندى 1,2 تريليون جنيه أحسب ال 1 ، 1 ونص يساوى كام ؟
محمد صلاح : مبلغ رهيب بس هى بتتحسب أزاى يا فندم ؟ بيتحسب فيها العنصر البشرى يعنى القتلى والواحد بكام يعنى ؟ ولا يعنى بتتحسب ماديا أزاى يعنى؟
النائب/شوقى يونس: بتتحسب إن اللى بيموت ده تعويضاته أيه ؟ اللى بيموت ده الأسرة بتاعته بتعانى بعد كده أيه ؟اللى بيتصاب ده علاجه أيه؟ القوى العاملة اللى بتنقص خصوصا لانه أغلب الحوادث من السن العمر الشبابى من 18 لى 40 سنة المنتج فى البلد دول القتلى ومصابى الحوادث مصر دفعت بس شركات التأمين دفعت فى عام 2009 . 2011 تأمين لمصابى وقتلى الحوادث ما يقرب من 2 مليار جنيه بس 1,9 مليار جنيه
محمد صلاح : دا غيراللى مدفعلهمش تأمين مش كده ؟ مش كل الناس مأمنة وعربياتهم متأمن عليها ؟
النائب/شوقى يونس: المشكلة أعمق ما تكون تأثيرا فى المجتمع المصرى آن الأوان حقيقتا أن نتصدى لها وهى مشكلة مجتمعية مقدرش أقول الحكومة بس لأ دا مشكلة مجتمع مجتمع متكامل
محمد صلاح : ثقافة كمان يعنى ؟
النائب/شوقى يونس:كل المجتمع كل المجتمع مسئول عن هذه المشكلة يجب أن يتصدى ليها المجتمع بكافة نواحيه سلطة تنفيذية سلطة تشريعية مجتمع مدنى كلنا لازم نتكاتف
محمد صلاح : سيادة النائب ما هو برضه فيه حاجات بيبقى فيها تناقض يعنى احنا بنتكلم عن البنية التحتية والطرق والكبارى والأنفاق وكل دا كلام جميل جدا بس لما بتطلع طرق بتطلع بطريقة غريبة جدا كوبرى السيدة عيشة يعنى دا طلع أزاى ؟ ولسه موافقين عليه وسايبنه وكل يوم والتانى حادثة وعربيات عمالة تنط من عليها وميكروباصات تنط وفيه عربيات بتنط على ميكروباصات تحت مش كده؟ وبتنط على الناس ؟
النائب /شوقى يونس: بنتط ليه ؟
محمد صلاح : هى مش غاوية تنط دى نطت غصبا عنها
النائب/شوقى يونس: هو مين اللى كسرالسور ووقع الكوبرى؟
محمد صلاح : مش الكوبرى دا المفروض يبقاله تصميم معقول ؟
النائب /شوقى يونس: بالتأكيد لان الكوبرى متصمم صح
محمد صلاح : كوبرى السيدة عيشة متصمم صح ؟ أول مرة أسمع كده
النائب/شوقى يونس: أنا بقول لسيادك أنه لا يمكن أن يتم إنشاء كوبرى إلا إذا كان تصميمه صح ويعطى صلاحية الإنشاء يعنى خلينا نتكلم من الناحية العلمية الحقيقية لا يمكن لا يمكن ما يتنفذش لا يتم الموافقة على تنفيذه
محمد صلاح : محود مرة واحدة كده .
النائب/شوقى يونس: ما هو علشان أعدى وأنت وأنت طالع عليه لازم تسوق بحرص ما هومش ممكن أطلع عليه وأسوق بسرعة 100
محمد صلاح : واحنا بنعمل الكوبرى للحريصين يعنى مش كده ؟
النائب /شوقى يونس: المفروض لانه المواطن يبقى حريص يعنى نتكلم ما لنا وما علينا ما أنا مجيش أرمى نفسى فى الميه وأقول والله أعمل أيه ؟ ما هو النيل كان عالى فى الوقت ده
محمد صلاح : وبالتالى أنت شايف لانه الطرق عندنا يعنى مش سبب من الأسباب الرئيسية
النائب/شوقى يونس: لا لا لأ فيه سبب لكن لا تمثل السبب الرئيسى
محمد صلاح : بتشمى على الدائرى يا سياد النائب ؟ أخباره أيه؟
النائب /شوقى يونس: أه بمشى عليه
محمد صلاح : أخباره أيه ؟ أصل أنا بمشى عليه برضه
النائب /شوقى يونس: أنت عارف الدائرى بيمشى عليه قد أيه فى اليوم ؟ 160 ألف عربية بص سيادك لما وزارة الداخية بدأت تضع عليه الرادار الثابت
محمد صلاح : الكاميرات فى أوروبا والدول المتقدمة الكاميرات بتبقى موجودة وبيقولك الكاميرا فين ؟ وبالتالى أنت بتظل محافظ على مستوى معين فى السرعة
النائب/شوقى يونس: كويس قوى المنطقة اللى فيها الكاميرات اللى موجودة فى الطريق الدائرى إنظبط فيها السرعة بكام بنسبة 70 ، 80 % لسه فيه برضه ناس بتخالف معلش لكن اللى حاصل الأتى لانه هذه المنطقة النهارده دا بيودينا لناحية كيف ننظم هذه العملية ؟ كيف نحد من حوادث الطرق
محمد صلاح : طب كنا عملنا فى حلقة لقاء فى الحلقة مع مساعد وزيرالداخلية اللواء شريف جمعة حوالينا الموضوع نشوف قال أيه وحضرتك تعلق على الكلام
النائب /شوقى يونس: قوى قوى
محمد صلاح : نشوف اللواء شريف جمعة قال أيه ؟ ونرجع تانى
اللواء/ شريف جمعة : مفيش عاصمة مفيهاش مشكلة مرور ولكن الفرق أيه ؟ اللى حضرتك بتلاحظه وبتقول والله أننا بتأثرللأسف من إرتباك حركة المرورالفرق لانه هناك زحمة منظمة وزحمة غير منظمة وسلوكيات بنفتقدها هنا عندنا بتؤثر على المروريعنى لما حضرتك تلاقى مواطن طالع كوبرى أكتوبر ويعنى فاتته الفتحة بتاعة النزول ويرجع بضهره علشان ينزل من الفاتحة دى هذا السلوك لايمكن تلاقيه فى أى مكان مستحيل لما تلاقى حضرتك مركبات نازلة من كوبرى أكتوبر طبعا دا شريان رئيسى وبيؤثرعلى مطالع ومنازل الجيزة والقاهرة الكبرى لما حضرتك نحصرحجم الأعطال اللى عليه فى وقت الذروة تخيل حضرتك عربية عطلانة بتتزق من خلال مجموعة مجندين علشان ينزلوها فى أول منزل أو الونش يجى يرفعها تخيل حضرتك نفق الأزهر لما بيحصل فيه أعطال أيه اللى بيحصل فى المنطقة ؟ ما هو أصلا المنطقة مش مستحمله اساسا فبيبقى فيه إحتكاك ما بين أتنين مواطنين أعلى أكتوبر وينزلوا لبعض ويقفلوا الطريق على ما الشرطة تنزل والكلام ده فأى يعنى وقوع حوادث أو عطل أو تصرفات خاطئة من المواطن بتؤثر بالسلب لانه الشوارع خلاص معدتش مستحملة حجم الحركة .
محمد صلاح : اللواء شريف جمعة شايف ان العنصرالبشرى بيتسبب لانه عامة سياد النائب مسئول المرور دايما بيحيدوا ا يحدث من حوادث أو حتى زحمة إلى النعصر البشرى أساسا وعادتا هتلاقى العنصر البشرى دا هيحيدها إلى عدم تطبيق القانون على الجميع طبعا يعنى أوإلى حالة الطرق والكبارى والأنفاق أنت مع مين بقى ؟
النائب/شوقى يونس: أنا متفق مع الكلام اللى قالوا الأخ شريف جمعة أنا متفق معاه تماما لانه دا بيؤكد لانه 70% من الأخطاء أسبابها العنصرالبشرى لكن النقطة اللى أنا عايزأقولها واحنا بنتكلم عن حوادث الطرق لانه كل الطرق الزحمة لا يترتب عليها ولا يقع عليها حوادث نادرا كويس كده
محمد صلاح : علشان زحمة ؟
النائب/شوقى يونس: الزحمة دى قضية أخرى يعنى الزحمة والمرور فى القاهرة قضية أخرى تتسبب فيها سلوكيات الناس فى التعدية فى وسط الشارع الكلام اللى حضرتك بتعانيه وأنا بأعانيه وغيرنا بيعانيه وأى واحد فى القاهرة بيعانيه لكن حوادث الطرق أغلبها ما بيحصلش فى القاهرة حوادث الطرق المميتة بتحدث فى الطرق العامة يعنى أغلب حوادث الطرق فى طريق القاهرة - إسكندرية الصحراوى القاهرة - إسكندرية الزراعى الطريق الدائرى يعنى كا ما كانت الطرق سريعة كل ما كان عدد الحوادث عليها أكتر وهنا يجب المعالجة والتركيز على مثل هذه الطرق
محمد صلاح : إزاى بقى ؟
النائب/شوقى يونس:احنا عرفنا دلوقتى لانه احنا عندا 3 حاجات أساسية نمرة واحد العنصرالبشرى نمرة أتنين المركبة نمرة تلاتة الطريق نفسه أدى التلاتة اللى بيسببوا العنصرالبشرى بيبقى نتيجة أيه ؟ الجهل بالقيادة سرعة زيادة ملف السرعة الكلام اللى ببيترتب عليه إجهاد
محمد صلاح : أه فيه ناس بتنام
النائب/شوقى يونس: ما بيريحشى وعايز يكمل علشان يوصل
محمد صلاح : ما هو بيريح وهو سايق
النائب/ شوقى يونس: وهكذا يبقى إذنا العنصر البشرى يجب العناية بيه
محمد صلاح : أنا فى الحلقة مع اللوا شريف جمعة قلتله على واقعة نشرت فى الصحف واحد كان بعين واحدة ودراع واحد يعنى بعين واحدة ودراع واحد
النائب /شوقى يونس: وبرجل واحدة ومركب رجل خشب كتبوها فى الصحف برضه لكن مش كل واحد يجى ياخد رخصة يعنى الواحد يبقى قاعد فى البيت وتطلعله الرخصة يعنى
محمد صلاح : فيه حد قاعد فى البيت بيطلعله رخصة ؟
النائب/شوقى يونس: جايز
محمد صلاح : جايز يعنى بيحصل؟
النائب/شوقى يونس: جايز يعنى احنا بندى رخصة لكل واحد وصل 18 سنة ما نشوف الدول التانية عاملة أيه ؟ ما هو أصل أنا لإاحنا بنقول لانه من 18 لى 15 سنة بياخد رخصة مؤقتة إذا ثبت فى ال3 سنين دول لانه نسبة المخالقات بتاعته بحد أدنى بياخد الرخصة التانية دا بالنسبة للرخصة الخاصة لكن نيجى نتكلم على رخصة الأجرة
محمد صلاح : أو الميكروباصات بقى عفاريت الأسفلت
النائب /شوقى يونس: أو نيجى نتكلم على رخصة النقل
محمد صلاح : أوو النقل دا بقى موال اللى بيعمل شاى وهو سايق والحاجات دى
النائب/شوقى يونس: دية بقى اللى أنا عايزأحطلها قواعد وتبقى الرخصة دى كل سنة مفيش كل 3 سنين ولا كلام زى ده فيجب أنها تجدد نهتم بحكاية الكشف الطبى
محمد صلاح : الراجل كان أتعور رحمة الله عليه وواحد كان برجل واحدة مع إحترامى طبعا بس ما يسوقش عربية شاحنة تريلا
النائب /شوقى يونس: يبقى فيه أيه بقى يبقى جهات متخصصة هى اللى بتدى الشهادات الطبية مش الدكتورأيا كان أنا مش بطعن فى الدكتورلكن لازم يبقى فيه جهات علشان نحاسبها بكرة لازم يبقى فيه مدارس يا أخى فى بعض البلاد ما بيرضوش يدونى الرخصة الدولية على الرخصة المحلية
محمد صلاح : على الرخصة المصرية لا محدش يرضى
النائب /شوقى يونس: ليه ؟ المفروض أن يكون هناك مدارس لتعليم القيادة يا جماعة احنا مش أقل من الدول اللى حوالينا يعنى لازم يبقى فيه تفتيش مفاجىء تفتيش مفاجىء على السائق نفسه مش على رخصته مش على رخصة العربية وبس يبقى لازم التكثيف فى هذه العملية نقطة تالتة مهنةالسواقة أصبحت مهنة لمن لا مهنة له ودى نقطة فى منتهى الخطورة الواحد النهارده اللى مش لاقى أى حاجة يروح يتعلم السواقة ويروح ياخد رخصة ويشتغل على ميكروباص اللى أصبحوا عفاريت الأسفلت اللى أدخل ثقافة فى المجتمع المصرى ما كان يجب أنها تخش وهى ثقافة البلطجة والكلام اللى كلنا عايشينه فدى نقطة لو كان فيه وقت هبقى أقول لسيادك عليها
محمد صلاح : قولى قول كل حاجة
النائب/شوقى يونس: يجب فى الحتة دية لانه أنا أنا مش ممكن أسوق تريللا وأنا معرفش أقرا وأكتب يعنى أزاى ؟
محمد صلاح : يعنى يقولك وأنا هقرأ أيه فى التريللا يعنى ؟
النائب/شوقى يونس: أزاى أنا أعرف إرشادات المرور أزاى أنا قريت كتاب المرور اللى مدينه ليا علشان أتبعه أزاى ؟ يعنى أنا فاكر لما كنا بنناقش قانون المرور
محمد صلاح : قانون المرورالجديد؟
النائب/شوقى يونس: الجديد والحزب كان له وجهة نظربعيدا بقى عن هل كان مناسبا صدوره دلوقتى أوصدوره غير دلوقتى كنا مقدمين لانه هو يجب يجب لانه احنا نشترط لانه يكون حاصل على مؤهل أدنى مؤهل أيه ؟ الإعدادية
محمد صلاح : دا اللى هيسوق ميكروباص يعنى ؟ دا اللى بتسموها رخصة تالتة مش كده ؟
النائب /شوقى يونس: أه يعنى واخد بال سيادتك يعنى الناس اللى موجودة دى أنا ما بلغيش رخصها أبدا بس أحط بقى قاعدة أمتص المجموعة اللى معندهاش شغل النهارده بالأعدادية والتجارة المتوسطة واوا إلى أخره وأرفع من هذه المهنة أرفع من مستواها وفوجئنا بعد ذلك بمعرفة القراءة والكتابة يعنى احنا بنقول كده ليه ؟ لانه ثبت لانه 40% من الحوادث القاتبة سببها النقل فى نقطة بقى مهمة قوى أنت سيادك أشرت إليها وهى الميكروباصات وما أدخلته من ثقافة على المجتمع ما كان يجب أن تدخل
محمد صلاح : دا اللى جاى التوك توك لسه ؟
النائب/شوقى يونس: ما أنا بتكلم عن التوك توك اللى دخل مصرالنهارده من وزارة الداخلية لانه المسجل عندها طبقا لقانون المرور 34 ألف
محمد صلاح : 34 ألف توك توك ؟
النائب/شوقى يونس: أه ومصرفيها فوق النص مليون توك توك شوف الفرق ودول مش مسجلين القضية أيه ؟ أن هناك طلب على النقل ولا يقابله نقل منظم ليس معنى النقل المنظم يبقى تبع الحكومة لأ يعنى فيه شركات نقل كانت قطاع خاص بيحكمها قواعد وقوانين بتقدم خدمة النقل لكن أنا النهارده جه عليا وقت أى واحد يروح يشترى ميكروباص يالله وأشتغل وأشتغل وأشتغل والميكروباص دا بقى قتل 7 ودا إنقلب ب 10 بقت إصابة خطأ احنا لسه شايفين الحكم 4 سنين على الولد اللى راكب عربية خاصة وقتل وجرح 14 واحد
محمد صلاح : على الدائرى ؟
النائب/شوقى يونس: أه على الدائرى الكلام ده لسه قرينه يجب أن يكون هناك قواعد أنا ما بقولش يلغى القائم لأنى أنا مقدرش أستغنى عنه دلوقتى
محمد صلاح : يعنى بداية جديدة يعنى
النائب/شوقى يونس: من النهارده يا جماعة تقديم خدمة النقل الجماعى للركاب فى قانون يحكمها من خلال شركات جمعيات تعاونية أقدر أحاسب عربية من عربياتها تعمل حادثة أقد أحاسب يبقى فيه السواقة اللى عليها يبقى شروطها كذا ووسائل الأمان اللى لازم تتحقق فيها تيقى كذا يبقى أنا بأساعد على تقديم خدمة آمنة مش خدمة عشوائية النقل نفس النظام ودا موجود وأعتقد أن هذا القانون أرجومن الله سبحانة وتعالى إن هو يخش فى الدورة البرلمانية
محمد صلاح : هل المسألة تتعلق بتشديد عقوبات بس ؟ ما احنا شددنا العقوبات لا الحوادث قلت ولا حصلت سيولة فى المرور برضه
النائب /شوقى يونس: لا لا لأ مش هى ديا احنا بنعاقب أيه ؟ احنا ما بنعاقبش على فكرة الحوادث احنا بنعتبرها إصابة خطأ بيقتل 7 وبياخد له سنتين سجن واللى بيقتل واحد بياخد 25 سنة
محمد صلاح : أه بس دا بيقول مع سبق الإصرار والترصد
النائب/شوقى يونس: هل الخطأ بتاعى إن أنا أخالف قواعد المرور؟ دا يبقى أيه ؟ اللى بيخالف قواعد المرور القتل الخطأ فى مفهمومه أنه لا يقصد القتل
محمد صلاح : لكن لما تخالف هتتقتل مش كده ؟ مش محتاجة قوى مفهومية
النائب/شوقى يونس: لكن النقطة الأساسية لانه احنا يجب نمرة واحد أن يكون هناك نقل جماعى منظم فى إطارقانونى أن يكون هناك نقل البضائع له إطارقانونى مش أى واحد يروح يشترى عربية نقل أو مقطورة ويشتغل النقطة التانية أن يكون هناك قواعد لمنح الرخصة الأمثر من دا كله بقى علشان أتجنب إلى حد ما الأخطاء الفردية التى هتحدث هتحدث أقلل من نسبتها إن أنا أدخل ما أدخلته الدول الأخرى
محمد صلاح : الدول الأخرى أدخلت أيه بقى يا سيادة النائب ؟
النائب/شوقى يونس: المراقبة الإلكترونية لحركة المرورعلى مستوى الطرق
محمد صلاح : دا هيقولك بقى دى هتتكلف كتير قوى
النائب/شوقى يونس: تتكلف هل هذه التكلفة هل 1000 قتيل
محمد صلاح : لندن متغطية كاميرات طوكيو متغطية كاميرات باريس متغطية كاميرات نيويورك واشنطن
النائب/شوقى يونس: عندنا المثال بقى أنا لسه مدى سيادك المثال المنطقة اللى فى الطريق الدائرى اللى إتحط فيها ده إتظبطت فإذنا أنا قدامى تجربة أهه النقطة التانية بقى مسألة التصالح فى المخالفة يعنى أنا النهارده علي مخالفة ب 500 جنيه
محمد صلاح : أدفع ال 500 جنيه ؟
النائب /شوقى يونس: أنا لسه واحد بقولى واحد كان بيستخدم الطريق الدائرى رايح يجدد الرخصة لأ عليه 15000 ألف جنيه ساب العربية ومشى
محمد صلاح : ما هو علشان ما كنش يعرف لانه فيه كاميرا محطوطة أنا شفتها فمهدى اللعب
النائب/شوقى يونس: النقطة التانية الطرق العامة إذا أنا نش هقدرأقول على الطرق العامة والسريعة النهارده لانه أنا أقدرأغطيها بالكاميرات أغطيها بقى بالدوريات أنت بتمشى فى أى دولة من الدول
محمد صلاح : على طول تلاقى جنبك كان زمان فيه حاجة أسمها كموسطبل
النائب/شوقى يونس: خلينا نسميها طالعلك الكمبوسطبل أنا راجع من ماليزيا على القاهرة ففى فرق ما بين ميعاد وصول الطيارة السعودية الساعة 3 صباحا والطيارة المصرية كانت الساعة 3 بعد الضهر فنزلت رايح اللوكاندا السواقة جرى أنا لوحدى قاعد فى العربية فى إشارة ثلاثية الساعة 3 صباحا مفيش حد ماشى السواق واقف
محمد صلاح : لايمكن يعديها
النائب /شوقى يونس: أنا بقوله ما تعديه شوف التعبيراللى قاله قاللى كده أسلم ربط مخالفته للأشارة بالسلامة مش بمخالفة
محمد صلاح : عندنا الجو مختلف يعنى كده لو رحت بره وقعدت فى مدينة من أللى فيها قواعد مرور وشوارع بجد يعنى وكبارى بجد وحاجات زى كده وسلوكيات منضبطة وإتعودت شوية وجت هنا ووقفت فى إشارة بالليل يعنى ممكن الواد ده يتشتم من اللى حواليه يعنى
النائب /شوقى يونس: اللى بيشتغلوا فى السواقة فى مصرلما بيروح أى دولة من الدول دى بيلتزم طب ليه ما بيلتزمش فى مصر ؟
محمد صلاح : ما أنا بسألك السؤال ده ليه ؟
النائب /شوقى يونس:لأنه لا يجد العقاب الفورى للمخالفة
محمد صلاح : لان العقاب لا يطبق على الجميع
النائب/شوقى يونس:أنا عايز أقول لسيادتك حاجة يعنى للأسف الشديد حكاية أنت عارف أنا أبن مين ؟ وعارف العربية تبع دا مجلس شعب دا مجلش شورى دا عربية مش عارف أيه الكلام دا مش موجود بره
محمد صلاح : مش موجود بره عندنا كتير منه
النائب/شوقى يونس: الكلام دا مش موجود فاحنا لازم ثقافتنا ثقافة التطبيق للقانون ترتفع إلى مستوى القانون حتى يحترم القانون
محمد صلاح : سياد النائب لسه الكلام مخاصش علشان فيه كلام مهم عايز أسألك عليه لسه الكلام ما خلصش
فاصل
محمد صلاح : كلام كتيرعن العنصرالبشرى سياد النئب معانا بقى العنصرالبشرى نشوف الجماعة سائقى الشاحنات وعربيات النقل والحاجات اللطيفة دى يعنى نشوف بيقول أيه وحضرتك ترد عليهم نشوف بقى عفاريت الشاحنات بيقول أيه ؟
تقرير
سائق: هو يعنى النقل التقيل حلو أه بس مشكلته لانه هو ما بيحترمش العجل الصغير ولو جاتله أى فرصة ممكن يدعجنها
سائق: عمر ما سواق نفسه يعمل حادثة سواق ملاكى مثلا جايب رخصة بقاله 5 شهور راح جابها عن طريق واحد معرفة أو عن طريق واحد يعرفه جاب رخصة بقاله 3 شهور وقاله أطلع وجاب عربية ملاكى بقاله شهرين تلاتة هيبقى زى خبرة 30 أو 40 سنة أنا بقالى 37 سنة راكب نقل هيبقى زى خبرتى ؟ بيطلع سريع فجأة بيلاقى عربجى فجأة بيلاقى عربية واقفة عربية ميكروباص بتاخد ركاب يروح ضارب فرملة وواقف جاى عكس الإتجاه داخل دخلة غلط داخل قاطع عليه فى الطريق فأنت لازم تخبطه هروح فين يعنى ؟
سائق: بالنسبة للحوادث يعنى كان زمان السواقة فن وذوق وأخلاق ولكن دلوقتى حضرتك بقا العربجية والحشاشين هما اللى بيسوقوا العربيات دلوقتى بيبقى ماسك الجوزة ولا الشيشة وعامل حجرين حضرتك وماشى شارب برشامة علشان يصحى فحضرتك بيبقى ماشى أصلا ومش عارف نسب بعد العربية اللى قدامه والمرور حضرتك للأسف بيساعده بيبقى شايل حمولة أكتر من حولته يلف وياخد الشمال يعنى الأسبوع بتاع العيد كان النقل التقيل واخد أجازة كان المشوار من بنها لحد كلية الزراعة لحد المؤسسة بياخد معانا نص ساعة سرعة 80 ، 90 نص ساعة بنكون هناك فيه نقل تقيل تبص تلاقى الطريق يا خد له ساعة ساعة وربع
سائق: سواقين النقل بتجرى غصبا عنها لأنها عندها شغل بتدفع فى الميزان 500 جنيه فى ال24 ساعة فلازم يعوض ال 500 جنيه أنا علشان أدورها لازم أغطى ال500 جنيه اللى أنا بدفعهم دول
سائق: فى وسط الطريق ماسكين فى الشمال أكن الشارع بتاعهم يعنى بس مش أكتر ولا أقل يعنى
سائق: هو النقل التقيل بس تلاقيهم ماشين على الطريق بيبقى ماشين واخدين شمال يمين مخبطين فى كل حاجة بس هما دول النقل التقيل
محمد صلاح : يعنى واضح لانه الجماعة اخوانا سائقى الشاحنات عربيات النقل القدام بيشتكى من الجيل الجديد من السائقين وطبعا سائقى الميكروباصات والعربيات العادية والملاكى وكده بيشتكوا من كل بتوع النقل إنما الغريب الراجل اللى هو بيسوق وهو ماسك الشيشة ده طب الشيشة دى عايزة إجراءات وكده موجودة فى حتة دى لانه حد يسوق وهو ماسك الشيشة يعنى ؟
النائب :شوقى يونس: ما هوا تاركها لتقديرك أنت بقى وحكمك أنت
محمد صلاح : لأ أنا ما شفتهاش أنا بشوف هنا العجب
النائب :شوقى يونس: طب خلاص يعنى الخطورة الل قالها أحد السائقين إن هو بيقول إن هو بيمر على المرور والمرور ساكت نقاط المرور منتشرة على الطرق السريعة مش نقطة واحدة وفيه كمين وفيه الكلام اللى سيادك عارفه المفروض لانه مهياش عملية نقطة مرور وبس يعنى المفروض زى ما كنا بنتكلم إن 40 % من الحوادث القاتلة للمرور سببها النقل المفروض أنها تعمل تختاركل 100 عربية نقل تمسك واحد تشوف حالته أيه ؟ الوزن علشان خاطر هيدفع فلوس لانه محمل وزن زائد علما بأن هذه قضية أخرى أنا لا أسمح بالمرورعلى الطرق بوزن زايد ولا لأ ؟ ومدى تحمل الطريق لى كده ؟ وتكلفة إعادة تأهيله مرة أخرى هل تتناسب مع المبالغ اللى إندفعت فى الوزن الزائد ولا لأ ؟ دى قضية أخرى لكن المفروض زى ما احنا قلنا أن يكون هناك دوريات راكزة اللى بتفتش على السيارات التى تسير على كافة الطرق السريعة والعامة يجب فى النقطة ديه بدوريات ومش معروفة يعنى أنا ببقى عارف الكين قبل ما أوصله أنا عارف نقطة المرور قبل ما أوصلها لأ دا راجل راكب ماشى أقف تشوفه تشوف حالته
محمد صلاح : حضرتك بتحكى حاجات مش موجودة هنا
النائب :شوقى يونس: لأ موجودة بس ليست بالكثافة التى يجب أن تكون فيها ليه ليست موجودة بنفس الكثافة؟ زى أنا ما سمعت من بعض المسئولين عن المرورالتكلفة المالية يا جماعة أنا مازلت بقول أن روح المصرى غالية المفروض لانه التكلفة المالية لا تقف عائقا أمام حماية إنتقال المواطن المصرى لأن حق إنتقاله حق دستورى احنا الدولة الوحيدة التى تسمح بتسير المقطورات فى مصر فى العالم
محمد صلاح : فى العالم كله مفيش مقطورات إلا هنا ؟
النائب /شوقى يونس: كانت سوريا ولغت
محمد صلاح : احنا عندنا مقطورات بس فى العالم كله فى التوك توك أو فى دول كتير من العالم فيه التوك توك ماليزيا وفيه فى بنجلادش توكتوك كتير قوى
النائب/شوقى يونس: أنا هحكى لسيادك حاجة أنا لما باجى أنزل القرية بتاعتى ما بعرفش أمشى من التوك توك
محمد صلاح : دا عامل زى الناموس ؟
النائب/شوقى يونس: ليه بقى ؟ دا حتى أدخل ثقافة أخرى يعنى زمان كنا واحنا فى البلد لما أنتقل من مكان إلى مكان مشى على الرجلين النهارده لأ يعنى خدماته داخل القرى والربط ما بين القرى مطلوبة أنت واخد بال سيادك لكن يجب أن تقنن وفى قانون المرورالجديد محطوط له شروط 34 ألف مسجل والباقى غير مسجل
محمد صلاح : طب دلوقتى يا سياد النئب فى دراسة بمركز المعلومات بمجلس الوزرا بتقول لانه ظاهرة تزايد حوادث النقل فى مصر إتخذت بعدا دوليا أنت عارف أصلا احنا مش ناقصين أبعاد دولية يعنى بمعنى لانه فيه تأثير سلبى على السياحة
النائب /شوقى يونس: %% من 3 سنين طلع من وزارة الخارجية الأمريكية تحذير لرعاياها من السفرإلى مصر بسبب حوادث الطرق تعال النهارده الحادثة الأخيرة للسياح الروس أيه أللى حصل ؟ طلع تحذير ودا بناءا عليه أيه ؟ أتحركت وزارة السياحة وبعت وفود علشان تروح هناك فى روسيا علشان تقنع أ،وا دى حوادث عارضة
محمد صلاح : ما هو أنا السائح ده مش سائح فدائى يعنى هيجى هقوله عندنا طرق حلوة ومعندناش حوادث وبعدين يجى يلاقى حوادث ولازم أصلح الطرق بتاعتنا
النائب /شوقى يونس: مش الطرق
محمد صلاح : آمال أيه ؟ السواقين ولا أيه ؟
النائب /شوقى يونس: ما هوده السواق وبتاع النقل وبتاع الميكروباص وبتاع الملاكى اللى لسه واخد رخصة وماشى وماهواش عرف راسه من رجليه أبعت وفود لأن السياحة الروسية بتمثل المرتبة التانية أوالتالتة فى مصروبعدين تأثيرها مش على الروس بس لانه الكل بيسمع أنا جاى أتمتع و لاجاى أموت
محمد صلاح : ونلاقى فيه برضه التجمعات السكانية اللى هى بتطلع على الطرق الجديدة فاكر الدائرى أو ما طلع ؟ كان عليه أيه ؟ مفيش دلوقتى فيه المنطقة بتاعة التجمع الخامس الفيلل الرايقة اللطيفة والمنتجعات وفيه قبلها بقى الطوب الأحمر الرهيب ده
النائب /شوقى يونس:وما بيبضوش ليه الطوب الأحمر ؟
محمد صلاح : أنا عارف
النائب /شوقى يونس: فين الحرم بقى بتاع الطريق لانه أنا فى يوم من الأيام لانه أنا أعمل تانى على حانبى الدائرى ممر أخر للنقل زى ما سيادة الريس طلب
محمد صلاح : هتيجى تنفذ ده أزاى ؟ الممر الأخر فى بيوته هتقول التنظيم كلانه نظمه زمان مش كده ؟
النائب /شوقى يونس: أزاى أنا أعمل محطات خدمة بترولية على الطريق الدائرى ؟ هخش وأطلع أمال أنا هاجى أوسع الطريق الدائرى أزاى ؟
محمد صلاح : احنا عملنا على قد اليومين دول ما بنبصش لقدام مش كده ؟
النائب /شوقى يونس: إذنا المنظومة كلها عايزة تتغيرخلينا نتكلم بقى بمنتهى الصراحة
محمد صلاح : نتكلم بقى بمنتهى الصراحة
النائب/شوقى يونس: منظومة النقل على الطرق ومنظومة النقل بصفة عامة عايزة تخطيط دا اللى كان ورا رأى الحزب أن يكون هناك مجلس قومى للنقل النقل مسئول عنه 17 وزارة فى مصرواخد بال سيادك كل واحد بينفذ من وجهة نظره مفيش هذا التناسق يعنى أنا أروح أعمل مجتمع عمرانى جديد قبل ما أعمل المجتمع العمرانى الجديد مش هتكلم على أن يكون المجتمع العمرانى قائما بذاته فى كافة خدماته وا وا إلى أخره هيظل فترة إلى أن يكون قائما بذاته معتمدا على الأم والأم هى المدينة الرئيسية سواء كانت عاصمة محافظة القاهرة أو أسكندرية أو غيره ما فكرش لانه أنا أربطه بيها ما فكرش أيه وسائل النقل اللى هتربط الناس ديه ما فكرش أيه وسائل النقل اللى هتخلى أبن الراجل اللى ساكن هناك يجى الجامعة
محمد صلاح : طب ما تم فى المجالس النيابية يا سيادة النائب لما تكون رئيس لجنة لما بتظهر الحاجات دى ما بتحتجوش ليه ما بتحظروش ليه ؟
النائب /شوقى يونس: احنا بنطالب وهناك سلطة تنفيذية عليها التنفيذ لما تيجى سيادك تتكلم معاهم فى هذا الموضوع فيه أمثر من عنصر يعنى هدى لسيادك مثال صغير احنا إقترحنا أن يكون لمدينة القاهرة جهاز لتنظيم المرور داخل القاهرة الكبرى والنقل بيبقى مسئول عن القاهرة الكبرى الكلام ده خد 4 ، 5 على ما صدر القرار ليه ؟ لأنك أنت بتاخد إختصاصات أكتر من جهة على ما تحطها فى جهاز واحد فعلى ما بتعمل هذا التنسيق ليس الأمر سهلا بالصورة اللى هى بنعتقد أنها سهلة فى ظل بيروقراطية التنفيذ
محمد صلاح : أه عندنا بيروقراطية جامدة سيادة النائب خلينا نتكلم كده بإختصار عن القطارات يعنى ؟
النائب /شوقى يونس: ليه بس القطارات ؟ ما تخلينا على الطرق بقى دلوقتى
محمد صلاح : الجهازالمركزى للتعبئة والإحصاء قالت لانه حوادث القطارات زاد عددها 1750 حادثة فى سنة 2009 نسبة زيادة 22% عن سنة 2008 اللى كان فيه 1290 حادثة بس احنا بنتقدم ولا بنتأخر ؟
النائب /شوقى يونس: لأ هى حوادث القطارات هتظل حوادث القطارات موجودة
محمد صلاح : هو احنا نرضى بالأمرالواقع يعنى ؟
النائب /شوقى يونس: لأ أكمل بس يا محمد بيه هتظل حوادث القطارات قائمة هو يمكن كل يوم بيحصل حادثة لكن احنا بنتكلم على حوداث القطارات اللى ليها إصابات قاتلة يعنى ممكن جدا أحسب لانه القطر اللى اتأخر ساعتين حادثة لانه فيه عربية عدتت قدامه بيعتبروها حادثة وبتحسب من ضمن الحوادث واخد بالك أى عطل فى القطار وهو سائر
محمد صلاح : أه بس فيه حوادث القطارات اللى بتسلم على بعضها وفيه بقى الجاومسة عدتت من قدامه يطير له عربية نقل
النائب /شوقى يونس: سيادتك كان عندى فيلم زمان موجود لأحد وزراء النقل كان عامل فيلم جميل جدا الناس عاملة أسواق على قضبان السكة الحديد سوق بيبيع ويشترى فيعنى مش عايزين نوصل لهذا الحد
محمد صلاح : لأ نلغى السوق يا سياد النائب نلغى السوق
النائب /شوقى يونس: النقطة اللى أنا عايزأقولها السكة الحديد هى شرايين النقل فى مصرإذنا واخد بال سيادك لأنها منتشرة فى كل ربوع مصر ومن أقدم سكك الحديد فى العالم
محمد صلاح : دى تانى سكة حديد فى العالم بعد أنجلتر
النائب /شوقى يونس: السكة الحديدعلشان تنهض قدامك 3 حاجات علشان تنهض وتؤدى خدمة أمنة نمرة واحد هرجع وأقول العنصرالبشرى القائم على تشغيل السكة الحديد دى نمرة واحد نمرة أتنين الخطة علمية التى تأخذ بالعلم الحديث فى تطوير السكة الحديد
محمد صلاح : دا احنا لسة بنتخانق على الجرارات
النائب /شوقى يونس: نمرة تلاتة تدبير التمويل اللازم نمرة واحد أنا قلتها دا العنصر البشرى النهارده معنديش أفسام سكة حديد فى كليات الهندسة محدش عايز هيطلع يشتغل أيه ؟ هيعمل أيه ؟ هياخد كام معايا يا فندم النقطة التانية معدتش السكة الحديد جاذبة للمهندسين نمرة تلاتة السكة الحديد فيها 72 ألأف واحد تقريبا الرقم دا على ما أذكرواخد بال حضرتك من أول عامل الدريسة وعامل المزلقان لرئيس السكة الحديد أيه المستوى بتاع الناس من الناحية الفنية للقائمين على تشغيل ده وأيه المستوى المادى اللى أنا بديه له ؟ علشان يقدر أحاكمه بكرة هقوله تعال أنت راجل أخطأت تعال أنت نمت الحنة دى لازم أنها تعالج زإلا أنك أنت مهما صرفت فلوس يظل هذا التدنى فى المستوى الفنى نمرة أتنين الناس بتروح للجر الكهربائى واحنا لسه بنروح للجر الزيتى نرة تلاتة بقى التمويل خلينا نتكلم بمنتهى الصراحة السكة الحديد القائمة حاليا يجب أن يتم تطويرها بتطوير داخلى ذاتى ودع من الحكومة وإلا مش هتقوم الحكومة عملت اللى عليها أول ما حصلت حادثة القطر عايز كام ؟ 8 مليار إتفضل أدى 5 مليار ونص و2 مليار ونص قروض أتفضل أشتغل خد بال سيادك النهارده الكلام الجديد اللى بيتقال لانه علشان أحافظ على السكة الحديد القائمة أنا عايز24 مليارتانى
محمد صلاح : علشان أحافظ عليها زى ما هى ؟
النائب/شوقى يونس: لأ أتطورها بنفس القائمة احنا مش عايزين القائمة احنا عاوزين نطورالقائمة إلى ما هو حديث
محمد صلاح : أه بس احنا يبقى محناجين كتير قوى كده
النائب/شوقى يونس: يبقى مينفعش الحكومة تمول يبقى احنا عاوزين حد يخش يمول خلينا بقى ناجه مشكلة البنية الأساسية فى مصر بالفكر الجديد
محمد صلاح : أيوه بس دا هيفتح مجالات أخرى بالفكر الجديد
النائب/شوقى يونس: على فكرة الخدمة المميزة بالسكة الحديد اللى هى الدرجة الأولى القاهرة إسكندرية أو القاهرة أسوان أصبحوا بالأجرة طاردة للمواطن
محمد صلاح : أه غالية ب55 جنيه
النائب/شوقى يونس: الطيارة من أسوان لمصرأرخص من السكة الحديد لأ هى متقدرش تزود لمكن هى يجب أن تنمى مولرد خاصة بيها تنقل بضاعة تشغل بقى نفسها
محمد صلاح : احنا أمتى سيادة النائب يبقى عندنا مجتمع أمن الحوادث سواء على الطرق أو السكة الحديد النقل النهرى والمواصلات النهرية تمشى فى النيل ولا هنلاقى المراكب غرقانة ولا أيه ؟ دا بديل يعنى كويس
النائب/شوقى يونس:أحسن بديل للنقل أنت عارف سادك لانه 92% من البضايع بيتم نقلها على الطرق والنيل والسكة الحديد ومعرفش أيه دا كله
محمد صلاح : يعنى النيل حل
النائب/شوقى يونس: أه طبعا حل جذرى
محمد صلاح : خلاص يا جماعة بقى الناس تركز على النيل الكام سنة اللى جايين دول لحد ما نطورالبنية التحتية للسكة الحديد والبنية التحتية للطرق والعنصر البشرى كمان يتغيروقال رئيس لجنة النقل والمواصلات الدكتور شوقى يونس كلامه معانا النهارده كلام جميل كلام معقول أكيد كلام مسئول خلص الكلام ونلتقى فى الحلقة المقبلة .