كورة كولا

1- شخصان يشاهدان لقطة لبعض لاعبي المنتخب يسجدون بعد انتهاء ماتش الجزائر..
شخص 1: مش ملاحظ إن شيكابالا هو اللعيب الوحيد اللي مابيسجدش معاهم؟
صوت: الأهلاوية بيشجعوا مصر وإحنا معاهم.
2- شخص أنيق جدا يجلس علي كرسي المكتب وساقاه لا تلمسان الأرض، يتابع لقطة تركز فيها الكاميرا علي جدو، يمسك الموبايل ويتصل بشخص ما.
شخص1: باقولك إيه هاتلي اسم جدو الرباعي.. أنا قررت نرشحه في إسكندرية.. هينزل في الدايرة بتاعة هشام طلعت مصطفي.
صوت: أحمد عز بيشجع مصر وإحنا معاه.
3- شخص أمامه آلة حاسبة ضخمة من التي يستخدمها موظف الكاشير في كارفور، يتابع بانفعال شديد الفرص السهلة التي يهدرها متعب كل دقيقة.
الشخص: يا تييت.. تيييت.. ده إنت هيطلع تييت تيييت
صوت: بطرس غالي بيشجع مصر وإحنا معاه.
4- شخص يدخن سيجارًا ويفنط أوراق الكوتشينة وحوله ثلاثة يجلسون بالملابس الداخلية وقد تكدست أمامه علي المنضدة كل ملابسهم وأموالهم، يكادون يموتون بردًا، بينما حسني عبد ربه علي وشك أن يلعب ضربة الجزاء، ينظر إلي أصدقائه بتحدٍ.
الشخص: أنا هانزل ب200 جنيه علي البلانتي ده إنه هيضيع، مين هينزل قصادي؟
الثلاثة ينظرون له ببلاهة.
صوت: نائب القمار بيشجع مصر وإحنا معاه.
5- شخص وحوله مجموعة من الصعايدة يتابعون المباراة، الشخص ينزعج بشدة مع كل هدف يدخل في الجزائر ويبلغ توتره مداه مع الهدف الرابع فيقف صارخًا.
الشخص: مش معقول اللي بيحصل ده، أنا بكره هاقدم استجواب أطلب فيه فتح المنافذ أمام الجزائريين.
صوت: مصطفي بكري بيشجع مصر وإحنا معاه.
6- شخص يرتدي مريلة الحلاق والأخير يصبغ له شعره بينما يشاهدان ماتش الجزائر، بنهاية الماتش يشرد قليلا.
الحلاق: بتفكر في إيه حضرتك؟
الشخص: بافكر آخد خطيبتي ونروح نحضر النهائي في الاستاد.
صوت: رئيس الوزراء بيشجع مصر وإحنا معاه.
7- شخص له هيبة قوية يجلس في مكان غامض يشاهد المباراة، يتابع لقطة للحكم وهو يتغاضي عن احتساب ضربة جزاء صحيحة لمصر، يدقق النظر في الحكم ثم يرفع سماعة التليفون المجاور له.
الشخص: أنا عايزكو تحطوا لي سماعات الحكام دي تحت المراقبة.
صوت: وزير الداخلية بيشجع مصر وإحنا معاه.
8- أشخاص يفترشون العراء وهم ملتحفون بالبطاطين ويتابعون ماتش الجزائر علي تليفزيون يستمد الكهرباء من بطارية جرار زراعي، يشعرون بتعاطف ما مع الجزائريين بعد أن دخل فيهم الهدف الرابع.
شخص: تصدقوا يا جماعة إن المخرات بتاعة ربنا فيها رحمة عن المخرات بتاعة حسن شحاتة.
صوت: ضحايا السيول بيشجعوا مصر وإحنا معاهم.
9- أشخاص عيونهم ضيقة للغاية يتابعون ماتش مصر والكاميرون، يتابعون بتركيز حسن شحاتة، الكاميرا علي شحاتة يتمتم بجملة ما، شخص منهم يصرخ فيهم.
شخص: أوكيه يا أولاد.. فوانيس رمضان اللي هننزل بيها السنة دي بتقول جملة واحدة بصوت شحاتة (يارب.. ياحبيبي يا رسول الله)
صوت: الصينيون بيشجعوا مصر وإحنا معاهم.
10- أشخاص بهم مسحة من الوقار يتابعون حسن شحاتة وهو يستغيث أمام الملايين بالرسول..
شخص: كويس إننا عملنا الانتخابات بتاعتنا والمنتخب مسافر، لو شحاتة هنا كان نجح باكتساح.
صوت: مكتب إرشاد الإخوان بيشجع مصر وإحنا معاه.