الفجر شَقْشَقْ يا قلبى اعشق واذكر إلهك.. خَلَق وأنشأ ■ ■ ■ قال: كونى.. كانت كراماتها بانت سَعِت وشِقْيت صلِّت وصامت ولا يوم علينا فى الحرب هانت والفجر شَقْشَقْ ■ ■ ■ الجسم ناحل جبل وساحل طول ما هى راحلة تلاقينى راحل يكتر عذابنا وتقولوا ساهِل دا الفجر شَقْشَقْ ■ ■ ■ راحل وراها دمعة وآهة ولا حد غيرى فى الليل رآها ولا حد قدِّى خده هواها والفجر شَقْشَقْ ■ ■ ■ ضاحْكة حزينة ضحكتها زينة حبيبتنا مهما ترازى فينا إدمانها عِشْقَ بنت اللذينا والفجر شَقْشَقْ ■ ■ ■ بيسرقوها وينهبوها.. وفلِّسوها.. وقلِّبُوها ومطلّع الكل دين أبوها والفجر شَقْشَقْ ■ ■ ■ ديابة تنهش وكلاب تقرقَشْ فى المحكمة برَّأوا اللى كَوَّش ويحبسوا اللى فاض بُه فَدَرْدَش والفجر شَقْشَقْ ■ ■ ■ وازّاى حبيبة وبينّا غريبة؟ وازّاى عليلة لكن طبيبة؟ مولودة علشان تكون نهيبة والفجر شَقْشَقْ ■ ■ ■ ساعات يشَقْشَقْ ساعات يزمزق ساعات يقول مانيش عارف ابْدأ لا ليكو صدق ولا ليكو مبدأ والفجر شَقْشَقْ ■ ■ ■ والفجر شَقْشَقْ يا قلبى اعْشَق واذْكُر إلهك خلق وأنشأ!!