احمد عفيفي يكتب : « دريم » وزير إعلامهم .. و « دريمنا »!!

دريم لو نطقناها بالانجليزي يعني حلم .. ولمّا احمد بهجت انشأ هذه القناة كان حلم حياته انها تكون قناة فضائية توصل للناس الغلبانة الشقيانة وتعبر عنهم ويشوفوها ببلاش من غير تشفير ولا يحزنون .. وهى أول قناة فضائية مصرية على ما أظن .. وكانت ماشية حلو في بداياتها وكانت هالة سرحان عاملة فيها شغل مش وحش ابدا .. وشوية شوية دخل ابراهيم عيسى ببرنامجه التحفة " على القهوة " وبعدين ألف رحمة ونور عليه مجدي مهنا ببرنامجه " في الممنوع " وجات منى الشاذلي في " العاشرة مساء " .. ومش عارف مين استضاف هيكل مرة ، فكانت فرصة للنظام القديم الجديد انه يقرص احمد بهجت قرصة جابت دم .

قرصة حرة غير مباشرة بلغة أهل الكورة .. يعني بدل مايقوله ايه اللي بيقولوا عيسى في قهوته .. ومين قال لفلانة تستضيف هيكل .. قام ضربه في البيزنس بتاعه .. ومفيش حاجة تكسر اى رجل أعمال غير انك تضربه في مقتل وتعاكسه في اكل عيشه وعيش ملايين بتشتغل معاه وبتاكل من وراه .. وغصب عنه احمد بهجت كلم الناس اللي معاه : بلاش الضرب في العلالي .. وبلاش الضرب تحت الحزام .. احنا مش قد مبارك وابنه والعادلي وشلته .. فمشيت هالة سرحان وقفل ابراهيم عيسى القهوة بتاعته .. ومات مجدي مهنا غير نادم على حياة قذرة لا تستحق ان نحياها راضيين بقذارتها وقذارة نظامها الوسخ.

وقامت الثورة .. اى والله العظيم كان فيه ثورة بجد قامت في 25 يناير 2011 .. بالأمارة حتى كانت بدأت في ميدان التحرير وكان فيها ناس زي الورد البلدي بريحته اللي تجنن .. وعشان افكركم لو كنتوا نسيتوا ، كان فيها ضرب نار وخراطيش وخراطيم ميه اقوى من المدافع ومات فيها ناس كتير .. وربنا كتب لها في الأخر النجاح .. وغار مبارك .. بس مين اللي جه ؟ .. سي مرسي .. وغار العادلي .. بس مين اللي جه ؟ .. سي ابراهيم .. وغار انس الفقي وزير الاعلام .. بس مين اللي جه؟ .. سي صلاح عبد المقصود .. ونقول كمان.. راح مبارك وجه الأسوأ منه .. وراح العادلي وجه تلميذه .. وراح الفقي وجه واحد " أنيل " بمراحل.. كبيره كان يبقى محرر محافظات في اى جريدة تحت السلم .. قام بقدرة قادر بقى وزير للإعلام .. وبيأمر وينهى ويقول لك مين يبث ومين مايبثش .. كان زمان من سنتين الا شوية انس الفقي وزير إعلام معفن .. بس كان عنده مخ بقرشين تلاتة .. دلوقتي وزير اعلام ميعرفش اى حاجة .. وكل اللي يعرفه عن المخ .. لمّا ياكله في سندوتش من عربية عم محمد اللي جنب سينما بيجال في عماد الدين.

امبارح .. مفيش سيرة في اى برنامج توك شو الا حكاية اغلاق قناة دريم .. وطبعا عم البيه الوزير لازم يتكلم ويقول لنا ليه قفلها.. سىء على يساله " بحنية " في المحور ويسمع كلامه دون مناقشة .. وزي الاهبل عايز منه تصريح وانفراد صحفي لبرنامجه مين رئيس الاذاعة والتليفزيون اللي جي .. يساله بضحكة بلهاء عاملة مع صلعته " لوك " محصلش .. وكأن اللي قاله الوزير عن حكاية دريم كلام مقنع ويدخل دماغ عيل صغير .. في المقابل الاقي خيري رمضان في " ممكن " - مع ان الاتنين هو وسىء على اسوأ من بعض - .. بس خيري انصح حبتين .. اتخانق مع الوزير على الهوا وهو مش مقتنع بكلمة واحدة قالها سيادته مبررا إغلاق القناة.


بس اللي لفت نظري في الحدوتة الوسخة دي ان الوزير عبد المقصود خلاني افتكر المأسوف على شبابها اللي اسمها حياة الدرديري اللي كانت في قناة الفراعين مع المأسوف على شبابه هو كمان توفيق عكاشة .. حيث كانت حلقاتها كلها تكرر فيها اسم الإعلامي الملهم سيادة الدكتور اللي الدكتوراه بتاعته من امريكا السيد المبجل المحترم زيادة عن اللزوم توفيق عكاشة .. كانت تكرر هذه الجملة المضحكة المملة يجي 200 مرة في الحلقة الواحدة .. وسي عبد المقصود افندي وزير الاعلام بمناسبة ومن غير مناسبة يكرر : سيادة الرئيس الدكتور محمد مرسي .. الرئيس المنتخب اللي جه بإرادة حرة وانتخابات نزيهة بنت خالتي شريفة .. ياعم انا بسألك عن دريم .. اش دخّل الدكتور مرسي في الموضوع .. فيرد : الرئيس اللي عايز يجيب حق الشعب المصري اللي داق المر من عهد مبارك .. الرئيس اللي بيحارب الفسدة والفاسدين .. وعلى طريقة الكتاتني بتاع مجلس الشعب قبل ما يتقلش : محدش يزايد علينا.

احنا سفينا التراب ايام مبارك وحان الوقت لجني الثمار والحصاد المنجاوي .. ومن النهارده مفيش حرية .. مفيش ديمقراطية .... مفيش دريم .. مفيش أحلام وردية .. دلوقتي شعارنا في المرحلة الجديدة وشك في الحيط وقفاك ليا .. ده انا - ولسه الوزير بيتكلم - ماكنتش احلم ابقى بياع لبن في بلدنا .. اقوم الاقي نفسي وزير للإعلام مرة واحدة .. طيب حطوا نفسكوا مكاني .. واحد في حالتي .. ايه اللي ممكن يعمله غير انه ينفذ الأوامر اللي بتجيله من الاتحادية ومن عند العريان ومن عند الشاطر .. أمال انا وزير إعلام ليه .. مش عشان اُعلمكم " من الإعلام " باللي الناس اللي فوق راسنا عايزينه .


ماهما لو لقوني مش مؤدب ومش بسمع الكلام حيجيبوني وزير ليه .. وانا اساسا شكلي كده اسرح بجاموسة في سوق التلات .. عشان كده وم الاخر وعشان محدش يوجع راسي ونلت ونعجن كتير في الكلام .. نداء من وزير إعلام المرشد والرئيس مرسي الاخواني الى جميع الإعلاميين في بر مصر المحروسة .. في الفضائيات والصحف والمجلات الورقية والالكترونية .. اللي مش حيلم لسانه جوا بقه ويتخرس خالص .. فعندنا بدل الكارت مليون كارت .. نقدر نطلّعه وقت اللزوم.. نعاكسه ونحاربه في رزقه ونطلع ميتين ام اللي خلفوا اهله .. والمثل بيقول امشي عدل يحتار عدوك فيك .

واحنا وبقولها م الأخر برضه اعداء الشعب المصري .. اللي بيحلم ونفسه ياحبة عين امه في شوية حرية وشوية هوا نضيف .. معندناش .. كان فيه منه وخلص .. دلوقتي عندنا العين الحمرا .. والضرب بالشبشب بالقانون وبالدين .. واللي مش عاجبه الباب يفوت جمل .. وياريت تسرحوا وتغوروا بعيد عن وشنا ياللي عاملين فيها مثقفين وفاهمين .. احنا مش عايزين في مصر غير الغلابة الاميين .. اللي نفرّق عليهم سمن وسكر وزيت ينبسطوا ويزأططوا .. ولو قلنا لهم قال الله وقال الرسول يردوا ويقولوا امين.