أحمد عمار يكتب: أحمد سبع الليل المصري

لون النيل..
أسمر خمري..
زي النيل..
مادد ومنفد أوصاله في كل مكان..
أحمد سبع الليل المصري
طيب.. طيبة فرع الجميزة المتدلي..
لجل يضلل على أحبابه..
أحمد سبع الليل الطيب..
قلبه بينبض عشق وحب..
يحضن نايه..
يعلا غناه:
"عشقك غية.. يا سمرا يا غالية"..
أحمد سبع الليل كان رافض..
إيده تكون..
إيد الظلم..
كانت إيد الظلم قوية..
كسرت نايه..
مات الطيب بين أحضان السمرا الغالية..
لكن..
أحمد سبع الليل مش ممكن يوم هيموت..
أحمد سبع الليل من تاني أكيد هيعود..
إيده هتصبح درع وحامي..
لكل إخوانه..
إيده تطبطب على أحبابه..
وكل أصحابه..
أحمد سبع الليل مش واحد..
أحمد سبع الليل ميت واحد..
لأ مليون..
إيدهم تمسك إيد إخوانهم..
تقطع إيد الظلم الجاثم..
فوق القلب..
أحمد سبع الليل المصري
فاهم.. عارف..
إن إخوانه..
خرجوا ينادوا بالحرية..
علشان خاطر عينه وعينهم..
علشان عين السمرا الغالية..
اللي بيعشق ضي عينيها..
بيدوب فيها..
أحمد سبع الليل هيغني..
ويمسك نايه..
يعزف لحنه الباقي الخالد..
يعلا الصوت..
أحمد سبع الليل مش ممكن يوم هيموت..