اختراق

الاربعاء29/12/2010
عمرو الليثي: بسم الله الرحمن الرحيم .. مساء الخير .. وأهلاً بيكم .. حلقة جديدة من اختراق بمناسبة حلول العام الجديد .. اسمحولنا في هذه الحلقة أن نقدم لكم استعراض لحصاد برنامج اختراق خلال عام 2010 ...
فاصل موسيقي مع عرض صور ل "صلاح نصر"
تقرير
صلاح نصرأشهر رئيس لجهاز المخابرات المصرية فى الفترة من عام 57 وحتى عام 67 يعد من أكثرالشخصيات التى أثارت الكثير من الجدل ، ولد صلاح الدين محمد نصر فى شهرأكتوبر من عام 1920 بإحدى قرى محافظة الدقهلية تخرج فى الكلية الحربية عام 36 انضم للضباط الأحراروشارك فى ثورة الثالث والعشرين من يوليو كان قائدًاً لإحدى الكتائب عينه الرئيس جمال عبد الناصر نائبا لرئيس المخابرات عام 56 ثم رئيسا لجهازالمخابرات عام 57 ، صلاح نصر له دور بارز ومشهود فى تطويرجهازالمخابرات، فى عهده قامت المخابرات المصرية بأهم عملياتها وأشهرها ضد إسرائيل تلك العمليات التى أصبحت تدرس فى معاهد المخابرات الدولية ارتبط اسمه بقضايا تعذيب وتجنيد السيدات فى أعمال استخباراتية أمرالرئيس جمال عبد الناصر باعتقاله وتقديمه للمحاكمة حكم عليه بالسجن 40 عاما الأولى بعد إدانته فى قضية انحراف المخابرات والثانية فى قضية مؤامرة المشيرقضى من العقوبة 7 سنوات حتى أفرج عنه الرئيس السادات فى أكتوبر من عام 1974 استمرت معاناته مع المرض حتى وفاته فى عام 1982..
عمرو الليثي: كيف التحق السيد صلاح نصر بالمخابرات العامة أعتقد كلفه الرئيس عبد الناصر أن يكون نائباً للسيد على صبرى كان السيد على صبرى ساعتها رئيس المخابرات ؟
د/هانى صلاح نصر:لأ .. هو المخابرات العامة كانت أسست سنة 53 ، 54 كان السيد زكريا محيي الدين..
عمروالليثى: مظبوط
د/هانى صلاح نصر :وكانت المخابرات عبارة عن شقتين أو تلاتة فى وسط البلد وكانت فرع من المخابرات العسكرية وسنة 56 مسكها السيدعلى صبرى .. خلفاً لل .. وكان بعد إجلاء 56 كانت مصر بحاجة لجهاز مخابرات قوى يواجه أجهزة المخابرات اللي هي العالمية دي..
عمروالليثى: تمام
د/هانى صلاح نصر: ففكرعبد الناصرفى إنشاء الجهاز ده فجه سنة 56 قال للوالد يعنى أنا دورت لقيت انت أنسب واحد تمسك الجهاز دهوت مع .......
د/هانى صلاح نصر: يعني هاتكون نائب على صبرى لمدة سنة وبعد كده هطلع قرار تبقى رئيس المخابرات عشان على صبرى هياخد وزيردولة أو حاجة زى كده
عمروالليثى: تمام
د/ هانى صلاح نصر: وفعلا إن كان القرارإتمضى ولما قامت حرب 56 رجع تانى لبس البدلة العسكرية و 57 مسك المخابرات العامة ..
فاصل موسيقى مع عرض صور ل "صلاح نصر"
عمرو الليثي: الوالد كان مُتهم أنه يقوم بالتجسس على الشخصيات العامة فى الدولة والوزراء وكبارالمسئولين وإمداد الرئاسة يوميا بتلك التسجيلات للاستماع إليها هل هذا صحيح .. أم غير صحيح؟
د/هانى صلاح نصر: هذا غير صحيح يا فندم
عمروالليثى: إيه بقى الصحيح؟
د/هانى صلاح نصر: صحيح إن الرئيس الراحل جمال عبد الناصركان عنده جهازمراقبة تليفونات فى بيته واخد بال حضرتك لانه بعد 62 كان متشكك ومرتاب فى كل من حواليه كان عنده جهازمراقبة بيديره السيد سامى شرف هو عبارة عن جهاز للمعلومات فى بيته والوالد حد قال إنه كان عنده جهازبدائى فى بيته كان مجرد إنك بتحط ال3 حروف اليمين بعد ما تطلب النمرة يبتدى يراقب على طول فكان بيراقب الأوضة لأنه خايف أومتوجس منهم واحد بيحمى نفسه .. الرئيس بيحمي نفسه .. وحتى مرة من المرات المراقبات اللى تمت فى هذه الفترة الوالد كان بيزورالرئيس الراحل فقال له خد يا صلاح شوف ده .. مش شغلكم .. كان تسجيل لشخصية مهمة يعنى شخصية نسائية مهمة زوجة حد مهم الرئيس عبد الناصر كان مسجلها .. قال طب احنا مالنا ومال الكلام ده .. احنا شغلنا شغل المخابرات الكلام ده كان بيتم في مكتب السيد سامى شرف المخابرات العامة لم يكن لها أى صلة بالتسجيلات إلا من خلال قضايا التجسس يعنى بيراقب حد بطريقة أو بأخرى .. الحد ده بيكون التجسس ..
عمروالليثى: يعنى ما كانوش بيراقبوا يا فندم فنانات ولا حاجة؟
د/هانى صلاح نصر:لأ فنانات إيه .. فيه فرق إن نخش فى فنانات ده قصة تانية
عمروالليثى: ما احنا هانخشلها بس أنا باخد لها المدخل بتاعها
د/هانى صلاح نصر:على آه ممكن يراقب فنانة وهي الفنانة دى شغالة فى المخابرات بس .. ولكن هيراقب فنانات عمال على بطال
عمروالليثى: هو كان فيه فنانات بيشتغلوا فى المخابرات؟
د/هانى صلاح نصر: عدد قليل
عمروالليثى: زى مين؟
د/هانى صلاح نصر: أعتقد مفيش داعى يا افندم لأسامى أنا نفسى ما كنتش أعرفهم أساسا
عمروالليثى: دول كانوا ضباط فى المخابرات؟
د/هانى صلاح نصر: مجندين آه...
عمروالليثى: مجندين؟ .. كيف تم تجنيدهم؟
د/هانى صلاح نصر: بتيجي هاتقولها انتى هتشتغلى فى المخابرات بطريقة أو بأخرى بتوافق وبتمضى على إقرار إنها بتشتغل فى المخابرات وبتاخد ماهية ولها فايل ولها ملف والعملية اللى بتقوم بها بتاخد مقابلها مكافأة وبعض من الستات دول قاموا بأعمال جليلة كان لا يمكن للرجال إنهم يقوموا بها..
عمروالليثى: وإيه رأيك فى اللى بيتقال إن الوالد كان بيعمل على الواحدة حاجة إسمها عمليات الكونترول إنه كان يورط الفنانات أولا فى علاقات مع بعض الشباب ويتم تصويرهم بكاميرات سنيمائية ثم يتم مواجهتهم بهذه الشرائط ويقال لهم تشتغلوا معانا واللا هانذيع الأفلام دية.؟
د/ هانى صلاح نصر: لا الكلام ده مش مظبوط .. حضرتك الكونترول ده كان ب .... على فكرة كان هناك برضه .. نرجع ونقول إن هما قليلين جدا اللى اشتغلوا .. لكن كان فيه ستات كتيراللى كانوا بيشتغلوا فى المخابرات ييجى 100 واحدة كانوا بيشتغلوا فى المخابرات في الفترة ده..
عمروالليثى: 100 واحدة؟
د/هانى صلاح نصر: 100 واحدة تقريبا الفنانات يمكن ما يزيدوش عن 3 أو 4 فنانات
عمروالليثى: كانوا مشهورين يا فندم ساعتها؟
د/هانى صلاح نصر: آه كانوا مشهورين
عمروالليثى: معروفين؟
د/ هانى صلاح نصر: آه وحضرتك القواضي اللى كانوا بيشتغل فيها السيدات كانت بتتم لما يكون فيه حاجة ماسة ليهم مش كل قواضي المخابرات بيشغلوا فيها ستات .. ومش معنى ست برضه إنها بتشتغل فى المخابرات إنها تكون علاقة مش مضبوطة أوعلاقة سريرأو بأخرى .. ممكن تكون نتيجة علاقات عامة ، واحدة تلاقيها سيدة مجتمع فبتجيب معلومات بطريقة أو بأخرى الست اللى انت بتقول عليها حضرتك إنها بيكونترول عليها اللى .. إنها واحدة مثلاً بتوقع عميل ما هى دى مجندة بتقول معلومات ممكن تبيع يعنى طبعا معلومات مخابراتية فلازم يكون عليها كونترول وأغلبيتهم كان بعلمهم
فاصل موسيقي وعرض صور لأجهزة المراقبة والتسجيلات
عمروالليثى: وهل كان السيد صلاح نصر يوافق على استخدام الجنس فى الحصول على معلومات؟
د/هانى صلاح نصر: هو الحقيقة اللى اقترح الحكاية ده علشان نقول الحق برضه .. اللي اقترح الموضوع ده كان الرئيس الراحل عبد الناصر في أوائل .. ويمكن المعلومة دى أول مرة أقولها والوالد كان معارض فى الأول تشغيل الستات .. انت عارف المجتمع المصرى بيرفض هذه الفكرة لكن بعد ما قعد واقتنع إن أجهزة مخابرات العالم وفي كل حتة بيشغلوا بالذات إسرائيل الجزئية ده فيها عالية جدا فابتدا يستخدمها في إطار محدود مع كونترول عليهم بطريقة معينة
م/ حلمى السعيد: لا ما حصلش كده صلاح نصر راح ألمانيا ده هو اللى راح ألمانيا .. لقى الألمان بيستخدموا الستات فنزل رجع استخدم .. جاب الستات .. وهو عبد الناصر هايتدخل ليه يستخدموا ستات واللا يستخدموا رجالة ما كانش عبد الناصر بيتدخل بالشكل ده..
عمرو الليثي: اسمح لى أن آخد كلمة انحراف .. انحراف .. عندما .. وده اللى قيل يعنى إن الوالد استغل سلطته كرئيس للمخابرات وانحرف بهذه السلطة فأقام علاقات مع بعض السيدات هؤلاء وضغط على بعض الفنانات لإقامة علاقات معهم من أجل اللذة الشخصية أولاً وأيضا تم استغلال هذا الموضوع فى علاقات شخصية ليس لها علاقة بالعمل العام أو عمل المخابراتي وهاديك نموذج إذا عايزأديك إسم السيدة إعتماد خورشيد وهذا ما قالته اعتماد خورشيد نصاً فى العديد من الحوارات التليفزيونية وفى مذكراتها تعقيبك إيه؟
د/ هانى صلاح نصر: أنا هرد عليك فى النقطة دى أولا بالنسبة لتشغيل السيدات .. أرد لك على اعتماد خورشيد ولا على السيدات عموما..؟
عمروالليثى: رد لى على ده وعلى ده.
د/ هانى صلاح نصر: السيدات عموما انهارده المخابرات كانت لا تجبر سيدة على العمل بالجهاز وانهاردة حضرتك بتقول إنه بيتضغط عليهم بالعكس الناس كانت بتتطوع إنها بالنسبة تشتغل فى جهازأمنى زى ده كان بيديهم امتيازات .. إنها ..
عمروالليثى: زى إيه امتيازات؟
د/ هانى صلاح نصر: بتاخد فلوس وبتاخد علاقات
عمروالليثى: بتاخد كام يعنى؟
د/ هانى صلاح نصر: لا ماليش أن أنا أعرف
عمروالليثى: يعني إيه خايفة إن أنا مثلاً ممكن تروح إيه اللى يخلى فنانة تروح تاخد مرتب عشان خاطر هى عارفة إنها هتمارس الجنس مع شخصية عشان تجيب منه معلومات وهى أولريدى فنانة بتكسب كويس؟
د/هانى صلاح نصر: حضرتك مش عاوزين نتكلم فى المواضيع دية
عمروالليثى: لأ.. أنا لازم .. معلش أصل حضرتك قلت لى فنانات وشخصيات عامة.
د/ هانى صلاح نصر: آه
عمروالليثى: يعنى انت اخترت لى نوعيات أو فئات من المجتمع المصرى مش محتاجين الشخصية العامة دى محتاجة فلوس فى إيه دى واحدة عندها فلوس إيه اللى هايخليها إن هى وهى سيدة وزوجة وسمعنا موضوعات زى كده تروح إنها تعمل؟
د/ هانى صلاح نصر: مفيش زوجة يا فندم
عمروالليثى: بياخدوهم آنسات يا فندم كانوا
د/ هانى صلاح نصر: لأ .. مفيش زوجة يعني.. مفيش واحدة زوجة
عمروالليثى: يعنى كانوا بيشترطوا للعمل هايكونوا آنسات؟
د/ هانى صلاح نصر: لا .. هو لازم يكونوا يا آنسات يا متزوجات ..؟
عمروالليثى: مطلقات يعنى؟
د/ هانى صلاح نصر: على بعضه مش هنخش فى ..
عمرو الليثى: أنا بقول إيه اللى يخلى شخصيات عامة مش محتاجة فقيرة مثلا ده حتى الفقراء شرفاء وإيه اللى يخلى فنانة محترمة أو فنانة مش محتاجة على الأقل وما فيه برضه منهم فيه الصالح وفيه الطالح إنها تروح تاخد مرتب ما أعتقدش إنه هيوازى اللى بتاخده فى الأفلام فى سبيل إنها تشتغل فى المخابرات وهى عارفة هتعمل إيه كويس قوى..
د/هانى صلاح نصر: هو برضه عايز أقولك حاجة
عمرو الليثى: ومش عايز تقول لى إن مفيش ضغوط وفيه كونترول ومفيش سيطرة.
د/هانى صلاح نصر: آه .. دا مؤكد .. هو حضرتك انهارده
عمروالليثى : دكتورهانى مفيش فنانة كبيرة هربت من المخابرات العامة لما حست إن هى سوف يمارس عليها ضغوط وسابت البلد وخرجت بره مصر ومش هقول إسمها.
د/ هانى صلاح نصر: الكلام ده إتكتب فى الجرايد يعنى كل اللى حضرتك بتقوله كلام جرايد
عمروالليثى: وذكر فى قضية فى تحقيقات النيابة وقضية انحراف المخابرات.
د/ هانى صلاح نصر: زى مين .. ؟
عمروالليثى: مش هقول إسمها
د/ هانى صلاح نصر: لا معلش الكلام ده اتقال في السبعينات يا افندم .. الكلام اللي انت بتقوله دوت اتقال فى الجرايد فى حملة للتشهيروأنا عارف إنها فنانة كبيرة الفنانة ابتعت لها لما الوالد إترفع عليه قضية إزاى إنها تقول حاجة زى كده الست أنكرت إنها قالت حاجة زى كده فكان أى واحد يكتب النهاردة تقول إيه ده فلانة قالت وفلانة عادت هاتوا الست دى عايز
عمروالليثى: بعد ده كله يا فندم مش عايز يتفضح وبعدين حتى اللى ما اشتكوش ما اشتكوش عشان الفضيحة لان على الأقل الأول الملفات كانت فى المخابرات لكن لما هاتخش فى التحقيقات مين سيدة تروح تقول أنا كنت بعمل كده هيسيبوا
د/هانى صلاح نصر: وهى لو كانت خايفة من الفضيحة لو كان الكلام صحيح هتطلع فى الجرايد تقول أنا كان فلان
عمروالليثى: خلاص ما هو مشى.
د/هانى صلاح نصر: لا طب ما تيجى تقول الكلام ده وتقول هى جت اشتغلت فى المخابرات إزاى .
عمروالليثى: ما أنا عرفت بعد ما خرج من السلطة وبعد ما اترفع عليه قضية
د/هانى صلاح نصر: بص حضرتك الحاجات دى كلها الكلام ده ما حصلش
عمروالليثى: على فكرة أنا مش عايزأجيب حد بس أنا بنقل لك اللى أنا بحكيه لسيادتك ده هذاهوالانطباع العام السائد لدى الكثيرين عن السيد صلاح نصر كرئيسا للمخابرات فى تلك الفترة.
د/هانى صلاح نصر: مين اللى قال الكلام ده كان بعيد عن قضية انحراف المخابرات وهحكي لك ولا حد من المخابرات اللى انت بتتكلم عليها دى حد قال عليها حاجة ما هم كان ممكن يقولوا أقوالهم لوكانوا هم عايزين
عمروالليثى: هم هيقولوا إيه يا دكتورهانى فيه ست محترمة إضغط عليها عشان تمارس الجنس مع شخصية عربية أو شخصية أجنبية عشان تاخد منه معلومات هتروح تحكى تقول أنا إضغط على؟
د/هانى صلاح نصر: آه تقول ما تقولش ليه
عمروالليثى: يعنى إزاى تقول إزاى مش دى زوجة وأم وعندهم أولاد واحدة منهم كانت زوجة يا دكتورهانى وكانت فنانة معروفة وكانت زوجة وبرضه مش هقول إسمها وربنا يرحمها ؟
د/هانى صلاح نصر:حضرتك قضية المخابرات مفيش فيها غير ست واحدة بس كل الأسامى اللى حضرتك بتقول عليهم مشهورين ومش مشهورين محدش رفع قضايا على الوالد ولا شهد عليه ولا قال كلام فى الجرايد
عمروالليثى:أناعلى فكرة اللى أنا بقوله لسيادتك ده من خلال ملفات قضية انحراف جهاز المخابرات اللى أنا بقوله ده مش بقوله من دماغى وعندى نسخة كاملة أديها لك وموجودة.
د/هانى صلاح نصر:يا ريت والله لو فيه قضية حضرتك اللى انت بتتكلم عليه ده الملف اللى هو بتاع النيابة مش القضية نفسها كمان ادعاءات النيابة يا فندم لكن القضية ، دى فيها ادعاءات لها ردود أى حد شاف الردود دى ولا محدش شاف الردود دى
عمروالليثى: احنا العبرة فى النهاية للحكم .
د/هانى صلاح نصر:الحكم منين يا فندم؟
عمروالليثى: من المحكمة
د/هانى صلاح نصر: إسمها إيه ؟
عمروالليثى: من المحكمة
د/هانى صلاح نصر: إسمها إيه المحكمة دى؟
عمروالليثى: محكمة الثورة
د/هانى صلاح نصر: مين رئيسها؟
عمروالليثى: رئيسها موثوق فيه يا فندم؟
د/هانى صلاح نصر: حضرتك دى تصفية حسابات سياسية وده مش قاضى ودى محكمة استثنائية
عمروالليثى: يا سلام ما هى محكمة الثورة دى قامت من 54 حاكمت الإخوان ما بقيتش شرعية غيرلما بس حاكمت صلاح نصر.
د/هانى صلاح نصر:انا مش مسئول عن مين اللى عمل محكمة الثورة ولا الرئيس عبد الناصراللى كان عاملها أنا بتكلم فى الجزئية اللى تخصنى فقط لا غير, لكن النهاردة دى مش محكمة وده مش قاضى
م/ حلمى السعيد: في محمد نسيم قدم تقرير قال إن المخابرات العامة فيها انحرافات نسائية ومالية فحرصا من جمال عبد الناصرأويعنى فى رأيى إن هو حرصا من جمال عبد الناصر على صلاح نصر قال إن اللى يحقق معاه هو حلمى السعيد فرحت أحقق معاه رحت المخابرات فما حققتش مع صلاح نصر فى الأول أول ما شفت لا ما شفتوش خالص أنا لما رحت رحنا خدنا أوضة فى المخابرات وبدأنا نتكلم على إيه هى الانحرافات إيه كلمة انحرافات دى قالوا انحرافات ستات طب هاتوا الستات فجبنا الستات يعنى فلانة وعلانة وكده يعنى كمية ستات أهم واحدة اعتماد خورشيد.. اعتماد خورشيد كانت بتكتب شكاوى فجاءت اعتماد خورشيد وقالت كلام كتير وقالت على أسماء الناس والبنات فالبنات اللى قالت عليهم واللى قال عليهم محمد نسيم واللى لقينا لهم تسجيلات فى المخابرات جبتهم وحتى حققت معاهم إيه اللى حصل ففيه ستات منهم أو سيدات منهم ما قالوش حاجة فيه منهم كلفوا من المخابرات بعمل حاجات معينة وفيه منهم جابوا قضايا
موسيقى وعرض لأجهزة الرقابة والتسجيل
عمروالليثى: ما حقيقة أن السيد صلاح نصر كان ينفق أموالا كثيرة تحت مسمى الأموال السرية أو الباب السرى الذى كان موجود لدى المخابرات العامة؟
د/هانى صلاح نصر: المصاريف السرية دى كان لها دفاتر خاصة ومثبتة وكان بيمضى عليها مديرمالى ومديرإدارى وفي إمضاءات معتمدة بتطلع بشيكات وبتخش فى ميزانية الدولة
عمروالليثى: آه بس مش عارفين الفلوس رايحة لمين ؟
د/هانى صلاح نصر: لا ما يعرفوش لان ده شغل المخابرات فما يعرفوش طبعا
عمروالليثى: هل والدك كان ميسور الحال؟
د/هانى صلاح نصر: الحمد لله
عمروالليثى: يعنى هل مرتبه فى المخابرات كان معيشه؟
د/هانى صلاح نصر: المرتب أعتقد فى الستينات كان المعاش معرفش ساعتها المرتب كان كام ..؟
عمروالليثى: ثروته بعد وفاته كانت كام يا دكتورهانى فى إقرارالذمة المالية بتاعه؟
د/هانى صلاح نصر: ماعندوش أى حاجة غيرالبيت بتاعه اللى كان ساكن فيه
عمروالليثى: بس؟
د/هانى صلاح نصر: آه أنا والدتى كانت ميسورة الحال
عمروالليثى:هل كان يسهل للمشيرعامرالحصول على بعض هذه الأموال السرية من ضمن المصروفات السرية؟
د/هانى صلاح نصر: لا
عمروالليثى: تردد هذا الكلام؟
د/هانى صلاح نصر: آه بس الكلام دا كله مش مظبوط
عرص صور ل "صلاح نصر"
تقرير
كاميليا السادات الابنة الصغرى للرئيس الراحل محمد أنور السادات من زوجته الأولى إحسان إقبال .. خرجت للحياة قبل اثنى عشر يوما فقط من طلاق أبيها لوالدتها وبالرغم من ذلك تعد أشهر المدافعين عن كل ما يتعلق بأبيها تزوجت كاميليا فى سن مبكرة جدا وكان الزعيم الراحل جمال عبد الناصر هو أحد شهود هذا الزواج الذى عانت خلاله الكثير وأثمر عن ابنتها الوحيدة إقبال التى تعيش حاليا فى الولايات المتحدة ، كاميليا نفسها أمضت فترة طويلة من حياتها فى الولايات المتحدة عانت خلالها الكثير وواجهت العديد من الأزمات قبل أن تستقر أخيراً في مصر .. وقامت بتأليف كتاب عن حياتها أثارضدها ردود فعل متباينة .. كاميليا السادات هي الأخت الصغرى للسيدة رقية السادات والتي تعتبر شخصية مثيرة للجدل خاصة إذا كان الأمر يتعلق بشكل أو بآخر بحياة والدها .. تصدت رقية السادات لمحاولات التطاول على سيرة الزعيم الراحل محمد أنور السادات .. ورفعت في سبيل ذلك العديد من القضايا .. ودخلت في نزاع قضائي مع هدى ابنة الزعيم الراحل جمال عبد الناصر، كما طالبت بمنع عرض الفيلم الإيرانى "إعدام فرعون" باعتباره فيلما يُسيئ لوالدها بالرغم من أن الفيلم لم يحصل على ترخيص للعرض فى مصر.
عمروالليثى: حدثينى عن العائلة التى نشأ من خلالها الرئيس الراحل أنور السادات؟
السيدة/ رقية السادات:والله هقول لحضرتك حاجة هى عائلة متماسكة جدا لإن ببطبيعة النشأة فى الفلاحين وفى بلاد القرى يعنى بتبقى نشأة متماسكة جدا يعنى كانت بداية من عائلة جدى الله يرحمه ووالدته ودى اللى نشأ فيها بابا وهو صغير بعد كده لما دخل الكلية الحربية وتخرج من الكلية الحربية واتجوز ماما عشنا فى بيت واحد فى كوبرى القبة.
عمرو الليثى: انتى إمتى ابتديتى تحسى إن باباكى منفصل عن والدتك الله يرحمها؟
د/ كاميليا السادات: عمرى ما حسيت بالحكاية دى إلا لما بابا قرر إن هو ياخدنا فى حضانته سنة 58 إن احنا نروح نعيش فى البيت بتاعه وإن مفيش ماما
موسيقى وعرض صور لعائلة الرئيس السادات
عمروالليثى: كيف كانت علاقتك بالسيدة جيهان والمعروف أن فى تلك الحالات دائما شعور الإبن أو الإبنة تجاه الزوجة الثانية يكون يتسم نوعا ما بالكراهية أو النفورأو عدم الاكتراث؟
السيدة/ رقية السادات: لا أنا بالنسبة لى دى ما حسيتش بها خالص ليه هقول لحضرتك لإن أصل كم الحب والحنان اللى كان بابا بيدهونى طول العمر وغذانى به كويس قوى وأنا صغيرة وبعدين أنا بحبه قوى قوى قوى فأى شئ بابا يحبه أى حد بابا يحبه لازم أنا أحبه مش خوف من بابا لا هو خوف إن هو يزعل يعنى بخاف إن هو يزعل بخاف عليه إنه يزعل فحبا فيه كل اللى بابا يحبه لازم أنا أحبه ثم أنا مفيش أى خلافات بينى وبين طنط جيهان من وأنا صغيرة بالعكس ده أنا لما جيت أتجوز طنط جيهان كانت بتشارك معايا فى الجهاز بتاعى وشاركت فى الجهاز بتاع راوية وكاميليا إخواتى.
عمروالليثى: انتى ليه كنتى زعلانة من مدام جيهان فى الفترة اللى انتى كنتى قاعدة عندها فيها؟
د/ كاميليا السادات: لا أنا عمرى ما زعلت من طنط جيهان وأنا قاعدة عندها فى البيت لإن طنط جيهان أولا وللحق يقال سيدة فى منتهى الدفئ اللى فى الدنيا أنا عمرى ما زعلت من طنط جيهان فى حياتى يعنى زعل زعل من طنط جيهان إطلاقاً.
عمرو الليثى: طب هى زعلت منك ليه؟
د / كاميليا السادات: بص بقى هى زعلت منى بسبب الكتاب ده أبى وأنا اللى أنا عملته وأنا فى أمريكا اتكتب خبر بطريقة استفزازية فى جريدة الأهالى مش فاكرة كان إيه فهى إن أنا بعمل كتاب عن بابا فهى عملت اجتماع للعيلة كلها أعمامى واخواتى وكل أفراد العيلة وقالت لهم لا أنا ولا ولادى هنعرفها لإنها بتكتب كتاب تشوه سمعة أبوها.
عمروالليثى: هل انتقدتى بابا فى الكتاب أو انتقدتى مدام جيهان فى الكتاب ؟
د/ كاميليا السادات: لا إطلاقا أنا ذكرت الحقيقة والحقيقة بتزعل.
عمروالليثى: إيه بقى الحقيقة اللى انتى قلتيها؟
د / كاميليا السادات: بص هقول لك على حاجة يا عمرو إذا ما كنتش انت عايش فى سلام مع نفسك أنا تصالحت مع الماضى وكان أهم ما فيه اللى هو زواجى وأنا سنى 12 سنة.
عمروالليثى: هنتكلم فى موضوع جوازك دلوقتى انتى اتجوزتى 12 سنة ؟
د/ كاميليا السادات: 12 سنة ولما يحبوا يجوزوا واحدة 12 سنة يقولوا للمأذون شهادة الميلاد مش موجودة فالمأذون بيسأل بابا بيقول له شهادة الميلاد فين قاله مش موجودة قال له طب فين الشهود بتوعنا يا ريس دى فيها قصة جميلة جدا راح عمى جمال رادد قال له جرى إيه يا أنورهو فيه اثنين رؤساء فى البلد و أنا مش دارى وللا إيه كان رئيس مجلس الشعب فقال له الشهود بتوعنا الرئيس جمال عبد الناصر والمشير عبد الحكيم عامر.
عمروالليثى: الرئيس جمال عبد الناصر والمشيرعبد الحكيم عامر هم الشهود على عقد جوازك.
د/ كاميليا السادات: إداهم يمضوا من غيرما يسننونى
عمروالليثى: مضى إن انتى عندك كام سنة؟
د/ كاميليا السادات: مضى على إنى 16
عمروالليثى: وتم تسنينك وتم جوازك ، يعنى هو كان موافق إنك تتجوزى وانتى عندك 15 سنة؟
السيدة/ رقية السادات: آه طبعا كان فرحان جدا
عمروالليثى:طب عمك جمال عبد الناصر اللى شهد على العقد ما قالوش يا أنور صغيرة؟
السيدة/ رقية السادات: لا أصل بابا كان فرحان جدا لإنه عايز بقى بنته تتجوز وتخلف وعايز أحفاد وتبقى مستقلة.
عمروالليثى: نموذج للفلاح.
السيدة/ رقية السادات: نموذج للفلاح وبعدين هقول لحضرتك حاجة طب ما هى نانا أختى وبابا رئيس جمهورية اتجوزت وهى عندها 15 سنة برضه ..
عمروالليثى: سننوها برضه
السيدة/ رقية السادات: أمال نانا اختي جيهان الصغيرة
موسيقى وعرض صور للرئيس عبد الناصر
عمروالليثى: طب ماما كان رأيها إيه لما عرفت إن بنتها هتتجوز 12 سنة؟
د/ كاميليا السادات: ماما لم تعلم شئ عن الموضوع إلا من الجورنال لما لقت صورتنا فى ظهر كانت فى ظهر الأهرام أنا فاكرة كويس كانت صورة فى ظهر الأهرام فى الحتة بتاعت الاجتماعية دى زواج بنات السادات فده لما ماما عرفت
عمروالليثى: ما حضرتش فرحك؟
د/ كاميليا السادات: لا ...
عمرو الليثى: طب وانتى ما كانش نفسك أمك تيجى تحضر فرحك؟
د/ كاميليا السادات: أنا ولا كنت أعرف حاجة أنا كل اللى أعرفه.........
عمروالليثى: ما انتى طفلة صغيرة 12 سنة .
د/ كاميليا السادات: احنا بنروح للترزى عشان بنعمل فساتين الفرح احنا بنجيب الطرحة وبنقيس يعنى أنا مشغولة تماما يعنى كطفلة زى ما بقول لك كلها طاقة وحاجات كده وعمالة أتفرج على الحاجات.
عمرو الليثى: شفتى العريس طيب ؟
د/ كاميليا السادات: شفت العريس لما جاء يلبسنى
عمرو الليثى: الشبكة؟
د/ كاميليا السادات: الشبكة
عمروالليثى: كان بيعاملك كويس؟
د/ كاميليا السادات: لا هقول لحضرتك على حاجة بالاختصار الشديد ما خلاش إساءة معاملة فى الجسد أو الكلام أو العواطف أو المشاعر يعنى كان حاجة صعبة جداً .. فأنا قلت لبابا أنا عايزة أروح أقعد عند ماما خدت بنتى ورحنا قعدنا عند ماما كان بييجى كل 26 يوم 4 أيام كالعادة واكل عند والدته كالمعتاد والدتى رحمة الله عليها تخلى اللى بيشتغلوا فى البيت هم اللى يقدموا الأكل لجوز بنتها لا دى هى غرفت بنفسها الأكل وحطت فى الصينية ودخلت قدمتها له على الترابيزة راح شايل الترابيزة بدون مبالغة وحادفها فى السقف الملوخية قعدت فى السقف ماما ما بيضتش الأوضة دى لمدة سنتين تقول ذكرى من عزالدين وإيه الزفت اللى جايباه أنا أوضتى كان فيه باب أوضة بيفتح على أوضة النوم وماما كانت بتصلى قلت له بتقول إيه الزفت ده قال لى وكمان بتردى على وابتدى فى علقة وكان فيها نفس السب اللى هو مش بس لشخصى وللأم وللأب وللدين.
عمروالليثى: حصل الانفصال إزاى بقى؟
د/ كاميليا السادات: رحت لبابا عمى طلعت طبعا حكى له قال له ده جنان رسمى رحت لبابا قلت له هتطلق يعنى هتطلق
عمروالليثى: حصل إيه بقى يعنى بابا عمل إيه عشان ينهى الأزمة اللي بينك وبين جوزك؟
د/ كاميليا السادات: ولا أى حاجة كلموه فى التليفون وقالوا له سيادة الريس قرر الطلاق كان بابا وقتها كان نقل من نائب إلى رئيس جمهورية فقالوا له سيادة الريس بيقول لك هيتم الطلاق.
عمروالليثى: هل انتى اتطلقتى بقرار جمهوري؟
د/ كاميليا السادات: لا مش قرار جمهوري قرار أب..
موسيقى وعرض صور للسادات وكريمته كاميليا
عمروالليثى: يعنى كانت علاقة عبد الناصر.......
السيدة/ رقية السادات: كانت علاقة قوية جدا لإن الرئيس جمال عبد الناصر الله يرحمه كان ساكن معانا فى كوبرى القبة.
عمروالليثى: تفتكرى العلاقة القوية الإنسانية هى اللى جعلت عبد الناصر يأتى بالسادات نائب لرئيس الجمهورية؟
السيدة/ رقية السادات: ده أكيد لإن هو عارف إن ما لوش مطمع.
عمروالليثى: ما هو ردك على الاتهام الذى وجهته الدكتورة هدى جمال عبد الناصر إلى الرئيس الراحل أنورالسادات أنه قام بقتل والدها ووضع السم له أثناء فترة إقامتهما فى فندق هيلتون القاهرة أثناء فترة انعقاد مؤتمر القمة العربية ؟
السيدة/ رقية السادات: وده معلن والله تفتكر حضرتك أنا هرد عليها طب أنا أقول إيه طبعا هى جانبها سوء الحظ كثير قوى إنها تقول الكلام ده الحقيقة هرد عليها عشان أقولها إيه..؟
عمروالليثى: لكنك تنفى هذا الاتهام رفضا مطلقا؟
السيدة/ رقية السادات: ما دليلها فين دليلها إن أنور السادات قتل أبوها يعنى أمال أنا أقول إيه اللى أنور السادات اتقتل أمام شاشات العالم كله
موسيقى وعرض صور للرئيس السادات
عمروالليثى: إتجوزتى إزاى المرة الثانية؟
د/ كاميليا السادات: المرة التانية كانت .. كنا بنروح بيت بابا يوسف الله يرحمه يوسف وهبى الممثل ده لما اتعرفت عليه أنا بالنسبة لى ولا فكرت فيه على الإطلاق هو معجب ومبين إعجابه بإيه بإن كل يومين يجينى سبت ورد "صباح الخير"
عمروالليثى: هو كانت جنسيته إيه؟
د/ كاميليا السادات: هو كان أساسه من اليمن بس عايشين .....
عمروالليثى: فى سوريا؟
د/ كاميليا السادات: فى سوريا عيلته كلها كانت عايشة هنا للأسف الشديد إن بعد سنتين يعنى اكتشفت إنه هو ما كانش متجوزكاميليا ده كان متجوزأنورالسادات فبابا عرف إن هو بيستغل إسمه
عمروالليثى: هوفعلا كان بيستغل إسمه؟
د/ كاميليا السادات: هو كان بيستغل إسمه دى أنا ما أعرفش كان بيستعمل إسم بابا فى إيه
عمروالليثى: أمال الرئيس السادات عرف إزاى إن هو بيستغل فى إسمه؟
د/ كاميليا السادات:وصل له أخبار من ناس وجاء له كلام من ناس فلاقيت عمو فوزى بيكلمنى بيقول لى بابا
عمروالليثى:فوزى عبد الحافظ؟
د/ كاميليا السادات: آه فوزى عبد الحافظ رحمة الله عليه فقال لى بابا بيقول لك لو عايزة تقعدى معاه خديه واطلعى من هنا.. فكلمت عمو فوزى قلت له إعملوا اللى انتوا عاوزين تعملوه
عمروالليثى: يعنى انتى قلتى للسيد فوزى عبد الحافظ خلاص طلقونى منه؟
د/ كاميليا السادات: إعملوا اللى انتوا عايزينه
عمروالليثى: عملوا إيه بقى هما ؟
د/ كاميليا السادات: إعملوا اللى إنتوا عايزينه نفس المنظر بالضبط بتاع المرة الأولانية لقيت المأذون داخل ومعاه الضابط.
عمروالليثى: ما اعترضش خالص طبعا هيعترض إزاى بنت الريس لو اعترض هيروح وراء الشمس.
د/ كاميليا السادات: هيعترض يقول إيه بس صفى شركته وباعها وصفى أمواله وساب.
عمروالليثى: بس إنتى كنتى بتحبيه ؟
د /كاميليا السادات: وساب مصر هقول لك على حاجة أنا ما أنكرش إن أنا حبيته
موسيقى وعرض صور للسادات وكريمته كاميليا
عمروالليثى: انتى مريتى بظروف صعبة أنا أحب أعرف حياتك مشيت إزاى بعد كده فى الولايات المتحدة الأمريكية طبعا انتى كنتى مشهورة جدا كنتى من أشهر الدكاترة اللى بيدوا محاضرات أعلم إن محاضراتك كانت باهضة التكاليف باتخدى بآلاف الدولارات بال20 وال 30 ألف دولار إيه اللى حصل بعد كده إيه التحول اللى حصل فى شخصيتك؟
د/ كاميليا السادات: عملت عملية جراحية فى المخ أنا مبسوطة إنك انت سألتنى السؤال ده عشان أقول لك عارف يا عمرو العملية الجراحية سببت لى عجز جزئى عارف انت عشان إيه كانت علشان الصرع العملية عملت لى عجز جزئى عن العمل.
عمروالليثى: كنتى بتصرفى إزاى وحياتك ماشية إزاى يعنى أنا عرفت إنك بعتى بيتك وحتى الحاجات بتاعتك اتحجز عليها بعد كده ؟
د/ كاميليا السادات: إتحجز عليها
عمروالليثى: إيه اللى حصل؟
د/ كاميليا السادات: لما ظروفى المالية بقت صعبة ما بدفعش إيجارى فطبعا كان لازم يبعتوا لى إنذار إن أنا لازم أسيب فأنا الدكاترة بتوعى كتبوا للتأمينات لهيئة التأمينات العامة إن أنا لا أصلح للعمل وإن أنا أستحق المعاش بتاع التأمينات الاجتماعية لإن أنا..
عمروالليثى: اللى هى الإعانة الشهرية؟
د/ كاميليا السادات: آه .. فجالى الجواب وجاء لى الكارت بتاع الإعانة وجاءنى كارت من الصحة عشان خاطر أكمل لكن الدكتور بتاعى اقترح وقال لى ليه ما تروحيش البيوت بتاعت الحكومة فيه بيوت بتبقى نظيفة جدا وكويسة جداً
عمروالليثى: هل فعلا تعرضتى لمحاولة اغتصاب حاول حد إنه يعتدى عليكى فى البيت الخاص بالجمعيات دى؟
د/ كاميليا السادات: هو كان راجل طليانى وراجل عجوز وعنده حالة نفسية كده فتح على باب الأوضة يعنى أنا كنت طلعت اعمل قهوة فتح على باب الأوضة واتهجم على بطريقة يعنى أنا قعدت أصرخ فلما كلمت البوليس وهم اللى ماسكين المنازل بتاعة الحكومة دى ما يحبوش صوت يطلع من عندهم فبدأوا هم نفسهم يضطهدونى طلعت أعمل العملية تقريبا هربت من يعنى حتى عفش الأوضة بتاعتى اللى أنا كنت قاعدة فيها لسه موجود فى البيت ده
عمروالليثى: لغاية دلوقتى؟
د/ كاميليا السادات:لغاية دلوقتى وبعدين طبعا عفشى أنا بعت كل حاجة
عمروالليثى: عفشك ؟
د/ كاميليا السادات: عفشى ده له قصة الحق يقال أنا حطيتهم عند مخزن يعنى بعت لشركة خدوهم حطوهم فى مخزن المخزن ده ب 300 دولار فى الشهر طب أنا أدفعهم إزاى وأنا ما بعملش محاضرات ولا حاجات زى كده إتكومت المبالغ على إلى أن آن الوقت إنهم يعملوا مزاد ويبيعوا حاجتى فكلمتنى البنت قالت لى التايم بتاع الأوبشن جاء قلت لها جو أهيد بيعوا بصيت لقيتها بيكلمونى بعدها بيومين بتقول لى مواطنين إسرائيليين واخدين الجنسية الأمريكية لما بلغناهم إن احنا الشاحنة دى اللى عندنا اللى فيها حاجتك هنبتدى مزاد قالوا باسم مين قلنا إبنة الرئيس السادات قالوا احنا ما نبيعش ذكريات الرئيس السادات ولسة محافظين لى على العفش لحد دلوقتى
صور للرئيسين عبد الناصر والسادات مع بعض الرؤساء العرب
عمروالليثى: هل كان فيه حاجات من عندك فى أمريكا من مقتنيات السادات راحت منك؟
د/ كاميليا السادات: لا الساعة بتاعة بابا أنا كنت بعتها علشان خاطر أعمل العملية
عمروالليثى: بعتى الساعة بتاعة بابا؟
د/ كاميليا السادات: ايوه يا بابا
عمروالليثى: بعتيها؟
د/ كاميليا السادات: لأ .. بعتها ورجعت لى
عمروالليثى: والساعة معاكى؟
د / كاميليا السادات:لا ضاعت منى
عمرو الليثى: وللا إتسرقت؟
د/ كاميليا السادات: إتسرقت زى ما تقول
عمروالليثى: ومين اللى سرقها؟
د/ كاميليا السادات: لا بص دى حاجة استحالة إن أنا أقولها لإنها واحدة من كبار نساء العالم العربى
عمرو الليثى: سرقتها؟
د/ كاميليا السادات: آه بس رجعت لى .. رجعت لي تاني
عمروالليثى: فين معاشك بقى انتى واخواتك من أظن لكم معاش؟
د/ كاميليا السادات: لنا معاش من الدولة
عمروالليثى: كام المعاش بتاعك؟
د/ كاميليا السادات: 415 جنيه وكانوا ربنا يخليهم اخواتى إنهم واخدين بالهم منى
عرض صور عسكرية ومدنية وخطب وزيارات للرئيس عبد الناصر
عمرو الليثى: كيف أثرت النكسة على الحالة الصحية للرئيس عبد الناصر؟
السيدة/ منى عبد الناصر: أولا جاء له الالتهاب فى الأعصاب اللى هو دلوقتى بيسمى النيوروباسى ده بيجى من الانفعال الشديد جدا بيبقى وجع فى الرجلين رهيب وبيجى يا فى الرجلين يا فى الظهرهو جاء له بقى فى الرجلين والظهر كان فى الاثنين آلام لا تطاق بس كان مع ذلك بيشتغل.
عمرو الليثى: لما عملتى كسكرتيرة لرئيس الجمهورية هل شعرتى أن هناك ضغوط شديدة عليه هل كان يتحمل أكثر مما يحتمل الإنسان العادى خصوصا إن تلك الفترة كانت فترة عصيبة فى تاريخ مصر خارجين من هزيمة ونكسة والريس بيبنى الجيش من أول وجديد وإسرائيل تتحرش بينا وأمريكا تتحرش بينا
د/ هدى عبد الناصر: طبعا يعنى اللى أنا عايزة أقوله إن والدتى كانت بتشتكى إنه ما بيرتحش وكان دايما بيجهد نفسه ما كانش فبعد النكسة كان المجهود مضاعف وكان شغله لغاية الساعة 2 و3 الصبح ويصحى من الساعة 7 الصبح وكان بيتتبع طبعا كل شئون الجيش وشئون البلد ما تنساش إن شئون البلد كانت مهمة جدا يعنى تعبئة الشعب للمعركة دى كانت عايزة مجهود كبير جدا لإن الفترة طالت مش معركة كانت حالة كنا لازم ننتظر حتى إعادة تسليح الجيش فدى كلها كانت فترات حاسمة وكان العمل طبعا مضاعف بالنسبة له
عمرو الليثى: ألم يفكر الرئيس عبد الناصر أو لم يصارحك بأنه لديه الرغبة فى إن يتخلى رئاسة مصر؟
د/ هدى عبد الناصر: هو كان دايما يتكلم بعد ما أسيب الرياسة بيقول لوالدتى كان بعد إزالة أثار العدوان
عمرو الليثى: يعنى كان ناوى مثلا أو حد تاريخ معين يترك فيه رئاسة مصر؟
د/ هدى عبد الناصر: آه هو كان دايما بيقول أنا عايز أسيب الرياسة وأتفرغ للاتحاد الاشتراكى
عمرو الليثى: لكن لأسباب صحية ما فكرش؟
السيدة/ منى عبد الناصر: لا بالعكس بعد ما ابتدى يعيد
عمرو الليثى: حرب الاستنزاف؟
السيدة/ منى عبد الناصر: حرب الاستنزاف حس إن هو اللى هيفضل لغاية آخر نفس يجاهد لغاية لما يعبر لا خالص كانت أمنية حياته العبور
عمرو الليثى: فى يوم 11 سبتمبر عام 1969 أصيب عبد الناصر بأول أزمة قلبية قاتلة شخصها الدكتور الصاوى حبيب بأنها ذبحة قلبية حادة وفى اليوم السابق 10 سبتمبر كان الرئيس يشهد تدريبا عمليا على طريق السويس وبينما هو يشهد هذا التدريب بلغة أن الإسرائيليين قاموا بعملية إنزال عسكرى فى منطقة الزعفرانة الواقعة على خليج السويس وبدأت الأنباء الصادرة من تل أبيب وبعض العواصم الغربية تصورها على أنها محاولة لغزو مصروتضايق عبد الناصرضيقا شديدا بعد أن بلغه أمرالغارة الإسرائيلية وأمركبار قادة الجيش الذين كانوا معه بإلغاء التدريب ورفع حالة الاستعداد لدى القوات والإعداد للقيام بعملية دفاعية أوهجومية ثم عاد للقناة.
عمرو الليثى: تذكرى إيه أهم الأحداث التى أثرت صحيا على الرئيس عبد الناصر؟
السيدة / منى عبد الناصر: الشغل بقى اللى مالوش أول ولا آخر فجينا سنة 69 جاءت له أول ذبحة.
د/ هدى عبد الناصر: هوتعب قوى لما جاءت له الأزمة القلبية الأولى فى سبتمبر 69 وقتها طبعا لم يعلن إن جاءت له أزمة قلبية ولكن قالوا اعتكف
عمرو الليثى: دى كانت أول أزمة قلبية تجى له
د/ هدى عبد الناصر: دى كانت أول أزمة قلبية
عمرو الليثى: دى جاءت فجأة وللا كان لها سبب؟
د/ هدى عبد الناصر: لا فجأة بدون أى سبب
عمرو الليثى: يعنى هل كان هناك أخبار سيئة هل كان هناك ضغوط معينة؟
د/ هدى عبد الناصر: والدكتوراكتشفها لأنها جاءت بدون ألم
د/ الصاوى حبيب: واشتكى من إنه صحى المفروض احنا كنا هنسافر بعدها ب3أو4 أيام.
عمروالليثى: كنتم رايحين موسكو؟
د/ الصاوى حبيب: آه كنا رايحين موسكو طلبت منه طبعا إن احنا نعمل رسم قلب وفعل عملت رسم القلب.
عمروالليثى: وجبت جهاز رسم القلب منين يا فندم ؟
د/ الصاوى حبيب: نعم موجود الجهاز ده كان موجود عنده في الأوضة .. كان دايماً جهاز رسم القلب وفيه اسطوانة اكسجين .. كان كل الاجراءات معمولة وفي طبعاً الحال لما لقيت الرسم مخالف يعنى بيشيرلوجود جلطة فى الحال استدعيت الدكتور منصور فايق وطبعا برضه قلنا له التشخيص وطلبنا الدكتور.
عمروالليثى : سيادتك قلت له إنه عنده إيه ساعتها لما سألك قال لك أنا عندى إيه قلت له عنده إيه؟
صوت الدكتور/ الصاوى حبيب: عندك أنفلونزا شديدة جدا
عمرو الليثى: كانت حرب الاستنزاف على أشدها وزاد حجم العمل على عبد الناصر إلى 18 ساعة يوميا وطلب منه الأطباء عدم الإجهاد وأن معرفة أخبار الضحايا والشهداء قبل النوم يؤثر على صحته مباشرة وكان عبد الناصر يتلقى تقريرا يوميا من سامى شرف عن خسائر الجبهة كل ليلة وتدخل الدكتور صاوى حبيب لمنع ذلك الانتحار ولكن لم يستجب عبد الناصر لطلباتهم
السيدة / منى عبد الناصر: كنت قاعدة معاه فى الجنينة وقت بحر البقر دى من المرات اللى بكى والكلمة اللى قالها لى قال لى هم بيحاربوابالإنجليزية بالميراج بيحاربوا بالزراير واحنا حتى لسة مش عارفين ناخد الميج 21 وبكى
موسيقى وعرض صور لمخلفات الضرب الإسرائيلي للمدنيين
السيد/ سامى شرف: فى الفترة الأخيرة كان من وسط سبتمبر سنة 70 حصل ضغط كلنا بدون استثناء إنه ياخد يومين ثلاثة راحة فى مرسى مطروح قال اسكندرية قلنا اسكندرية قريبة وفيه عمل وبتاع وإيه يروح مرسى مطروح.
موسيقى وعرض صورة للرئيس عبد الناصر في مطروح
عمرو الليثى: كانت رحلة مرسى مطروح هى بداية النهاية فكان عبد الناصر قد قرر قضاء أجازته السنوية فى مرسى مطروح وقبل أن يسترخى على رمالها بساعات اندلع القتال فى الأردن وحاول مستشاروه إخفاء الحقيقة عنه ولكنه كان يتابع أخبار المأساة من إذاعات العالم.
السيد/ عبد الحكيم عبد الناصر: طلع رحلة مرسى مطروح رحلة استجمام لإنه كان بيمر بفترة إعادة القوات المسلحة ، حرب الاستنزاف فقالوا له إنه لازم ياخد أجازة فقال نروح مرسى مطروح وأنا الوحيد اللى طلعت معاه من ولاده طبعا فوجئت إنها مش رحلة استجمام لإنى فوجئت إن كان معاه الفريق أول الله يرحمه الفريق محمد فوزى وكان الله يرحمه السيد حسين الشافعى واحنا رايحين فى القطر لقينا فى القطر بقم يفتحوا خرائط وبيشوفوا يعنى شكلها برضه ما كانتش رحلة استجمام.
السيد/ سامى شرف: يعنى مش رايح أجازة لا رايح أجازة معاه الفريق فوزى عشان يشوف الخطة بتاعة تحريرالأرض.
السيد/ عبد الحكيم عبد الناصر: كانت أحداث أيلول*سبتمبر* اللى حدثت بين القيادة الأردنية وبين المقاومة الفلسطينية وكثرت المذابح وقطع الإجازة فورا ورجعنا على اسكندرية وابتدى يوضب لمؤتمر قمة.
لقطات لمؤتمرات وتوديع الرئيس عبد الناصر للقادة العرب
السيد/ سامى شرف: عمل ليل نهار من يوم 19 سبتمبر لغاية ليلة لغاية 27 سبتمبر عمل ليل نهار يعنى زائد مجهود بقى متراكم 18 سنة لا يتحمله جبال.
السيدة/ منى عبد الناصر: الوالد كان جاء يوم 27 قبل الوفاة بيوم من الهيلتون وبات هو قال أنا عايز آجى أبات هنا وبات فى البيت وبعدين صبح كان فيه بقى بيودع رئيس.
د/ هدى عبد الناصر: يوم الرحيل دخل علينا احنا كنا بنستناه على السفرة دايما فدخل علينا قال اتغدوا انتم أنا تعبان.
عمرو الليثى: كانت الساعة كام ..؟
د/ هدى عبدالناصر: كانت حوالى الساعة 4
عمرو الليثى: يعنى بعد ما وصل ....
د/ هدى عبد الناصر: بعد ما وصل أمير الكويت رجع وكان تعبان هو كان عادته بعد المؤتمرات دى يبقى تعبان فكان يخش ينام الظهر ينام بقى 3 ساعات حاجة كده فقال لا أنا مش هتغدى حتى أنا اتغديت وروحت بيتى
السيدة / منى عبد الناصر: دخل لاقيته داخل من برة قال أنا تعبان أنا مجهد وبعدين قال لى روحى هاتى لى حاجة حلوة فرحت جبت له شوكليت وزى كراميلا كده ودخلت له وقعد وبعدين قال لى أطلبى الدكتور الصاوى كلمت السكرتارية وجاء الدكتور الصاوى بقى على طول وكانت حوالى الساعة 3 يعنى ما كانش خد 10 دقائق
د/ الصاوى حبيب: طلعت فلاقيت السيدة تحية بجواره وقالت لى أنا شفته جاى تعبان فاديته كباية عصير برتقال دخلت بقى ممدد فى الفراش متنبه تماما لكن كان فيه عرق كان لافت للنظر فى الكشف الطبى إن أطرافه باردة وبرودة الأطراف دى بتيجى مع الصدمة القلبية كعلامة من علاماتها والنبض سريع جدا وفى نفس الوقت ضعيف جدا وفى الحال أدركت بقى خطورة الموقف وهرعت إلى التليفون واتصلت بالدكتور منصور والدكتور زكى الرملى.
عمرو الليثى: كنت مشخص الحالة؟
د/ الصاوى حبيب: آه أزمة قلبية تسببت عن جلطة فى الشريان التاجى سببت الصدمة القلبية
عرض صور للرئيس عبد الناصر
السيدة/ منى عبد الناصر: ما فهمتش كان ساعتها اللى كان فيه يعنى كنت شايفة كل حاجة أدامى اللى فهمت ماما إن هو فى خطر أنا ما فهمتش حاجة خالص أخش وأقعد بقوا يقولوا لى إطلعى وماما لقيت ماما طالعة تقول لى إقرئى قرآن هى كانت بتقرا قرآن على طول وأنا برضه ما فهمتش يعنى إيه اللى بيحصل ما فهمتش على الإطلاق
عرض صور للرئيس عبد الناصر
د/ الصاوى حبيب: واليوم قعد يعنى كان الدكتور منصور كان عاوز يروح الجبهة كلمه شوية فى الآخر قال أنا عاوز أسمع نشرة أخبار الخامسة على ما اعتقد وقام واعتدل في الفراش.
السيدة/ منى عبد الناصر: قعدت برضه على الكرسى فى أوضة النوم كانت الدكاترة كده وبعدين قالوا بقى كويس لاقيته بقى كان مستنى خبر مستنيه فى البى بى سى يعنى مش عارفة إيه اللى كان مستنيه كان بيجيب محطة البى بى سى هو دايما كان بيكلمنى بلغة المذكر يعنى ما يكلمنيش على إنى مؤنث أبدا الظاهر من كتر بقى ما كنت بتشاقى مع إخواتى فكلمنى وقال لى مونى وكده وبعدين قال لى اندهى لى الدكتور تانى.
د/ الصاوى حبيب: قلت له سيادتك مستريح قال لى استريحت يا صاوى وانتهى.
عمرو الليثى: وتوفى
د/ الصاوى حبيب: آه بصيت لاقيت وشه قعدنا نعمل له التنفس الصناعى.
عمرو الليثى: تدليك للقلب
د/ الصاوى حبيب: آه طبعا يعنى لمدة حوالى ثلث ساعة.
السيدة/ منى عبد الناصر: دخلت لاقيتهم بيعملوا له بقى اللى هو بيحاولوا إنهم
عمرو الليثى: تدليك للقلب
السيدة/ منى عبد الناصر: ماما عرفت إن هو اتوفى وقالت لى جمال راح وقعدت تعيط أنا برضه ساعتها عادى ما ماتش لم أتصور إنه مات
موسيقى حزينة مع عرض صور للرئيس عبد الناصر
عمرو الليثى: صفى المشهد
د / هدى عبد الناصر: لا مش عايزة مؤلم بلاش يعنى إعفينى
صور للرئيس عبد الناصر مع أسرته تصاحبها موسيقى حزينة
السيدة/ منى عبد الناصر: أنا فاكرة وهو نازل من البيت يعنى زى أى واحد رايح يقابل ربه شايلينه يعنى زى كل الناس هو النهاية انت رئيس وللا هتقابل ربك نازلين به السلالم وبعدين حطوه فى العربية وراحوا به قصر القبة.
مشهد لجنازة الرئيس عبد الناصر
الرئيس السادات يذيع نبأ الوفاة: فقدت الجمهورية العربية المتحدة وفقدت الأمة العربية وفقدت الإنسانية كلها رجلاً من أغلى الرجال رجلا من أغلى الرجال وأشجع الرجال وأخلص الرجال هو الرئيس جمال عبد الناصر
السيدة/ منى عبد الناصر: ونزلوا اخواتى تحت ودفنوه لإن احنا كان لازم نعمل زى ما الإسلام بيقول.
موسيقى حزينة وعرض صور لجنازة الرئيس عبد الناصر
عمرو الليثي: كان هذا بعض ما قدمناه خلال عام 2010 .. في الحلقة القادمة إن شاء الله نواصل معكم تقديم المزيد مما قدمناه في اختراق هذا العام المنصرم .. وتابعونا في الحلقة القادمة إن شاء الله..